1 Ookkoneechchi uduma moyanji Yihudaxxanna Iyyerusaalemixxa geedhe duuchcha ye'e.

2 Yihudaka manna duuchcha, Iyyerusaalemike qachcha'ni hedha'neeka manna duuchcha, Qeesenna, wabeeko duuchcha, oosetenaa'ni lumollii qico'ni mitti manji gatebaangi aadheexxi Duuchchi Woddike Goottike galmiba'a dage. Duuchchi Woddike Goottike galmi giddi'ni afemeeka kakotike maxaafika hiyyichcho duuchcha mansha ifixxinni lanqo'a insa'ne'a haaseesse.

3 Moyanjikinna worqetixxe sooddo bira Duuchchi Woddike Gootti edo uurreexxi Duuchchi Woddika Gootta hordoffaaxxa ajajuwwa, seeruwwa, aaduwwa, mitte godobini, hedho duuchcha heqqedhaaxxa, konne maxaafa'ni borreessendeexxa kako jabeessaaxxanna Duuchchi Woddike Gootti edo kakotanna haaroonse. Ookkoneechchi uduma ardi duuchchi kakote'e afe'exxa addatensha kokeesse.

4 Moyanjikinna Ba'aali'a, Asheera'anna iimixxe urjuwwa duuchchi'a giissinemmaka la'onfantaaka miyuwwa duuchcha, Duuchchi Woddike Goottike galmi giddii'ni fulchinaashsha umo qeesichcho Hilqiyaasi'i, iso'ni aande hariirendemmaxxa qeesenna galmiinxa hula heqqammaka heqqanjuwwa ajaje. Miyuwakanna Iyyrusaalemi gadho Qediroonixxe dhooqake diida'ni gube bululokanna Beeteli'a aadhe me'e.

5 Yihudaka qachchuwwa'ninna Iyyerusaalemi qarqara'ni hedheeke tullichchuwwa'ni hixaana gunbo'a Yihudiinki moyanjuwwi hariiremmaka magenoonfantammaxxe fakkexxa qeese shorre ittani Ba'aali'a, arishshoteenna agenjokee, bukki hiteexxe urjuwwa'anna iimatixxe urjuwwa duuchchi'a hixaanna gunbammakaara fugusse.

6 Asheerixxe fakkexxa sooddo Duuchchi Woddike Goottike galmi giddi'ni fulcheexxi Iyyerusaalemi qachchi gadho hedheeke Qediroonixxe dhooqabaa'a aadhe me'exxi gube; bulleesse dayeexxi ardiinke hirreessa'ni xeere.✝

7 Ittanni ege'nemebaaka mageno magenoonfachchotixxa aada, Duuchchi Woddike Goottike galmi giddo labbaki labbakinni weleti yabaabulammake galmi giddixxa kutuwwanna melaalle Asheerake mageni'a seemmatika golo giissito'a fuutta suqqammaxxa kutuwwa findige.

8 Iyyosiyaasi fakke magenoonfantammake minixxa qeese duuchcha Yihudake qachchuwwanaa'n Iyyerussaalemi'a iyyedage; Geba'i'n Berissaabehi qico'ni; qeese hixaana gubbammaka; tullichchuwwake'n magenoonfantammaka boonchuwwa duuchcha battoonse. Qachchinxe hulabaa'ni bita'i darre'ni; ookkone qachcha galchammake Iyyaasubaa e'yinammak kinjiinke dalla'ixxe hula bira magenoonfantammaka boonchuwwa diige bire.

9 Tullichchuwwake'ni magenoonfantamma boonchixxi qeese Iyyerusaalemi hedheeke Duuchchi Woddike Goottike tolchimalcho'ni tolcha shiqishabaashsha gonphoolenna midde; jaaluwwa insa'neexxe qeeseni welti gamami (irsho) e'yebaaxxa kebbo inda'nemmani.

10 Henoomixxe Dhooqa'ni hedheemmaka Toofeeti hinaaka magenoonfantammaka booncho battoonse; tennenna assechchi; huuni manjinna labbaka yookaani meyyaxxa belto ifixxa Moloki hina'neeke mageni'a ciincatike tolchi'a shiqishabaashshaten.✝

11 Yihudak moyanjuwwi Duuchchi Woddike Goottike galmibaa e'yinammaxxe hula'ni arishsho magenoonfachchote'e uunemmaka fadhado oko'ni fugusse. Insa'nenna Naataani Meeleeki hiyyemaake mitte jalqabike mini bira weldeennate'ni he'nemmani. Iyyosiyaasinna arishsho magenoonfanto'a uuneemmaka fadhaduwwakanna hoyye; fadhadiinxa gaarenna gube.

