1 Ookkone wodda Aki'aab, Eliyaasi assammaxxa duuchcha; raagole duuchcha wolaantichchik hitta gorraasisseexxa Elizaabeeli'ni haaso'e. 2 Tennexxe Elizaabeelinna, «Soodo tenne yanna'ni atixxa lubbonna ookkooneerixxe lubboshshanni assa gophonnole magenuwwi aneenna shiyowwal; tenne caaldeexxanna ane'n iyyedagowwaal» hite Eliyaasibaa manna ergite.

3 Eeliyaasinna sodaatemmaxxe'e lubbo gato'a ke'e baaje. Yihudake boga'ni hedheeke Bersaabehike qachchiba'a dageeshshanni erganjo ifika ookkoone waale; 4 Qiila gammooje giddo barra duuchcha me'e. Isinna Kitikita hinaake haqichchiba geyeexxi hunda ofo'leexxi rewo'a, «Duuchchi Woddike Gootta ani'a gelte'en; ani edika annuwwa anka sa'abo'non lubbo anxa adhdhii!» hiyye soodate. 5 Ookkoonneechchi uduma haqichchi hunda irkateeba diiphe.

Dedhange'n iimik erganji le'miseexxi, «Kexxettexxi iti!» hiyye. 6 Tamasse uuda wodda; kashiloke'n kossineexxi kebbonna mitte odolcho'ni wode'e umiinba hedhee'na afe; ite ha'we ke'eechi uduma hige diiphe.

7 Duuchchi Woddike Goottik iimik erganjinna higgen dage le'miseexxi, «Bayya me'itaattaxxe'e kexxe iti!» hiyye. 8 Tennexxe ke'eexxi ite ha'we; ite hunna jabeefateexxi Koorebi Mageniixxe koobaba'a geyaaqico shoole tomme barranna shoole tomme hashsha me'e. 9 Ookko'o wolo'o mitte giddo e'ye gale.

Duuchchi Woddik Gootti isoo hiyyee qici, «Eliyaas kaba maa assitaattee?» hiyye.

10 Higgeen isinna «Ani Duuchchi Woddike Gootti Mageni'a yo'oshsha hinaafeennen; Isira'eelik ardi kako atixxa diige'en; tolchimalichuwwa diinge'en; wabeekottanna wolaantichchik shinne'en. Ane calla gateennen; ta'anna anee shinno'a hansa'neen» hiyye.✝

11 Duuchchi Woddik Gootti hiyyee qici, «Hexxettebaa'n fulde koobatixxe xungo'n ani edo uurri» hiyye.

Ookkoo'n jabaxxinna hunnaameette diidallo koobuwwa hacaqqi assite; kinuwatanna Duuchchi Woddike Gootti edo bulleessite birte; Duuchchi Woddik Gootti kinni diidalloti giddo hedhemmabaan; diidallote'n itti aande buttinniinxi lele'ma kadde; Duuchchi Woddik Gootti kinni buttiniinxe lele'ma giddo hedhemmabaan. 12 Buttatixxe lele'ma uduma giira dagge; Duuchchi Woddik Gootti kinni giirati giddo hedhemmabaan; giirati uduma laanchiteexxi diidallo gande. 13 Eliyaasi tennee laqeexxi, alba ifika fugatemalchin buqedhe fuleexxi wolootixxe hula'ni uurre.

Ookko'ni «Koo Eeliyaasi kaba maa assitaattee?» hiyyaka hafuura laqe.

14 Isinna «Ani Duuchchi Woddike Gootta Mageni'a yo'oshsha hinaafeennen; Isira'eelik ardi kako atixxa diige'en; tolchimalcho diige'en; wabeeko atixxanna wolaantichchik shinne'en. Ani calla gateennen; ta'anna anee shinno'a hansa'neen» hiyye.

15 Duuchchi Woddik Goottinna iso'o hiyyee qici, «Daggettenga ora higge Demasiqoxxe qiilla gammoojjebaa me'i; ookko'o geltottole Azaheeli'i Sooriya'n moyaashsha hariiri.✝ 16 Iittanni Nimishika belto Iyyunna Isira'eeli'ni moyaashsha hariir; higgeen wabeeko kadeexxi atixxe bakka'n wabeeka kadaashsha Abeeli Mehoolaka manjo Saafaxiinika belto Elsa'ii hariir.✝ 17 Azaheelike wolaantichchonaa'n baajemmaka Iyyuu shiyaani; Iyyuke wolaantichchonaa'n baaje'eka kin Elsa'i shiyaani. 18 Aninna Ba'aali magenoonfatebaakanna suumeti fakke sunqedhebaaka torbaane kuma manna Isira'eeli giddo gatisannon» hiyye.✝

19 Elsa'i ookko'n ke'e me'a wodda Saafaxiinika belto Elsa'ii tommenna lame qotiyyo fulche ifi'a tommenna langaxxe qotiyyon hucca'na'a afe. Eliyaasinna isiba'a mareexxi fugatemmalcho hana ibise. 20 Ookko'ni Elsa'i qotiyyuwwa waaleexxi Eliyaasi'i hordofeexxi «Annakanna ama anxa sunqedhe higonna'a ani'a eeti'i uwwi; ookkoneechchi uduma ate hordofannon» hiyye.

Eliyaasinna hiisseexxi, «Ani ate'e assennelchi hedhee? Wirri hite higa dandeettatton» hiyye.

21 Tennexxee Elsa'i waaleexxi hige. Lamiinxa qotiyyo dule; huccammake miya'ninna giira ha'isheexxi maala gafe ardake'e uwwe insa'nenna inde. Ookko'n Eliyaasii'i hordofe me'eexxi gargaara'nemman.