1 Akaaziyaasixxi ama Ataaliya, ifike beltixxa reyo laqqee wodda, moyanjinka mini hado duuchcha shilchiise.

2 Moyanjo Iyyoraamixxi belto Akaaziyaasixxi dayyo Yoosabeeti kinni Akaaziyaasik belti Iyyo'aasi shiyemo'aa hedemeemmaxxe moyanjiinxe oose giddi'n moorte adhdhite; shinnabaashsha isoo Gotooliyanaa'n sho'neexxi isoonna isoo gargartammaxxa manjichcho mitte kuta'n shoxxe; tennexxe isinna shiyemebaan.

3 Gotooliya boga ookkone galchitaammaa wodda isoo gargaartammaxxini welti jaane wogga Duuchchi Woddike Goottike galma'ni sho'ome.

4 Torbaxxe wogga'ni Yodaahe ergeexxi Karaatitonna heqqanjuwwa ajajammaka dhibba ajajalluwwa isi hedhemmabaa Duuchchi Woddike Goottike galmiba dangaashsha asse. Insa'neninna welti kako aagiyyoti Duuchchi Woddike Goottike galmi giddo insa'ne kakachchiise; ookkoneechchi uduma moyanjiinka belto insa'ne'n leellishsheen. 5 Hiyya'ni insa'ne ajajee qici, «Ha'noonna, sase gamo kaddine'e Sanbatiinxa barra heqqitinaaki giddii'ni sasekenaa'ni mitti mootummatika mine heqqowwaali; 6 Weli sasekenaa'ni mitti Suurixxa hula heqqowwaali; gateeki weli sasekenaa'ni mitti higgeeni galma heqqammake heqanji uduma hexxeexxa hula heqqowwaali. 7 Ha'noo baratendeemmashanni Sanbaatiinxa barra heqanjummatixxa huje affinebaaki sasekenaa'n langaxxi anga kinni moyanjoken shiyemabaashsha galma heqqe. 8 Ha'noo duuchchiingi loliinka miyya abixxitine Moyanjo erqe kayyi'ni qoqqobine heqqe; ha'noo biri'aa shiqaaki hedhoole shiyemowwaali. Moyanji gadhi'a fulla woddanna mini'aa e'yaa wodda duuchcha isonaa'ni gargari higginoqqe'e.»

9 Dhibba loliinka manna ajajammakinna qeesichchi Yodaahe ajajeexxa duuchcha assine; insa'ne mitti mittiingi Sanbatiinxa barra heqqatixxe huje'a e'yaammakanna fulaammaka manna aa'neexxi qeesichcho Yodaheba iyyedange.

10 Qeesichchikinna Duuchchi Woddike Goottike mine'ni hedhemmaka moyanjo Daawwitika bagedonna wonte dhibba loliinka manna ajajammakeera'n uwwe.

11 Loliinki manninna mitti mittingi loliinka miya abixxeexxi; galimiinke bita'anaa'ni middi qico'ni tolchi malchi biranna galimii bira moyanjiinke qarqara'n uurine.

12 Yoodaahenna moyanjinka belto gadhi'a fulcheexxi kallachcha iso'ni ugge; kakotika Maxaafanna koppe iso'n uwwe; isi moyexxanna lallabe; Iyyo'aasinna hariiremeexxi moye. Ookkoneechchi uduma ardi, «Moyanji qeera baro moyowwaali» hiyya'ni cala'ni gammandeexxa hafuura gikki assinne gammashsho leellinshshe.

13 Mootite Gotooliyanna loliinke mannikanna ardiinka canca leqqeexxa yanna ardi hedhdhemmaba'a Duuchchi Woddike Goottike galmibaa me'ite.

14 Ookkoo marte gelteeshshani aadatishshanni moyanji utuphii bira uurre'naa; Ja'laabuwwikinna malagata ufuufammakiiri isi bira he'ne'na'a uude. Ookkone bogiki ardi duuchchi qeexala'ni, malagata ufuufa'nemmani. Gotooliyanna aareti seemma ifixxa darteexxi; «Tinni jallote! Tinni jalloten!» hita'ni raarte.✝

15 Qeesichchi Yodaahenna dhibba loliinka manna ajajammakaara «Middi bita'ni daleeke ardi giddi'ni isee fulche isee hordofaaka duuchcha wolaantichchiki shiwwe» hiyye ajaje. Tinni kaddeechchi qeesichchi ediseeni «Duuchchi Woddike Goottike mine'ni ise shiyema hasissabaani» hiyyeemmani.

16 Insa'nenna isee abixineexxi mootummatike minibaa aa'ne me'inee; Iseenna ookko fadhadiinxe e'yatixxe hulaa hinaa booncho'ni shinne.

17 Yodaahena, Duuchchi Woddike Goottike arda kandaashsha Duuchchi Woddike Goottixxe, moyanjiinxenna ardiinxe odoo'ni kako hexxaashsha asse; iittanni moyanjiinxenna ardiinxe oddo'ni kako hexxaashsha asse.

18 Ookkonne bogiki ardi duuchchi ba'ali hinammaxxa fakke magenoonfantammake minibaa mareexxi findinge; tolchchi malchuwwanna fakkuwwa duuchcha butuchchine; Ba'aali hiyyemaake magenika qeesichcho Maataaninna tolchi malchi edo shinne Ookkoneechchi uduma Yodahe Duuchchi Woddike Goottika galma heqqaaka heqqanjuwwa ugge.

19 Ookkoneechchi uduma dhibba loliinka manna ajajammakaara, Karaatitonna heqqanjuwwa ookkone iittanni bogike ardi duuchchinni welt duuchchiingi mitteba moyanjo Duuchchi Woddike Goottike galmaa'ni aa'neexxi heqqanjuwwiinke dalla'inxe hula darree'ni aade hedheeke mootummatike mine'ni aa'ne e'yinshe; moyanjikinna mootete'ni ofo'le.

20 Bogiinki ardi duuchchi gammade; Gotooliya mootummatike mini giddo wolaantichchiki shiyendemmaxxe qachchi nage'a alfe.

21 Iyyo'aasinna moyee wodda wogga isixxi torbaane woggammaani.