1 Shiixxooxxe yanna uduma Iyizira'eelichcho Naabutek woyinetke hiddichchike fichcha'n mitte yaane kadde; fichchikinna Iyyizira'eeli giddo Semaariyake moyanjike Aki'aabike moyetike mini birammani. 2 Aki'aabinna Naabutee, «Woyinetike hiddichchiki atiki fichchi moyatike anke mini bira kademmaxxe hiddichchuwwiinke fichcha assedhonna'a ani'a waali ookkonee fichchixxa bakka wele sa'eeka fichcha ati'a uwwannoni; kadaani hitotole fichchi fulchaaxxa birre ati'a uwwannoni» hiyye.

3 Naabutenna kinni «Konnee woyinetike hiddichchika fichcha edike anke Annuwwanaa'n geego adhdheenneken; ati'a uwwateenaa'n Duuchchi Woddik Gootti ane gatiso'o» hiyye hiisse haaso'e.

4 Aki'aab, Iyyizira'eelichchi Naabute «Annuwwa ankenaa'n adhdhenneka qadaada ati'a uwwabe'no!» hiyyemmaxxe Aki'aabi mufati bojogema'n ifike mine'n e'ye; mufateexxinna taqete'n sa'e diiphe; itatanna gibe.

5 Are isixxinna Elizaabeeli isibri'a shiqqeexxi; «Konne qico ate'e aarsee'na ita gibbettelchi mayeete?» hite qorte.

6 Isinna, «Iyyizira'eelichcho Naabute'e ise'n, ‹Woyinetike hiddichchiinka fichcha ane'n gurguri; eetottole konnee fichchixxa bakka wele ati'a uwwannoni› hiyyenneni; isinna kinni; ‹Anka woyinetike hiddichchika fichcha ati'a uwwabo'noni› hiyyemmaxxeeteni» hiyye.

7 Are isixxi Elizaabeelinna; «Ati ta'a Isira'eelike moyanjoni; kexxettexxi ita iti; gammadi; Iyyizira'eelichcho Naabuteka woyinetike hiddichchika fichcha ani ati'a uwwissaanoni!» hite.

8 Tennexxee borro borreessiteexxi Aki'aabike summinni beessisa uggiteexxi Naabuteke qachcha'n isinni welti hedha'neeke Ja'labuwwi'anna geedhuwwate ergte. 9 Borrotanna hite borreessitee qici, «Barra mitte agabo goddo honsaashsha lasse; Naabutenna ardi giddo eloke booncho'n ofo'lishshe. 10 Iittanni lame dhariki dhugaa kuldaaxxa dhuga'a isi edi dare ofo'lishshinee'na'a ‹Magenokanna moyanjo yowwe'eni› hite dhugaa kuldowwaali. Ookkoneechchi uduma Naabute'e qachchi gadho fulchitine kinjik cancaqqine shiwwe.»

11 Tennexxee Naabuteke qachcha'n hedha'neeki Ja'laabuwwinna geedhe Elizaabeeli borrote'n hite borreessitemmashshani assine. 12 Mitte barra agabo goddo honsaashsha lassine; Naabutenna ardi giddo eloke booncho'n ofo'lnshe. 13 Ookko lame dhara dhugaa kuldaammaxxi dhuga'a isi edi darre ofolde; ardi edo «Naabute Magenokanna moyanjo yowwe'eeni» hite dhugaa kulde. Tennexxee qachchini gadho adhdhine me'ineexxi kinjki cancanqe shinne. 14 Ookkoneechchi uduma Elizaabeeli'n «Naabute'e kinjki cancanqe shine'eni» hine erga ergine.

15 Elizaabeelinna kinjiki cancanqe shiinneexxa laqqeeshshaani; Aki'aabii'i, «Naabute kinjiki cancanqe shinne'eeni; kexxettexxi Iyyizira'eelichchi Naabute ate'n gurgura gibemmaka woyinetike hiddichchika fichcha ifike assexxe adhdhi» hite. 16 Aki'aab Naabutexxa reyexxa laqeexxi Naabuteka woyinetike hiddichchika fichcha ifike geego asedhdho'a ke'e me'e.

17 Ookkoneechchi uduma Duuchchi Woddik Gootti Teesibichcho Eliyaasi'a hiyyee qici, 18 «Semaariyake moyajo Aki'aabiba kexxe mari; Naabuteka woyinetike hiddichchika fichcha geego ifike asedho'a mare'e ta'a ookko hedheeni. 19 Isoo hitatto qici, ‹Duuchchi Woddik Gootti hiyya'nee qici, Naabutee shiltetexxi hanqattammale kara isixxa dhaaldota'ateeta?› Duuchchi Woddik Gootti hiyya'nee qici ‹wonshi Naabutexxa munde araphphemmaxxe baka'n atixxa mundenna wonshi iittanni arraaphphaani!› » ✝

20 Aki'aabinna Eliyaasii'i «Koo anke naapha! Ane'e affette kinni?» hiyye.

Eliyaasinna hiisse hiyyee qici, Duuchchi Woddike Gootti edo gibendeexxa yaane assitotta'a ifi gurgudhiteettaxxe'e «eetti! Atee afeenneni. 21 ‹Kunni ate'n bala ibisannoni; sanne atixxixxa bakka hara balleessannoni; garbakenna kadi ca'ichcha mitte mittenga Aki'aabika maa'nichcho belto Isra'elinaa'n bakka balleessannoni› 22 Ane mufachchiissettaxxeenna Isira'eeli dedhissettaxxe mini hado atika Naabaaxika belto Iyyorbi'aamike mini hadishsha; Akiyake beltike Ba'ishake mini hadishsha assannoni.

23 «Elizaabeelixxenna Duuchchi Woddik Gootti hiyya'nee qici, ‹Iyyizira'eelike dalla'i bira wonshi Elzabel'i itaani› hiyya'neeni.✝

24 «Iittanni Aki'aabike fira kadeexxi qachchi giddo reyekaara wonshi itaan; hadi giddo reyeeka allaattuwwa ittaan.»

25 Are ifixxi Elizaabeeli tirtirsitee'na Duuchchi Woddike Gootti edo fuggo assate'e Aki'aabishsha ifi sa'isse uwweedheek manji ijje hedhemmabaan. 26 Duuchchi Woddik Gootti Isira'eel edii'ni shorre'ek Amoorik manni duuchchi assemmashshan, isinna fakkuwwa magenoofatat hara gibissaaxxa batte yaane asse.

27 Aki'aab konnee hiyyichcho laqeexxa yanna seemma fulchedhe dooniyya oddo'weexxi agabo goddo sa'isse; dooniyate'ninna diiphe; yaade hangulli hiyyenna me'aamman.

28 Ookko'ninna Duuchchi Woddik Gootti Teesibichcho Eliyaasi'n hiyyee qici 29 «Aki'aab ani edo ifi hitta salphiseexxa uuddeetten? Ifi salphisemmaxxe'e yoona tenne bala hedhoti barqico'n iso'o assabo'non; yaane kinni tennee bala mine isike'n ibisaannek isike beltike baro'niten.»