1 Eettene yanna'n Iyyorbi'aamik belti Abiya elagophe; 2 Iyyorbi'aaminna are ifixxa hiyyee qici, «Ke'i, Iyyorbi'amixxe are hine egennabaashsha ifi assite; Seelo'a me'i; konne arda'n moyannoshsha ane'n kuleeki wabeek Akiya ookko hedheeni. 3 Me'itatto wodda tomme wodhamo, heenooxxa daabbonna mitte odolcho malebo abixxite me'i; isinna beltoke'n kaddaaxxa ate'n kulaani» hiyye. 4 Tennexxe Iyyorbi'aamixxi are isi hiyyeexxa assite Seelo hedheeke Akiyaba marte.

Eettene yanna Akiya cimotenaa'n kexxeexxa ille garjeemmani. 5 Kaddo male'e Iyyorbi'aamixxi are ela gophpheeke iseke beltixxe qodhdhito'a ise ifi wele manjishsha assite daga'neexxanna maa hiyye ise'a haaso'aaxxa dada duuchchik Duuchchi Woddik Gootti ediseexxi raagichcho Akiya'a kulemmaani.

6 Akiyanna ise hulatiba gelte'na hirba iseka laqeexxi ise'a hiyyee qici, «Tee Iyyorbi'aamixxe are mini'a e'yi; yaane kinni mayeete ifi wele manjoshsha assatee hassettelchi? Ati'a elobaaxxa odo ati'a kulonna'a ergemeenneni. 7 Ta'a martettexxi Iyyorbi'aami'i dada duuchchik Duuchchi Woddik Gootti Isira'eeliki Mageni hiyya'neexxi hiyya hita'nee qici: ‹Ardi giddi'n ke'issennexxi Isra'eelike ardike akeekisanjo ate'e asseenneni. 8 Daawwitixxe sannenaa'n mootuma hoyyennexxi ati'a uwweenneni; ati kinni ani edo eloxxa calla assita'n ajaja anka heqqedhemmake mitte godobinni ane'e hordofemmake anke erganjo Daawwitishsha kaddeboxxoni. 9 Ati edi darre hedhemmake duuchchi caala ati fuggoxxa hujjetteni; ifi'ani baqissetteke sibilinni wele magenuwwa giissite aneenna mufachchissetteni; dudduro ane'n wirri hitetteni.

10 « ‹Tennexxe aninna Iyyorbi'aamike mine'n ba'ne geessisannoni. Garbichchokeenna kado'o ca'ichcha Iyyorbi'amika labbaka duuchcha Isira'eelinaa'n birannoni; hori gubate bululoke kadammashshaani; aninna Iyyorbi'amika mine iittanni gubannoni.✝ 11 Iyyorbi'aamixxe hortenaa'n qachchi giddo reyaaka worishshi itaani; hadi giddo reyaaka kinni allaattuwwa ittaani. Tenne haaso'eeki dada duuchchike Duuchchi Woddike Goottani!›

12 «Yooni mini atikiba'a me'i. Hexxetteke qachcha'n e'yitetteshshani belti reyani. 13 Isira'eeli duuchchi isi'a ooxxa'n mooggaani. Dada duuchchik Duuchchi Woddik Gootti Isira'eeliki Mageni Iyyorbi'aamike mine duuchchanaa'n gammade'eki iso'n calla kadeemmaxxee'e seeriki moogemaaki iso callani.

14 «Tennee iimi darre, dada duuchchik Duuchchi Woddik Gootti Iyyorbi'aamika mini hado biraaka moyanjo Isira'eeli'n ifi'anni techcho ke'issaani; tinninna kaddaaki ta'andeni. 15 Dad duuchchik Duuchchi Woddi Gootti Isira'eeli'i wodi'i giddo lele'maammake shonbooqishsha lele'misaani; Asheera hinaake magenuwwixxa fakke giissine dada duuchchik Duuchchi Woddika Gootta mufachchiisseemmaxxee'e; dada duuchchik Duuchchi Woddiki Gootti edike annuwa insa'neke uuwwemake konne eloke boganaa'n Isira'eelii'i shorraani; galaani widonna insa'ne xexxeeraani. 16 Iyyorbi'aami cubbo hujeexxi Isira'eelinna cubbo hujjaashsha assemmaxxe dada duuchchik Duuchchi Woddiki Gootti Isra'eli hune waalaani.»

