1 Moyanji Daawwiti cime gopha'ni dagee ejja buyyinsoolenna midde eeba'emaba'a. 2 Tennexxee isik erganjuwwi iso'o, «No'oke moyanji'a ergatendaaxxi dubarcho hasenduun; isenna gootta no'oke moyanji'a ergatenduun; bira diiphphe iso'o eebishshuun» hine.

3 Ookkoneechchi uduma Isira'eelike boga duuchcha'n dancha dubarrichcho hanseexxi Sunemichcho Abishaagii'i anfe; moyanjiinba'anna isee aa'ne dange. 4 Tinni dubarrichchonna yo'oshsha danchatemman; moyanjokeenna ergatenda'ni gargaarta'nemman; moyanji kinna isee tuqebaan.

5 Eettene yanna'n Hagiiti ildemmak Adooniyaasi, «Ani moyanjoke kadannon» hiyye ke'e; tennexxee sarageelluwwanna iittanni isi edo me'aaka onde tomme manna qophpheesse. 6 Anni isikinna, «Maye'e ati iitta assitaatte?» hiyye iso'n ke'e ege'neba'a, Adooniyaasinna yo'oshsha danchakenna Abeseloomike maa'namman.✝

7 Adooniyaasi Tsuriyake belti Iyyo'abininna qeesichcho Abiyataarinn welti mari'atee insa'nenna isi'a baassine. 8 Yaane kinni qeesichchi Saadooqi, Yoodahek belti Bennayaasi, wabeek Naataani, Saami, Reesinna Daawwitik jajjabbi heqqanjuwwi Adooniyaasinni welti guddinebaani.

9 Adooniyaasi Enirogeeli bira hedheeke Zoheeletike* kinji bira gedhebo, korimoolenna ha'yaka jiboottuwwa tolche; dayyuwwa ifika duuchcha, moyanjiinxa labbaxxi oose, iittanni moyatike minike ja'laabuwwa kandemmaka Yihudaka manna duuchcha ye'e. 10 Kaddo malee'e Adooniyaasi wabeek Naataaninna kadi Bennayaasi, moyatike minika heqqanjuwwanna kadi dayyo ifika Solomoonii'i ye'eba'a.

11 Ookkoneechchi uduma Naataani Solomoonixxa ama Berissaabehi'i, «Gootti no'oki Daawwiti ege'nebaangi Hagiiti ildemmaki belti Adooniyaasi moyeexxa laqqeebexxoo?✝ 12 Ta'a ati ifixxanna belto attika Solomoonixxa lubbo hitta gatisa dandeettattoxxa ate'n kulo. 13 Moyanjo Daawwitibaa martettexxi iso'n, ‹Anke gootta moyanjo; belti atiki Solomooni anibaa uduma moyeexxi moote anxe'ni ofo'laani› hite'e, ‹Ani'a erganjo atixxee'e kakatteettabaa? Eega mayeeta Adooniyaasi moyanjo kadeeki?› hite iso'ni kuli. 14 Ati ookko marte'e moyanjoke'n kuldatto wodda aninna dagennexxi ati hiteettexxi dhugaate kaddeexxa kokeessannon.»

15 Tennexxee Berissaabehi moyanjo yaanississo'a isixxe kuta giddi'a e'yite; moyanjikinna yo'oshsha cime'emman; Sunemichcho Abishaaginna isi'a ergatenda'emman. 16 Berissaabehinna butti'a heeshshi hiteexxi isi edo guluffatte.

Moyanjikinna isee, «Maa hassette?» hiyye isse qore.

17 Isenna iso'ni hitee qici, «Koo anke gootta ati ane'ni, ‹Belti anki Solomooni aniba uduma moyeexxi moote anixxe'n ofo'laani› hite'e ati umi atinginninni ane'e eriganjo atixxe'e dada duuchcha ajajaak Duuchchi Woddike Gootta atike Magenike summinni anee atixxe arganjo'a kakatte'etan. 18 Ta'a kunse Adooniyaasi moyo'aten; anke gootta moyanjoo ati kinni tenne yaane egende'ebexxon. 19 Isi heddo kormoole, ha'yo jibootuwwakanna gedhebo tolche'eeni; atixxa labbaxxa oose duuchchanna qeesichchi Abiyataarinna atike loliinke mannika ajajallo Iyyo'aabinna ye'edheeni; erganjo atika Solomoonii'i kinni ye'ebaan. 20 Koo anke gootta moyanjoo atibaa uduma gootta anke moyanjiinxe moote'n ayyi ofo'laaxxa ege'nishshota'a Isira'eeliki ardi duuchchi ate'e heqqedhate'n hedheeni. 21 Tennee assa gophphotole kinni gootti ank moyanji ati rertatto wodda aninna belti ank Solomooni, balleesanotishsha uudemmannoni.»

