1 Ookkoneechchi uduma moyanji Solomoon Duuchchi Woddike Goottika kakotika taaboota Daawwitike qachcha Tsiyooninaa'ni iyyedagate'e Isira'eelixxa geedhuwwa, Isira'eelixxe gosake mini mininka akeekisanjuwwanna Isira'eelike ardika ja'laabuwwa duuchcha isi hedheeba'a Iyyerusaalemi'a dango'a ye'e.✝ 2 Ayyaani ulfeessemammake Etaami hiyyemaake torbake agenjo'ni Isira'eelik labballi duuchchi moyanji Solomoon hedheeba'a bukki hiyye.✝

3 Isira'eelixxi geedhuwwa duuchcha daggee wodda qeesole kakotika taabota dulkite. 4 Duuchchi Woddike Goottika kakotika taabota, Duuchchi Woddike Goottika afenshaxxa duunkaananna ise giddo hedheeka woyyichcha miyuwwa idange; qeesoletinna Leewwito konne miya duuchcha dulkite. 5 Moyanji Solomooninna isinni welti ookko'o bukki hiyye'emmak Isira'eelki ardi duuchchi kakotike taaboti edo hedhiyyoti laakkoossi iimi darre hedheeka gedhebokanna lalo tolchine.

6 Ookkoneechchi udumi'a qeesole Duuchchi Woddike Goottika kakotika taaboota iyyedaggeexxi galmi giddo hexxeexxe isixxe woyyo woyyite bakka'n e'yishsheexxi kurubeelike keeli hunda uggitte. 7 Kurubeeluwwanna kakotik taabooti hedhemmake boonchi hana keela ifika bandeexxi kakotika taabotanna isika dukisanjuwwa murge buqqe 8 Murguwwatik qeerinnenaa'ni kexxeexxa isexxi qaccuwwa galmi giddo woyyo woyyitte edi darree'n leellita'emman; galmii'n gadhidarre hedheeki manji kinni isee'e afa'emmaba'a; murguwwatinna telchi qico'n ookkoonni hexxeen. 9 Isira'eelik ardi Gibtsee'n fule wodda Duuchchi Woddik Gootti Isira'eelike ardinni welti kako aagemmaba Koorebi, Muuse kakotike taaboti giddo uggemmaxxa lame bocendeexxa kino malee'e kakotike taabooti giddo mittilchchinna hedhemmabaan.✝

10 Qeesole galmi giddii'ni fulde wodda duumanchchi Duuchchi Woddike Goottika galma wo'me. 11 Duuchchi Woddike Goottik ulfinni galmi giddo wo'meemmaxxe'e, qeesole duumanchakenaa'n kexxeexxa ergatema dandeetteba'a.✝

12 Ookkone wodda Solomoon hiyyee qici, «Duuchchi Woddik Gootti dimma duumanchi giddo hedhaaxxa haaso'eedheen;✝ 13 Kunseten ani duuchchin woddi'a hexxattoka ulfichcha galma ati'a ijaareennen» hiyye.

14 Isira'eeliki bukki hiyyeeki ardi duuchchi ookko'o uurre heedheena'a moyanji alba insa'neeba'a wirri hiyyeexxi insa'ne'e eebbise. 15 Ookkoneechinni uduma hiyyee qici, «Anna anke Daawwiti'a afo'o ifikenni addachchiise haaso'eexxi anga ifixxenni muuxxeek Duuchchi Woddik Gootti Isira'eelik Magen saademowwaal. Isinna hiyyeemma qici 16 ‹Arda anka Isira'eeli'i Gibtsee'n fulcheennexxe barranaa'ni summi anki ye'emaabanna galmi ank ijaaremaaxxa bakka Isira'eelixxe gosake minike qachchuwwi duuchchanaa'ni mitte qachchanna filebe'non; Arda anka Isira'eeli'i akeekaashsha kinni Daawwiti'i fi'lenne› » hiyye.✝

17 «Anni anki Daawwiti Duuchchi Woddike Gootta Isira'eelike Magenike summi'a galma jaaro'a godobik hede'emman; 18 Duuchchi Woddik Gootti kinni anna anka Daawwiti'i hiyyee qici, ‹Anke summi'a galma ijaarate'e heddeettaxxe'e, tennee godoba atike'n heda eloxxen.✝ 19 Kaddo malee'e galma ijaartattok atete kaddeboxxok ati i'litattoke atike belton; eetti anke summi'a galma ijaaraak isoten› hiyye.✝

