1 Solomooni Gibtseka moyanjo Feri'ooninni welti jaaloommeexxi Feri'oonixxa belto aadhe. Isinna ifika moyatika mine, dada duuchcha ajajaak Duuchchi Woddike Goottika galmanna Iyyerusaalemike qariqara'n dalla'a ijaare bira qico'n Daawwitike qachcha'n isee ugge.

2 Eettene yanna'n dada duuchcha ajajaak Duuchchi Woddike Goottike summi'a galmi ijaarema gophemmaxxe'e ardi tolcha shiqishaammaki magenoonffachotike gooruwwa hanamman. 3 Solomooni dada duuchcha ajajaak Duuchchi Woddika Gootta eeya'emmani, ifike annixxe Daawwitixxe aada'ninna me'a'nemmani; kaddo malee'e, gooruwwatixxe magenooffachotixxe bakka'n tolcha tolcha'n hixaana guba'emmani.

4 Duuchchinge magenoonffachchotixxe gooruwanaa'n sa'aak Geba'oonite kademmaxe'e moyanji tolcha tolcho'a ookko'a me'e; Solomooni ookkonee tolchimalchoke'n kuma ciincatika tolcha tolche. 5 Geba'ooni dada duuchcha ajajaak Duuchchi Woddik Gootti Solomooni'n hashsha oojjoti leelle; Magenikinna isoo'o, «Ati'a uwwona'a eettaattochcho duuchcha kadhati» hiyye.

6 Solomooni hiyye hiise haaso'e qici, «Anni anki Daawwit dhugaati, qullummatinna qalbetixxe qajeelummani ati edo mammarememmaxxe'e garbichcho atikee'e lumoxxa jaalala uudisseten; tinni lumoxxi jaalala uuritabaashsha assiyyoti telchonna mootete'n ofo'laaka belto isi'a uutete'en.

7 «Ee dada duuchcha ajajaateke Duuchchi Woddike Gootta anke Magenoo garbichchi atik ani Daawwiti anke annixxe bakka'ni moyannoshsha assiteten; ani kinni shiixxooke belto kadeennaaxxee midda bita'a ege'nebe'non. 8 Garbichi atik ani, arda atike fi'liteteke, bira sa'ne isixxenaa'n kexxeexxa laakko'a dandeessissabaake tuuti ardi giddo hedhennen. 9 Tennexxee elo yo'oxxa gargar hiisse'e affiyyoti arda atika galcha dande'annoshsha anee'e garbichcho atikee'e qalbe uwwi; kada gophphoole konne tuuta arda ayyete galcha dande'a?»

10 Solomoon tennee kadhatemmaxxee Duuchchi Woddik Gootti gammade. 11 Tennexxee isoo hiyyee qic, «Ifi'a qeerraaxxa wogga, durumma alfatee yookaan atiki naaphi reyaashsha kaddebaang, dhugaati galchitattoshsha qalbeefachcho laqqexxettaxxee, 12 tennexxee kadhatetexxa ati'a uwwanon; ayyinna edi darre afebaaka, ati udumanna ayyinna alfabaaka beekumanna qalbefataaxxa qalbe ati'a uwwannon; 13 Tennee gadhi darre ati qorteboxxoka qabeennanna ulfinna ati'a uwwannon; tinninna hexxetteke baro duuchcha'n atinni qixxo'aak huun moyanjinna hedhabaashshaten. 14 Anni atik Daawwiti assemmashsha ora anke'n me'itottole, aada anxanna ajaja ankanna heqqexxottole boro atika qeerisannon» hiyye. 15 Solomooninna diiphokena'n dammaqe; oojjo kaddeexxanna ege'ne.

Ookkoneechi uduma Iyyerusaalemi'a ille iima higeexxi Duuchchi Woddike Goottik kakotike taabooti edo uurre; ciincatika tolchanna mittoominka tolcha tolche; jilatanna jileexxi ifika ja'laabuwwa duuchcha itise ha'wise.

16 Eettene yanna'ni yabaabbulleti galda'emmaxxi lame melaalle moyanijinba dagge isi edo shiqqe. 17 Insa'ne giddi'ni mitte hitee qici, «Anke gootta, tinni manjichonna ani mitte mine'ninn he'nannon; mitteba he'naana ani labba belto ilennen. 18 Ani ilennexxe sakkaxxe barra uduma, tinni manjichchonna ilde; no'o mine giddo mitteba he'naannan; no'o lame malee weli manji mini giddo hedhemmabaan.

19 «Tenne manjichchoki belti ise hana diiphpheemmaxxe'e hashsha reye. 20 Tennexxee ise hashsha wodhakka kexxeexxi, ane'e atixxi garbitte dhiipho hedhee'na'n anka belto ani birii'ni adhdhite; ookkone uduma ifi biranna diiphilsiteexxi reyeeka iseka belto aaxxe daggeexxi ani bira diiphisse. 21 Langa barixxa gorsa belto anka unuunsona'a ke'ano wodda kunse reye'e; yaane kinni bogi ifeena'a dhaphphi hiyye isoo uudanno wodda ani illeenneke belto kadebaaxxa afene.»

22 Langaxxi manjichchonna «Yaane ati hitaatteshatebaan; reyeek belti atiken; lubbo hedheek kinni anken» hite.

Siretixxi manjichcho kinni jabeessite, «Waawwoti! Reyeek atiken; lubbo hedheek kinni anke belton» hite. Konnee qicinn moyanji edo weli moromme.

23 Moyanjikinna, «Tinni, ‹Ank belti lubbo hedheeken, reyeeki kinni atiken hita'neen; ittinna kinni, waawwo'o atiki belti reyedheen; lubbo hedheeki anken hita'neen› » hite.

24 Ookkoneechchinni uduma moyanji, «Yoona wolaantichcha ani'a iyye dagge» hiyye; wolaantichchakanna moyanjokee iyyedange. 25 Moyanjikinna ookone wodda, «Amme, lubbo hedheeka belto lameba qooddine'e gamisa mittetee'e, gamisa kinni langaxxee'e uwwe» hiyye ajaje. 26 Lubbo hedheeke beltixxi ama belto ifike'e amummatik godobi yo'oshsha mararemmaxxee moyanjo, «Anke goottaa, maganneten, lubbo hedheeka belto ise'anni uwwi malee shiltoxxe'e!» hite.

Langaxxi manjichcho kinni, «Ani'anna kadi ati'anna uwwemaba'a; lameba qoodemowwaal!» hite.

27 Ookkoneechchi uduma moyanji, «Amme konnee lubbo hedheeka belto siretixxe manjichcho'a uwwe, shiltinoqqe'e; beltiinxi ama iseteni» hiyye.

28 Isira'eelik ardi duuchchi moyanji mureexxa murte laqeexxi, toggitte murte muro'a Magen isi'a beekkuma uwwe'na'a uudemmaxxe'e moyajo sodaante.