1 Iyyo'aabi, «Moyanji Daawwiti ifike belto Abeseloomixxee yaada'ni oodha'nen» hiyyende iso'ni kulnde. 2 Moyanjikinna, «Belto ifikixxee yaade'een» hiyyendeexxa eettene barra loliink manni laqeemmaxxee, eettene barraxxe injifachchoxxi gammashsho loliinke manna duuchcha'ni yaaddote'ni jijjirende. 3 Eettenne barra'ninna lolakenaa'ni baaje shooke quushshi hiyye qachchi giddi'a e'yammake manjishsha ardikinna hangulli hiyye qachchi giddi'a e'ye. 4 Moyanjikinna alba ifika buqedheexxi, «Anke belto koo Abeseloom! Koo anke belto Abeseloomi! Koo anke belto! Aanne anke beltoo!» hiyya'ni hiiqqise oodhe.

5 Ookkoneechchi uduma Iyyo'abi moyanjinke minibaa e'yeexxi hiyyee qici: «Atixxa, labbaxxenna meyyaxxe atixxe ooseka, atixxe aruwwakanna atixxe shiixoxxe aruwwaxxa lubbo gatisemmaka manna duuchcha telcho insa'nee shookishsheten. 6 Atee jibbaakaara eetatton atee eeyyaakaara jibbitatton. Atike lolinke mannik ajajalluwwinna insa'neek loliink manni ati'a woyi fula'neebaaxxa kunnise telcho farri assiteetten. Techcho Abeseloomi hedhoti hedhee'naa no'o duuchchiingi renne mundeennelcho kaddeele ati gammaddattexxa telchixxe barra'ni uudennen. 7 Kexxe ta'a gadhi'a fuldettexxi atika manna jajjabeessi. Ati fula gophphottole kinni mitti manjinna atinni welti hedabaaxxa Duuchchi Woddike Goottik summinni kakataannen. Tinninna oosumma atixxenaa'ninni saffe telchi qico'ni ate'ni gelteexxe elobaaxxe yaane duuchchanaa'ni baaseexxa ko'o ate'ni geessissaan.» 8 Tennexxe moyanji ke'eexxi hulati qarqara ofo'le. Ardakeenna, «Moyanji hulati qaraqara ofo'le'een» hiyyende kulndee wodda ardi duuchchi moyanjiba'a dage.

Eettene yanna'n Isira'eeliki ardi duuchchi ifi ifike miniba'a baajemman. 9 Isira'eelike gosa gosake mini hado'ni ardi, «Moyanji naapha no'okixxe anganaa'ni no'oo fulche'een; Filisixeemitotixxe anganaa'ni no'oo anjireek isoten; tennexxee ta'a kinni Abeseloomixxe buutonaa'ni kexxeexxa bogi giddii'ni baaje me'edheen; 10 no'oo moye galchaaashsha hariirennek Abeseloomi kinni lolake'ni reyeedhen; moyanjo mayeeta hiissa gophine sammi hitinchii?» iitta hina'ni weli'anni weli moroma'nemman.

11 Moyanji Daawwitinna Isira'eelito weli'aanni weli haasoteexxa laqe; tennexxee eettenee qeese Saadooqinna Abiyataari'i ergeexxi Yihudaka akeekisanjuwwa hina'n qorro'a insa'nee ajajee qici, «Moyanjo gargaartineexxi isike moyetike minibaa illee iima hissatee mayee udumitine? 12 Ha'noo anke maalanna micco kaddineeke anke dayyuwwan; mayeeteta moyanjo hiissatee udu'mitineeke kaddine?» 13 Amaasa'ninna, ‹Atiqqa maala ankenna micco ankebaa? Ta'inaa'ni lubboti hexxete qico'ni Iyyo'aabixxe bakka'ni anke loliinke mannike ajajallo assa gophonnole Mageni anee shiyo tennenaa'ni saxxeexxa rakko ane'ni geessisoo› » hitine iso'ni kulle hiyye.

