1 Isira'eelika moyanjo Iyyo'akaziki belti Yo'aasi Isira'eeli'n moye galcheexxe langaxxe wogga'ni; Yihudaki moyanji Iyyo'aasik belti Amesiyaasi moye galche. 2 Isi Moyee wodda wogga isixxinna lame tommenna ondetemmani; Iyyerusaalemi ofo'leexxi lame tommenna sallaane wogga moye galche; ama isixxinna Yiho'adiini hiyyendaaxxe Iyyerusaalemi ilendeexxemmani.

3 Amasiyasi Duuchchi Woddike Gootti edo gammachchiissaaxxa yaane asseeni; yaane kinni anni isiki Daawwiti assemmashatebaani; duuchchiinxe yaaneni anna ifikika Iyyo'aasika fakkeenna hordofe.

4 Koobuwwate'ni hedheeka magenoonfantammalchuwwa diigebaani; ardikinna koobuwwate'ni tolcha shiqishanna hixxaana guba waaleemmabaani.

5 Amesiyaasi mootumma jabeesse abixxeechchi uduma; moyanjo anna isika shiyemmaka Ja'laabuwwa shiye.

6 Kaddo malee Muuseke seerike maxaafa'ni Duuchchi Woddik Gootti «Mitti mittingi manji hujemmaxxe ifixxe cubbo'a shiyemo malee annuwwi oose ifixxixxe, oosuwwatinna annuwwi ifikixxe cubbo'a shiyendoqqe» hiyye ajajemmaxxe shiyemaake mannixxa oose shiyebaani.✝

7 Isinna, maxinetixxe dhooqa hiyyemaake booncho'ni tomme kuma Eedoomika loliinka manna bire; Sela'iika qachcha lole injifate abixxemmaxxe techchi qico'ni Yoqixi'eeli hiyyemaaka summa fulcheeki Ameesiyaasiteni.

8 Ookkoneechchi uduma Ameetsiyasi, Iyyuk belti Iyyo'akaazi ileeke Yo'aasii'i Isira'eelike moyanjibaa, «Amo weli uundo» hiyyeexxi erga erge.

9 Isira'eeliki moyanji Yo'aasi kinni Yihudaka moyanjo Amesiyaasi'a hiyye erga ergee qici, «Mitte Libaanoosixxi qu'muudo; ‹belto atixxa belti anki aardho'a uwwi› hite'e Libaanoosike biribirsibaa erga ergite. Ookkoonneechchi uduma mitti Libaanoosiki biniinchi dageexxi qu'muudo lekkati hirbeesse. 10 Dhugaaten ati Eedoomii'i loldee injifatteetteni; qalbe atixxinna hollati wo'miteeni; tenne injifachchoxxeenna gammada'ni sammi hitee mine atike'ni ofoldeettele woyani; ifi'ninna arda atike'ni rakko geessissaxxa yaane ke'issatee mayee hasaate?» hiyye.

11 Amesiyaasi kinni laqebaani; tennexxee Isira'eeliki moyanji Yo'aasi fule; isinna Yihudak moyanji Amesiyaasinna Yihudiinke boga'ni Beetishemeshi edi darre lola inbe.

12 Isira'eeli, Yihuda injifate: mitti mitti insa'neengi ifi ifinxe duunkaanebaa baanje.

13 Isira'eelik moyanji Yo'aasi Akaaziyaasike beltika belto, Iyyo'aasika belto Yihudaka moyanjo Amesiyaasii'i Beetishemeshike booncho'ni lubbondinni booji'e. Ookkoneechchi uduma Yo'aasi Iyyerusaalemi'a me'e; Efireemike Dalla'ixxe hulabaa'ni ke'isse shoole Kasike Dalla'ixxe hula hiyyemeeke boonchi qico'ni qeerrini shoole dhibba ciqile kadeeka dalla'a diige.