22 Isenna moyanjiki welti haaso'ande'n hexxe'na'a wabeek Naataani dage e'ye. 23 Moyanjoke'n wabeek Naataani dageexxa kulle; isinna moyanji edo shiqe'e butta wabbi hiyye.

24 Naataaninna moyanjo hiyyee qici, «Koo anke gootta moyanjoo, Adooniyaasi atibaa uduma ate'e moyanjiinxe moote'ni ofo'laan hite'etta? 25 Adooniyaasi techchixxe barra'n aade mareexxi heddo kormoole, ha'yo jibootuwwakanna gedhebo tolche'eeni; ate'e moyanjinxa labbaxxa oose duuchchanna atike loliinke mannika ajajallo Iyyo'aabinna qeesichcho Abiyataarinna ye'edheeni; kunse ta'a tennee, ‹Moyanjo Adooniyaasi qeerraaxxa wogga moyi› hina'n isinni welti ita ha'wate'n hedheeni. 26 Yaane kinn anee erganjo atika, qeesichcho Saadooqii, Yoodaheka belto Bennayaasinna erganjo atika Solomoonii'i ye'ebaa. 27 Egedhdhi, ate'n aaneexxi ate'e moyanjo ankixxe moote'ni ofolaaka atike erganjuwwa'n ege'nishshebexxong tinni iitta kaddaashsha ati eettii'i uuteete?»

28 Ookkoneechchi uduma moyanji Daawwiti, «Berissaabehi'i ani'a ye'we» hiyye. Isenna moyanji hedhemmaba'a marte isi edo uurrite. 29 Ookkoneechchi uduma moyanji hiyye kakatee qic, «Lubbo anxa rakko duuchchanaa'ni wode'eke hedhaake dada duuchcha ajajaak Duuchchi Woddike Goottixxa, 30 ‹Atik beliti Solomooni ani uduma moyani; anxa bakka moote anxe'n ofo'laan› hiyye. Isira'eelike dada duuchhca ajajaak Duuchchi Woddike Gootti Mageniinke summinni ati'a kakateennaxxa kako techcho dhugaaten muuxano.»

31 Berissaabehinna butta wabbi hite'e udma moyanji edo guluffatteexxi «Koo anke Gootti moyanji Daawwiti ati duuchchin woddi'a lubbo hedhi!» hite.

32 Moyanji Daawwitinna, «Qeesichcho Saadooqii, wabeeka Naataaniinna Yoodaheka belto Bennayaasii'i ani'a ye'we» hiyye. Insa'nenna moyanji edo shinqee wodda, 33 isinna insa'nee hiyyee qic, «Ha'nooke goottika erganjuwwa aaxxine me'itineexxi anka belto Solomooni'i anxe gaange'ni gulufissine'e Giiyooni'anna aaxine dirre. 34 Ookkoonna qeesichchi Saadooqinna wabeek Naataani isoo hariireexxi Isira'eeli'ni moyaashsha assinowwaal; malagatakanna ufuufina'n ‹Woyanji Solomooni duuchchin woddi'a moyowwaal!› hitina'n raarre. 35 Ookkoneechchi uduma Ha'no isixxa duuka iimi'a qabatte ookkoo'ni dageexxi moote anxe'ni ofo'lowwaal; anxe bakka'ninna galchowwaal; Isira'eeli'ninna Yihuda'ni galcho'a isoo'o fileennen.»

36 Yoodahek belti Bennayaasi moyanjoke'n hiyye hiisse haaso'e qici, «Kadduun! Moyanjo anke goottik dada duuchcha ajajaak Duuchchi Woddik Gootti Magen tenne'e muuxowwaal. 37 Dada duuchcha ajajaak Duuchchi Woddik Gootti, moyanjo anke goottinn welti hedhemmashshanni Solomoonininna hedhowwaal; moote isixxanna anka gootta moyanjo Daawwitixxe mootenaa'ni saxxeexxa assowwaal!»

