1 Elisa'inna «Yooni Duuchchi Woddike Goottika hiyyichcho laqi! Duuchchi Woddiki Gootti soodo iittexxe yanna'ni Semaariyaxxe hula'ni sase killo eloxxa bulle yookaan jaane kilo so'a mitte sibiljinxe birre'ni gurgurraani» hiyye isi'a hiisse.

2 Moyanji irkote assedhe'eeka loliinka manna ajajammaki; Magenika manjo, «Itani kadoolenna Duuchchi Woddik Gootti iimuwwatixxa hulaanna banoole midde iitta kada dandeetta?» hiyye qore.

Elisayinna, «Tenne ati umi atingennini ille atixxini uuddatoni; kaddo malee eettene midhanaa'ni mittelchonna afo'iki maqqaboxxoni.»

3 Eettene yanna Soomiinke dhukkubin abidemeeki shooli manni qachchi giddi'a e'yinammaxxe hula'ni hedhemman: insa'nenna weli'an weli hinaamma qici: «Rennano qico'ni kaba he'naanneki Maye'etesi? 4 Yoona ‹Qachchi giddi'a e'yinannoni hinonnole› ookkoonna solo'iki rennannoni; kabanna he'nonnole reya no'oxxinna ittani gatta'nebaani; tennexxee Sooriyitotike ola'ibaa'a sammi hine me'ino sammi hinoole lubbo gantannoni; shinnoolenna rennannoni» hine.

5 Ookkoneechchi uduma bogi galigalo'e wodda, ke'neexxi Sooriyike mannike ola'ibaa me'ine: ookkoo gennee wodda manjonge hinaachchi mitti hedhemmabaan.

6 Tinni itta kaddeexxi buuto Duuchchi Woddiki Gootti Soriyika manna fadhadinkanna fadhadiinxe gaaruwwaka ittani heddi lolinke mannka hafuura Sooriyito laqqaashsha assemmaxxeettemmani; insa'nenna welii'ani weli «kunni Isira'eeliki moyanji no'o lole miidho'a; Hiititotikanna Gibtseka moyanjuwwa hidhdhe no'o'ni iyyedage'eni» hine.

7 Tennexxee insa'nenna bogi galgalo'ee wodda, ke'neexxi baqante; duunkaana ifika, fadhadokanna harre adhdhinebaani; lubbo ifixxa calla gatirsatee'e hineexxi ola'a ifika waalle me'ine.

8 Soomo'emmaki manni ookkone olla'i bira geyeechchi uduma; duunkaanne mitte giddo e'yyine; inde, ha'wine; ookko'n birretika sibljo, worqenna seemma adhdhine me'ineexxi hinge dangeexxinna wele duunkaanne giddo e'yineexxi wele yaanuwwanna adhdhineexxi sho'e'ne.

9 Insa'nenna weli'aan weli hinee qici; «Elobaaxxe hunjenneni; telchii gammashshotixxe barrani; tenne gammashsho no'oo kinni ifi'aa calla asse'nenneni; sooda qico'ni heqinonole mura wonxanoxxe hexxeen. Tennexxe mootummatike minbaa ranke marrenneexxi kullo!»

10 Ookkoneechchi uduma insa'nenna ookkone qachchik giddi'aa e'yinammaxxa hula heqqammaka manna cancina'ni ye'neexxi, «Sooriyitotike olla'i giddi'a e'yineenneni; ookkonna usurreeka fadhadonna harre malee mitti manjinna hedhemmabaani; hafuuri mittinna hedhemmabaani; duunkaanuuwwakinna hedheemmashshanni hedheemmani» hine kulle.

11 Hula heqqaammaki manninna tenneeni hafuura gikki asse haaso'emmaxxe odotinna mootummatike mini qico'ni laqende.

12 Yannatinna galgala temmani; moyanji diiphemabaa'ni ke'eexxi loliinke mannika ajajaluwwa hiyyee qici, «Sooriyake mannika yaada ha'noo'ni kulo! Insa'ne kaba hedheeka solo'o egene'een. Tennexxee kaanbe insa'nexxa waalexxi hadi giddi'a sho'omatee marre'en; no'onna ita harsecca fulloonole lubbondinni no'oo boojinee'e qachcha no'okanna adhdhinaan.»

13 Loliinka sooresuwwinaa'ni mitti hiyyee qici: «Konne qachchi giddo lubbo gateek ardi konneechchi edo reyeemake mannishsha reyotenee'ni gataakebaan. Tennexxee kaddeexxa yaane egenannoshsha heenook manna fillenexxi reyotenaa gateemake onde fadhadinni welti erginoo» hiyyaaka yaada shiqishe.

14 Insa'nenna heenoka manna fille; moyajikinna ookkone manna lamee sarageela'ni ofolaashsha asseexxi Sooritotike sannachcha'ni gelteexxa yaane memmekinseexxi hiisichcho uunaashsha akeete uwweexxi insa'nee erge. 15 Iikki manninna ookkoo'ni ke'eexxi Yordaanoosike galaani qico'ni ke'ne me'ine; ora orake'ni Sooriyik manni baaja'ni hune me'eemaka seemmatanna miyuwwa duuchcha uunde. Ookkoneechchi uduma hinge dangeexxi tenne duuchcha moyanjokee haasone.

16 Ookkoneechchi uduma Ardikinna elqenna kayya higeexxi Sooriyake mannixxa karra saame adhdhine. Duuchchi Woddik Gootti edisee haaso'emmashanni sase kiilo eloxxa dinne yookaan jaane kiilo so'aa mitte birretike sibiljo'ni gurgurreeni.

17 Eettenee yanna Isira'eeliki moyanjik ookkone qachchika dalla'ixxa hula heqqaake shiqike loliinke mannika ajajalo kadeeke erganji baale hunda heqqendaasha asseeman. Yaane kinn ookkone erganjo ardi hirbeesee'naa ookone reye. Tinni kaddeedek moyanji Elisa'ii haaseso'aa maree wodda Eeliyaasi ookkone erganjo'ni haaso'emake raagik hiyyichchi muuxemeemmaxeeten.

18 Eettene yanna'ni Eeliyaasi moyanjoke, «Soodo tenne yanna'ni Semaariyaxxe hula'ni sase kiilo eloxxa dinne yookaan jaane kiilo so'a mitte biretike sibiljo'ni gurgurraan» hiyyemmaxxi muuxende. 19 Loliinke manniki akeekisanji Magenike manjo'ni; «Duuchchi Woddik Gootti iimatixxa masikootuwwa banoole midde tinni hitta kada dandeetta?» hiyyemmaxxe; Mgeniki manji, «Tenne atinni umo atinginini uuddattoni yaane kinni midha ettenenaa'ni mittelcho afo'iki maqqaboxxoni» hiyyexxi hiisse'emmani.

20 Ookkone erganjo e'yinammaxxe hula'ni ardi hirbeessee'naa reyemmaxxe kulendemmaxxi muuxende.