1 Wabeek Elisa'i wabeekotike orgi giddii'ni mitte ye'eexxi hiyyee qici: «Hidha atika usudhdhitettexxi, tennee zayitetixxa odolcho aaxxettexxi Raamoti Gele'adi'a me'i. 2 Ookko geltettetto wodda Nimishika akka'o Iyyoosafiixika belto Iyyuu'u hasi. Isiba'anna shiqqettexxi jaaluwwa isikenaa'ni qofinni fulchitettelchi uduma; mini'a e'yishi. 3 Ookkoneechchi uduma odolcho aaxxettexxi zayite umo isike'ni hana dunidetteexxi, ‹Duuchchi Woddik Gootti hiyya'nee qici, Kunniseteni, ani Isira'eeli'ni mootattoshsha hariireenneni› hite lassi. Ookkoneechchi uduma hula bandettexxxi dandeettette qico'ni ookkone boonchonaa'ni kexxe baqati!»

4 Tennexxe iikki dargaggeessi wabeek Raamoti Gele'adiba me'e.

5 Ookko'o mare geyeeshshan loliinke maniki ajajalluwwi mitteba ofoleemmani; isinna «Loliinke mannike ajajallo; ani atiba ergeme dageenneni» hiyye.

Iyyunna, «No'o giddi'ni ayye'nite haasoottaatteki?» hiyye qore.

Wabeekichchinna, «Lolilnke mannike ajajallo Ati'aateni haaso'aanneki» hiyye hiisse.

6 Iyyunna ke'eexxi mini'a e'ye; ookkoneechchi uduma iikki wabeek zayite Iyyu hana duneexxinna hiyyee qici: «Isra'eliki Duuchchi Woddik Gootti Mageni hiyya'nee qici, ‹Duuchchi Woddike Goottike Isira'eelike arda'ni moototta'a atee harireenneni.✝ 7 Erganjuwwa anxe wabeekoxxa munde itani Duuchchi Woddike Goottike eriganjuwwixxa munde duuchchaxxe'e Elizaabeeli'n halo fulannoshsha ati gootti atikika Aki'aabika mine bakka balleessitattoni. 8 Aki'aabik mini duuchchi kutti hiyyaan; garbakenna kadi mine ilemeeki Isira'eeli giddo hedheeka maa'na ilemaaki labbaki belti duuchchi Aki'abinaa'ni shiyee birannoni. 9 Yooni Aki'aabika mine; Naabaaxike beltishsha Iyyorbi'aamike minishshanna Akiyake belto Ba'ishake minishsha assannoni. 10 Elizaabeeli kinni Iyyizira'eelike fichchi giddo worishshi isee itaani; isee moogaakinna hedhebaani› » ookkoneechchi uduma tennee kuleexxi hula bane gonga'ni me'e.✝

11 Iyyuna fuleexxi loliinke mannike ajajalluwwa kandeeke jaaluwwiba geyeshshaani; insa'ne giddi'ni mitti, «Duuchchini geechi nage'ange? Maraattichchi kunni atibaa dage'echchi mayeete?» hiyye qore.

Iyyunna «Manjichchokeenna kadi isi haaso'aaxxa ha'nonni egendine'eni» hiyye hiisse.

12 Insa'nenna «Tinni dhugaatebaani; ati no'aa kuli» hine hiissine.

Iyyunna hiyyee qici, Isi ane'ni hiyye kuleechchi, « ‹Duuchchi Woddik Goottinna Isira'eelike moyanjo kaddotta'a ate'e hariireenneni› anee hiyyeen» hiyye insa'ne'a hiisse.

13 Insa'ne duuchchiingi ranke seemma fulche'na'ni Iyyu qabatammake hadhisanjon hana fanne; ookkoneechchi uduma malagata ufuunfee, «Iyyu moyeeni» hine.

14 Tennexxe Nimishik betik belti, Iyyoosafiixik belti Iyyu Iyyoraami'ni fugoxxinni ke'e. Ettene yanna'ni Iyyoraaminna Isira'eeli duuchchi Raamoti Gele'adi'i Sooriyake moyanji Azaheeli lole midhabaashsha heqina'nemmaani.