38 Tennexxee qeesichchi Saadooqi, wabeek Naataani, Yoodahek belti Bennayaasi, Kelitotinna Felito dirne dangeexxi Solomooni'i moyanjo Daawwitixxe gaange'ni gulufinseexxi Giyooni'a aa'ne dange. 39 Qeesichchi Saadooqinna zayitetixxa buuda woyyichcha duunkaani giddii'ni aadheexxi Selomoni'i hariirre; ookkone wodda malagata ufuunfe; ardi duuchchinna, «Moyanji Solomooni duuchchi woddi'a hedhowwaal!» hiyya'ni cance. 40 Ardi duuchchinna suusu'le ufuufa'ninna yo'oshsha gammada'ni isoo'o elqe kayyii'ni qoqqonbe; insa'neeke cancinaa'n kexxeexxeninna buttin lele'me.

41 Adooniyaasinna isixxi keessumma duuchcha ita haleelendammaxxa yanna tenne'e lanqe; Iyyo'abinna malagati ufuufemaa wodda laqeexxi, «Kunni qachchi giddo laqema'neek hafuuri maachcho?» hiyye qore.

42 Iyyo'aabi haaso'ande'ni hedhee'na'a qeesichcho Abiyataarik belti Yoonataani dage; Adooniyaasinna isoo, «Atishsha hedheeki elok manji eloxxa odo laqebaak daga gophammaxxe'e e'yi» hiyye.

43 Yoonataaninna hiyye hiisse haaso'e qici, «Waawwo'o Eloxxa odo aadhe dagebo'non! No'ok gootti moyanji Daawwit Solomooni'i moyaashsha asse. 44 Moyanji Daawwiti qeesichcho Saadooqii'i, wabeek Naataanii'i, Yoodahek belto Bennayaasi, Kelitotinna Felito, isinni welti me'inaasha asse'een; insa'nenna iso'o moyanjiinxe gaange'ni gulufinse. 45 Qeesichchi Saadooqinna wabeek Naataani Giyoonixxe muummeba iso'o hariireexxi moyanjoke assine'en. Ookko'inna gammanda'n fulle; qachchikinna tenneenni gammashsho laqise; ha'nonna laqqine'eek hafuur konnenden. 46 Konneechchi gadho wele Solomooni galchatixxe moote'ni ofo'le'een. 47 Mootummatike minik ja'laabuwwi gootta no'okiba'a moyanjo Daawwitiba'a dageexxi ‹Magen atik Solomoonika summa atike summi irra gurra fuleeke, moote isixxinna atixxa moote caaldaaxxe assowwaal› hine eebbinse. Moyanjikinna ifixxe taqe'ni hedheexxi kumbu hiyye Mageno magenoofata'n, 48 ‹Techcho moote anxa dhaalaaka ille anxi uuddaashsha asseki Isira'eelik dada duuchcha ajajaak Duuchchi Woddik Gootti Magen saademowwaal› » hiyye.

49 Tennexxee Adooniyaasinna isi ye'emmaxxi keesumma duuchcha alaneexxi ke'ne ora ora'n xexxeeremme. 50 Adooniyaasi kinni Solomooni'i soodaateexxi mare tolchimalchiinka cunnichcho abixxe. 51 Ookkoneechchi uduma Solomooni'n, «Adooniyaasi kunse moyanjo Solomooni'i sodaateexxi tolchimalchinka cunnichcho abixeexxi, ‹Ane garbichcho ifika moyanji Solomoon wolaantichchik shiyabaashsha techchonni ani'a kakatowwaal› hiyye'een» hine iso'ni kulle.

52 Solomooninna, «Isi me'injo ifika giissedheexxe kaddoole isike umike ordichchonaa'ni mittikinna midde butta ibabaan; balleessa iso'ni afendoole kinni reyaan» hiyye hiise haaso'e. 53 Ookkoneechchinni uduma moyanji Solomooni manna ergee'na'a Adooniyaasii'i tolchimalchokenaa'ni dirrinse. Adooniyaasinna dageexxi moyanjo Solomooni'a heeshshi hiyye; Solomooninna isoo, «Kexxe ati mini'a me'i» hiyye.