14 Isinna Yihudak ardi duuchchi isi'aa xuurameesa kadaasshsha asseen. Insa'nenna, «Atinna atik ardi duuchchi higge» hine iso'ni erga ergine.

15 Ookkoneechchi uduma moyanji higeexxi Yordaanoosi qico'n dage.

Konne wodda Yihudak manni moyanjo qophe'neexxi Yordaanosi'i foosastee Geligeela qico'ni dangeemman. 16 Ookkone wodda Baarhuriimik bogi manjo kadeeki Geeraki belti Biiniyaamichchi Saami Yihudake manninni welti hedheexxi moyanjo Daawwiti'i qophedho'aa rakee adadde dirre.✝ 17 Isinni weltinna mitte kuma Biiniyaamito, iitanni Sa'oolike mini hadiki ergaji Siiba tommenna onde labbaxxe oossenninna lame tomme ifike erganjuwwinni welti mitteba he'nemman. Ookkoneechchi uduma moyanji hedheebaa Yordaanoosi'a ranke adadde dirrine. 18 Moyanjiinka mini hado iyyedagateenna isi harsaaxxa duuchcha assatee wode'e foonfe.

Geeraki belti Saami Yordaanoosii'i foofe; isinna moyanjii edo albiki gonbisemeexxi; 19 Hiyyee qici, «Anki gootti balleessa anxa laakko'oqqe'e; moyanjo anke gootta Iyyerusaalemii'n fuldettexxa barra balleessendaxxa balleessa ani'a waali; halo abixxitoxxee. 20 Ani atik erganji cubbo hujeennexxa ege'neennexee; telcho kinni gootta anka moyanjo qophedhonna'a Yooseefike mini hidi duuchchanaa'ni taakake kadee kunni dageennen.»

21 Ookkoneechchi uduma Tsuriyak belti Abisa, «Saami Duuchchi Woddik Gootti hariireka yowweemmaxxee reyo isi'a hasisabaa?» hiyye.

22 Daawwitinna, «Ha'noo Tsuriyaxxe oose, ha'noonna anee maacho afensiisaa? Ha'noonna telcho ane'ni naaphake kaddine'een! Ayyetenna kadoole telcho Isira'eeli giddo manji reya hasissaa? Ani Isira'eeli'ni moyanjo kadeennexxa ege'nennexxe barrabaa?» hiyye hiisse. 23 Tennexxe moyanji Saami'i, «Rertaboxxen» hiyye kakate.

24 Sa'oolik belti Mefibosheetinna moyanjo qophedho'a adadde dirre. Moyanjikinna shorremeexxe yannanaa'ni ke'issee higeexxe barra qico lekka ifixanna anshedhebaan; areedakanna haaxxebaan; seemma ifixxanna borcedhemmabaan.✝ 25 Isinna moyanjik welti afematee Iyyerusaalemii'n dageexxa yanna moyanji, «Koo Mefibosheeti anxa duuka daga gophteelchi mayete?» hiyye laqe.

26 Isinna hiyyee qici, «Anke gootta moyanjo, ani erganji atik naafake kadeennaxxee, ‹Moyanjik welti me'onaa'a harrichcho anke'n gulufona'a› hiyyeenabaa. Kaddo malee erganji anki Siiba anee sobeen. 27 Goota anke moyanji edo anka atike erganjika summa balleesseen. Anke gootta moyanjo ati iimike erganjishsha kaddeettaxxee ate'ni fakkaate leelliteexxa assi. 28 Anke moyanjo anke annike mini hadi duuchchi'a sila reyote hasissamman; ati kinni erganjo atika anee indaaxxe qore bira ofo'lishsheten. Konneechchi iima ani'a assendowwaal hiyyee moyanjo laqonna'a maa seera afeene?»

29 Moyanjikinna isoo, «Mayee haaso'aa bira sa'isitaatte? Atinna Siiba fichcha duuchcha qoodendinaasha ani ajajeennen» hiyye.