20 «Duuchchi Woddik Gootti haaso'exxa addachchiisa muuxe'een; Duuchchi Woddik Gootti haaso'eexxe addachiisashanni anna ankixxe bakka'ni Isira'eelike moyanjo kadeennen; iittanni Duuchchi Woddike Gootta Isira'eelike Magenike summi'anna galma ijaareennen. 21 Gibtsee'n edika annuwwa no'oka fulchee wodda Duuchchi Woddik Gootti insa'ne'a aagemmaxxe kako giddo hedheek kakotik taabooti hedheeka booncho ookko qophpheesseennen» hiyye.

22 Ookkoneechchi uduma Solomooni Isira'eelike bukki hiyyeek ardi duuchchi hedheeba, Duuchchi Woddike Goottike tolchimalchi edo uurreexxi angatanna iimi'a farri asse'e 23 hiyyee qici:

«Ee Duuchchi Woddike Gootta, Isira'eelike Mageno ati edo mitte godobinni hedhaake atike erganjuwwi'a aaggettaxxa kako muuxxattokinna, jabaxxa atixxa jaalala leeliishshattokee, ale iimate'n buttanna buttate'n atishsha hedheek Mageni hedhebaan. 24 Erganjo atike Daawwiti'i anke anni'a haasoottettexxa addachchiisa guuttee'etten; afo'o atiken haasootte'e, haasoottettaxxanna anga atixxenni techchixxe barra'ni muuxxe'etten.

25 «Ta'anna ee dada duuchcha ajajaak Duuchchi Woddika Gootta Isira'eelike Magenoo erganjo atike Daawwiti'i anna anka, ‹Ati assitettaaxxa duuchcha, oose atixxi ani edo mammarenda'n assitaaxxe duuchcha'n xexxe'attoole calla malee Isira'eelixxe moote hana ani edo ofo'laaka manjo gophphaboxxoni› hita'ni haasoottettexxa addachchiisa isi'a muuxi.✝ 26 Ta'anna, ee Isira'eelike Magenoo erganjo atike anna anke Daawwiti'a haasoottettexxi addachchiisa muuxendowwaal.

27 «Yaane kinni dhugaandinni Magen buttati hana hedhaasi? Wele waalini iima, iimuwwati iimi darre hexxeexxi iimanna midde atee'e dandeette aaxxabaan; ani ijaarenneki kunni galmi fa'i maata heeno'ma gophuu!✝ 28 Kaddoolenna ee Duuchchi Woddik Gootta anke Magenoo anee'e erganjo atikixxa soodachchonna kadha laqi; telchixxe barra'ni erganji atik ani ati edo shiqishaanexxa oodhishanna kadha caqasi. 29 Ani erganji atiki konne boonchibaa shiqishaanneexxa soodachcho laqqota'a, ‹Summi ank ookko hedhaan› hitettexxe tenne bakka'n hedheeke konne galmiba'a ille atixxi hashsha barra uuddowwaal.✝ 30 Ani eerganji atikinna ardi atik Isira'eel tenne bakkaba'a soodantanno wodda kadha no'oxxa laqi; atike galduma kaddeexxe iimanaa'n laqi; laqqenna no'o'a gattowwaal hiyyi.

31 «Manji mitti jaalo ifika miidhe'eeshsha uudemeexxi kakato'a dage'e konne Galmi giddo tolchimalchi edo kakata wodda, 32 tenne'e iimate'ni hexxe laqi; konne erganjuwwa atike'ninna murte uwwi; tinninna balleesa afendeeka manjo, huje isixxishshanni iso'n muri; balleessa afendebaakanna, balleessa afa gopha isixxa kokeesati qullumma isixxika hira isi'anna uwwi.

33 «Ardi atik Isira'eel atee'e balleessatenaa'ni kexxeexxa, ifike naapha'ni injifatema wodda, faaci'e atiba higeexxi summa atika ulfeessoole, konne galmi giddonna atibaa soodatoolenna atiba'a kadhatoole, 34 iimate'n hexxe laqi; arda atikixxa Isira'eelixxa cubbo gattoowwal hiyyi; annuwwa insa'neeke'e uuteteke bogibaanna insa'ne'e illeema hiissi.

