1 Xiroosik moyanji Kiraami baro isike duuchcha'ni Daawwitike jaalo kademmaxxe'e, Solomooni anniiinxe bakka'ni moyo'a hariiremeexxa laqee wodda, ifika erganjuwwa Solomooniba'a erge. 2 Solomooninna Kiraamibaa erga illeema hiisse hiyye ergee qici, 3 «Egendinemmashanni anni ank dada duuchcha ajajaak Daawwit Duuchchi Woddike Gootta, ifike Mageni'a galma ijaara dande'emmaba'a; tinninna kaddeechchi dada duuchcha ajajaak Duuuchchii Woddik Gootti naapha Daawwitika anga Daawwitixxe'n ibisaaqico'n naaphi isik duuchchi darrenaa'n iso'o adhaammaxxeeten. 4 Ta'a kinni dada duuchhca ajajaak Duuchchi Woddik Gootti anki Magen qarqara anka duuchcha nage'ake asse'en; naaphakanna ba'ne iyyedagaachcho afebe'non. 5 Kunse, dada duuchcha ajajaak Duuchchi Woddik Gootti anna anke Daawwiti'a, ‹Anke summi'a galma ijaaro'a ate'ni aane'e atixxe moote'n ofo'lishannoke atik belton› hiyye haaso'emmashshanni dada duuchcha ajajaak Duuchchi Woddike Gootta anke Magenike summi'a galma ijaaronna'a hedeenen.✝

6 «Tennexxee anke manni giddii'ni Sidoonake mannishsha haqqe karatixxa ege'na afeek hedhebaaxxa atinni egendeetaxxe'e Libaanoosik birbirsi ani'a karemaashsha ajaja sa'issi; ank manni atike manninni welti hujaan; atike mannika runda atinni murtettexxe qixxe'n uwwannon.»

7 Kiraami Solomoonixxi erga geltee wodda yo'oshsha gammadeexxi, «Konne'e lomoka arda akeeko'a dada duuchhca ajajaak Duuchchi Woddik Gootti Daawwiti'a beeka belto uwwemmaxxe'e techcho Duuchchi Woddike Gootti saademowwaal» hiyye.

8 Tennexxe Kiraami, Solomooni'n hiyye ergee qic, «Erga atixxi ane'e gelte'een; birbirsiinxanna hi'neessiinxa mura shiqisha uuddaaxxe'n hassettexxa duuchcha assannon. 9 Ank manni mura adadde Libaanoosinaa'n abbaayyati qico'n harkinsaan; aninna mura duuchcha mitteba usurende'e ati heddeteke boonni qco'ni abbaayyate'ni shallallise gelttashsha assannon; ookkoonna usurra tikee'na'a atinna adhdhitatton; atinna anke mootummatike minike manni'a ita uwwiyyoti halcha anxa muuxxatton.»

10 Konnee qicin Kiraami Solomooni'a hasissaaxxa birbirsiinxanna hi'neessinxa mura duuchcha shiqisha'emman. 11 Solomooninna kinni Kiraamike mootummatike minike manni'a itate'e lame dhibba kuma kiilo giraama dinne, shoole dhibba liitire qullitte ejersiinxa zayite isi'a uwwe; Solomooni wogga wogga'ninni tenne'e Kiraami'a uwwa'emman. 12 Dada duuchcha ajajaak Duuchchi Woddik Gootti Solomooni'i addachiisemmashshanni Solomooni'a beekkuma uwwe; Kiraamixxenna Solomoonixxe oddo'ni eloke mittoomma hedheman; lamiing weli'a kako aange.

13 Moyanji Solomoon Isira'eeli duuchchi giddii'n hunnatixxe hujeka manna filemaashsha asse; laakkoossi insa'neekinna sase tomme kumammani. 14 Isinna insa'ne'e agenjo agenjo'ninni bado badoti tomme tomme kuma Libaanoosi erga'na'a, agenjo Libaanoosi hunja'n lame lame agenjo ifi ifike mine'n hafuura adhdhina'emman; Adooniraaminna insa'neeke ajajallomman.✝ 15 Solomooninna tulliichuwwinke boga'ni torbaane tomme kuma ba'o ba'edhaakanna saddeeta tomme kuma kinjo bocaaka manna afe'emman. 16 Iittann konne manni'a umoke kade'e tenne huje towataaka sase kumanna sase dhibba akeekisanjuwwa afeemman. 17 Insa'nenna moyanjike ajaja'ninni galmiinxe boosoxxe huje'a kaddaaxxa lumollamma, filende filendeexxa kino qonte fulchati bocendeexxa kino qophpheessine. 18 Solomoonikinna Kiraamik angatixxe ogeki hujaluwwinna iittanni Biibiloonik manni Woyyichchi Galmiinke ijaarsi'a kaddaaxxa haqqenna kino qophpheessine.