15 Moyanji Iyyoraami kinni Sooriyaka moyanjo Azaheelinni lolemee wodda, Sooriyito madeessitemmaxxe mada fayyiriso'a Iyyizira'eeli'a higeemmani. Iyyunna, «Yoona yaadi ha'nooki iitatte kadoole; tennee yaane Iyyizira'eli maree haaso'abaashsha; ayyi manjinna konne qachchanaa'ni luuxxe fulabaashsha heqqee» hiyye.

16 Ookkoneechchi uduma Iyyu fadhadiinxe gaare'ni ofo'leexxi Iyyizira'eeli'a me'e: tennee assechchi Iyyoraami ookko diiphemmaxxe Yihudinki moyanji Akaaziyaasinna mada fayyitemmabaan: Yihudak moyanji Akaziyasinna isoo laqo'a adaade dagee.

17 Iyyizira'eelike kinjiinke dalla'ixxe xellepho'ni uurremmaki heqqanji Iyyuk loliinki manni shiqe dageexxa uudeexxi; «loliinki manni dagaa'na'a uudaannen!» hiyye cance kule.

Iyyoraaminna hiyyee qici, «Mitte fadhachcho gulufeeka manjo erigitetexxi ookkone daga'neeka manna ‹Daggine'eki nage'angeete?› hiyye qorowwaali» hiyye ajaje.

18 Erganjikinna Iyyunni afemo'a fadhachcho gulufe mareexxinna; «Moyanji, ‹Daggine'echchi nage'angeetee?› hiyya'neeni» hiyye.

Iyyunna, «Nage'inxe rakkattattoki atetebaani! Isee waalde uduma saxxettexxi anee hordofi» hiyye. Heqqammakinna, «Erganjikinna insa'ne bira geye'eni yaane kinni hige dagebaani» hiyye ege'nishe.

19 Tennexxe moyanji Wele fadhachcho gulufeeka erge; ookkone manniba geyyeshaan «Moyanji, ‹Daggine'echi nage'angeetee?› hiyya'neeni» hiyye.

Iyyunna, «Nage'iinxee rakkattattoki atetebaani! Isee waalde uduma saxxe anee hordofi» hiyye.

20 Heqqanjikinna, «Erganji insa'neeba geye'eni; yaane kinni kunninna hige dagebaani; loliinka manna ajajaammakixxa gaare oofa'neeki Nimishik belti Iyyu oofammashshateni; oofa'neekinna maraatinsha oofa'neeni» hiyye ege'nshe.

21 Iyyoraaminna, «Fadhadiinxa gaare ani'aa qophpheessi» hiyye ajaje. Fadhadiinxa garenna isi'a qophpheessinshaani; Isira'eeliki moyanji Iyyoraaminna Yihudak moyanji Akaaziyaasi ifi ifinxa gaare gulunfeexxi Iyyunni afemo'a me'ine; Iyyizira'eelichcho Naabuteke geego kademmake fichcha'n welti afemme.

22 Iyyoraaminna Iyyunni afeeshshaani, «Koo Iyyu mayee elonxee daggete?» hiyye qore.

Iyyunna, «Amaa atixxi Elizaabeeli iyyedaageexxe gogonna magenoonfachchati fakke giddo karseme he'nee'na mayiinke nage'a hedhee?» hiyye hiisse.

23 Iyyoraaminna fadhadiinxa gaare wirri assedheexxi baqata'ni, «Koo, Akaaziyaasi, tinni jalloten!» hiyye.

24 Ookko'ni Iyyu gabe udumi'a harkisedheexxi wocci asseexxi Iyyoraamii'i ceeko lamiinxixxa oddo ote; mogidikinna giddi'a e'ye onna otemmaxxe'e gaareti giddo wabbi hiyye ibe.

