1 Gele'adike boga'ni hedhamakeranaa'ni mitti Teesibixxe gosak Eliyaasi hiyyemaak wabeek moyanjo Aki'aabii'i hiyyee qici, «Ani hiyyaaneshsha kaddoole daggaxxe wogguwwa'ni bogake'ni xeeni yookaani fixxeessi hedhabaaxxa ani ergatemaannek Duuchchi Woddike Gootta Isira'eelike hedhaake Magenke summinni ati'a kulaanene» hiyye.✝

2 Ookko'n Duuchchi Woddik Gootti Eelyasii'i hiyyee qici, 3 «Kabaa'ni kexxe borotiba'a me'i; Yordaanoosii'n boroti darre'n hedheeke Koraatike galaani bira hexxeexxe dhooqa'n sho'ome. 4 Wode'e galaanakena'ni ha'witatton; qoodhanduwwi ookko'o ita ati'a shiqishaashsha ajajeennen» hiyye.

5 Tennexxee Duuchchi Woddik Gootti ajajemmashan Eeliyaasinna asse; Yordaanoosii'n boroti darre'n hedheeke Koraatike galaani bira ookko'o ofo'le. 6 Qodhanduwwikinna gorsanna galgala waasakanna maala isi'a idaga'nemman; wode'ekanna galaanakenaa'ni ha'waamman.

7 Bogake'ni xeeni gana gopheemmaxxe'e shiixxooxxe yanna uduma galaani gabe. 8 Ookko'ni Duuchchi Woddik Gootti Eeliyaasii'i hiyyee qici, 9 «Kexxetexxi Sidoonake boga'ni hexxeexxe Seraaphita marte ofo'li; ookkonna mitte aro'o affebaaxxi hiyyeette manjichcho atee itiso'aa ajajeennen» hiyye.✝ 10 Tennexxe ke'eexxi Seraaphita'a me'e. Qachchiinxe hulaba geyeeshshann mitte aro'o affe'ebaaxxi hiyyeette manjichcho haasume qocexaa'na'a afe; isee'e ye'eexxi, «Ha'wannoka wede'e ani'a uwwi» hiyye ise'e kadhate. 11 Iyyedaggo'a marta wodda higgeeni ye'eexxinna, «Maganneten tima shiixxooka ani'a iitee dagi» ise'e hiyye.

12 Isenna hiissiteexxi isoo'o «Hedhaake Duuchchi Woddike Gootta atike Magenixxa qalqallote'n hexxeexxe oobo bullenna odolchote'ni hexxeexxe shiixxooxxa zayite malee'e afenneelchi hedhebaan. Kunse ani ifi'aanna belto anke ita qophpheese'na inde rennonna'a haasume qoce mini'a adhe me'onnaaten» hite.

13 Eiyaasinna ise'e hiisse hiyyee qici; «Meeco, sodaattoxxe; mine e'yitettexxi hitetteshshanni assi; edise kinni ookkone affettenga shiixxooxxa kebbo kebbisse ani'a aaxxe dagi; ookkoneechchi uduma ati ifi'anna belto atike'e ra'issi. 14 Isira'eelik Duuchchi Woddiki Gootti Mageni hiyya'nee qici; ‹Duuchchi Woddik Gootti buttatee xeena gansiisaaxxe barra qico'ni; qalqallo giddii'n bulle gophendabaan; odolcho giddii'n zayite muddabaan› » hiyye.

15 Isenna marteexxi Eliyaasi ise'a hiyyemmashshan assite; konne qicinn Eeliyaasi; aro'o affebaaxxi hiyyeettenna mini hadi iseki heddo barra inde. 16 Eliyaasi'ni kulendeexxe Duuchchi Woddike Goottike hiyyichchishshann qalqallo giddi'ni bulle gophendebaan oddowwa giddi'inna zayite muddeemmabaan.

17 Shiixoxxe yanna uduma aro'o affebaaxxe manjichchok belti elagophe; dhibotinna itti jabaatte; hafuurikinna fule. 18 Isenna Eliyaasi'i «Koo Mageniinke manjo; ani atee'e maa'asenne? Cubbo anxa kassi hite belto anka shilitotta'a kaba daggette?» iso'o hite.

19 Eeliyasinna hiisseexxi; «Belto atika aniba iyyedagi,» ise'e hiyye; beltokanna anga isexxenaa'ni aadheexxi isi hedhammaxxe mini iimixxe xellephpho'ni imareexxi taqe ifixxe'n diiphise. 20 Ookkoneechchi uduma Eeliyaasi qonqo gikki asseexxi, «Ee, Duuchchi Woddike Gootta anke Magenoo! Summa atika tenne aro'i reyeexxe manjichcho'ni mayee'e iitta hexxeexxa wixirri assittaaxxa yaane assitette? Ise anee'e keesunsati lumoxxa elle assite'een; eega ati mayee'e belto iseka reyaashsha assittette?» hiyye'e Duuchchi Woddike Goottibaa raare. 21 Beltoke'ni hana sasele wabbi hiyyeexxi, «Ee Duuchchi Woddike Gootta anke Mageno konne beltixxi lubbo higgowwaal!» hiyye'e Duuchchi Woddike Goottibaa raare.✝

22 Duuchchi Woddik Goottinna Eliyaasixxa raare laqe; beltiinxi lubbonna higge; beltikinna fayye. 23 Ookko'ni Eliyaasi belto ke'isseexxi mini giddixxe xelephphonaa'ni butti'a dirriseexxi amate'ni, «Belti atik kunniseten; fayye'een!» hiyye ise'a uwwe.

24 Ookkoo'ni manjichcho Eeliyaasi'i, «Ati Duuchchi Woddike Goottike manjo kaddeettexxa; atike afo'onaa'ni fuleek Mageniink hiyyichchi dhugaate kadeexxa ta'a ege'nennen!» iso'o hite.