1 Sooriyaxxenna Isira'eelixxe oddo'ni sase wogga'a loli hedhemmabaan. 2 Sakkaxxe wogga'n kinni Yihudak moyanji Iyyosafixxi Isira'eelika moyanjo to'atate'e dirre 3 Isira'eelk moyanjinna ja'laabuwwa, «Gele'adike boga'n hexxeexxi Raamoti no'oxxe kaddee'naan, Sooriyake moyanjixxe anganaa'n ibisatee higge'e mitte wo'laanchonna assineebe'noxxa egendinebaa?» hiyye.

4 Tennexxee Iyyosafixxinna, «Gele'adike boga'n hexxeexxa Raamotii'i lolate'e aninni welti duulo duuldottaa eetaatte?» hiyye qore.

Iyyosafixxinna, «Aninna atishshanden; anki ardinna atike ardishshanden; anki fadhaduwwinna atike fadhaduwwishshanden» hiyye. 5 Iyyosafixinna Isira'eelika moyanjo, «Edisse kinni Duuchchi Woddike Goottika yaada laqi» hiyye.

6 Tennexxee Isira'eelik moyanji shoole dhibba wabeeko bukki asseexxi, «Gele'adike boga'n hexxeexxe Raamoti'ni duullannomo waallanno?» hiyye insa'ne'e qore.

Insa'nenna, «dada duuchchi Gootti moyanjiinxe anga'ni sa'isse uwwaan duuli» hine.

7 Iyyosafixxi kinn, «Qodhdhinaannek Duuchchi Woddike Goottik wabeek kaba hedhebaa hiyyatee?»

8 Isira'eelik moyanjinna Iyyosafixi'i, «Yimilak belti Mikiyaasi hiyyemaak Duuchchi Woddike Goottika yaada qodhdhinaak manji hedha hedhenni hedheen yaane kinn heene yanna'ninna kaddo anxee fuggoxxa malee'e eloka raaga haaso'e ege'na gophemmaxxe'e ani iso'o eeyyabe'non!» hiyye.

Iyyosafixinna, «Moyanjo iitta hiyya hasissabaan!» hiyye.

9 Tennexxee Isira'eelik moyanji ja'laabuwwi giddii'n mitte ye'exxi, «Amo mee Yimilaka belto Mikiyaasi'i rakke aaxxe dag» hiyye ajaje.

10 Isira'eelik moyajinna Yihudake moyanji Iyyosafixxi mootummatike minixxa seema oddo'wineexxi, Semaariyake dalla'iinxe hula bira hexxeexxe weldeenna'ni moote ifinxe'n ofolee'naa, duuchchiinxi wabeeko insa'ne edo raaga haasota'emman.

11 Konne wodda Sedeqiyaasite hiyyemaak Kena'aanik belti sageettot gaafa giisseexxi, «Duuchchi Woddik Gootti, ‹Kutti hine mundaa qico'ni Sooriyaka manna konneechchuwwin loldatton› » hiyye.

12 Gatteexxi wabeeko duuchchanna, «Duuchchi Woddik Gootti moyanjiinxe anga'n Gele'adike boga'ni hexxeexxa Raamoti'i sa'isse uwwani marte loli» hina'ni mitte afo'o kande raaga raanga'nemma.

13 Ookkoneechchi uduma Mikiyaasii'i ye'a mareeki erganji, «Kunse wele wabeeko moyanji lole injifataaxxa mitte afo'o kaddeexxi isi'a raggaammaxxee atik hiyyichchinna insa'neekenni welt mitteke kadaashsha maganne eloxxa haaso'i» hiyye.

14 Mikiyaasi kin, «Hedhaake Duuchchi Woddike Goottixxa isi'a haaso'aannek Duuchchi Woddik Gootti ane'ni haaso'exxe callani!» hiyye.

15 Ookko'o geyeeshshann moyanji, «Koo Mikiyaasi Gele'adi'i hexxeexxe Raamoti'ni duullannomoo yookaan waallanno?» hiyye iso'o laqe.

Isinna, «Duuchchi Woddik Gootti moyanjiinxe anga'ni Remaati'i sa'isse uwwaammaxxee duulde injifat» hiyye hiisse haaso'e.

16 Moyanji kinna «Dhugaa malee'e Duuchchi Woddike Goottike summinni wele mittechchonna haasoottaboxxoshsha me'ele atee kakachchisanno?» hiyye.

