1 Daawwiti reyaaxxi barra shiqqemmaxxe'e belto ifika Solomooni'i hiyye ajajee qici: 2 «Kunse ani manji duuchchi reyammashshanni aninna reyannoxxi yanna shiqqeen; yoona jabaati! Manjoke kadi. 3 Dada duuchcha ajajaak Duuchchi Woddike Gootta atike Magenika ajaja heqqedhi; assitattoxxi duuchchi ati'a qajeeldaashsha, Muuseke seera'n borreessendemmashshanni ora isike'ninna me'i; aada isixxanna seeruwwa isika ulfeesi; ajajuwwa isikanna galduma isika heqqedhi. 4 Dada duuchcha ajajaak Duuchchi Woddik Goottinna, ‹Horte atixxi me'injo iseka heqqexxoole, iittanni mitte godobininna hedho insa'neexxinni ani edo xuurameessummati mammaremoole, Isira'eelixxe moote'n ofo'laaka moyanjo horte atixxenaa'n ate'e gophisa bo'non› hiyye anee addachchisemmaka hiyyichcho ani'a muuxaani.

5 «Tsuriyak belti Iyyo'aabi ane'n asseexxa, iittanni Isira'eelike loliinke mannike ajajaluwwa'ni Nerike belto'n Abeneeri'ninna Yiiteerke belto'n Amaasa'n asseexxa atinni ifi'aani egendeetteni; loli hedhebaangi nage'iinxe yanna'n isi munde insa'neexxa dune'eeni; tennenaa'n kexxeexxa eettene dunnendeexxe munde'a isi qoremaan;✝ 6 Asiyyo hasissaaxxa afeteke beekkumini assi male'e cimeexxi nage'iki reyo'a waaliddoxxe.

7 «Dayyo atika Abeseloomi edii'n baajenna wodda eloxxa ani'a assineemmaxxe Gele'adichcho Baarizlaayixxe oose kinni qore atixxa itaake manninn welt indaake kandowwaal.✝

8 «Aninna Mahinayimi'a me'inaa wodda, hinabaaxxa hiyye ane'e badineek Baahuriimi hedhek Biiniyaamichchi Geeraki belti Saami, kunse ati bira hedheeni; ane qophphedho'a Yordaanoosike galaaniba dage'na'a ‹Wolaantichchiki ate shiyyabe'noni hiyyennexxi dada duuchcha ajajamak Duuchchi Woddike Goottike summinni kakateenneni›✝ 9 Ta'a kinni balleesa afebaake manjishsha assite iso uuddoxxe'e; beekake kaddettaxxe'e iso'n maa assiyyo hasissaaxxa atinni egenddetteni; cime nage'iki reyo'a waaldoxxe'e.»

10 Ookkoneechchi uduma Daawwiti re'eexxi edike ifike annuwwiba'a me'e; Daawwitike qachcha'ninna moogeme. 11 Daawwitinna Kebirooni'n torbaane wogga, Iyyerusaalemi'ni sase tommenna sase wogga, mitteba shoole tomme wogga Isira'eeli'ni moye.✝ 12 Tennexxee Solomooni anni ifikixxe Daawwitixxe moote'n ofo'le; mootumma isixxinna yo'oshsha jabaxxe kadde.

13 Eettene yanna Hagiiti ildeeki belti Adooniyaasi Solomoonixxa ama, Berissaabehiba mare; Bersabehinna, «Nage'ange'e daggette?» hite iso'o qorte.

Isinna, «Eeti, nage'anggeteni» hiyye hiise haaso'e. 14 Ookkoneechchi uduma ise'n, «Ate'n haaso'aannexxe yaane hexxeeni» hiyye.

Isenna, «Eloxxeni haaso'i» hite hiissite haasote.

15 Isinna ise'e, «Ani moyanjoke kaddiyyo hasissa'nan, Isira'eelik ardi duuchchi ani mowona'a ille ane'n ugge'emmaxxa ati umi atingeninni egendeetten; kaddo malee yaane dada duuchcha ajajaak Duuchchi Woddike Gootti darree'ni murendeexxe kaddemmaxxe'e yaane jijjirendeexxi, mootumma anke dayyixxe kadde. 16 Ta'anna mitte yaane atee'e kadhataannen anee'e hoyyexxoxxe'e» hiyye.

Isenna, «Haassoottaata» hite.

