1 Aki'aab reyeechchi uduma Mo'aabi Isira'eeli'ni fuggoxxinni ke'e.

2 Ookkonne wodda Akaaziyaasi Semaariya hedheeke iimi darreke mootummatike minixxe masikootenaa'ni ibeexxi miidheme. Tennexxe isinna hiyyee qici: «Martineexxi tenne ela gonphenaa'ni fayyannoxxanna fayyabo'noxxa Aqaroonika mageno Bi'eelizebulii'i qorre» hiyyeexxi ergajjuwwa erge.

3 Duuchchi Woddike Goottik iimik Erganji kinni Teesibichcho Eliyaasii'i hiyyee qici: «Kexxettexxi Semaariyake moyanjike erganjuwwini afendotta'a martettexxi, ‹Aqaroonika mageno Bi'eellizebuli'i qodhdhitino'a me'itina'neeki Isira'eeli giddo Magen hedhebaani hiyyote?› hite'e insa'ne qori. 4 Tennexxee Duuchchi Woddik Gootti hiyya'nee qici, ‹Ati diiphphettexxe taqenaa'ni kexxaboxxoni. Dhugaandinni rertaatteni!› hiyye'een.» Ookkoneechchi uduma Eliyaasi me'e.

5 Eriganjuwwikinna moyanjiinbaa hinge dangee wodda, «Maye'e higgine daggine?» hiyye insa'ne qore.

6 Insa'nenna iso'ni hine hiissinee qici, «Mitti manji no'onni afemo'a dageexxi, ‹isinna ha'noo erigemmake moyanjiba higgine martineexxi, «Duuchchi Woddik Gootti hiyya'nee qici: Aqaroonika mageno Bi'eelizebuli'i qodhdhate'e manjo erigexxaatteki Isira'eeli giddo Magen hedhebaani hiyyotee? Tennexxe diiphphetteexxe taqenaa'n kexxabexxoni dhugaandinni rertattoni!» › »

7 Moyanjikinna insa'nee hiyye qoree qici, «Yoona ha'noo'ni dage afeme ha'no'ni iitta hiyyeeki manji hitta hedheeke?» hiyye qore.

8 Insa'nenna, «Manjichchi ordati giissineexxe seemma odo'we'ekeni: hidhakanna gogiinxe mixeni usurreekeni» hine hiissine haasoonne.

Moyanjikinna, «iikki Teesibichcho Eliyaasiten hiyye hiisse» hiyye.✝

9 Ookkoneechchi uduma moyanji onde tomme loliinka manna ajajammaka onde tomme loliinke mannini welti Eliyaasiba'a erge. Onde tomme ajajammakinna Eliyaasi ofo'lemake tullichchiinxe xungo'ni iima fuleexxi isoo hiyyee qici: «Koo Mageniinke manjo, moyaanji atee, ‹Amo dirri hiyya'neni› » hiyye.

10 Eliyaasinna hiisseexxi onde tomme loliinka manna ajajammake'n hiyyee qici: «Ani Mageniinke manjo kadonnole giira iimi'ni ibbe'e, ateenna onde tomme atika manna ittowwaali!» hiyye. Ookkoonna giira iimi'ni ibbeexxi onde tomme ajajammakanna isika manna itte.

11 Higgeeni moyanji wele onde tomme ajajammaka isike onde tomme mannini welti erge; onde tomme manna ajajammakinna, «Koo Mageniinke manjo moyanji atee, ‹Ta'a tenne amo dirri› hiyya'neeni» hiyye.

12 Eliyaasinna «Ani Mageniinke manjo kadonole giira iimi'ni ibbeexxi ateenna onde tomme atika manna ittowwaali!» hiyye. Eettene yanna'ni Mageniinxi giira iimii'ni ibbeexxi isoonna isika onde tomme manna itte.✝

13 Tennexxe moyanji sakkaaka onde tomme loliinka manna ajajammaka onde tomme mannini welti erge. Kunninna sakkaki onde tomme manna ajajammak mareexxi Eliyaasi edo guluffate isoo hiyya'ni kadhdhatee qici, «Koo ati Mageniinki manjo! Isinna maganneteni aneenna konne onde tommixxi atike erganjuwwixxi lubbo ati edo eeyyendeexxe kaddowwaal! 14 Kunseteni giira iimi'ni ibbeexxi; lame onde tomme ajajammaka ajajalluwwanna insa'neeka manna duuchcha itte. Yaane kinni ta'a lubbo anxi ati edo eeyyendeexxe kaddowwaali!»

15 Duuchchi Woddike Goottixxi Erganna Eliyaasi'i, «Isinni welti adadde dirri; isoonna sodaattoxxe» hiyye. Tennexxe Eliyaasi ke'exxi isinni welti moyanjiinba mare.

16 Moyanjokanna Duuchchi Woddik Gootti hiyya'nee qici: «Yoona Aqaroonika mageno Bi'eelizebuli'i ifi'a qodhdhitottaa erganjuwwa ergexxetteki; Isira'eeli giddo Magen hedha gopheexxeete? Tenne assitettaxxee diiphphettaxxe taqenaa'ni hara kexxabexxoni; reya atixxi gattabaan!» hiyye kule.

17 Tennexxe Akaziyaasi Eliyaasi haaso'emmashanni Duuchchi Woddike Goottike hiyyichchishshanni reye.

Akaaziyaasinna labbaka belto i'la gopheemmaxxee Iyyosafixxiki belti Iyyoraami Yihudake'ni moyexxe langaxxe woga'ni dayyi isiki Iyyoraami isixxa bakka moye. 18 Wele Akaaziyaasi baro isike'ni hujeexxinna asseexxi hujuwwa duuchchi Isira'eelike moyanjuwwixxe jirtetike maxaafa'ni borreessendeexxebaata?