1 Sooriyaki moyanji Beenihadaadi sannachcha duuchcha mitteba kukki asse; isinni welti sase tommenna lame moyanjuwwi fadhaduwwikinna fadhadiinxe loliinxe gaaruwwan isi welti he'nemman; duulo fuleexxi Semaariya elqe kayyii'ni buqe lole. 2 Isinna qachchi giddi'a manjo ergeexxi Isira'eelik moyanjo Aki'aabii'i hiyyee qici; «Beenihadadi hiyya'nee qici 3 ‹Sibiljiinxi birrenna worqe anxen; dadanchallamma aruwwa atixinna oose atixxi anxen› » hiyye.

4 Isira'eelik moyanji, «Koo anke gootta moyanjo ati hitettexxi dhugaaten aninna ani horatennelchi duuchchi atiken» hiyye hiisse.

5 Erga mare'emmak manninna higgeen dage hiyyee qici: «Beenihadaadi hiyya'nee qici, ‹Birretika sibljonna worqe atixxa, aruwwa atixxanna oose atixxa ani'a uutotta'a atiba'a manjo ergaannen. 6 Ta'a kinni soodo iitte wodda atika mootummatika minenna ja'laabuwwa atikika mine saamo'a ja'laabuwwa anka atiba'a ergannon. Insa'nenna hira ati'a fulchaachcho duuchcha adhdhine dangaan.› »

7 Isira'eelik moyanjinna bogi ifikixxa geedhe duuchchi eyeexxi, «Kunni manji lola harsa'nee qico uudde; aruwwa anxanna oose anxa birretika sibiljonna worqe anxa isi'a uwwona'a anee laqee wodda hoyyedhebe'non» hiyye.

8 Geedhuwwatinna ardi duuchchi, «Isi hiyyaaxxa laqqoxxe; isi laqedhaachchonna eetti hitoxxe» hine.

9 Tennexxee Beenihadaadiki erganjuwwi «Gootta anke moyanji'a, ‹Ani atik erganji sirete'n laqqettexxa duuchcha assannon; ta'ika qortuma kinni muuxa dande'abe'non› hitine iso'ni kulle» hiyye. Erganjuwwi isikinna tennee erga adhdhine hinge.

10 Ookkoo'ni Beenihadaadi «Anee hordofaake manni duuchchi'a Semaariyak buttinna mitte mitte oobo geessisa gophoonnole magenuwwi ane'e qooma shiyo; tenne saxxeexxanna ane'n geessiso!» hiyye wele erganjuwwa Akaabiba'a erge.

11 Isira'eelik moyanjinna, « ‹Lolakee ka'le fulaaki manji loliinka imaana tilqeeke manjishsha geerara hasissabaan› hitine iso'ni kulle» hiyye.

12 Beenihadadi tennee erga laqee welti hedhemmak moyanjuwwi ifike duunkaan giddo hedhee ha'waamma wodda Beenihadadi manna «Ke'we duulokee qophpheeffatte» hiyye. Tennexxee insa'ne qachcha lollo'a qophpheeffante.

13 Ookkone wodda mitti wabeek Isira'eelike moyanjo Aki'aabibaa dageexxi, «Duuchchi Woddik Gootti hiyya'nee qici: ‹Konnee heddo loliinka sannachcha uuda'ninn hexxette? Techcho anga atixxe'n insa'nee sa'isse uwwannon; ookko'ni Ani Duuchchi Wooddike Gootta kadennexxa egendattoni› atee hiyya'neen.»

14 Aki'aabinna «Tennee assa'neek ayyetesi?» hiyye isoo laqe.

Iikki wabeekinna, «Duuchchi Woddik Gootti hiyya'nee qici, ‹Tennee assa'neeki Awiraaji Awiraajik loliinke mannike dargageeye ajajalluwwan› » hiyye.

«Yoona lola edise safa'neek ayyete?» hiyye laqe.

Iikki wabeekinna «Atinni edisse saffaton?» hiyye hiisse haaso'e.