17 Isinna ise'e, «Moyanji Solomooni ati hitettexxa gibabaan Sunemichcho Abishaagii'i aadhona'a ani'a uwwo'a laqi» hiyye.✝

18 Berissaabehinna «Eloxxen, tenneen moyanjoke'ni ati'a kulannon» hite hiissite.

19 Tennexxee Berissaabeehi Adooniyaasixxa yaane iso'ni kuldo'a moyanjo Solomoonibaa marte; moyanji kinna ofo'leebaa'ni ke'e ise'e heeshshi hiyye nage'a aadhe ke'echchi uduma mootete'ni hige ofo'le; moyanji kinna ifixxe ama'a wele moote aadhiseexxi midda ifike'ni ofo'lishe.

20 Isenna isoo'o, «Ani atee'e kadhataannexxe mitte shiixxooxxe yaane hexxeen maganneten gibbe'e ane'e hoyyexxoxxe» hite.

Moyanji kinn, «Anxe amaa atee'e shookishabo'non; ane'ni kuli» hiyye ise'ni hiisse haaso'e.

21 Isenna, «Sunemichcho Abishaagii'i, atik dayyi Adooniyaasi aadheelena'a?» hite.

22 Moyanji Solomooninna ama ifixxe'n, «Mayee'e Sunemichcho Abishaagii calla Adooniyaasixxee laqqattota? Anke angafa dayyo kademmaxxe'e mootumatanna isi'a laqi; qeesichcho Abitaari'anna Tsuriyake belti, Iyyo'aabi isixxe gamon» hiyye hiisse haaso'e.

23 Ookko'neechchin uduma moyanji Solomooni, dada duuchcha ajajaak Duuchchi Woddike Goottike summinn hiyye kakateeqic, «Adooniyaasi tenne'e qoremmaxxe reyo iso'ni murema gophphoole Magen ane'ni murowwaali; tennee caaldaaxxanna ane'ni iyye dagowwaal. 24 Ta'anna ane'e jabeesseek, anna ankixxe Daawwitixxe moote'ni anee'e ofo'lisheekinna uwwemmaxxe addachiisashshanni tennee mootumma ani'anna anxe horte'a uwweeke hedhaake dada duuchcha ajajaak Duuchchi Woddike Goottixxa Adooniyaasi telchixxa bara shiyemaan!»

25 Tennexxee Adooniyaasi'i shiyemaasha Solomooni moyanji Yoodaheka belto Bennayaasii'i ajaje; Bennayaasinna Adooniyaasi'i gane shiye.

26 Moyanjkinna qeessichcho Abiyataarii'i, «Silaa shiyendatoke manjomman, yaane kinni dada duuchchike Duuchchi Woddike Goottika kakotika Taaboota, anna anke Daawwiti edo dulkite'etaxxe'e, anna ankixxa rakko duuchcha atinna welti qoodendettaxxe'e, ta'a ani atee'e shiyabo'non; Anatootike atike fichchiba me'i» hiyye.✝ 27 Tennexxee dada duuchcha ajajaak Duuchchi Woddik Gootti Eelike minixxe'e Seeloke booncho'ni haaso'emmake hiyyichcho muuxo'a Solomooni Abiyataari'i dada duuchcha ajajaak Duuchchi Woddike Goottixxe qeesoomanaa'ni hoyye.✝

28 Abeseloominni welti kadebaang Adooniyaasinni welti gudde'emmak Iyyo'aabinna tenne'e laqe wodda dada duuchcha ajajaak Duuchchi Woddike Goottike duukaana'n baajeexxi tolchimalchiinka cunnichcho abixxe. 29 Iyyo'aabi dada duuchcha ajajaak Duuchchi Woddike Goottike duunkaana'n baaje me'exxanna tolchimalchii bira hedheexxa moyanji Solomooni laqeexxe yannanaa'n Yoodaheka belto Bennayaasii'i, «Martettexxi iso'o shiyi!» hiyye ajaje. 30 Tennexxee Bennayaasi dada duuchcha ajajaak Duuchchi Woddike Goottike duunkaani giddi'a e'yeexxi Iyyo'aabi'i, «Moyanji ate'e, ‹Kabaa'ni fuli› hiyya'neen» hiyye.

Isinna «Fulabe'non, kabanni reyannon!» hiyye hiisse haaso'e.