35 «Ardikinna atee'e balleesatenaa'ni kexxeexxa, iima cufende'e xeeni gana gophexxee'e konne boonchiba soodatoolenna summa atika ye'edhoole, rakkissettaxxeenna balleessa ifixxenaa'ni higoole, 36 iimatenaa'n laqi; erganjuwwa atika arda atika Isira'eelixxa cubbo gattowwal hiyyi; me'iyyo hasisaaka toggichcha ora insa'ne'e barsiisi; geego kadaashsha arda atikee'e uutettake boga'ninna xeena gansiisi.

37 «Bogake'n solo'i yookaan bala dagga wodda, waage yookaan buquni kadaa wodda, awwaaneessi yookaan isixxi shiixxaramma beltanna bogake'n daggaa wodda yookaan bogi giddo hedheeke qachchuwwa naaphi buqoole iittanni hiini ba'ne yookaan dhukkubi dagaa wodda, 38 Arda atike Isira'eelinaa'n feedheek manji godoba ifikixxe yaaddo'a anga ifixxa konne miniba'a farri asse soodataa wodda yookaan kadhataa wodda duuchcha, 39 Atike galduma iimate'ni hexxe laqi; gattowwaalinna hiyyi; gargaar. Atinn calli manji duuchchikae godobika yaado egendeettaxxe'e mitte mittienge manji'a huje huje isixxishanni hira uwwi. 40 Tinninna insa'ne annuwwa no'okee'e uutettake boga'n he'naaxxa yanna duuchcha atee'e sodaantaashshaten.

41 «Atike arda Isira'eelite kadebaak, yaane kinni atike summike lummeninaa'n kexxeexxa bayyike boganaa'n degeeki alagi manji hedhoole; 42 bayyii'n manni daga'nechchi summa atika lumoka, jabaxxa atixxa anga, atixxe qeerraaxxe hirrexxa laqeete kaddemmaxxee iikki manji dage'e konne galmiba soodatoole, 43 ati galduma atike'ni iima hexxe laqqe'e ate'e qoreexxa duuchcha isi'a muuxxi; tinninna buttatik arduwwi duuchchi summa atika ege'neexxi, ardi atik Isira'eel atee'e sodaatammasha insa'nenna atee'e sodaanto'anna ani ijaarenneki kunni mini summi atik ye'ema'neeke kadeexxa egennaashshaten.

44 «Atik ardi naapha ifika lolo'a ergitattoke fedheeke boonchiba'a bagedoke'e fulaa wodda, ati fi'litetteke qachchiba'anna ani atike summi'a ijaarenneke galmibaa'a wirr hiyye Duuchchi Woddike Goottibaa soodatoole, 45 Soodachchotanna kadha insixxa iimate'ni hexxe laqqe'e gargaar.

46 «Cubbo hujabaaki manji hedhebaan; tennexxe'e ardi atiki cubbo hujeexxi atee'e yaadisse'na'a, atinna mufatte naaphi bayyike yookaan shiqike ifike bogibaa booji'e adhdhe me'aashsha anga isixxe'n sa'issite arda atika uutottole; 47 ardi booji'eme hedheeke ookkone boga'ni hedheexxi ‹Cubbo hunjeennen; balleessinennen; fuggoxxanna assineen› hiyya'n aadde aage ate'e kadhatoole; 48 Iittann insa'ne booji'e adhdheeke naaphinke boga'ni he'ne mitte godobininna shenitte hedhon atiba hingoole, annuwwa insa'neeke'e uutetteke konne bogiba'a, fi'litetteke konne qachchiba'anna summa atike'e ani ijaarenneke galmiba wirri hine ate'e soodantoole; 49 Iima galduma atikenaa'n soodachcho insa'neexxanna kadha insa'neexxa laqi, insa'nenna qarqqar. 50 Ate'ni hunjeexxe cubboxxeenna ate'e balleessineexxe sa'ne duuchchi'a arda atikee gattowaal hiyyi; insa'ne booji'eekir insa'ne'a o'wwaashsha assi; 51 insa'neqa ati siblijo baqisaaxxe itoonixxe giirashsha hedheeke Gibtseke boginaa'n fulchitetteke atike arda.