17 Ookkoo'ni Mikiyaasi hiyye hiissee qic, «Isira'eeli duuchcha allalisanjo afeebaake gedhebishsha kooba koobate'n xexxeerende'naa uudenne; Duuchchi Woddik Goottinna, ‹Kunni ardi gootta afebaan; mitti mittingi nage'ik ifi ifike miniba'a nage'ik me'owwaal› hiyye hiise haaso'e.» ✝

18 Isira'eelik moyanji Iyyosafixxi'n, «Isi anxee fuggoxxa malee'e eloka raaga ragabaan hiyyeennabaa?» hiyye.

19 Ookkoo'ni Mikiyaasi hiyyee qic, «Yoona Duuchchi Woddike Goottik hiyyichi hiyya'neexxa laqi! Duuchchi Woddik Gootti ifixxe moote'n ofo'le, iimatiki sannachchi duuchchi isike midda'ninna bita'i darree'ni uurre'naa uudeennen;✝ 20 Duuchchi Woddik Goottinna, ‹Gele'adi hexxeexxe Raamoti'ni duule ookkonni reyaashsha ayyete mare Aki'aabii'i dedhisaak ayyete?›

«Erganna giddii'ni mitti wele, welkinna wele gargar hedheeka yaada shiqinshaamman. 21 Udu'meexxi mitti hafuur shiqe; ookkoneechchi uduma Duuchchi Woddik Gootti edo uurreexxi, ‹Ani isoo dedhisannon› hiyye.

22 « ‹Duuchchi Woddik Goottinna, hitta assite'e?› hiyye isoo qore.

« ‹Iikki hafuurinna ani marennexxi wabeeko duuchchik afo'o'ni dharichcha hafuura kadannon› hiyye hiise haaso'e.

«‹Duuchchi Woddik Goottinna: Yoona kexxe marte dedhisi ati'a qabbaan› hiyye.

23 «Tennexxee kunse Duuchchi Woddik Gootti tenne wabeekoke afo'o duuchcha'n dhariinka hafuura ugge; ate hananna bala iyyedaga'neexxa Duuchchi Woddik Gootti haasodheen.»

24 Ookko'n Kena'aanik belti Sedeqiyaasi fuleexxi Mikiyaasii'i kabalati ganeexxi, «Haanichchinni kayyi'a Duuchchi Woddike Goottik hafuur anenaa'ni sa'e ate'ni dage haaso'eek?» hiyye qore.

25 Mikiyaasinna, «Yoona sho'ondota'a mitte mine'n me'ittattoxxa barra egendattoni» hiyye.

26 Ookkoneechchi uduma Isira'eelik moyanji hiyye ajajee qici, «Amme Mikiyaasii'i abiddineexxi ookkone qachcha galchammake Amoonibaanna moyanjinke belto Iyyo'asibaa ille iima hiisse. 27 Ookkoneechchi ‹Moyanji nage'ik higanno qico'ni konne manjichcho usurriinke mine'n turaashsha asse; bagoka buudeenanna wode'e malee'e weleechcho isi'a uutinoqqe'e› hiyye'en hitine kulle» hiyye.

28 Mikiyaasinna «Ati nage'ik higgottole Duuchchi Woddik Gootti ane'ni haaso'eebaani hiyyatebaa!» hiyye. Iitti aanseexxi «Kaba hexxetteki ardi duuchchi konne anka hiyyichcho qalbeeffatte galchedhi» hiyye.

29 Tennexxee Isira'eelik moyanjinna Yihudak moyanji Iyyosafixxi Gele'adike bogi giddo hedheeke Raamotike qachchibaa qabante. 30 Aki'aabinna Iyyosafixxii'i, «Ege'nemabe'noshsha seemma jijjiidhe'e wele manjo fakkaate e'yannon; ati kinni atixxa mootummatixxa seemma oddo'wi» hiyye. Tennexxee Isira'eelik moyanji ifi sho'edheexxi loliibaa e'ye.

31 Ookkonee wodda Sooriyak moyanji ifika sase tommenna lame sarageelluwwiinka ajajalluwwa, «Isira'eelike moyanji gadhi darre lumokenninna kadi shiixxookenni ayyinninna lola ibbinabaashsha» hiyye insa'nee ajajeemman. 32 Iikki sarageelluwwiink ajajaalluwwinna Iyyosaafixi'i uudaa wodda, «Mitte mami belo kunni Isira'eelike moyanjon» hiye. Tennexxee lolle miino'a isoo bunqe; Iyyosafixxi raaree wodda kinni 33 iikki sarageelluwwiink ajajaalluwwi isi Isira'eelike moyanjo kadebaaxxa egenneexxi isoo hordofa waalle.

