1 Saabaxxi mootitte Duuchchi Woddike Goottike summi'a ulfinna idaga'neeka Solomoonika gurra laqqe wodda mekki assaake qortumin iso'o hega uudo'a dagge. 2 Lumoka manna duuka hordofiseexxi shitto, yo'oxxa worqenna hiri fiixxeka kinjuwwa gaalaken fe'iseexxi Iyyerusaalemi'i galteechi uduma Solomoonibaa marteexxi godoba affe'eka yaada duuchcha iso'n shiqishshe. 3 Solomooninna laqqeexxa duuchcha ise'a hiisse; moyanji hiissa gophee'na gateek mitti qortuminna hedhebaan. 4 Saabaxxi mootitte Solomoonika beekkuma; ijaareemmaxxa mooteti mine uuddaa wodda, 5 Ittanni isixxe qortten shiqqaaxxa ita; ja'laabuwwi ofo'leexxa; ergatemammak aadatixxe seemmanninn, bulbulo ibisammakara, ittanni Duuchchi Woddike Goottike galmiba shiqisheeka ciincatika tolcha uudda wodda hara yo'oshsha mambe'a hite.

6 Isenna moyanjo hitee qici, «Muuxxettexxe hujexxeenna beekkuma atike'e boga aninge'ni hedhenne wodda laqenexxi dhugaaten. 7 Kaddo malee'e ani umi aniniginnini dagee'e konneechchuwwa illeti uudannoxxee addateennabaan; dhugaandinni gamisa midde ane'ni kulle'ebaan; beekkumi atikinna durumma atixxi laqene iimi darren. 8 Atike mannixxa wodo! Duuchchi wodda ati edo uurrneexxi beekkuma atika laqa'neer ja'laabuwwiinxa wodo! 9 Ate'n gammade Isira'eelixe moote'ni ate'e ofo'lisheek Duuchchi Woddik Gootti atik Magen saademowwal; Duuchchi Woddik Gootti duuchchi woddixxe isixxe jaalalanni Isira'eel'i eeyyatenaa'ni kexxeexxa; dhugaatixxi murtenna qullumma bira saxxaashsha atee'e moyanjoke asse'en» hite.

10 Moyanjoke'e shoole kuma kiilo worqe xe'maxxa shuutta shufruwwanna fiixe'eka kinjo isi'a uute; Saabaxxi mootitte moyanjo Solomooni'a uutemmaxxe qiciixxa bira saxxeexxa xe'maxxa shuuta shufuruwwa ookkoneechchi uduma hara uwweeki hedhebaani.✝

11 Iittann Ofiiri'n worqe iyyedageexxi Kiraamixxi hoboluwwa yo'oxxa sandaletixxa haqqenna fiixxeeka kinjuwwa iyyedage. 12 Moyanjikinna sandaletixxa haqqe Duuchchi Woddike Goottike galmixxe kipha'anna moyatike minixxe kipha'a, faarsaleeyyete'e kiraarakanna masinqo giisinaashsha asse. Konne qico bira saxxeexxi sandaletixxi haqqe telchi qico'n hara iyyedange'na uunde egennebaani.

13 Moyanji Solomoon Saabaxxi mootitte badhaase ise'a uwweechchi gadho hasseexxanna laqeexxa duuchcha ise'a uwwe; ookko'ni isenni dagemmake manninni welti ifike bogiba higge.

14 Solomoon wogga wogga'n alfammaxxi worqe lame tommenna sase kuma kiilo qicammani. 15 Tinninna daddalaakenaa'ni wele orinn isi'a uunaammaki qaraxi; Arabiinki moyanjuwwi duuchchi bukki asse uwwaammakanna boga galchaammak manni bukki assemmaxxi irbo lebendebangiten.

16 Moyanji Solomoon bexxi assineexxe worqen lame dhibba lumolla wonte hujise; mitti mittinxe wonte'n mankeexxi worqe torbaane kiilonna gamisa worqemman. 17 Ittanni bexxi assine'exxe worqen sase dhibba shiixxaramma wonte giissise; mitte mitte wonte'nini mankeexxi worqe lame kiilo geltaaxxemman. Moyanji kinna tennee Libaanoosike gongoma hinaake mootummatike mine'n ugge.

18 Ookkoneechchi uduma moyanji Aribiinxe issooni lumoxxa moote gissiseexxi ca'itte woriqenni buure. 19 Mootetinna jaane koobbo affeemman; udumi darree'ni iima guutote'ni kuku'mitte kaddaa wodda; middanna bita'a irkantaachcho afe'en; irkantaachchi bira lami Neenqi uurre'en. 20 Jaaninixxe koobbo'n hana middi'ni jaani bita'i'ni jaani Neenqi uurre'en. Tennee fakkaattaxxi moote hoone galchatike boga'ninna hara hujende egendebaan. 21 Moyanji Solomoon ha'wa'neexxi buuda duuchcha worqeti giissineexxe kadda woddaa; Libaanoosike gongoma hiyyemaake mooyatike mini giddo hedheek miyi duuchchi ca'itte worqenn hujeme'ekemman; Solomoon galchammake baro'ni sibiljo birre la'o afeeshsha udema gophphaammaxxe sibiljo birrenn hujeme'ek miyi ijje hedhemmabaan. 22 Moyanji Kiraamixxe hoboluwanni welti Abbayyate'ni me'inaaka Terseesixxa daddalatixxa hoboluwwa afeemman. Kunnichuwwi sase sase wogga giddo mittele worqe, sibljo birrenna Arbiinxa isso, Qamaletanna buraburrite ci'a idanga'nemman.

23 Moyanji Solomooninna durummatinna beekkumik boga duuchcha'n hedheeke moyanjuwwi irra sa'emman. 24 Butta duuchcha Duuchchi Woddik Gootti Solomoonixxe qalbe'ni ugge'eka beekkuma isiba dage laqatee'e halchinaamman. 25 Wogga wogga'ninni daga'neeka manjo duuchcha sibiljo birrenna worqetik miyi, seemma, loliinka miya, shitto, fadhadokanna gaange konneechchuwwa uune badhaansaamman.

26 Solomoon fadhadiinxa gaaruwwanna fadhado bukki asse; mitte kumanna shoole dhibba fadhadiinxa gaaruwwanna tommenna lame kuma fadhaduwwa afe'emmaan. Konneechchuwwa duuchcha fadhadiinxi gaaruwwa hexxeeka qachchuwwanna isi hedhaammabba Iyyerusaalemii'i he'naashsha asse.✝ 27 Moyanji ifike galchati baro duuchcha'n Iyyerusaalemi giddo birreti sibljo kinotishsha, Birbirsiinxe haqqenna Yihudake tullichchuwwi hunda habanna latamake odi'ishsha lakko'endaammanna. 28 Solomooni'a fadhado idangeek Gibtsee'inna Qewwee'nite kadaa wodda; konneera Qewwe'ni hirte dageexxi mootummatike minxe isixxe daddaltomman.✝ 29 Mitte fadhaadinxa gaare Gibtsee'ni hirre danga'neek jaane dhibba birretik sibiljo kada wodda; fadhado kinn mitte dhibbanna onde tomme sibiljo birren hirre dangaamman; Hiititotenna Sooriyake moyanjuwi'a idange'e insa'ne'n gurgurraamman.