1 Moyanji Solomooni Feri'oonixxe belto gadho heddo wele bogixxa melaalle tinninna Mo'aabitotixxa, Amoonitotixxa, Eedoomitotixxa, Sidoonitotixxa, Hiititotixxa melaalle eeyye.✝ 2 Insa'nenna Duuchchi Woddike Gootti Isira'eeli'i, «Qalbe ha'nooxxa insa'neeke magenuwwiba dhugaadinn hiise'naammaxxe'e insa'neexxa dubarte aadha ha'no'a hasissabaan» hiyye. Hiyyemmake gosa gosake ardi darre'ni he'nemman; kaddo malee'e Solomoon kinni, insa'nenni weli jaalalati jammi hiyye.✝ 3 Isinna moyanjuwwakenaa'n ilendeexxa torbaane dhibba aruwwanna sase dhibba gursume'a aadheemman; aruwwatinna qalbe isixxi weleba daaqqaashsha assite. 4 Solomoon cimee wodda aruwwa isixxi wele magenuwwa magenoonfataashsha assite; ann isiki Daawwiti mitte godobinni ajajjememmashsha Solomoon mittte godobinni Duuchchi Woddike Gootti'a ajajjemebaani. 5 Solomooninna Sidoonitotixxe melaalleka mageno asitaarooti, batto'eeke Amoonitotika mageno Milkoomiii'i magenoonfate. 6 Tennexxee Solomoon Duuchchi Woddike Gootti edo fuggoxxa yaane asse; anna isike Daawwitishsha Duuchchi Woddika Gootta muuxamin qico'n hordofebaani.

7 Solomoon Iyyerusaalemii'n boroti darree'n hexxeexxe kooba'n batto'eeke Mo'aabitotike mageni'a Kemooshi'a, iittaanni batto'eeke Amoonitotike mageno Moloki'a magenoonfantaaka tullichcha giisse. 8 Magenuwwa insa'neeke hixaana guphphitaaxxenna tolcha shiqilshitaaxxe wele aruwwa ifixxe duuchchi'a konne qicinn insa'ne'a giisse.

9 Solomoon lame yanna isi'a leellemmake Isira'eelike Duuchchi Woddike Gootta Magenonaa'n bayyatemmaxxe; Duuchchi Woddiki Gootti iso'n mufate. 10 Mittelchonna wele magenuwwa hordofabaashsha Solomooni'i hoyyoolenna midde; Solomoon Duuchchi Woddike Goottika ajaja heqqedhebaani. 11 Tennexxee Duuchchi Woddik Gootti Solomoonii'i hiyyee qici, «Tenne assitettaaxxe ati'a ajajennexxa kako anxanna seera anka heqqedha gophphettaxxe; mootumma atixxa atenaa'n hoyye'e eriganjuwwa atikenaa'n mittekee uwwannoni. 12 Tenne kinn anni atikixxe Daawwitixxee hiyyee baro atike'ni assabo'noni; mootumma atixxa lameba hiissannoki belti atikixxe anganaa'niteni. 13 Ittanna kaddoole mootumma duuchcha isonaa'n hoyyabo'noni; yaanne kinni anke eriganjixxe Daawwitixxennaa fi'lennaxxe Iyyerusaalemixxe hiyye'e belto atikee mitte gosa uwwannoni» hiyye.

14 Ookkoneechchi uduma Duuchchi Woddik Gootti Edoomike moyanjuwwixxe gosanaa'n Eedoomichcho Hadaadi Solomooni'n naaphake asse ke'isse. 15 Ookkoneechchi edigama Daawwiti Eedoomike mannini welti lolemmamma wodda; reyeka manna moogo'a dageemmaki lolinke manniki ajajali Iyyo'abi Edoomika labballo duuchcha shiyee bireemmani. 16 Iyyo'aabinna Isira'eeliki loliinki mann duuchchi Eedoomika labballo duuchcha shinne birraa qico'n ookko'o jaane agenjo turreemmani. 17 Hadaadi kinni oosummadinni hedhe anna isikee ergatemeemmake heenoke Eedoomike manninni welti Gibtse'a baaje. 18 Insa'nenna Midiyaamii'n ke'neexxi Faaraani'a me'ine; Faraani'n manna adhdhineexxi Gibtse'a dangeexxi; Gibtseke moyanjiba'a Feri'ooniba marre. Moyanjikinna Hadaadi'a minekanna boga uwwe; itaachchonna uwwe hiyye ajaje.

19 Feri'ooninna Hadaadi yo'oshsha eeyye; tennexxee isixxe arexxa mootitte Xaafineesixxa dayyo iso'n aadhise. 20 Xaafineesixxi dayyonna Genbaati hinaaka labbaka belto isi'a ilde; mootitte Xaafineesi moyatike mine'n adhdhite nosseexxe; Genbaatinna Feri'oonixxe oosenni welti nophphe.

21 Hadaadi Gibtsen hedheemma wodda Daawwitiinna lolinka manna ajajammaki Iyyo'abi renneexxa laqe. Hadaadinna Feri'oonii'i «Bogi ankiba'a me'onna'a eetti ani'a uwwi» hiyye.

22 Feri'ooninna, «Kaba ati'a maachcho xe'ye'naate bogi atikiba'a me'atee hassettelchi?» hiyye qore.

Hadaadinna, «Mittilchi xe'yeechchi hedhebaani; me'onaa'a calla eetti an'a uwwi» hiyye.