12 Yihudak moyanjuwwi iimi darreke Akaazike mini bira iimike ba'lina'ni uurrisemmaka tolchimalcho, Minaasenna lamiinxe Duuchchi Woddike Goottike galmike ba'linna'ni giissemmaka tolchimalchuwwa enqe bire; enqemalchuwwakanna Qediroonixxe Dhooqa'ni hune.

13 Iittani Iyyrusaaleminaa'n boroti darre'ni batto'eeke tullichchibaa'ni bita'i darre'ni Asitaarooti hiyyemaake Sidoonake mageni'a, Kamooshi hiyyemaake Mo'aabike mageni'aanna Milkoomi hiyyemaake Amoonike mageni'a moyanji Solomooni giisiseemmaxxa battitte fakkuwwa duuchcha battootteexxe kaddeexxa kokeesse.✝

14 Higgeen moyanji Iyyosiyaas magenoonfantammaxxa kinjiinxa sooddo duuchcha butuchche bire: Asheera hinaaxxe mageniixxa sooddo wowwoxe bire; ettene bakka'ninna reyeeke mannixxa miqe tuule.✝

15 Isira'eeli'i dedhiseemmaki Naabaaxik belti Iyyorbi'aami hujiseemmaka tolchimalcho Beeteli hedhemmaka ookkonee tullichchuwwake'ni magenoonfatammaka booncho midde ittani findige; kinjuwwakanna butuchche bire, bulletishshanna asse. Asheeraxxa soodo gube.

16 Ookkoneechchi uduma Iyyosiyaasi qarqara uuda wodda, tullichchuwwake'ni hedheka hirreessuwa afe; miquwwatanna moongemmaxxe bale balenaa'ni fulchinaashsha asse; iikki Duuchchi Woddike Goottik manji edise haaso'emmashshani; Duuchchi Woddike Goottiki hiyyichchi muuxeemaashsha tolchimalcho battonso'a hiyyeexxi miquwwa hana gube.✝

17 Moyanjiikinna «Iikki hirreessi ayyike?» hiyye qore.

Beetelik Qachchiinki manninna; «Yihudanaa'n dageexxi ta'a ati assitetexxa yaane duuchcha Beetelike tolchmalcho'ni geltaaxxa kuleeke ookkone Duuchchi Woddike Goottike manjike mooggoni» hiyye.✝

18 Iyyosiyaasinna «Kabanni waalle; isixxa miqe huuni manjinna kabaa'ni le'misabaashsha» hiyye.

Tennexxee isixxanna Semaariya'n dageemmake wabeekixxa miqe tunqebangi walle.

19 Iyyosiyaasinna Beeteli assemmaxxa duuchcha Semaariyake qachchuwwike tullichchuwwa'ni hana Isira'eeliki moyanjuwwi hujisemmaxxanna Duuchchi Woddika Gootta mufachchinsemmaxxa magenoonfantammaxxe fakkeka booncho duuchcha battoonse. 20 Iyyosiyaasi ookkone tullichchuwwa, tullichchuwwa'ni magenoonfantammake booncho'ni qeese duuuchcha; mitte mitte tolchimalchuwwi hana gorra'e bire; tolchimalchuwwake'ninna manjinxa miqe gube. Ookkoneechchi uduma Iyyerusaalemi'a hige.

21 Moyanjikinna arda duuchcha «Konne kakotike Maxaafa'ni borreessendemmashshanni Duuchchi Woddika Gootta ha'nooke Magenika sa'atika ayyaanna ulfeesse» hiyye ajaje.

22 Isira'eeli'i akeekkammaxxe hayyooleke baronaa'ni ke'isse; Isira'eelikenna Yihudake moyanjuwwike baro duuchcha'ni iitta hedheeki Sa'atiki ayyaani haanonna ulfeesseme ege'nemebaani.

23 Iyyosiyaasi moyemmake baro'ni tommenna saddeetixxe wogga'ni kini kunni Sa'atiki ayyaani Iyyerusaalemi giddo Duuchchi Woddike Gootti'a ulfeesseme.