34 Yaane kinni mitti manjichchi dedhange'n ifika mogido alaamebaang ittanni darbaa wodda Isira'eelike moyanjixxi loliinxi seemma welti abidendeeemmabaa'n isoo ote; moyanjikinna ifika sarageella oofammaka, «Mado'ennexxee sarageella udumi'a wirri assite anee tenne loliinxe bakkanaa'n fulchi!» hiyye. 35 Barra duuchcha lolikinna qiidebaan; eettene yanna'ni moyanji Sooriyake manni edo ifike loliinke sarageella'n toggi hiyye irkateeshanni hedhemman; mado'emabaa'ni yaatammaxxi munde ookkone loliinke sarageellixxe fa'wo hana coccoba'nemman; eettene barraxxe hashsha'ninni moyanjikinna reye. 36 Arsho aaggo shiqqee'naa loliinke sannachchuwwi giddii'n «Mitti mitting manji ifi ifike minibaanna ifi ifike bogibaanna me'owwaal!» hiyyemaaki canci ke'e.

37 Moyanji Aki'abi reyemmaxxee isoo Semaariya iyyedange moonge. 38 Ookkone loliinka sarageellanna yabaabuluwwi anshedhammake Semaariyake baleessa'ni anshine; Duuchchi Woddik Gootti haso'emmake hiyyichchishanni isixxa munde wonshi arraaphphe.

39 Wele Aki'aab moye galchammake baro'n kaddeexxinna assemmaxxi duuchcha, mootummatika mine ijaaremmaxxinna Daane'inxe isson seeseemmaxxi, iittanni ijaaremmak kollifachchotik qachchuwwi Isira'eelike moyanjuwwike jirtetike maxaafa'ni borreessendee hexxeen. 40 Aki'aabinna reye; belti isiki Akaziyaasinna isixxe bakka'ni moye.

41 Isira'eelik moyanji Aki'aab moye galcheexxe sholgaxxe wogga'ni Aasaki belti Iyyosafixxi Yihuda giddo moye; 42 Iyyosafixxi moyaa wodda isixxi wogganna sase tommenna onde woggamman; isinna Iyyerusaalemi'n lame tommenna onde wogga moye. Ama isixxi Azuuba hiyyendaaxxen; isenna Shiilihixxe beltomman. 43 Isinna anni ifiki Aasa me'emmaka ora me'e; isibaaninna mishikki hiyyebaan; Duuchchi Woddike Gootti edo eloxxa calla asse; kaddo malee'e tullichchuwwiinxa magenoonfachchotixxa bakkaara balleessemmabaan; ardikinna ookko'o tolcha tolcha'n hixaanakanna guphpha'nemman. 44 Iittanni Iyyosafixxi Isira'eelike moyanji welti nage'ik hedhate'n ke'e.

45 Wele Iyyosafixxi moyemmake baro'ni muuxemmaxxi lolake'n asseexxinna hujeexxi duuchchi Yihudake moyanjuwwiinke jirtetike maxaafa'ni borreessendee hexxeen. 46 Anna ifike Aasake bari uduma midde fakkuwwitixxe magenoonfachchotixxe bakkaara'ni gatteemaxxa labbaki labbakenni meyyaxxi meyyanni wel wel aadhdhammake mannixxa hafe ookkone bogikenaa'ni fugusse.

47 Ookkone wodda Eedoomik bogi ifika moyanjo affemmabaan; baalloma'emmak manjinna isoo galcha'emman.

48 Iyyosafixxi worqe iyyedago'a Ofiiri'a me'aaka daddaliinka markabuwwa* giissiseemman; kaddo malee'e iikki markabuwwi abbaayyatixxe gabala kaddeexxe Etsiyonigabiiri'n enqemeemmaxxee hara ookko'a me'a dandeesiseeba'a. 49 Ookkone wodda Aki'aabik belti Akaaziyaasi Iyyosafixxii'i, «Anki manni atike manni welti markabake'n me'uuni» hiyyeexxi isoo laqeemman. Iyyosafixi kinni eetii'i uwweemmabaan.

50 Iyyosafixxi reye; isik annuwwi moogemeemmake Daawwitike qachcha'ni moogeeme. Belti isik Iyyoraaminna isixxe bakka'n moye.

51 Yihudak mayanji Iyyosafixxi moyemmaxxe tommenna torbaxxe wogga'ni Aki'aabik belti Akaaziyaasi Isira'eelike moyanjo kadeexxi Semaariya'n hedheexxi moye; Isira'eeli'ninna lame wogga moye. 52 Isinna ifika annanna ifixxa ama iittanni Isira'eelii'i dedhisemmaka Naabaaxika belto Iyyorbi'aamika ora hordofati Duuchchi Woddike Gootti edo gibendeexxa fuggoxxa huje asse 53 Ifik anni assemmashshanni isinna Ba'aali'ite hiyyemaaka magenuwwa magenoonfata'n sagade. Ookkonna Duuchchi Woddik Gootti Isira'eelik Mageni mufataashsha asse.