1 Daawwitikenna Sa'oolike minni hadixxe oddo'ni hedhemmak loli qeerraxxa yanna adhdhe. Daawwiti jabaata'ni me'aa wodda Sa'ooliki mini hadi kinni gopha'ni me'e.

2 Daawwiti Kebirooni hedhemma wodda jaane labbaaxxa oose i'le; angafi belti Iyyizira'eelichcho Ahino'aaminaa'n illeeki Aminooni, 3 Langaki Qermeeloosichcho Naabaalixxi are Abigeeli ildeeki Kili'aabi, sakkaki Geshuurika moyanjo Telmayixxi belto Ma'ika iledeek Abeseloomi, 4 Sholgaki Hagiitinaani ilde'ek Adooniya, ondiba Abixaali ildee'ek Sefaaxiya, 5 Jiyaki Daawwitixxi are Egila ildeek Yutire'aamitemman; kunniir Daawwiti Kebirooni hedhemma wodda isi'a ilendeexxeeramman.

6 Sa'oolik minninna Daawwitiki mini lolake kadaamma wodda Abeneeri Sa'oolike mine'ni midditte alfa'ni me'e.

7 Sa'oolinna Iyyoheelixxa belto Ritsifa hiyyendaaxxa jaalo are afeemman; Iyyabusittenna Abeneeri'i, «Mayeete anke annixxe shiixxooxxe arenne welti diiphettek?» hiyye.

8 Abeneerinna Iyyaabusitte hiyyeeke hiyyichcho'ni lumoshsha mufatemmaxxi hiyyee qici, «Anee Yihuda'a ergatemannoke wolcho assitette? Ani anna atike Sa'oolike mini'a isike dayyuwwi'anna fira isike'e addatensha anxa telchi qico'ni waaleebo'non; aninna atee Daawwitixxe anga'ni sa'isse uwwebo'non; ta'a kinni ati tenne man'jichcho'n assennexxe yaanexxee anee ku'litatto? 9 Duuchchi Woddik Gootti Daawwiti'a kakoti uwweemmaxxa eettenee addachchiisa muuxendaashsha assebe'nok gatoonole Mageni Abeneeri'n fuggoxxa assowwaal; eettenenaa'ninna caldaaxxa iso'n iiyyedagowwaal. 10 Dada Duuchchik Gootti mootumma Sa'oolike mininaa'n adheexxi Daawwitixxa moote Isira'eeli'ninna Yihuda'n, Daani'n Bersaabeehi qico'n ofo'lishatee addachchiisati isi'a aageemmaxxa kako muuxendaashsha ani Daawwitii'i kipha gophonnole Mageni anee uudo!»✝ 11 Iyyabusittenna Abeneerii'i yo'oshsha sodateemmaxxee hiissee mitelchonna midde hiissa dande'ebaan.

12 Ookko'ninna Abeneeri Daawwiti'a hiyyee qici, «Konne bogi galchalli ayyete? Aninni welti weli aagottole yoona Isira'eeliki ardi duuchchi atiba'a higaashsha ani atee gargaarannon» hine Daawwiti'a kullaashsha erganjuwwa erge.

13 Daawwitinna «Kadduun eloxxen, atinni welti weli aangannon; yaanee kinni atenaa'ni mitte yaane hasaannen; tinninna ati aniba'a daggatto wodda edisse Sa'oolixxa belto Melkooli'i aaxxe daggattoshshaten; iita kada gophphoole kinni aniba'a daggoxxee» hiyye. 14 Ookkoneechchi uduma Daawwitinna hiyyee qici, «Dhibba Filisixeemitotike manna yakkate araarsedhennaxxa are anxa Melkoolii'i ani'a uwwi» hiyya'nee Sa'oolike belto Iyyaabusittebaa erga erge.✝ 15 Tennexxe Iyyaabusitte mitte manjo ergeexxi, Milikooli heerundemmake aro'o iseke Leessake belto Feelixi'eeli hundii'ni fulchine. 16 Aro'i iseki Paalixi'eelim Baahuriimke qachchi qico'ni oodha'ni duuka isexxa me'e; yaane kinn Abeneeri, «Gelteen! Yoona mini atikibaa higi» hiyye. Tennexxe isinna hige.

17 Abeneeri Isira'eelixxe geedhuwwanni welti mari'ate hiyyee qici, «Konneechchinni edo Daawwiti ha'nooke moyanjo kado'a yortine'emman; 18 Duuchchi Woddik Gootti Daawwiti'a ‹Erganji anki Daawwiti arda anka Isira'eeli Filisixeemitotixxe anganaa'ninna insa'neke naaphuwwixxe anganaa'ni anjirannon› hiyyee addachchiisemmaxxee tennee ta'a tennee asse.» 19 Iittanni Abeneeri Biiniyaamitotee ifi'aanni mareexxi tenneenni insa'ne'ni kule; ookkoneechchi uduma Isira'eelinna Biiniyamito duuchcha assate'e hanseexxa duuchcha Daawwiti'ni kulo'a Kebirooni'a me'e.