24 Higgeeni Iyyosiyaasi ekedha haaseessammaka, morammakaara, mini mini hadika magenuwwa, magenoonfantammaxxa fakkuwwa, ittani Yihudake'ninna Iyyerusaalemi'ni afendeexxa wele diqachchiissaaxxa yaanuwwa duuchcha fugusse bire. Tenneenna asseechchi qeesichchi Hilqiyaasi Duuchchi Woddike Goottike galmi giddii'ni afemaake maxaafa'ni borreessemeeki seeriinki hiyyichchi muuxemaashshateni.

25 Muuseke seera'n borreessendemmashshani mitte godobini, shenitte hedhoni, shenitte hunnani, Duuchchi Woddike Goottibaa higeeki Iyyosiyaasishsha hedheeki moyanji isi edi ga'manna kadi isi uduma hara afemebaani.

26 Yaane kinni Minaase hujeexxe fuggooxxe yaanexxe buuto'a Yihudake'ni bubbeexxi Duuchchi Woddike Goottixxi mufe ta'iqico'ni qiiddeemmabaani.

27 Tennexxe Duuchchi Woddik Gootti hiyyeeqici, «Isira'eel'i ifinaa'ni bayyisenneshshani Yihudakanna ani edii'ni bayyisannoni; ani fi'lenneka qachcha Iyyerusaaleminna ‹Summi anki ookko hedhaani› hiyye haaso'enneka konnee galma waalannoni» hiyye.

28 Iyyosiyaasi moyemmake baro'ni hujendeexxi wele huje; huje muuxeexxi duuchchi Yihudake moyanjuwwike jirtetike maxaafa'ni borreessende hexxeexxebaata?

29 Iyyosiyaasi moyemmake baro'ni Gibtsek moyanji Fari'ooni Nika'u, Asoorika moyanjo gargaaro'a Efiraaxisike galaaniba'a mareemmani; moyanji Iyyosiyaasinna lolakee fule; kaddoolenna Feri'ooni Nika'u mare loleexxi Megido hinaaba iso'o shiye.

30 Iyyosiyaasiki erganjuwwi Megido'n rensha isika fadhadinxe gaare'ni fe'exxi Iyyerusaalemi'a iyyedangeexxi moyanjuwwiinke hirreessa'ni moonge. Yihudiinki manninna Iyyosiyaasika belto Iyyo'akaazii'i filleexxi hariirre moyanjoke assine.

31 Iyyo'akaazi Yihudake'ni moyee wodda wogga isixxinna lame tommenna sasetemman; isinna Iyyerusaalemi ofo'leexxi sase agenjo moye galche. Ama isixxinna Hamuuxxaal hinaaxxeni; isenna Libinake manjixxe Ermiyaasixxe beltommani.

32 Ediki annuwwi isiki assemmaxxa duuchcha isinna Duuchchi Woddike Gootti edo elobaaxxa yaane asse.

33 Iyyerusaalemi ofo'leexxi galchabaashsha Feri'ooni Nika'u Hamaatike boga'ni Ribla hiyyemaake booncho'ni haachchabiki usureexxi; Yihudake'ni sase kumanna shoole dhibba kiilo birretika sibiljo, sase tommenna shoole kiilo worqe; irbo uwwaashsha asse.

34 Feri'ooni Nika'u Iyyosiyaasika belto Eliyaqemi'i anninxe Iyyosiyaasixxe bakka'n moye galchaashsha asse; summa isikanna Iyyo'aaqemite hiyye fulche. Yaane kinni Iyyo'akaazii'i booji'eexxi Gibtse'a adhdhe me'e isinna ookkooni reye.

35 Iyyo'aaqemi Feri'ooni Nika'u hunnati laqemmaashsha worenna birretika sibiljo uwwe; tennee'e assate'e hunna hunnashanni irbo birretika sibiljonna worqe ardakenaa'n aadhe.

36 Iyyo'aaqemi moyee wodda wogga isixxinna lame tommenna ondetemman; Iyyerusaalemi ofo'leexxi tommenna mitte wogga mowe galche; ama isixxi Zebida Ruumake qachcha'n ilemeeke Fedaayaxxe beltomman. 37 Iyyo'aqeemi siretiki annuwwi isik assemmashshanni isinna Duuchchi Woddike Gootti edo elobaaxa yaane asse.