1 Wabeekotik orgi Elsa'i'n hiyyee qici, «Kunni, ati edo ofollannoki boonchi cu'mate'eni. 2 Tennexxe Yordaanoosike galaaniba marrenneexxi no'o mitti mittingi haqichcho wonxe iyyedango; ookkoonna he'nannoka mine ijaarro» hine.

Elsa'inna «Kaddaqqata me'e» hiyye.

3 Wabeekkole giddii'ni mitti Elsa'ii, «Atinna erganjuwwi atikinni welti daggaboxxoota?» hiyye.

Elsayinna «Eloxxeni me'annoni» hiyye.

4 Insa'neni weltinna me'e. Yordaanoosika galaana genneshshaani haqqe cirate'ni ke'ne.

5 Inisa'nee giddii'ni mitti haqqe woxate'ni hedhee'na'a dedhange'ni maxirabi haqichchokenaa'ni luffi hiyyeexxi wedi'i giddo ibe: isinna «Maa mambe'a anke gootta; manjokenaa'ni aadhenneke maxarabaqqa!» hiyye raare.

6 Mageniinki manjinna «Hoone darre'ni ibee?» hiyye qore.

Manjichchikinna qoce ibeemmaxxa bakka kulee wodda, Elsa'iinna haqichcho woxeexxi wede'i giddi'a takki asse maxirabi wode'eke'n iimi'a dage. 7 Ookkoneechchi uduma Elisa'inna, «Fulchite aadhi» hiyye. Manjichchikinna anga qeerriseexxi aadhe.

8 Eettene yanna'ni Sooriyike bogiki moyanji Isira'eelike ardinni welti lolemma'ni heedhemani: isinna loliinke mannike ajajalluwwinni welti mari'atechchi uduma, «Kaba, konne booncho'ni ofo'lannoni» hiyye. 9 Mageniinki manjinna, «Sooriyaki manni ooko'ni butti'a dirremmaxxee ookkone gamanaa'ni saxxaboxxoshsha heqedhi» hiyya'ni Isira'eelike moyanji'a erga erge.

10 Tennexxee Isira'eeliki moyanji Mageniinki manji kulemmaka booncho dooyyinaashsha asse; Elsa'inna moyanjo iitta hedheeke boonchonaa'ni ifi heqqedhaashsha mittenna lame yanna iimi darre xexxe'achchiise.

11 Tinninna Sooriyaka moyanjo yo'oshsha jinnisseemmaxxee; loliinka manna ajajammakaara ye'eexxi «No'o giddii'ni Isira'eelike moyanjinni welti jaaloomeeki hedhoole ane'ni kuldinabaa?» hiyye insa'ne qore.

12 Loliinke mannike ajajaalluwwi giddii'ni mitti «Anke gootta, Moyanjoo; no'o giddii'ni mittikinna tennee assaaki hedhebaan; yaane kinni ati ma'nande'ni hexxe haasottattooxxa midde mittetinna gattebaangi Isira'eelike moyanji'a kula'neeki Isira'eeli giddo hedheeki wabeek Elsa'iteni» hiyye.

13 Sooriyik moyanjinna, «Manna erge abidisonna'a; Isi haba hedheexxa hasse» hiyye ajaje. Ookkoneechchi uduma «Elisayi Dootani hedheeni» hitaaxxi odo iso'ni gelte.

14 Tennexxe Moyanjikinna fadhadokanna fadhadiinxe gaarreni itaani heddo loliinka manna ooko'a erge. Insa'nenna hashsha me'ina'ni galle marre genne qachcha bunqe.

15 Mageniinke manjiki erganji barrsa ke'eexxi gadhi'a fulee wodda, fadhadiinkinna sarageelluwwake'n hedheeki ifi jabeessedheeki loliinki manni qachcha bunqeemmani. Erganjikinna «Anke gootta; maa assinennexxa woyya?» hiyye qore.

16 Iikki Wabeekinna «Meeco'o no'oni weliti hedheeke sannachchi insa'neni welti hedhekenaa'ni sa'aakeni sooddattoxxe» hiyye.

17 Ookkoneechchi uduma Elsa'inna «Duuchchi Woddike anke Goottaa; uudaashsha ille isixxa bani» hiyye soodate. Duuchchi Woddik Goottinna erganji isikixxa ille bane; uude woddanna giiratiki fadhadinna gaaruwwa koobuwwate'ni Elsa'ika qarqara buqqee'naa uude.