25 Iyyunna gaaretika akeekisanjo Bidiqaarii'i hiyyee qici, «Rensha aaxxettexxi Iyyizira'eelichcho Naabuteke hiddichchuwwiinke fichcha'ni huni; aninna ati mowanjo Iyyoraamike anna kade'eemake Aki'aab udumii'n ifi ifike sarageeluwwa'ni gulunfennexxi isoo hordonfe me'innanno wodda, Duuchchi Woddik Gootti isixxee konne wabeekumma haaso'eexxa kassi hiyyi. 26 ‹Bereqe Naabutexxanna isixxe oosexxa munde uudenneni: hiyya'neeni Duuchchi Woddik Gootti tenneenna ani ate konne fichchi giddo xixannoxxa kakatenne› hiyya'ni, Duuchchi Woddiki Gootti ta'anna Duuchchi Woddik Gootti hiyyemmashshaani aaxxettexxi konne fichchi giddo huni.»✝

27 Yihudaki Moyanji Akaaziyaasi kaddeexxa yaane duuchcha uudeexxi sarageel gulufeexxi Beeti Hagak qachchibaa baqate; Iyyunna duuka isixxa hordofee mareexxi, «Isoo shiwwee!» hiyye loliinke manni'a ajaja uwwe; loliink manninna Akaaziyaasii hordonfeexxi Beeti Hagaan qachchi bira hedhdheeke Guurike ho'lichchike wirfama'ni sarageelik qalchaa'naa ganne madeesine. Isinna isso ga'medhdheexxi Megidoke qachchi qico'ni me'eexxi ookko'o reye.

28 Erganjuwwi isikinna rensha fadhadiinxe gaare giddo uggineexxi Iyyerusaalemi'a aa'ne me'ineexxi Daawwitike qachchi giddo hedheeke moyanjuwwa moongammake hirreessa'ni moonge.

29 Akaaziyaasi Yihudake'ni moyeeki Aki'aabik belti Iyyoraami moyeexxe tommenna mittixxe woga'nitemmani.

30 Ookkoneechchi uduma Iyyu Iyyizira'eeli'a me'e; Elizaabeelinna tennee kaddeexxa yaane laqeexxi illete'ni seesa buudhdhiteexxi; umokanna seesse ga'nite masikootetenaa'ni gadhi'a uuda'nemmani.

31 Iyyunna dalla'iinxa hula e'yee wodda, «Gootta atika shiltetteki koo Zimmiri daggeetteki nage'angeette?» hite qorte.

32 Iyyu iimi'a qokki hiyye masokootetibaa uudeexxi, «Ayyete ati? Ayyete anee gargaaraaki hiyya'ni raare» lami yookaan sase kolaasemeek manni iimi'ni butti'a iso'o uunde. 33 Iyyunna, «Elizabeli'i ise'e butti'a darbe!» insa'ne hiyye. Insa'nenna butti'a darbine. Fadhadi isee hiribeessee wodda, munde isexxinna dala'ake'ninna fadhadoke'ni fixende.

34 Iyyu Mootummatike mine'ni e'ye ite ha'we. Okkonneechchi uduma «Fedheexxenna kaddoole Ise moyanjiinxe belto kaddemmaxxe; tenne badinendeexxa manjicho eloqicinni moogge» hiyye.

35 Mooggoke'e fullee wodda kinni iseka umiinka qoonjo, anganna leka malee welelichcho anfebaani.

36 Tenne duuchcha hingeexxi Iyyu'ni haasoonne wodda, Iyyu hiyyee qici, «Duuchchi Woddik Gootti erganjo Teesibichcho Eliyaasi'ni Iyyizira'eelike boga'ni hiddichchuwwiinke fichchi giddo Elizaabeelika maala worshi itaani.✝ 37 Maala isekanna Iyyizira'eelike boga'ni hiddichuwwiinke fichchi giddo koriinshsha kadaammaxxe ayyi manjinna ‹Tinni Elzaabeeliteni› hiyya dande'abaani hiyememmaki hiyyichchi konneteni.»