52 «Ta'anna ille atixxi erganjo atikixxenna arda atike Isira'eelixxe kadhabaa'a baqqi hiteexxe kaddowwaal; ardi atik atibaa oodha wodda duuchchanna oodhishsha insixxa laqi. 53 Ee dada duuchchike Duuchchi Woddike Goottaa annuwwa no'oka Gibtseke boganaa'ni fulchitetta wodda Muuse'e atike erganji darree'n haasootettashshanni insa'ne atike geego kandaasha gosa gosake arduwwi duuchchanaa'ni insa'ne'e gargara foote'eteken.»

54 Solomooninna tenne soodachchonna kadhaa duuchcha Duuchchi Woddike Goottibaa shiqilsheechchi uduma anga ifixxa iimi'a farri asseexxi guluffate hedhemabaa'n Duuchchi Woddike Goottike tolchimalchi edii'ni ke'e. 55 Ookkoneechchi udumi'a uurreexxi Isira'eelixxe tuuta duuchchi edo hafuura gikki asse hiyye eebbisee qici:

56 «Haaso'emmaxxe addachchiiseshshanni arda ifika Isira'eeli'i hafuura adhdhiseeka Duuchchi Woddika Gootta galati geyowwaal; erganjo ifike Muuse darree'n haaso'emmake eloxxe addachchiisa duuchchanaa'n mitti hiyyichchinna midde gatebaan.✝ 57 Duuchchi Woddik Gootti no'oki Magen edike no'oke annuwwinni welti hedhemmashshanni no'onninna hedhowwaal; no'o waaloqqe'e, hunoqqe'e. 58 Isika ora duuchcha me'inonna'a, edike no'oke annuwwi'a uwwemmaka ajajuwwa, seeruwwanna galdumuwwa heqqe'nannoshsha qalbe no'oxxa ifiba'a wirri assowwaal. 59 Barra barra'ninn ane'e erganjo isikixxanna arda ifike, Isira'eelixxa halcha muuxaashsha tinni Duuchchi Woddike Gootti edo soodatennexxi anxi soodachcho, hashsha barra Duuchchi Woddike Gootta no'oke Magen edo shiqqaaxxe kaddowwaal. 60 Tinninna butta duuchchi arduwwi, Duuchchi Woddik Gootti, Magenoke kadeexxa, isi gadhi darre weli hedhebaaxxa ege'naashshaten. 61 Tennexxee techchixex tenne barrashshsha, seera isike'n galdinoanna ajaja isika heqqexxino'a qalbe ha'nooxxi Duuchchi Woddike Gootta ha'nooke Mageni'a hirendeexxe kaddowwaal.»

62 Ookkoneechchi uduma moyanjikinna isinni welti hedhemmak Isira'eelik manni duuchchi Duuchchi Woddike Gootti edo tolcha shiqishe. 63 Solomoon mittoomiinke tolchi'a lame tommenna lame kuma laliinxa kormoole, dhibbanna lame tomme kuma gedhebonna re'e, Duuchchi Woddike Gootti'a shiqishe; konne qicinni moyanjikinna Isira'eelik ardi manni duuchchi Duuchchi Woddike Goottika galma eebbinse.

64 Eettene barra'ninni moyanji Duuchchi Woddike Goottike galmi edo hedheeke ba'liniinxa odditte bakka Magenokee foyendeexxe kaddaashsha asseexxi, ookko ciincatika tolcha, midhatika tolchanna mittoomiinke tolchixxa ha'yo, shiqishe; tenne'e asselchinna, Duuchchi Woddike Gootti edo hedheek sageetotike sibiljik tolchimalchi shiixxedhatenaa'n kexxeexxa ciincatika tolcha, midhatika tolchanna mittoominke tolchika ha'yo dande'e aadha gophemmaxxeetten.

65 Ookkone wodda Solomoon isinni welti hedheeke Isira'eelike manni duuchchinni welti, kunninna Hamati e'yinammabaa'n Gibtseke bagoke lagi qico'n hedheeke boga duuchchanaa'n bukki hiteexxe lumoxxe tuutanni welti ayyaana ayyaaneeffate; Insa'nenna torbaane barra, higgeenni wele torbaane barra mitteba tommenna shoole barra Duuchchi Woddike Gootta no'oke Mageni edo ayyaana ayyaneeffante.

66 Isinna itti aandaaxxe barra'n arda geegesse; ardinna moyanjo eebbise. Duuchchi Woddik Gootti erganjo ifike Daawwiti'anna arda ifike Isira'eeli'a asseexxe eloxxe duuchchixxe ardi mitte godobinni gammade ililliseexxi ifi ifike miniba'anna illeema hige me'e.