1 Naabaaxik belti Iyyorbi'aami moyeexxe tommenna saddeeteessoxxe wogga'ni Abiya Yihuda'a moye. 2 Iyyerusaaleminni hedhe sase wogga galche; ama isixxi Ma'ika hiyyendaaxxe Abeseloomixxe beltomman 3 Isinna anni isikishann cubbo huje; anna isike Daawwitishsha mitte godobinni Duuchchi Woddika Gootta ajajemebaan. 4 Yaane kinni iso'n itti aane belti isik moyaashshana Iyyerusaalemi jabeesso'a Duuchchi Woddik Gootti Mageni Daawwitixxee hiyye ifa uwwe.✝ 5 Daawwiti Hiitichcho Ooriyo'ni hujeexxa balleessa malee; Duuchchi Woddike Gootti edo dhugaatixxa yaane asse'en; lubboti hedhemmake baro duuchchaa'ni Duuchchi Woddike Goottike ajajana'n mishik asseexxi yanna hexxebaan.✝

6 Abiyanna lubboti hedhemmake baro duuchcha'n Roobi'aamixxenna Iyyorbi'aamixxe oddo'ni loli hedhemman. 7 Wele Abiya isike baro'n asseexxanna hujeexxa duuchcha Yihudake moyanjuwwixxe jirteti maxaafa'n borreessende hexxeexxebaa? Abiyaxenna Iyyorbi'aamixxe oddo'ni loli hedhemman. 8 Abiyanna reye; Daawwitike qachcha'n moonge. Belti isiki Aasa bakka isixxe'n moye.

9 Isira'eelik moyanji Iyyorbi'aami moyeexxe lame tomme wogga'ni Aasa Yihuda'n moye. 10 Iyyerusaalemi'ni shoole tommenna mitte wogga moye; akka'o isixxanna Ma'ika hiyyendaaxxe Abeseloomixxe beltomman.

11 Aasa anni isik Daawwiti assemmaxxa duuchcha Duuchchi Woddike Gootti edo eloxxa asse.

12 Moyanji Aasa fakkuwwa magenoonfatammake mine'n yabaabulaammaka duuchcha bogakenaa'n shorre; annuwwi isiki hujemmaxxa fakkuwwa duuchcha diige bire. 13 Battoondeexxa Asheera hiyyendaaxxe meyyake magenixxa diqqachchisaaxxa fakke giisise uurisemmaxxee akka'o ifixxa Ma'ikaa'a mootittummatenaa'n hoyye; fakke isexxa butuche Qediroonixxe dhooqa'n gube. 14 Aasa magenoonfatammaka tullichuwwa hara balleesse bira gophoolenna midde lubboti hedhemmake baro duuchcha'n qalbeti Duuchchi Woddike Gootti'a addatemeeke kade hedhemman. 15 Ann iskinna isi Duuchchi Woddike Gootti'a foneeka birretika sibiljonna worqe ittanni miyuwwa iyyedageexxi Duuchchi Woddike Goottike galmi giddo ugge.

16 Aasanna Isira'eelki moyanji Ba'isha insa'neeke mootummatike baro'n weli'anni weli lolema'ni he'nemmani. 17 Isira'eeliki moyanji Ba'isha Yihudake'n duule; ookko'n Yihudiinke moyanjo Aasake boga'n ayyinna e'yabaashshanna, ookkoo'ninna fulabaashsha hoyyatee Raamake boncho'n kollo giissedhe.

18 Aasanna Duuchchi Woddike Goottike mine'ninna moyatike minike miya massecatike mine'n gatemmaka birretika sibiljonna worqe duuchcha adhdhe; ookko'ninna xuurameesa kadeeke ifike ja'laabuwwixxe anga'n Demasiqo galchammake Xabirimoonika belto, Aaziinike beltike belto kadeeke Sooriyake moyanji'a Beenihadadi'a erge. 19 Aasanna hiyyee qici: «Anki anninna atiki anni welti aangemmashshanni; ta'anna atixxenna anxe oddo'n weli aaggo hexxowwaali; kunni birretika sibiljonna worqe ati'a ergenneni; ta'anna Isira'eeliki moyanji Ba'isha dagemmaba'a higo'a, isinni welti aaggeettaxxa kako diigi» hiyye.