14 Duuchchi Woddike Goottika galmanna Mootummatika miya massinaake minuwwa'ni hexxeexxa worqenna birreetika sibljo duuchcha ookkonna afemeeka miya duuchcha abidise booji'ememmaka mannanna aadheexxi Semaariya'a hige.

15 Yo'aasi Moyemmake baro'ni asseexxi wele yaane, huje muuxxeexxi duuchchi, Yihudaka moyanjo Amesiyaasi'i loleeke lolini welti Isira'eelike moyanjuwwinke jirtetike Maxaafa'ni borreessende afendaaxxebaa?

16 Yo'aasi edike annuwwi isikshshani reye; Semaariya Isira'eelika moyanjuwwa moongemmake hirreessa'ni moogeme; belti isiki Iyyorbi'ami isixxe bakka'ni moye.

17 Iyyo'aasik belti Yihudak moyanji Amesiyaasinna, Isira'eeliki moyanji Iyyo'akaazik belti Yo'aasi reyechchi uduma tommenna onde wogga ture: 18 Amesiyaasi moyemmake baro'ni asseexxi wele yaane Yihudake moyanjuwike jiritetike Maxaafa'ni borreessende hexxeexxeebaa?

19 Amesiyaasi'i Iyyerusaalemi giddo shiyate'e hansemmaxxe: baqateexxi Lakkishiike qachchibaa me'e; insa'ne kinni iso'o hordofaaka manna ookko'a eriginee'na'a ookko'o isoo shinne.

20 Renshakanna fadhachchoke'ni feene aa'ne dangeexxi; Daawwitike qachcha'ni edike annuuwike hirreesaa'ni Iyyerusaalemi moonge.

21 Ookkoneechchi uduma Yihudak ardi duuchchi tommenna jaane woggaka Azariyaasii'i* aadheexxi anna isike Amesiyaasixxe baka'n moyashsha assine.

22 Azarya edike annuwwi isikishshanni reyeechchi uduma Ealaatii'i higgeenni qammalcheexxi Yihudabaa hiisseki konne Azaariyaasini.

23 Iyyo'aasik belti Amesiyaasi Yihudake'ni moyeexxe tommenna ondixxe wogga'ni, Isira'eeliki moyanjo Yo'aasik belti Iyyorbi'ami Semaariya moye; shoole tommenna mitte wogga moye galche.

24 Duuchchi Woddike Gootti edo elobaaxxa yaane huje; Naabaaxik belti Iyyorbi'aami Isira'eeli dedhisemmaxxe cubbonaa'ni waale udumi'a higebaani.

25 Isira'eeliki Duuchchi Woddik Gootti Mageni Gaatiheferi giddo wabeek Amitaki belti raagichchi Yoonaasi daree'ni haaso'emmashshani; Hamaatike oranaa'ni ke'isse Maxinetixxe Abbaayya qico'ni hexxemmaxxa Isira'eelixxa gabala hiisseeki Iyyorbi'amiteni.✝

26 Garbakenna kadi ca'ichchi, Isira'eel giddo hedhaaki duuchchi hitta lumo qico rakkatammaxxa Duuchchi Woddik Gootti uude; insa'ne gargaarammakinna hedhemmabaani.

27 Kaddo malee Duuchchi Woddik Gootti Isira'eelika summa buttatenaa'ni balleessaaxxa haaso'egopheemmaxxee Yo'aasika belto Iyyorbi'ami daree'ni insa'nee anjire.

28 Iyyorbi'ami moyemmake baro'ni asseexxi wele yaane, hujeexxi duuchchinna loleeki loli ittani Yihudaxxe gabala'ni hedhemmaka Demasiqonna Hamaati'i hitta asse Isra'eli'a hiisseexxa Isira'eelike moyanjuwwinke jirtetike Maxaafa'ni borreessende hexxeexxebba?

29 Iyyorbi'ami edike annuwwinni Isira'eelike moyanjuwwishshani reye; belti isiki Zakkariyaasinna isixxe bakka'ni moye.