1 Solomoon Duuchchi Woddike Goottika galmanna ifixxa mootummatika mine ijaadhdhe bireechchi udumanna hujo'a haseexxa duuchcha muuxeechchi uduma, 2 Duuchchi Woddik Gootti Geba'oonii'n Solomooni'a leellemmashshann higgeen iso'ni leelle.✝ 3 Duuchchi Woddik Gootti isoo hiyyee qici, «Ani edo soodattettexxa soodachchonna kadha laqeenneni; konnee ijaartettaka galma summi anki ookko'o duuchchi wodda'a hedhaashsha asse qulloonse foyeennen; ille anxinna godobi anki duuchchin wodda ookko'o hedhaan.

4 «Atinna atik anni Daawwiti assemmashann qajelummatinna addatenshat me'itettele ani ajajennexxa duuchcha muuxxottole; seera ankanna ajaja heqqexxottole; 5 Anna atike Daawwiti'a, ‹Isira'eelixxe moote'ni ofo'laaka manjo sanne atixxenaa'n gophaboxxon› hiyye haaso'ennaxxe addeeshshann moote atixxi Isira'eli'ni duuchchi woddi'a jabaatte hexxaashsha assannon.✝

6 «Yaane kinni ati yookaan oose atixxi anee gibbine'e udumi'a higgnoole; ha'no'a uwwenneka ajajuwwanna seeruwwa heqqedhaa gophphinoole; me'itine wele magenuwwa magenoonfatinaa'n isi'a kumbu hitinoole, 7 Aninna Isira'eeli'a uwwennake boganaa'n shorraannoni; summa ankee hiyye woyyoonsenneka konne galma waalannoni; ookkoneechchi uduma Isra'eel arda duuchcha'n osolendeexxenna mammaakendeexxe kaddaani; 8 Kunni galm mambe'a hinaake kadooleenna midde; oletixxe tuulo kadaani; ookko'n sa'aaki duuchchi manciira hiyyani; oso'la'nina ‹Duuchchi Woddik Gootti konne boga'ninna konne galma'n itta hexxeexxa yaane asseechchi mayye'ate?› hiyyaani.✝ 9 Iikki manninna hiyyaa qici, ‹Eeti Duuchchi Woddik Gootti tennee elobaaxxa duuchcha insa'ne'ni iyyedageechchi Annuwwa insa'neeka Gibtseke boganaa'n fulchemmaka Duuchchi Woddika Gootta Mageno insa'neeka waaleexxi wele magenuwwa sagandexxeenna iso magenoofantemmaxxeeteni› » hinaani.

10 Solomoon lamiinga kinjiinka minuwwa, Duuchchi Woddike Goottika galmanna moyatika mine huje bireexxe lame tomme woggake muuxama'n; 11 Moyanji Solomoon Geliila hedheeka lame tomme qachchuwwa Xiroosike moyanji'a Kiraami'a uwwe; moyanji tenne asseechchinna, hasisaachcho duuchcha biribriisa, hi'nessakanna worqe Kiraami uwwemmaxxeeteni; 12 Kaddo malee'e Kiraami Xiroosii'n ke'e Solomoon uwwe'eka qachchuwwa uudo'a maree wodda ookkone qachchuwwa'n gammadebaan. 13 Isinna, «Anke dayyo; kunni ani'a uutettek qachchuwwi mayiinke?» hiyye. Konnee qachchuwwanna «Kabuulike* boga» hiyye. Kunni qachchuwwi telchi qico'n konne summinni ye'ema'neen. 14 Ookkone wodda Kiraami moyanjoke'e shoole kuma kiilo giraami qica worqe ergeemman.

15 Moyanji Solomoon Duuchchi Woddike Goottika galma, ifika mootummatika mine, Milooni'i*, Iyyerusaalemika dalla'a, Hatsoori'i, Megidonna Geezeri'i ijaarate'e hunnatixxa huje hujaaka manna file'emman; 16 Gibtsek mayanji Feri'oon Geezerika qachcha lole miidheexxi giddo hedheemaxxa Kenaanito shiye'e qachchakanna gubeeexxi abixxe; ookkoneechchi uduma belto ifixxa Solomooni'n heerunsiisee wodda Gezeriinika qachcha gice ise'a uwwe. 17 Solomooninna Geezerii'i hiisse ijaare; ittanni aadi darrexxa Beetihoroninna ijaare, 18 Ba'ilati, Yihudaxxe qiilla gammoojje'n hexxeexxa Taamirii'i ijaare; 19 Solomooninna masscecatika qachchuwwa, fadhadiinxi gaaruwwa heqqemmaka qachchuwwa iittann fadhado gulufammak manni hedhaka qachchuwwa ijaare; ittanni Iyyerusaalemi'ni, Libaanoosi'ninna wele isi galchammake boga duuchcha'ni ijaaro'a haseechcho duuchcha ijaare.

20 Isira'eelike arda kadebaaka Amoorak, Hiititotik, Feeriizito, Hiwaatonna Iyyaabusak ardi duuchchi giddii'n gate'eka 21 Isira'eelki ardi sanne insa'neexxa balleessate'e dandeennebaakanna bogake'n gateekaara konneera telchonna assinammashshann Solomoon hunnatixxe huje'a insa'ne file. 22 Kaddo malee'e Solomoon Isira'eelike manni giddii'n garba assebaan; insa'ne loliink manni, ja'laabuwwi, loliinke mannik ajajalluwwi, lolake'e ajajammakir, loliinke manniki jaliqabuwwi gaaruwwa oofaakeeramman. 23 Kunnirinna Solomoon hujisammaka kinjinke minika ijaarsa hujaake mannika hujalluwwa towataakeramman; laakkoossi insa'neekinna 550.

24 Feri'oonixxi belto Daawwitike qachchanna'ni Solomoon ise'a hujiseeke mootetike miniba'a daggeechchi uduma Solomoon Milooni ijaare.

25 Solomooninna Duuchchi Woddike Gootti'a hujisemmake tolchin boonchcho'n woggate'ni sasele ciincatika tolchanna mittoomiinka tolcha shiqisheexxi; konneninn welit Duuchchi Woddike Gootti edo hixaana guba'nemman; konne qicin galma ijaare bire.✝

26 Iittanni moyanji Solomoon Eedoomike boga'n, Eelaati bira, Diimmoxxe Abbaayya qarqara'n hexxexxe Etsiyonigabiiri'n hoboluwwa giisse. 27 Hoboluwwate'n hana Solomoonike mannini welti hunjo'a; Kiraami abbaayyate'n hunja qico ege'neeka ifika hoboluwwatika manna erge. 28 Insa'neenna Ofiirike bogibaa mareexxi tommenna shoole kuma kiilo graama worqe aa'ne dangeexxi moyanjo Solomooni'a uune.