Taakkakaa Moyanjuwwiinkaa Maxaafa 12

Isira’el Roobi’ami’ni Fuggoxxin Ke’e

1 Isira’eeli duuchcha moosinso’a Sekemi’a me’inemmaxxe’e Roobi’aaminna ookko’an mare, 2 Naabaaxik belti Iyyorbi’aami tennee laqe wodda moyanjo Solomoonii’i baaje hedhammake Gibtseke bogibaa’ni hige dage. 3 Tennexxee Iyyorbi’aamibaa ergine isinna Isira’eelik haagani duuchchi Roobi’aamibaa dangeexxi, 4 «Anni atik no’o’ni jabaxxa ba’o ba’iseen, ati kinni ta’a anni atikixxa mararte affebaaxxa galcha no’o’ni ba’isemmaxxa jabaxxa ba’o shollishshottole ati’a hiremmannon» hine.

5 Roobi’aminna, «Yoona me’e, sase barra uduma anibaa’a higgine dagge» hiyye. Tennexxee ardikinna me’e.

6 Ookkoneechchi uduma Roobi’aami anni isik Solomoon lubboti hedhemma wodda ergatendammaxxe geedhet welti mari’ate; «Konne ardi’a hiissichcho uwwonna’a ha’no ane’e maa hitina’ne?» hiyye.

7 Insa’nenna, «Telcho ati konne ardi’a ergatendaatteke kaddottole, insa’ne’a ajajende gammachchiissaaxxa hiissa hiissitottole duuchchin wodda ati’a ergatemaake kandaan» hine.

8 Roobi’ami kinni geedhe gorsiteeka gorsa tuffateexxi hiri’a isixxe kaddexxanna isi’a ergatendammaxxa dargageeyyuwwa, 9 «Ha’no ane’e gorsitino’a affine’ek yaadi maachcho? ‹Anni atiki no’o’ni ba’iseexxa ba’o no’onaa’ni shollishi› hiyya’neeke konne manni’a maa hine hiissinanno» hiyye.

10 Dargaggeyyetinna hitee qici, « ‹Anni atiki jabaxxa ba’o no’o’ni ba’ise’en; ati kinni ba’o no’oxxa shollishi› hiyyeeke konne manni’a ‹Shuu’nichchi anki anike annike hidhi irra furdataan, 11 anni aniki jabaxxa ba’o ha’noo’ni fe’een; ani kinni isi caala saxxeexxe a’ursannon; anni anki halanget ha’no’o jadhafeen; ani kinn gaaddotishsha ha’no’o woxxaaxxe halangenn jadhafannon› insa’ne’a hiyyi!» hine.

12 Moyanji kinna, «Sakka baro higgine dagge» insa’ne’e hiyyemmaxxe’e; Iyyorbi’aaminna ardi duuchchi sakka baro Roobi’aamibaa hinge dange. 13 Moyanjinna geedhe uutemmaka gorsa waaleexxi, arda gammachchissabaaxxa hiissa hiisse. 14 Dargageeyye gorsitemmaka gorsa a’leexxi, «Anni anki qabbara ha’noo’ni ha’urse ani kinn isi caala qanbra ha’no’n ha’ursanon; anni anki halangeti ha’no’o jadhafeen, ani kinn gaaddotishsha ha’no idditaaxxe halangen ha’no’o jadhafannon» hiyye. 15 Dada duuchchik Duuchchi Woddik Gootti Seeloke bogike Akiya darree’ni Naabaaxike beltixxe’e Iyyorbi’aamixxee haaso’e edi darre dada duuchchik Duuchchi Woddik Gootti mureexxe kaddemmaxxe’e, silaa muuxa hassisammaxxe’e moyanji ardi hiyyeexxa laqebaan.

16 Isira’eel duuchcha moyanji insa’neeka yaada laqa gibeexxa insa’ne egenneexxi, moyanjoke hine hiissinee haasonee qici,

«No’o Daawwitii’ni maa qoobo anfeenne?

Isseyike beltonaa’ni maachcho alfinannochcho hedhee?

Tee Isira’eel, ifi ifinxe duunkaanbaa higi;

Koo Daawwiti yoona ifinga mine heqqedhe!» hine hiissine.

