1 Ookkone wodda Ni'imaani Sooriyake moyanjike loliinke mannike ajajallommani; Duuchchi Woddik Gootti konne manjixxe daafenni Sooriya injifattaashsha asseemmaxxee gootta isike'ni lumokenna ulfeessemeeke manjommani. Janna loliinke manjo kadoolenna soomo'ekemman.

2 Loliink manni Sooriyii'ni fuleexxi, Isira'eelike boganaa'ni mitte dubarrichcho booji'e; iseenna Ni'imaanixxe are'a erigatenda'nemmani.

3 Isenna ifixxe giitte'n «Anki gootti Ni'imaani Semaariyake boga'ni hedheeke wabeekiba mareexxi isoo afeeleqqa konne soomanaa'ni fayyamman» hite.

4 Ni'imaaninna gootti ifikiba'a mareexxi Isira'eelike boganaa'ni daggeemmaxxi dubaarrichcho hitemmaxxa kule.

5 Sooriyaki Moyanjinna «Yoona ta'ani mari; aninna Isira'eelike moyanji'a borro borreessannoni» hiyye; tennexxee Ni'imaani sase tomme kuma birretika sibiljo, jaane kuma maallaqa worqenna tomme iimi buttixxa seemma adhdhe me'e.

6 Isira'eelike moyanji'a uwwo'a abixxeemmaxxi borro, hitaamma qici, «Konne soominke dhukkubanaa'ni fayyissattoshsha tenne borro erganjo anke Ni'imaanixxe anga'ni uwwe eriganjo anka Ni'imani'i atibaa ergeenneni» hitaaxxemmani.

7 Isira'eeliki moyanji borro tennee bane uudeeshshan aareti seemma haaqqasse dareexxi, «Soomakenaa'ni fayyisonna'a kunni manjichchi aniba'a ergeechchi ani shiye fayyisa dande'annoke Mageno kadeenneni hiyyote? Uudde aninni welti lolemo'a hasa'neeni!» hiyye.

8 Mageniinki manji Elsa'i, Isira'eeliki moyanji seemma ifixxa dadareexxa laqee wodda, hiyya'ni isiba'a erga ergee qici, «Seemma atixxa maye'e dadartette? Manjichchi anibaa'a dagowwaali; ookkoneechchi uduma Isira'eeli giddo wabeek hedheexxa ege'naani.»

9 Tennexxe Ni'imaani fadhadiinxe gaaruwwa'ni ofo'leexxi Elsa'ike minixxe hula'ni geyeexxi uure.

10 Elsa'inna, «Martettexxi Yordaanoosike galaana'ni torbaanele anshedhi; bisi atikinna fayyaani; atinna ca'a hitattoni» hiyye kulo'a erga isibaai'a erge.

11 Ni'imaani kinni mufateexxi hiyyee qici, «Aniqqa dhugaanda ani biri'a dage'e uurre Duuchchi Woddike Goottika ifike Magenika summa ye'e; anga isixxini qaqqabe soomiinke dhukkubanaa'ni anee fayyisaake ane'ni labeemman. 12 Wodi'iinxin Demasiqoki wodi'i, Abaananna, Faarfar, hoone Isira'eelike wodi'uwwanaa'ni sa'abaa? Anshedhatite kaddoole; ookkone wode'uwwa'nini anshedhe ca'a hiyya dande'annabaa?» tennexxe aara'ni hige.

13 Ni'imaaniki erganjuwwi kinni isi biri'a shiqeexxi hitee qici, «Anna no'oke, wabeek tennenaa'ni ha'urtaaxxa yaane assittatoshsha kuleechcho kadde'ele assittatabaa? Yoona ‹Anshexxettexxi ca'a hiyyi› hiyyoole maachcho atee dhibe?» hine. 14 Tennexxe Ni'imaani adadde dirreexxi Mageniinki manji kulemmashshan Yordaanoosike galaana'n cuuphemma'ni fula'ni torbaanele anshedhe: bisi isikinna shiixxooke beltike bisishsha kade ca'a hiyye.✝

15 Ookkoneechchi uduma Ni'imaani isinni welti manni duuchchinni Mageniinke manjibaa hige me'e; isi edo uurreexxi, «Kunseteni Isira'eelike boga'ni malee butta duuchcha'ni weli Magen hedhebaaxxa ege'nenneni; tennee ta'anna erganjo atikenaa'ni uwwa adhittota'a kadhataanneni» hiyye.