20 Benihaddadinna moyanjo Aasaka yaada adhdheexxi; loliinke mannika ajajlluwwa Isira'eelike qachchuwwa'n duulchisexxi Iyyoonii'i, Daani'i, Abeeli Beeti Ma'iikaninna Kinereeti duuchcha ittanni Nefitaalemininni welti Gensareexxi duuchcha lolle miine. 21 Moyanji Ba'ishanna tennee laqeexxi; Raama safeemmaxxa kollotixxa huje uurriseexxi Tirtsa'a hige. 22 Ookkoneechchi uduma moyanji Aasa mitti manji gataabaashsha Yihudake boga duuchcha'ni lassise; ookko'inna arda Ba'isha Raamake boga'ni uggemmaka haqichchonna haqqe gursiise; moyanjikinna konnooni Mitsiphaanna Biniyaamixxe galcha giddo hexxeexxa Geba'ineke qachchuwwa'ni kollo giissedhe.

23 Aasa moye galchamma sane'ni muuxeme'ek welichchi duuchchi; asseexxa duuchchanna hujee'eka qachchuwwa Yihudake moyanjuwwike jirtetike maxaafa'ni borreesseme hedhebaa? Moyanji Aasa cimee wodda kinni lekka dhibeme. 24 Aasanna reye, edik annuwwi moogeemeke hirreessa'ni anniinke Daawwitike qachcha'n moogeme; belti isik Iyyosafixxi bakka isixxe'ni moye.

25 Yihudak moyanji Aasa moyemmake baro'ni; langaxxe wogga'ni Iyyorbi'aamik belti Naadaabi Isira'eel'i moye; lame wogga moye galche. 26 Isinna anni ifiki me'eemmaka ora me'eexxi; anni hujee'exxa duuchchanna Isira'eeli hujjaashsha assemmaka cubbo hujati Duuchchi Woddike Gootti edo elobaaxxa yaane huje.

27 Naadabinna Isira'eeli duuchchi Filisixeemike boga'ni hexxeexxa Gibetoonika qachcha bunqee'na; Yisakoorixxe sannenaa'ni ileme'eki Akiyaki belti Ba'isha fuggoxxinni ke'exxi Naadaabi Gebaatoni shiye. 28 Ba'isha Naababi'i shiyeechinna bakka isixxe'n moyeek, Yihudak moyanji Aasa moyeexxe sakkaxxe wogga'niten.

29 Moyeeshanni iikki woddi Iyyorbi'aamika mini hado duuchcha shiye bire. Duuchchi Woddik Gootti Seelo ilemeeka erganjo Akiya gamii'ni haaso'emmashshanni Iyyorbi'amike mini hado mitte manjonna lubbo gatisebaang duuchchiinga bire.✝ 30 Tinninna kaddeechchi Iyyorbi'aami hujemaxxe cubbo'anna Isira'eelinna hujaashsha assemmaxxe buutonni, Duuchchi Woddika Gootta Isira'eelika Mageno mufachchiisseemmaxxeteeni.

31 Wele Naadaabi moyyemmake baro'n hujendeexxi; isi assexxi duuchchi Isira'eelike moyanjuwwixxi jirte borreessendemmake maxaafa'n borreesende hexxebaa? 32 Aasanna Isira'eeliki moyanji Ba'isha moonemmake baro'n he'nemmaki weli'anni weli lollemma'ntemmaani.

33 Yihudak moyanji Aasa moyeexxe sakkaaxxe wogga'n Akiyaki belti Ba'isha Tirtsake qachcha'n; Isira'eeli duuchcha'n moye; lame tommenna shoole wogga moye galche. 34 Iyyorbi'aami me'emmanga ora me'ati Isira'eelina cubbo hujjaashsha assati Duuchchi Woddike Gootti edo elobaaxxa asse.