15 Tennexxee Aki'abi Awiraaji Awiraajika lame dhibba sase tommenna lame loliinke mannik ajajjalluwwa kaddeexxa dargaggeeyye ye'e ookko'ni gatteeka Isira'eelika manna bukki asse; insa'nek laakkoossinna torbaane kumamman. 16 Insa'nenna Beenhadaadinna isinne welti gudde'emmak sase tommenna lame moyanjuwwi duunkaana ifiki giddo ha'wine machchoonnee'naa barra saafo'a dange. 17 Edise umoke'n fuleemmakiir Awiraaji Awiraajixxe loliinke mannike ajajalluwwa kadde'eexxe dargaaggeeyummani.

Konne wodda Beenihadaadi to'ataaka manna ergeemman; insa'nenna «Semaariya'n manni fule'e kaba'a dagate'n hedheeni» hine iso'ni kulle.

18 Isinna, «Insa'nexxi daga nage'akeetemoo lolakeete lubbondinni he'nee'na aaxxine dagge» hiyye.

19 Awiraj Awiraajinxi loliinke mannikee ajajaluwwa kadde'exxi dargaggeeyye loliinka sannachcha a'lite qachchi giddi'n fulde. 20 Mitti mitting lolake'ni kiphphi hiyyeeka naapha shiye; Sooraki manninna baaje Isira'eelik ardinna shorrate'n ke'e. Sooriyaki moyanji Beenihadaadi kinn fadhachchoke'ni gulufe heenooke fadhado gulufe'eke manninni welti baaje fule. 21 Isira'eelik moyanji Aki'abinna edi'a gussati fadhadokanna fadhadiinxa gaaruwwa boojiwwe; Sooriyake manna'ninna fuggo lole miidhe.

22 Ookkoneechchi uduma iikki wabeek Isira'eelike moyanjiibaa dageexxi, «Dagaake Birra'atike agenjo'n Sooriyaki moyanji langaxxanna atee lolo'a hige dagaani jabaati; maa assitattoxxa atinni egendeetteni» hiyye.

23 Eettene yanna'n Sooriyake moyanjiki Ja'laabuwwi hiyye iso'o gorrisee qici, «Insa'neki magenuwwi tullichchuwwiinke magenuwwaani no'o injifanteechchi tennenaa'n kexxeexxeni. Diidake'n insa'ne lolleennele kinni insa'ne injifantannani. 24 Yoona assitatto qici; moyanjuwwa duuchcha ajajallummatenaa'n hoyyite; insa'nexxe bakaa'n wele loliinke mannika ajajaluwwa hariiri. 25 Isira'eelinni welti diidake'n lola inbaashsha mudemmake fadhadixxa bakka fadhado, mudemmaxxa loliinxe fadhadiinxe gaarexxa bakka fadhadiinxa gaare bakkate'n hiissite; konneechchi edo lolake'n mudemake manni qicika loliinka manna qophpheessi; ookkoneechchi uduma insa'ne dhugaandini injifantannoni» Moyanjikinna insa'ne shiqinsheeka yaada adhdheexxi hinemmashanni asse.

26 Higgeeke birra'atike agenjo'n Beenidadaadi Sooriyaka manna bukki asseexxi Isira'eel lolo'a Afeeqi'a me'e. 27 Isira'eelinna iittaanni bukki hiteexxi gala'a uuneechchi uduma welti lola ibbo'a bukki hite fulde. Sooriyaki manni boga wo'meemmani; Isira'eel kinni lame shiixxaramma re'etike bobba'ishsha hedhe insa'ne edigama bakka abixxe ofo'le.

28 Mageniinki manjinna dageexxi Isira'eelike moyanji'a, «Duuchchi Woddiki Gootti hiyya'nee qici, ‹Sooriyaki manni Duuchchi Woddik Gootti tullichchiinke mageno malee'e dhooqatike Magenobaani hiyye'eni konnee laakkoonne dhaqqanbabaaka loliinka manna anga atixxe'n sa'ise uwwannoni; atinna ani Duuchchi Woddike Gootta kadeennexxa egendattoni› » hiyye.

29 Bakka abixxine ofollemmange boncho'n weli eriqe kayya uunda'n torbaane barra turree uduma torbaaxxe barra'n welti lola inbe. Isira'eeliki manni eettene barra'n Sooriyaka loliinka manna dhibba kuma shiye. 30 Gatemmaki Sooriyaki loliinki manni Afeeqike qachcha'n baaje; ookkoonna lame tommenna torbaane kuma loliinke manna'n kinjinki dalla'i fottoqeexxi insa'ne'n hana ibe. Beenihadaadinna qachchi giddi'a baajeexxi mitte minixxe kuta'n e'yeexxi sho'ome.

