1 Iyyorbi'aami tolcha shiqilshatee'e tolchini bira uurree'na dada duuchchik Duuchchi Woddike Goottike hiyyichchi'a ajajemeexxi mitti Mageniink manji Yihuda'ni Beeti'eeli'a dage. 2 Tolchimalchokanna dada duuchchik Duuchchi Woddike Goottike hiyyichchi gibati hiyyee qici, «Koo tolchimalcho dada duuchchik Duuchchi Woddiki Gootti hiyya'nee qici, ‹kunse Iyyosiyaasi hiyyemaak Daawwitixxe gosa'a ilemaani isinna ta'aa kaba tolcha shiqisha'neekaara tullichchuwwake'ni magenoonfattamaxxa qeese ate'ni hana tolchaan; manniinxi miqenna ate'ni hana ha'yitaan› » hiyye.✝ 3 Eettenee barra iikki Mageniinki manji beessisa hiyye uwwee qici, «Dada duuchchik Duuchchi Woddik Gootti uwwek beessisi, ‹Kunse, tolchimalchi hacaqqi hiyyaan hana hedhemmak bululinna dunemaan› » hitaaxxen.

4 Moyanji Iyyorbi'aami iikki Mageniink manji Beetelike tolchimalchoke'ni canca'ni haaso'eexxa laqe anga ifixxa tolchimalchoke'ni ke'isseexxi, «Isoo abidde!» hiyye. Yaane kinni iitti ke'issemmaxxi anga soorte gatte; bukki assanna dande'ebaan. 5 Ittanni iikki mageniink manji dada duuchchik Duuchchi Woddike Gootta no'oke Magenike hiyyichcho'ni akeekeme uwwemmake beessisishanni tolchimalchi hacaqqi hiyye; bululikinna duneme.

6 Ookkoo'ni moyanji kinna Mageniinka manjo, «Anga anxa fayyiso'a dada duuchchika Duuchchi Woddika Gootta atika Mageno kadhati; ani'a soodati» hiyye; Tennexxe Mageniink manji dada duuchchik Duuchchika Woddika Gootta kadhate; moyanjiinxi angana fayyite; edi woddiba higge.

7 Moyanji kinna Mageniinka manjo, «Amo weyi afo'o uggu'litatton aniba mine marro; uwwatanna ati'a uwwannon» hiyye. 8 Mageniink manji kinni moyanjo hiyyee qici, «Horattettelchonaa'n gamisakanna midde uutettele atinni welti me'abo'non; konno'o waasakanna itabo'non, wode'ekanna ha'wabo'noni. 9 Dada duuchchik Duuchchi Woddike Goottike hiyyichchon, ‹Waasakanna ittoxxe, wode'ekanna ha'witoxxe me'iteteka ora higgoxxe› hiyyaake ajaja ani'a uwweme'en» hiyye. 10 Tennexxe'e dageeka ora waaleexxi welenga ora Beeteli'a hige.

11 Ookkone wodda Beeti'eeli'i hedha'neek mitti wabeek geerchi hedhemman; oose isixxinna daggeexxi eettene barra'ni Magenik manji ookko'o asseexxa duuchchanna moyanjo maa hiyyeexxa anna insa'neeke'n kulle. 12 Anni insa'neekinna, «Isinnii hoone ora hige?» hine insa'ne'e laqe oosetinna Yihudaa'n dageek Mageniink manji higeeka ora anna insa'neenge'n leellinshe. 13 Tennexxe oosetanna, «Amme harichcho ani'a fe'we» hiyye. Insa'nenna harichcho feeneexxi hana gulunfe; 14 Gulufeexxi ookkonee'e Mageniink manjo hordofe. Ookko'n qilxi hunda ofo'lee'na uudeexxi, «Yihudaa'n daggettek Mageniink manji atetee?» hiyye laqe.

Isinna, «Eeti anenden» hiyye hiisse haaso'e. 15 Tennexxee iikki wabeek, «Welti mine marree'na ita ittotta'a ke'i» hiyye.

16 Mageniinki manjinna hiyyee qici, «Udumi'a atinni welti hige'e me'abo'noni; konne booncho'ninna atinni welti ita itabo'noni; wodi'iinxa gadenna maqabo'noni. 17 ‹Ookko'n ita itabonoshsha, wode'ekanna ha'wabo'noshsha, daggeetteka ora wirri hite higgaboxxoshsha› hiyye dada duuchchik Duuchchi Woddik Gootti anee ajaje'eni» hiyye.