16 Iikki Wabeekinna, «Ergatemaanneke hedhaake Duuchchi Woddike Goottixxa mittechchonna adhabe'noni» hiyye hiisse. Mittechchonna midde Ni'imaani maganise kadhatoolenna adhdhebaani.

17 Tennexxe Ni'imaani hiyyee qici, «Uwwa anxa adhdha gophaattole Duuchchi Woddike Gootti'a malee hoone magenuwwi'aa ciincatika yookaani wele tolcha shiqisha gophaannaxxe lame gaange'ni buttina fe'edhdhe adhdhe me'onnaa eetti uuttotaa atee kadhataanneni. 18 Yaane kinni Duuchchi Woddik Gootti mitte yaane'aa calla erganjo atika ane'e gattowwaali hiyyowwaali; tinninna gootta ank magenoonfato'a Remoonike fakketi mine'ni e'yeexxi ane'n irkataa wodda aninna isishanni ookko magenoonfatonnole, Remoonike fakketike mine'ni magenoonfatennexxe Duuchchi Woddiki Gootti erganjo atika ane'e gattowwaali hiyyowwaali.»

19 Elsa'inna «Nage'ik me'i!» hiyye. Ni'imaaninna shiixxoo qico bayyate me'eshshani. 20 Eliyaasike erganjo kadeek Giyaazi, «Anke gootta kunni Sooriyichchi Ni'imaani iyyedagemmalcho adhdha gopha eloxxeebbaani; hedha'neeke Duuchchi Woddike Goottixxa isoo hordofe isonaa'ni mittechcho adhdhannoni» hiyye hede.

21 Tennexxe Giyaazi Ni'imaani'i hordofe: Ni'imaaninna Giyaazi udumii'ni gonga'ni daga'neexxa uudeexxi; fadhadiinxe gaarenaa'ni dirreexxi «Maye, elonxee daggette?» hiyye qore.

22 Giyaazinna, «Duuchchiingi nage'akeni; kinni anke gootta, ‹Wabeekotike organaa'ni lame dargaggeeyye Efireemike tullichchuwwinke boganaa'ni anibaa ta'a dedhange'ni dangeemmaxxe maganneteni sase kuma biretika sibiljnaa lame iimi buttixxa seemmaa uwwi hite kuli› hina'ni anee ergineeni» hiyye.

23 Ni'imaaninna «Maganneteni jaane kuma biretika sibljo uwwanno» hyye. Giyaazi'i magannise kadhate. Ookkoo'n jaane kuma birretika sibiljo lame subi gido usureexxi lame iimi buttixxa seemma lebeexxi lame erganjuwwa'ni dukiseexxi; insa'neenna eettene ba'e'neexxi Giyaazi edo me'ine.

24 Giyaazinna tullichchake'ni geyeeshshani ookkone lame subba eeriganjuwwakenaa'ni aadheexxi mini giddo ugge; mannakanna geegeessee'naa me'e.

25 Ookkoo'ni e'yeexxi gootta isiki Elsa'i edo uure. Elsa'inna «Koo Giyaazi haba hexxetta?» hiyye qore. Giyaazinna «Atiki eriganji habanna mareenbi hedhebaani» hiyye hiisse.

26 Elsa'inna isoo hiyyee qici, «Iikki manjichchi atinni afemo'a gaaretenaa'ni dirra wodda anki hafuuri atinni welti me'emmabaataa? Tinni malaqinna seemma ejersiinxe zayiteki hiddichchi, woyinetiki fichchi, gedhebiinkinna laliinki labbakinna meyyaxxi eriganjuwwa adhdhitattoxxe yannabaan. 27 Tennexxee Ni'imaanik soomi ate'ni higaani; duuchchi woddi'anna atixxe horte'ni tare sa'aani.»

Ookkoneechchi uduma Giyaazi Elsa'i biri'ni me'e; kaadetishsha gola'laa qico'ni soomo'e gate.