20 Abineerinna lame tomme manninni welti Daawwiti hedhemmabaa Kebirooni'a dage; Daawwitinna Abeneeri'anna isinni welti hedheeke manni'a jila jile. 21 Ookkoneechchi uduma Abeneeri Daawwitii'i, «Atinni welti kako aango'a godobi atiki yoremmashsha duuchcha galchitotta'a rake marennexxi ate gootta anke moyanji'a Isira'eelika arda duuchcha bukki asso» hiyye. Tennexxee Daawwiti Abneeri geegeesse; isinna nage'iki me'e.

22 Daawwitiki manninna Iyyo'aabi eettene yanna'ni heddo booji'o booji'eexxi duulokenaa'ni hinge. Abeneeri kinni Daawwiti nage'iki geegesse'naa me'eemmaxxee Kebirooni'ni hedhemmabaan. 23 Iyyo'aabi isinni welti hedhemmaki sannachchi duuchchi welti ookko'o geye; isinna Nerik belti Abeneeri moyanjiinbaa degeexxa moyanji geeggeessexxanna isi nage'ik me'eexxa laqe.

24 Tennexxe Iyyo'aabi moyanjii mine'ni e'yeexxi hiyyee qici, «Tinni assitettexxi yaane maachcho? Kunnisse Abeneeri atiba dageexxi nage'iki me'o'aa waaldetteki mayeete? 25 Atinna Nerika belto Abeneeri egendeetten; isi atiba dageechchi atee geeqqishe, fula higa atixxa ege'no'aanna ati hujaatelcho duuchcha dooyyo'aaten.»

26 Ookkoneechchi uduma Iyyo'aabi Daawwiti birii'ni me'eexxi Abeneeri'i iyyedango'aa erge; erga maremmakiirinna Seeyirixxe wode'iinxe bale qarqarii'n isoo hiissine. Daawwiti kinni tennee ege'neemmabaan. 27 Abeneerinna Kebirooni'a higee wodda Iyyo'aabi qofiba iso'n hasessa'nechcho fakkeesse wirri asse dalla'iinxe hulabaa iso'o aadhee me'e; ookkona isika dayyo Asaheelika guma hiissatee godoba oteexxi shiye. 28 Daawwitinna tenne yaane udumii'ni laqeexxi hiyyee qici, «Aninni kadi mootumma giddik ardi Nerike belto Abeneerixxe mundexxee balleessa no'oni hexxebaaxxa Duuchchi Woddik Gootti ege'ne'een. 29 Tinni isixxi munde Iyyo'aabi'ninna anni isikika mini hado duuchcha daafowwaal; coxxoti dhukkubi yookaan elobaaki mundiinki dhukuba afeeki, kooko'ichchi, yookaan wolaantichchake'ni reyaaki yookaan itaachcho gophe solo'waaki Iyyo'abike minenaa'ni gophemoqqe'e» hiyye.

30 Abeneeri Gaba'oo'ni kademmake lola'ni Iyyo'aabikanna Abisayika dayyo Asaheeli shiyemmaxxee insa'nenna Abeneeri shinne.

31 Ookkoneechchi uduma Daawwiti Iyyo'aabinna isinni welti hedhemmaka arda duuchcha, «Seemma ha'noxxa dartine dooniyya odo'witine'e Abeneeri'a oodhdhe» hiyye. Moyanji Daawwiti umi isinge'ni mooggo mare. 32 Insa'nenna Abeneeri'i Kebirooni moonge; ookkone moogo'ni moyanji Daawwitinna lumoshsha hiiqise oodhdhe; ardi duuchchinna iittanni oodhe.

33 Moyanji Daawwiti Abeneeri'a hiyya'ni boochchissinaa'ni hitinaa qici:

«Abeneeri mayee gowwi manjixxa reyo reye?

34 Anga atixxi usurendemabaan;

Lekka tinna haachchabiki takalendeemmabaan;

manji fuggaaleeyyetixxe anga'ni ibammashsha;

Atinna iittani ibbe rertette!»

Ardi duuchchinna hiiggen isi'a oodhe.

35 Ookkoneechchi uduma Ardi duuchchi ita itamaxxa yanna Daawwitiba dangeexxi ita iti hinaa'ni jaba qicinni kadhante. Daawwiti kinni, «Telcho arishsho aaga qico'ni midha yookaan weleechcho afo'o anke'ni maqonnole tinni kaddeexxi ane'n kaddo'a; wele caala Mageni ane'ni iyyedagoo!» hiyye kakate. 36 Ardi duuchchi tenne hubateexxi gammade; dhugaandinni moyanji Daawwiti asseexxi yaane duuchchi arda gammachchiisse. 37 Tennexxee eettene barra'ni ardi duuchchinna Isira'eeliki ardi duuchchi moyanji Daawwiti Nerika belto Abeneeri'i shilchiisebaaxxa ege'ne.

38 Ookkoneechchi uduma moyanji Daawwitinna isik jalqabuwwi'a hiyyee qici: «Telchixxe barra'ni Isira'eelinaa'ni akeekisanjinna ja'laabi reyeexxa egendineeba? 39 Mageni anee telcho fi'le hariireeke moyanjo kadonnolenna midde ani gophaaleessa manjon; tinni Tsuriyaxxi oose lumoshsha elobaaxxenni ane'ni kexxe'een. Duuchchi Woddik Gootti fuggoxxa hujaakee huje isixxishshaanni uwwowwaal» hiyye.