18 Iikki wabeek geerchi kinni, «Aninna atishanni wabeekaken; iimik Eriganji dada duuchchik Duuchchi Woddik Gootti hiyyeeka hiyyichcho ane'n hiyyee qici, ‹Ite ha'wo'aa atike minibaa isoo hiissite iyyedagi› hiyye'neen» hiyye. Yaane kinni isi isoo sobeetemmani. 19 Tennexxe mageniinki manji isinn welti higeexxi mine isikenaa'n ite ha'we.

20 Itate'n he'ne'naa'a; dada duuchchik Duuchchi Woddike Goottik hiyychchi wiri asse hiissemmake ookkone wabeek geerchibaa dage; 21 Yihudakenaa'n dagemmake Mageniinke manji'a; «Dda duuchchik Duuchchi Woddik Gootti hiyya'nee qici, ‹dada duuchchik Duuchchi Woddike Goottika hiyyichcho tuffatteetteni; dada duuchchik Duuchchi Woddiki Gootti atiki Magen ati'a uwweeka ajajuwwa heqqexxeboxxoni. 22 Wirri hite higgettexxi ite ha'witaboxxoshsha hiyye kuleeke booncho'n ita itte'e; wodde'ekanna ha'witeteni. Tennexxe renshi atiki Annuwwi atiki moogememmake hireessa'n moogendaboxxoni› » hiyya'n canca'n isi'a haaso'e.

23 Mageniinki manji ite ha'we ke'echchi uduma iikki wirri asse'e hiissemmaki wabeek ifika harrichchonna isi'a fe'e. 24 Isinna me'ande'ni hedhe'naa neenqi orake'n shiye; renshi orake'n ibeemmaani; harichchotinna neenqi renshi bira uurineemmani. 25 Ookko'n sa'aammaki manni renshi orake'n ibee'na'a; neenqi bira uuree'na uundemmaxxe; iikki wabeek geerchi hedhemmake qachcha'n marre'e kaddeexxa haasoone.

26 Iikki orakenaa'n isoo hiissemmaki wabeek tenne laqeexxi, «Kunni manji dada duuchchik Duuchchi Woddike Goottika hiyyichcho tuffateemmake Mageniinke manjoni; dada duuchchik Duuchchi Woddiki Gootti hiyye xexxe'achchiisemmashaani; sa'isse uuwee'naa neenqi ninnife shiyyeeni» hiyye.

27 Ookkoneechchi uduma iikki wabeek oose ifixxa, «Harrichcho ani'a fe'we» hiyye; harrichchokanna feene. 28 Ookkoonna mareexxi renshi orake'n ibee'na harrichchotina neenqi bira uurrine'na afe; neenqikinna rensha iteemmabaani; harrichchotanna enqeemmabaani. 29 Tennexxee iikki wabeek ookkone Mageniinke manjika rensha aadheexxi harrete'n fe'e; oodhishiishe moogo'a ifike qachchibaa iyyedage. 30 Ookkoo'n rensha ifike hadike hirreessa'n mooge; «No'oke dayyo! No'oke dayyo!» hina'n isi'a oo'ne.

31 Moonge ke'neechchi uduma oose ifixxa hiyyee qici, «Ani reyanno wodda Mageniinki manji moogemeemmake hirreessa'n aneenna moogge; miqe anxanna isixxe miqe bira ugge. 32 Beeti'eel hedheeke tolchimalcho'n Semaariyake qachchuwwa'ninna tulluchuwwa'n hedheeke magenoonfanchotike boonchuwwa'n dada duuchchika Duuchchi Woddike Goottika hiyyichcho lallaba'ni laqiseeki hiyyichchi dhugaandinni muuxemaakeni» hiyye.

33 Tinn duuchcha kadee'naani Iyyorbi'aami fuggoke oranaa'n higebaani; saxxexxini tulluchchuwwake'n magenoonfantammaba futti hiyyeenga harire qeesete assaammani; qeesete kado'a hasaaka duuchcha tulluchchuwwa magenoonfataammake'n qeesete asse hariira'nemmani. 34 Tinn cubbo Iyyorbi'aamixxi horte buttate'n hexxabaashshanna bakka baxxaashsha buutote kadde.