Tennexxee Isira’eelik ardi ifi ifinge duunkaanbaa hige.✝12:16 2 Sam. 20:1. 17 Roobi’aaminna Yihudake boga’ni hedha’neeke Isira’eelike arda’n moyanjo kade. 18 Moyanji Roobi’aami hunnatixxa huje hujammake mannike akeekisanjo kadeemmaka Adooniraamii’i erge; yaane kinni Isira’eelik ardi duuchchi kinjik cancaqe iso’o shiye. Moyanji Roobi’ami kinni kadeenxa kade fadhadiinxe gaare’n gulufe Iyyerusaalemi’a baaje. 19 Eettene yannanaa’ni saffe’e middi darrexxi kuta Isira’eeli hiyyende summa Daawwitixxe sanne’n jalleeshshanni hedheen.

20 Iyyorbi’aami higeexxa Isira’eelik ardi duuchchi laqee wodda, yaa’a insa’neekiba’a ye’inse Isira’eelike boga duuchcha’n iso’o moosinse. Daawwitike mini’a xuurameesummati jaabaate hexxeexxi Yihudaxxe gosa callan.

Shammaayya Haaso’eexxa Raaga

21 Roobi’ami Iyyerusaalemi’i geyee wodda Isira’eelixxi gosa lolide mootumma Solomoonike belto Roobi’aami’a hiissinaashsha Yihudaki minninna Biiniyaamixxa gosa bukki asse; sannachchi laakkoossinna mitte dhibbanna saddeeta tomme kumamman.

22 Yaane kinn Mageniink hiyyichchi Mageniinke manjo kade’eke Saamayabaa dageexxi: 23 «Yihudike moyanjo Solomoonike belto Roobi’aami’a, Yihudake mine duuchchi’anna Biiniyaamixxe gosa’a ittanni gateeke ardi duuchchi’a hitatto qici, 24 ‹Dad duuchchik Duuchchi Woddik Gootti hiyya’nee qici: tinni yaane ani darree’ni kaddeexxen; dayyuwwa ha’nooka Isira’eel’i loldinoqqe; ha’no mittimiting ifi ifike miniba higge› » tennexxe insa’ne dada duuchchik Duuchchi Woddik Gootti ajajemmashshanni dada duuchchik Duuchchi Woddike Goottika hiyyichcho lanqe ifi ifike minibaanna hinge.

Beeteli’inna Daani’ni Uurriteexxa Worqetixxa Jabbuwwa

25 Ookko’ne Iyyorbi’aami tullichuwwiinke Efireemike boga’n hexxeexxa Sekemi’ni kollo giissedhe ookko’o ofo’le. Higgeenna ookko’ni ke’eexxi Phini’eeli kollo giissedhe.

26 Iyyorbi’aami godobik hiyye hedeeqic, «Mootumma Daawwitixxe sannebaa higgaaxxe labbaan 27 kunni ardi tolcha shiqishatee’e Iyyerusaalemi hedheeke dada duuchchik Duuchchi Woddike Goottike galmibaa me’a’noole higgeen qalbe gootta Yihudaka moyanjo Roobi’amiba’a hiisedho’aten. Ookko’ni aneenna shiyaani moyanjo Roobi’aamibanna higaan» hiyye.

28 Moyanji iso’o gorseechchi uduma lame worqetixxa jabbe giissisexxi arda hiyyee qici, «Tee Isira’eel ta’iqico Iyyerusaalemi’a martette qici geyaani Gibtseke boginaa’ni ate’e fulcheemmak magenuwwi kaba hedheen» hiyye.✝12:28 Fula. 32:4. 29 Mitte Beeti’eeli’ni wele Daani’i uurrise. 30 Tinninna cubbote kadde; ardikinna ookko’o hedheeke kumbu hiyyo’a Daani qico’ni bayyate me’e. 31 Iyyorbi’aami magenoonfachchotike tullichchuwwa’n fukkuwwa giisexxi Leewwixxe gosa kadebaanga ardi giddii’n qeesete asse hariire. 32 Iyyorbi’aami Yihuda giddo assemaak ayyaanishanni saddeetike agenjo’ni tommenna ondixxe barra’ni ayyaana ulfeessinaasha mure; worqeti hujiseemake fakkuwwa’a Beeti’eeli hedheeke tolchimalchoke’ni ciinca shiqishe. Ookkonna Beeti’eelii’i magenoonfachchotee’e giisisseexxe tullichchuwwa’ni ergatendaaxxa qeese ugge. 33 Umi isinginninni fi’leeke saddeetike agenjo’ni tommenna ondixxe barra’n Beeti’eeli’i uurriseemmaxxe tolchimalcho’ni tolcha shiqishe; tennexxee Isira’eelike ardi’a ayyaana ulfeessinaashsha asse; isinna tolchimalchiinbaa mareexxi hixaana shiqishe.✝12:33 Lew. 23:33-34.