1 Solomooninna Moyanji, Isira'eeli duuchcha'n mowe. 2 Umo umoke kadeemmak isik ja'laabuwwi konneechchinn butti'a hedheeken;

Saadooqik belti qeesichchi Azariyaasi,

3 Shiishaxxi labbaxxi oose borreesano, Eelihoreefinna Akiya,

Ahiluudik belti, jirtetik borreessanji Iyyoosafiixi,

4 Yoodahek belti, loliinke mannike umik ajajalli Bennayaasi,

Qeese Saadooqinna Abiyataari,

5 Naataanik belti awuraajjuwwink umi ajajalli Azariyaasi,

Naataanik belti, qeesichchi Zaabuudi moyanjiink gorsallonna jaalokemman,

6 Ahishahaar, mootummatike miniki ajajalli,

Abidak belti hunnatixxe hujeki towatalli, Adooniraami.

7 Iittanni moyanji Solomoon moyanjokeenna moyanjiinke mini hadi'a indaachcho Isira'eeli duuchchanaa'ni bukki assaaka tommenna lame awuraajjiinka galchalluwwa afe'emman; kunni mitti mitting wogga giddo mitte mitte agenjo indaachcho shiqisha'emmakemman. 8 Summi insa'neekinna konneechchi butta hedheeken:

Beenihuuri'i, tullichchuwwiinke Efireemike bogik galchalli

9 Bendeqeri'i, Maqaatsike, Sha'alibiimike, Betishemeshikenna Eloonibetihaanaa'a qachchuwwik galchalli; 10 Beeniheseedi, Arubootik giddo afemaake Sekootike qachchikinna Heferike bogi duuchchik galchalli,

11 Beni Aminadaabi'i, Solomoonixxa belto Xaafatii'i, aadhe'emmake Doorik galchalli;

12 Ahiluudik belti Be'aana, Ta'inakinna Megidoke iittann Tsartaani aane'e adaddeshumma Iyyizira'eeli hedheeke Beetishane duuchcha'n ookko'ninna Yoqime'ami wido Abeeli Mehoola qico'ni hedheeke qachchuwwiki galchalli;

13 Benigeberi'i, Gela'adi Raamotike qachchik, ookkonni Gele'adi giddo Minaaseka belto Iyya'erike olla'uwwik, Baasaani giddo Aregobik awuraajji iittanni huluwwatike cufana'n sageettotika danqarsanjuwwa afe'eek kinjinke dalla'uwwi buqeme'eeke lumollamma jaane tomme qachchuwwik galchalli;

14 Idoki belti Ahinadaab, Mahinayimik galchalli;

15 Ahima'aatsi Nefitaalemika boga galchalli; isinna Solomoonixxa belto Baasimaati'i aadhe'emman.

16 Huushak belti Be'aana, Aseerikinna Be'aalotik galchalli;

17 Faaruwwaki belti Iyyosaafixi Yisakoorik galchalli;

18 Elaki belti Saami Biiniyamiki galchalli;

19 Uuriki belti Gebeeri, Amoorik ardik moyanji Siihooninna Baasaanika moyanjo Oogike galchina'emmaka gala'adike galchallomman; isinna awuraajjiinke qofike galchallomman.

20 Yihudakenna Isira'eelike ardik laakkoossi abbaayyatike maanchishsha bira sa'eeman; ardikinna ite ha'wa'n gamada'emmani.✝ 21 Solomooninna Afiraaxxisike galaananaa'n Filisixeemike bogi qico'n ookko'ninna Gibtseke bogixxe gabala qico'n hedheeke moyanjuwwika boga galcha'nemmani; konne boguwwik ardi duuchchi Solomooni'a iribo isi'a uwwa'ni hedhemmake baro duuchcha'n isi'a hireme gale.

22 Solomooni'a barra barrande hasissaammaxxi ita, onde kuma kiilo qicixxi yo'oshsha eloxxi bulle, tomme kuma goofa bulle, 23 Mine falendeexxi tomme sangoole, quffeexxe bada'a'n allalemaaka lame tomme jibootta, mitte dhibba gedhebiinxa koribeeyyenna re'etixxa koribeeyye, iittanni gadansa, buddanne, bada'atixxa re'uwwanna elollamma ci'a. 24 Efiraaxisike galaaninaa'n dhidhimi darre'n Tifisake qachchinaa'n Gaazake qachchiqico'n hedheeka moyanjuwwa galcha'emmaxxee duuchchi darrenaa'n nage'ik hedha'emman. 25 Solomoonike baro duuchcha'n Daanii'n Berisaabehi qico'n hedheeki Yihudakinna Isira'eeliki mitti mittingi manni hadi ifixxe woyinetike hiddichchi hundanna ifike balaseti haqichchi hunda nage'iki offo'le hedha'emman.

26 Solomoon gaare harikisaak fadhadi galaaka shoole tomme kuma dalla'anna tommenna lame kuma fadhado afe'emani.✝

27 Awuraajjiink ja'laabuwwi agenjo agenjo'ninni bado badoti moyanjo Solomooni'anna isike mowatike mine'ninaa'n itaake duuchchi'a hasissaaxxa ita, mittichchinna xe'yebaangi shiqinsha'nemmani. 28 Iittanni sarageelluwwinke fadhaduwwi'aanna guluffiinke fadhaduwwi'a hasisaake boonchiba'a sowwakanna hicaace idanga'emman.

29 Mageni Solomooni'a beekkumakannaa lumoshsha yo'oxxa galchecca iittanni abbaayyatike maanchishsha ba'laxxa sammo uwwe. 30 Solomoonik beekkumi borotike mannike beekkumanaa'n yo'oshsha caaleekenna Gibtseke beekkuma duuchchanaa'n sa'ekemmani. 31 Isinna fedheeke manji caala beekkichchakemmani; Ezirahichcho Etaaninaa'n, Maahoolixxa oose Heemaninaa'ninna, Kelqeedinaa'n, iittanni Daari'aa'inaa'n caala beekichchakkemmani; gurri iskinna qarqarake'n hedheeke gosa gosake arda duuchcha'n laqeme.✝ 32 Isinna sase kuma mammassuwwa haaso'e; isixxe faarok laakkoossinna mitte kumanna ondekemman.✝ 33 Solomoon haqichchuwwakenaa'n Libaanoosike birbirsanaa'n baxxe dalla'i giddo lataake hisophike hiddichchixxee'e haaso'edheen; iittanni binichchuwwinxe'e, ci'atixxee, godobiki me'amalchuwwixxenna qulxu'muwwatixxe'e haaso'edheeni. 34 Beekkuma isika laqeeki gosa gosake moyanjuwwa duuchchanaa'n ergemeeki bogi bogik manni duuchchi Solomoonika beekkuma laqo'a dage.