31 Isiki Ja'laabuwwinna, «Isira'eeliki moyanjuwwi gattowwaali hiyyake kadeexxa lanqeenneni; ta'a ke'nennexxi muddeexxa seemma oddo'wine, umo no'oke'n wodaro miriqe'nennexxi Isira'eelike moyanjiba marro; dedha lubbo atixxa gatisaake kadaani» hine.

32 Insa'nenna hidhake'n muddeexxa seemma usudhdhineexxi umoke'n wodaro mirqe'neexxi Isira'eelike moyanjiba'a marreexxi; «Atiki eriganji Beenihadaadi ‹Maganneteni anee shiltoxxe› hiyye ate'e kadhata'neeni» hine.

Moyanjikinna, «Ta'i qico'n lubbondinni hedhee? Isiqqa dayyo ankeni» hiyye. 33 Mannikinna tenne eloxxe hiyyeeshsha asse'e hiyyichcho isika qophe'neexxi; «Eeti Beenihadaadi dayyo atikeni» hine.

Moyanjikinna, «Martineexxi iso'o iyyedagge» insa'ne hiyye; Beeni Hadaadi daggee wodda; Aki'abi fadhadiinxe gaare'n ofo'laashsha asse.

34 Beeni Hadadinna, «Anni anki Anna atikenaa'n aadheemmaka qachchuwwa hiissannoni; Anni anki Semaariya assemmaxxa duuchcha; atina Demasiqo giddo ifixxa dikko uurrisa dandeettattoni» hiyye.

Aki'abina «Yoona ani tennee weli aaggonni atee tuqeechchi hedhebaangi wocci assannoni» hiyye; tennexxee isinni welti weli angeechchi uduma isoo me'o'aa waale.

35 Wabeekotixxe oosenaa'n mitti jaalo ifika Duuchchi Woddike Goottike hiyyichchi'a ajajemeexxi; «Ane'e gani,» hiyye. Manjichchi kinna gana gibe.

36 Tennexxee iikki wabeek, «Duuchchi Woddik Gootti hiyyexxe'n ajajema gophpheettaxxe; ani biri'n kexxe me'itatto wodda neenqi atee shiyaani» hiyye. Manjikinna me'echchi uduma neenqi afeexxi iso'o shiye.✝

37 Iikki wabeekinna wele manjo afeexxi, «Maganneteni ane'e gani» hiyye. Tennexxee iikki manji gane madeesse. 38 Ookkoo'n iikki wabeek me'e oriini qarqara uureexxi; moyanji dagaaxxa heqqedha'nemmaani. Umoke'n mirqedhemmalcho umokenaa'n hoyyedheexxi illetanna buqedheexxi; iso'o egennabaashsha assee. 39 Moyanjikinna ookko'n sa'a wodda wabeek isoo ye'exxi hiyyee qici, «Ani eriganji atiki eebbeeke loli giddo e'ye hedhee'na'a mitti manjichchi booji'emeeka manjo aadhe dageexxi ‹Konne manjichcho heqqi; isi ba'oole kinni ati isixxa bakka rertattoni; yookaani torbaane tommenna onde birretika sibiljo uutattoni› anee hiyye. 40 Yooni ani atiki garbichchi huje ane'n bira saxxe'na'a elqenna kayya marema'na'a manjichchi ba'e me'e.»

41 Ookkoneechchi uduma iikki wabeek umoke'n mirqedheemmachcho rake illetenaa'n hoyyedhe; Isira'eeliki moyanjinna iikki manji wabeekotenaa'n mitteke kadeexxa ege'ne. 42 Wabeekinna moyanjo hiyyee qici, «Duuchchi Woddik Gootti hiyya'nee qici, ‹Ani hara reyowwaali› hiyyenneka manjo waaldettaxxe isixxa bakka ati rerittattoni; isike ardixxa bakka atik ardi mudaani» hiyye. 43 Isira'eeliki moyanjinna aare mufateexxi Semaariya hedheke moyatike minibaa me'e.