Bennayaasinna, Iyyo'aabi ane'n haaso'eexxi hiissek hiyyichchi konneten hiyyeexxi moyanjoke'ni kule. 31 Moyanji kinna Bennayaasii'i hiyye ajajee qici, «Amo, hiyyemmashshanni assi; shiltenna iso'o mooge'e Iyyo'aabi tola boddichcha dhangalaaseexxe qullite mundenaa'ni aneenna anke annika mini hado fulchi. 32 Anni anki Daawwiti ege'nebaang Iyyo'aabi isonaa'n woyo'aaka lame qullichcha manna, Isira'eelike loliinke mannika ajajallo, Nerik belto Abeneerinna Yihudake loliinke mannika ajajallo Yiiteerka belto Amaasaa'a wolaantichchik shiyemmaxxe'e dada duuchcha ajajaak Duuchchi Woddik Gootti iso'n halo fulaan. 33 Konne shiyemmake mannixxi munde duuchchi woddi'a Iyyo'aabinna horte isixxa daafowwaal. Yaane kinni Daawwiti'inna sanne isixxe'ni, mini hado isike'ninna moote isixxe'n dada duuchcha ajajaak Duuchchi Woddike Goottik nage'i duuchchin woddi'a hedhowwaal.»

34 Tennexxee Yoodahek belti Bennayaasi alalle mareexxi Iyyo'aabelii'i gane shiye; isinna qiilla gammooje hedheeke ifike boga'n moogeme. 35 Moyanji kinni Iyyo'aabixxe bakka'ni Yoodaheka belto Bennayaasii'i loliinke mannike ajajallo asse; Abiyataarixxe bakka'ninna qeesichcho Saadooqii ugge.

36 Ookkoneechchi uduma moyanji Saamii'i ye'iseexxi hiyyee qici, «Iyyerusaalemi giddo mine ijaadhite ookko ofo'li; ookko'ni kinni haba'anna ma'itoxxe'e. 37 Yaane kinni ookko'ni fuldete'e Qediroonixxa dhooqa widi'a qaxxamurtatoxxa barra rertatoxxa ege'ni; atixxe munde'anna laqendattok atendeni.»

38 Saaminna moyanjoke'n, «Eloxxen, moyaji ank gootti hitettexxa ani garbichchi atik assannon» hiyye hiisse haaso'e. Isinna Iyyerusaalemi giddo heddo yaanna ofo'le. 39 Sase wogga uduma kinni lamiing Saamik erganjuwwi Ma'ikak labbak belti Akishi hine ye'naak Gaatike moyanjibaa baaaje; iikki Shime'iim erganjuwwi Geeti hedheexxa iso'n kulende. 40 Saami tenne'e laqeeshshanni harruwwa koodhdheexxi ifike erganjuwwika hasito Gaati hedheek moyanjo Akishibaa me'e; insa'neenna ookko'o afatee'e ifike minibaa wirri asse hiise.

41 Saami Iyyerusaalemi'ni Gaati mareexxi higeexxa Solomooni laqeexxa yanna, 42 Solomooni Saami'i ye'iseexxi hiyyee qici: «Weleba'a me'itattoxxa barra rertattoxxa ege'ni hiyye ani atee dada duuchcha ajajaak Duuchchi Woddike Goottike summinn kakachchiise'e, xexxe'achchiiseennabaa? Eettene yanna atinna, ‹Eloxxen, hitettexxa ajajemannon hitee'e ane'n hiissite haasoottettan› 43 Mayeeta, dada duuchcha ajajaak Duuchchi Woddike Goottike summinni kakattettaxxa kako heqqedha gophphette? Ani uwwe'enneka ajajanna mayee'e muuxa gibbette?»

44 Moyanjikinna hiisseexxi Saami'n hiyyee qici, «Anna anke Daawwiti'ni assitetexxa fuggoxxa yaane duuchcha godobi atingi ege'ne'een; tennexxee dada duuchcha ajajaak Duuchchi Woddik Gootti atixxa fuggo ate'n wirri assaan. 45 Anee Solomooni kinni eebbisemannon; Daawwitixxi moote dada duuchcha ajajaak Duuchchi Woddike Gootti edo duuchchi woddi'a jabaattee hexxaan.»

46 Ookkoneechchi uduma moyanji Yoodaheka belto Bennayaasii'i ajaje; Bennayaasinna fuleexxi Saami'i gane shiye.

Konnee qicin mootumma Solomoonixxi jaba qicinni anga isixxe'n jabaatte.