30 Mefibosheetinna moyanjo, «Moyanjo anke goottaa fichcha duuchcha Siiba adhdhowwaal; ani'a ati nage'iki mine atike'ni higiyyo calli ani'a geltaan» hiyye.

31 Iittanni Gele'adichchi Baarizilayi moyanjo qoqqobeexxi Yordaanoosika galaana foofatee'e Roogiliimii'ni adadde dirre dage;✝ 32 Ookkone wodda Baarizilaayi Saddeeta tomme wogake geerchomman. Isinna yo'oshsha duroomeemmake manjomman; moyanji Mahinayimi hedhemma wodda itaachcho isi'a iyyedageemman. 33 Moyanjikinna Baarizilaayi'i, «Atinna aninni welti fooffe Iyyerusaalemi'i aninni welti hedhi; ani ati'a ittattolcho uwwannon» hiyye.

34 Baarizilayi kinni moyanjokee hiyye hiisee qici, «Moyanjiki welti Iyyerusaalemi'a me'aannek haba hexxeexxe wogga'a hiyyeete? 35 Ani ta'a saddeeta tomme woggake geerchon; yoona ani eloxxanna elobaaxxa foye ege'na'noggee? Ta'inni edi'a atiki erganji itaachchonna kaddo ha'waachcho anja isixxa gargar hiissa dande'anno? Mansha anxinna labbakikanna meyyaxxike sirbika hafuura laqa dande'anoggeta? Yoona erganji atik moyanjo anke gootti'a mayeeta higgeenni ba'ote kadanno? 36 Erganji atiki Yordaanoosii'i foofee moyanjik welti shiixxo qico me'annon; yaane kinni moyanji konne qicinni ani'a uwwa uwwa'neeki mayeete? 37 Ani anigge qachcha'ni reye anke annikenna anxe amake hirreessi bira moogemannoshsha erganjo atika anee hige me'onaa'a eeti'i ani'a uwwi. Yaane kinni erganji atik Ke'ami moyanjo anke goottinna welti foofowwaal. Ati eetettexxa ani'a assi.»

38 Moyanjikinna, «Keme'aami aninni welti foofan ati eetattexxa yaane duuchcha isi'a assannon. Atinna anenaa'ni hassaattexxa feetenxa yaane ati'aanna assannon» hiyye. 39 Tennexxe ardi duuchchi Yordaanoosii'i foofe, ookkoneechchi uduma moyanjikinna foofe. Moyanjikinna Baarizilaayii'i sunqedheexxi eebbiseen, Baarizilaayinna ifike miniba'a hige.

40 Moyajikinna Geligeela'a me'ee wodda, Keme'aami isinni welti me'e. Yihudak loliinka manni duuchchinna ittanni Isira'eelike loliinke mannik gamisi moyanjo qoqqonbeexxi foossine. 41 Illee iima Isira'eelik ardi duuchchi moyanjinbaa dageexxi, «Dayyuwwi no'oki Yihudak manni moyanjo sho'ne insa'ne qofiti adhdhine isoonna isika mini hado isixxa duuka me'ammakeerinni welti Yordaanoosi'i mayee foossine?» hine.

42 Yihudak manni duuchchi Isira'eelike manni'a, «No'o tenne assineenelchi moyanji no'o'a firunteti shiqaammaxxeeten; tinni ha'noo mufachchiissaaxe'e? No'o moyanjokenaa'ni adhdhine indeneelchi hedhee? No'o ifi'a adhdhinenelchi hedhee?» hine.

43 Ookkoneechchi uduma Isira'eelik manni Yihudake manni'a, «No'oqqa monyajokena'n tomme anga qoobo anfeenne; tenne'ni hana no'o Daawwitii'i harsitina'nee irra no'o isoo harsinaannen; yoona ha'noo no'oo tuffatinlchi mayeetee? Moyanji no'oki higaashsha edinsenexxi lanqeenneki no'otebaa?» hine.

Yaane kinni Yihudik manni uwweek hiissichchi Isiraleeki manni uwweeke hiissichchi irra yo'oshsha jabakemman.