1 Iyyu moyeexxe torbaxxe wogga'ni Iyyo'aasi moye; Iyyerusaalemi ofo'leexxi shoole tomme wogga galche. Ama isixxi Saabiyya hiyyendaaxxi Bersaabehike qachcha'ni ilendeexxemmani.

2 Qeesichchi Yodaahe isoo barachchiisammake baro duuchcha'ni Iyyo'aasi Duuchchi Woddike Gootti edo eloxxa yaane asse.

3 Kaddo malee koobuwwat magenoonfatamma boonchuwwa balleesineemmabaani; ardi ookkone boonchuwa'ni tolchakanna hixxaana guba'ni hedhemmani.

4 Iyyo'aasinna qeese hiyee qici, «Duuchchi Woddike Gootti galmi'a woyyichcha tolchishsha uwwemaaka maallaqa duuchcha kunninna manji lubbo ifixxike hiri'a shiqishaakanna werreegik uwwaaka, iittanni eeyyunte ifixxini uwwaaka maallaqa duuchcha bukki asse.✝ 5 Mitti mittingi qeesichchi maallaqa massammake manjiinxe anganaa'ni aadhowwaali; hasiseeshshani galma giddo qammalchatixxe huje'ni hosowwaali.»

6 Kaddo malee, Iyyo'aasi moyanjo kadeeke lame tommenna sase wogga moye qico'ni qeese giddi darree diigemeemmaka galma qammalchiteemmabaani. 7 Tennexxe Iyyo'aasi qeesichcho Yodaheenna wele qeese Ye'eexxi, «Glmi giddo diigemeemmaka qammalcha gophphineeki mayeete? Hiyye qore; lebeexxinna konneechchi edi'a maallaqi galmi giddo diigemeeka qammalchate'ni hoso malee maallaqa abidaammake mannanaa'ni aaxxinoqe» hiyye. 8 Qeesetinna konneechchini edi'a ardakenaa'ni maallaqa bukki assinabo'noni, galmakanna ifi'aa qammalchinabo'noni; hite weli aagge.

9 Ookkoneechchi uduma qeesichchi Yodaahe mitte saaxine aadheexxi tuphanjokenaa'ni qo'aa fulche. Duuchchi Woddike Goottike galmibaa e'yinanna wodda edo hedheeke tolchimalchiinke midda'n ugge. Hula heqqitammaxxi qeesenna Duuchchi Woddike Goottike minibaa iyyedangammaka maallaqa duuchcha saaxxine giddo uggita'nemmani. 10 Saaxineti giddo heddi maallaqi hedheexxa uunda wodda duuchcha moyanjiinki borreessanjinna uni qeesichchi dangeexxi Duuchchi Woddike Goottike mine'ni aageeka maallaqa laakkoonne subba subba'ni worreexxi usurre ugginaammani. 11 Maallaqi geeyee qico kiille egenneechchi galmiinxa huje hujiinso'a annosineeke manna'ni maallaqakanna uunaammani; tinninna Duuchchi Woddike Goottika galma ijaaraakenna kinjik ijaarammake manni'aa uunaman. 12 Kino boccammakeeri'aanna, kino qunqume giissammakeeri'aa uunaakanna Duuchchi Woddike Goottika galma qamalchinaaxxa haqqeenna bonceexxa kino hirate hosaakemmani; iittanni gargar hexxeexxe hasissaaxxe yaanuwwaa duuchchi'a uuna'emman.

13 Galmi giddi'a aageeke maallaqanaa'ni kinni Duuchchi Woddike Goottike galm giddixxe huje'ni hossaaxxi birretike sibljixxi buuduwwa, faafasunjuuwwi, distuwa, malagatuwwinna yookaani weli worqetikenna kadi birretike sibiljiinke miyuwwixxe huje'ni hosebaani.

14 Iikki uuneeki maallaqi kinni galma qammalchake hujaluwwi'a callammani.

15 Insa'ne hujalluwwakee maalaqa uuwwashsha uuneeki manni haranga addatemeeke kadeemmaxxe maallaqi haba geye hine laqatee hansaammabaani.✝

16 Balleessatike tolchi'aanna cubbo biratike tolchi'a shiqaammaki iikki maallaqi qeesetike kadeemmaxxe Duuchchi Woddike Goottike galma'ni e'yaammabaani.✝

17 Eettene yanna Sooriyiki moyanji Azaheeli fuleexxi; Gaatika qachcha lole miidheexxi ifi'ni hiissedhe. Ookkoneechchi uduma Iyyerusaalemi'i lole miidho'a ke'e me'e. 18 Yihudaki moyanjinna Iyyo'aasi kinni ediki annuwwi Yihudiinki moyanjuwwi, Iyyosafixxi, Iyyoraami, Akaaziyaasi, Duuchchi Woddike Gootti'a woyyonsinee gari garitti foonemmaka woyyichcha miyuwwa duuchcha, isi umi isinginnini woyyonsemaaxxa uwwuwwa ittani Duuchchi Woddike Goottike galma'ninna mootummatike mine'ni miyuwwa massinammake minuwwa'ni afendeexxa worqe duuchcha bukki asseexxi Sooriyake moyanji'a Azaheeli'a erge; Azahelinna Iyyerusaalemi geyyebaangi wirri hiyye udumi'a hige.

19 Iyyo'aasi moyemmake baro'ni hujeexxe wele hujuwwanna huje muuxeexxi duuchchi Yihudake moyanjuwwinke jirtetike Maxaafa'ni borreessende hexxeexxebaa?

20 Isik ja'labuwwinna iso'n fuggoxxini ke'e; adaadde Sillabaa me'ammake ora'n Beeti Milo isoo shinne.

21 Isoo shiyeeki ja'laabuwwinna Semi'aatik belti Yoozakarinna Shoomeerik belti Yihozabaaditemmani. Isinna reye; edike annuwwa isike duuchchishshani Daawwitike qachcha'ni moogeme. Ameetsiyasik beltinna isixxe bakka'ni moye.