18 Sooryiki manni adadde dirre isibaa marree wodda Elsa'inna, «Konne arda balla'ake assi» hiyye. Duuchchi Woddike Goottibaa soodate. Tennexxee Elsa'i laqemmashshaani Duuchchi Woddiki Gootti insa'ne bala'ake asse.

19 Elsa'inna insa'nee, «Ori kabaa'nitebaann: qachchi konnetebaani: hassina'neeke manji'baa ha'noo geessisonnaa anxa duuka amme» insa'nee hiyye. Ookko'ni akeeka'ni Semaariya'a adhdhe me'e.

20 Qachchi giddi'aa e'yineechchi uduma Elsa'i «Duuchchi Woddike Gootta uundaashsha konne mannixxa ille bani» hiyye. Duuchchii Wddik Goottinna ille insa'neexxa bane; insa'nenna Semaariya giddo he'neexxa egenne.

21 Isira'eelik moyanji insa'ne uudee wodda, «Anke anna insa'nee shiyoo?» hiyyeexxi Elsa'ii qore.

22 Elisayyina «Insa'ne shiltoxxe; wolaantichchikina gabeti boojitetteka manna shiya ati'a hasissa? Ta'anna indaachchonna ha'winaachcho shiqinshaasha assi inde ha'wineexxi gootti ifikibaa me'inuuni» hiyye.

23 Tennexxe lumoxxa ita qophpheesise'naa inde ha'wineechchi uduma insa'ne geegeesse'na'a gootti ifikibaa me'ine. Sooriyaki loliinki manninna Isira'eeli'i lolo'a ookkoneechchi uduma hige dagebaani.

24 Shiixxooxxe yannan uduma Sooriyaki moyanji Beenihadaadi duuchchiinga loliinka manna bukki asse; fuleexxinna Semaariya elqe kayyi'ni buqe.

25 Ookkone qachchakanna elqe kayyii'ni buqeemmaxxe mitte harreki umi saddeeta tomme birretika sibiljo; lame tomme kiilo geyaaki guugenjotiki cili iittanni onde birretike sbiljo'ni gurgurra qico'ni jabake solo'o kadde.

26 Isira'eelik moyanji dalla'i giddo mammaremaa'naa mitte manjichcho hafuura gikki assiteexxi «Anke gootta, moyanjo; maganneteni anee gargaari!» hite.

27 Moyanjikinna, «Duuchchi Woddik Gootti ate'e gargaara gophoole ani hitta ate'e gargaaranno? Midhatite moo yookaan woyinetike bulbulinnite atee gargaaraanneki?» hiyye hiisse.

28 Ookkoneechchi uduma «Isi maachcho atinxi rakko?» hiyye isee qore.

Isenna kinni hita'ni hiissitee qici: «Tinni manjichcho, ‹Telcho belto atika indonnaa uwwi; soodo kinni anka belto indannoni› anee hite. 29 Tennexxe anka belto galfine indenneni. Gorsa kinni, ‹Belto atikanna indonna'a idagi› isee hiyyenneni; isenna kinni sho'exxe.»✝

30 Moyanjikinna manjichcho hiteexxa laqeeshshan yaaddoti seemma ifixxa daddare; dalla'i giddo mammaremaa wodda giddo doonyya odo'weexxa ardi uude.

31 Moyanjikinna, «Saafaxiinika belto Elsa'iki umi telcho woxemebaaki galoole; Mageni ane'e balleesso; tennee saxxeexxa ane'ni asso» hiyye.

32 Eettene yanna'ni Elsa'i mine ifinge'ni ofo'leemmaani; geedhuwwatinna isinni welti ofoldeemmaani. Moyanjikinna erganji edise me'ashsha asse. Erga maremmaki manji mare geyebaa edigama Elisayinna geedhe ifixxe, «Kunni manjo anga sa'eki gooba anka woxxo'a manjo erigeexxa affineeni hexxine? Kunni ta'anna erigememmaki dagaa wodda hula cuffine mini'a e'yabaashsha asse; moynjiiknna isi udumi'ni dagate'n hedheen» hiyye.

33 Elisayi geedhdheti welti haaso'ange'ni hedhdhee'naa; erganji isiba'a adade dirre dage. Moyanjikinna dageexxi, «Tennee rakko no'o'ni iyyedageeki Duuchchi Woddike Gootta; ani Duuchchi Woddike Goottanaa'ni maachcho heqqedhaanneta?» hiyye.