23 Higgeenna Mageni Rezooni hiyyemaaka Eli'aadanika belto Solomooni'n naaphake asse ke'isse; Rezooni Tsobake moyaanjonaa'n gootta ifike Hadaai'ezerina'n finqileemmakemmani. 24 Daawwiti Subaanika loliinka manna shiye bireechchi uduma Rezooni manna qarqara ifike'n bukki assedheexxi finqileemmake mannike akeekisanjo kade; Rezoonina ifike manninni Demasiqo'a me'e ofo'le; okko'o iso'o moyanjoke assine. 25 Hadaadi geessiseexxe rakko gadho Rezooni Solomoonike baro duuchcha'n Isira'eelike naapha kade; Rezooni Sooriyake moyanjo kade; Isira'eelixxa ijje giba'nemmani.

26 Ittaanni Solomoonike ja'labuwwanaa'n mitti Naabaaxik belti Iyyorbi'aami moyanjoke'n fuggoxxinni ke'e; isinna Tsereeda hiyyemaake boganaa'n dageeke Efireemixxe sanne kadaa wodda; ama isixxinna Tsuri'a hiyyendaaxxe aro'i reyexxe manjichchomani.

27 Isi moyanjoke'n fuggoxxinni ke'exxi buuto; Solomoon kiphake kaddaaxxa koobbuwwa giisa'n anni ifikike Daawwitike qachchika dalla'a qammachcha'nemmani. 28 Iyyorbi'aaminna yo'oshsha ege'na afeeke dargaggeessa manjomani; Solomooninna kunni dargaggeessi elo qicinni huje huja'neexxa uudeexxa yanna Yooseefixxe gosa giddo hunja'neexxe hunnatixxe huje duuchchi'a umoke asse.

29 Eettene yannaa'n Iyyorbi'aami Iyyerusaalemii'n fulee me'a'neege'ni haarooka ejja oddo'week, Seeloo'ni dageek wabeek Akiya qachchii gadho isoo orake'n afe; 30 Akiya oddo'wemmaka haarooka ejja adheexxi tommenna lameba daddare. 31 Ookkoneechchi uduma Iyyorbi'aami hiyyee qici: «Tomme daremalcho ati ifi'a adhdhi; Duuchchi Woddik Gootti Isira'eeliki Magen hiyya'nee qici: ‹Kunseteni mootumma Solomooninaa'n hoyye'e tomme gosa ati'a uuwwannoni. 32 Yaane kinni anke eriganjixxe Daawwitixxenna Isira'eelixxe gosa duuchchanaa'n fi'lennaxxe Iyyerusaalemike qachchixxe'e hiyye'e mitte gosa isi'a gatisannoni. 33 Tennee assaannelchi anee ginbeexxi Sidoonaka magenuwwa astaarooti, Mo'aabika magenuwwa kamooshi, Amoonitotika magenuwwa Milkoomii'i magenoofantemmaxxe ittaanni anni isiki Daawwiti assemmaashsha anke ora'n me'a gonpheemmaxxe ani edo eloxxa assa gonpheemmaxxe; galduma ankanna seera anka heqqedha gonphemmaxxeeteni.

34 « ‹Kaddo male'e mootumma isixxa duuchcha isonaa'ni hoyyabo'non, tenneenna assaannek fi'lennakixxe seerakanna ajaja anka heqqedhemmaxxe'e anke erganjixxe Daawwitixxee hiyye hedhaake baro duuchcha'ni moyaashsha assannon. 35 Mootumma isixxa belto isikenaa'n adhdhannon; ati'anna tomme gosa uwwannon 36 Anki summi ye'emaashsha fi'lennaxxe eettene Iyyerusaalemike qachcha'n erganjo anke Daawwiti'a duuchchin wodda ani edo ifi hedhaasha belto isike'e mitte gosa uwwannon. 37 Atee kinni atee'e Isira'eelike moyanjo assannon; ati eettetteka boga duuchcha akeekkatton. 38 Erganji ank Daawwiti assemmashanni atinna ani ajajenneka ajaja anka duuchcha muuxxottole ora anke'n me'itottole seerakannaa ajaja anka heqqexxe toggitte yaane ani edo assitoottole atinni welti hedhannon; Dawwitixxa mootumma jabeessenneshshanni ati'aanna ittann duuchchin woddi'a hexxaaxxa mootumma jabeessannon; Isira'eelinna ati'a uwwannon. 39 Tennenaa'n kexxeexxa Daawwitika mine salphisannon; yaane kinni duuchchiin wodda'atebaan› » hiyye.

40 Solomooni Iyyorba'amii'i shiyatee hase, Iyyorbi'aaminna Gibtse'a baaje moyanjo Shishaaqiba mareexxi Solomoon reyaaqico'ni ookkooni ofo'le.

41 Solomoon moyemmake baro'n asseexxinna hujeexxi duuchcha, beekkumi isikinna Solomoonixxe jirtetike maxaafa'ni borreesseme'eba? 42 Solomoon Isira'eeli duuchcha'n Iyyerusaalemi'i moyeeki shoole tomme woggan. 43 Ookkoneechchi uduma Solomoon lummedhe anni ifikike Daawwitike qachcha'ni moonge; belti isik Roobi'aaminna isixxe bakka'ni moye.