17 Iyyorbi'aamixxi arenna kexxeexxi Tirtsa'a ifike minibaa me'iteeni. Mini'a e'yiteeshaani belti reyeeni. 18 Dada duuchchik Duuchchi Woddik Gootti erganjo ifike wabeeka Akiya'n kulemmashshanni Isira'eeli duuchchi isi'a ooxxe mooge.

19 Wele Iyyorbi'aami asseexxe yaane duuchchi loleeka lolanna galcha isixxa duuchcha Isira'eelike moyanjuwwike raaginni borreesseme'eni. 20 Iyyorbi'aaminna lame tommenna lame woga moyeexxi reye; belti isiki Naadaabinna isixxe bakka'n moyye.

21 Solomoonik belti Roobi'aami Yihudake'n moyee wodda wogga isixxi shoole tommenna mitte woggammani; isinna dada duuchchik Duuchchi Woddik Gootti summi isiki ye'emaashsha Isira'eelixxe gosa duuchchanaa'n fi'leexxi Iyyerusaalemi'n tommenna torbaane wogga moye. Ama isixxi Na'ima hiyyendaaxxe Amoonitotemmani.

22 Yihudak ardi dada duuchchik Duuchchi Woddike Gootti edo fuggoxxa yaane asse; edike annuwwi insa'neeki erra insa'ne hunjeexxi cubbo jabaxxa mufe mufataashsha assite. 23 Iittanni mitte mitte tullichcha'ninna lumollamma haqquwwa hunda tullichchuwwake'n magenoonfantaaxxa fakkuwwa; Asheera hinaake magenuwwixxa fakke ifi'ani uurririssine.✝ 24 Tennenaa'n saxxeexxa fugguwwa magenoonfantammake mine'n yabaabulaaki mann ookkone boga'n hedhemmani; Duuchchi Woddik Gootti Isira'eeli edi'n shorre fulcheemmaki gosa gosaki ardi hujammaxxa fuggoxxa huje duuchcha insa'neenna hunje.✝

25 Roobi'aami moyeexxe saddeetixxe wogga'n Gibtsek moyanji Shishaaqi Iyyerusaalemi lole miidhe. 26 Dada duuchchik Duuchchi Woddike Goottika galmanna moyatike minixxa karra adhdhe; Solomoon giissisemmaxxa woriqetixxa wontuwwa midde gattebaangi adhdhe me'e.✝ 27 Tennexxe moyanji Roobi'aami konneechcho bakkate'n hiisso'a sageettotixxa wonte giissiseexxi moyatike minxa hula heqqammaki heqqanjuwwiki akeekisanjuwwi ajajaashsha asse. 28 Moyanji dada duuchchik Duuchchi Woddike Goottike galmiba'a me'a wodda duuchcha heqanjuwwi wontuwwa edo abinda'nemmani; okko'n heqqanjjuwwiinxe kuta giddo hiissine uggina'nemmani.

29 Gattexxi Roobi'aamixxi galcha assexxi duuchcha Yihudake moyanjuwwixxe jirite'n borreessendeexxeba? 30 Roobi'aamixxenna Iyyorbi'aamixxe oddo'n duuchchi wodda loli hedhemmani. 31 Roobi'aaminna reye; ediki annuwa mongemmake Daawwitike qachcha'n moonge. Ama isixxi Na'ima hiyyendaaxxe Amoonixxe gosammaani. Belti isiki Abiya isixxe bakkaa'n moye.