1 Yihudiinki moyanji Akaaziyaasiki belti Iyyo'aasi moyeexxe lame tommenna sase woga'ni Yihudake boga'ni; Iyyuk belti Iyyo'akaazi Semaariyake qachcha'ni Isira'eeli'ni moye; tommenna torbaane wogga moye galche.

2 Isinna Naabaaxik belti Iyyorbi'aami Isira'eeli'i dedhiseemmaxxa cubbo hordofati Duuchchi Woddike Gootti edo elobaaxxa huje huje: tenne fuggoxxe hujenaa'ni udumi'a higebaani. 3 Tennexxe Duuchchi Woddike Goottixxi aare Isira'eelike arda'ni ha'yite; tennexxe Sooriyaka moyanjo Azaheelinna belti isiki Beenihadaadi he'nemmake baro duuchcha'ni insa'neexxe anga'ni sa'isse uwe.

4 Ookkoneechchi uduma Iyyo'akaazi Duuchchi Woddike Goottiba'a soodate: Duuchchi Woddik Goottinna Sooriyiki moyanji Isira'eeli'i hitta rakkiseexxa uudemmaxxe soodachcho isixxa laqe.

5 Tennexxe Duuchchi Woddik Gootti Isira'eelii'i anjiraaka manjo uwwe; insa'nenna Sooriyake ardike miiccamanaa'ni fulle; edi woddishshani ifi ifinge duunkaana'ni nage'iki hedha sanfee.

6 Kaddo malee Isira'eeli'i cubbo hujaashsha assemake Iyyorbi'aamike mini hadixxe cubbonaa'ni waalle udumi'a hingebaani; waallammaxxa baka cubbo waala gibati Ashshera hiyyemaaka meyyaxxike magenixxa fakke Semaariya giddo magenonfachchote'ni jabaante.

7 Iyyo'akaazike loliinke mannanaa'ni reyotenaa'ni gateeki onde tomme fadhado gulufammaki manni, tomme sarageeluwwinna tomme kuma butti'ni lolammake manna caalman. Tinninna kaddeexxi buuto Sooriyaki moyanji gateeka biremmaxxenna aldu'metike huurishsha isoo assemmaxxetemman.

8 Iyyo'akaazi moyemmake baro'ni hujeexxi wele yaane; aseexxinna hujee muuxxeexxi duuchchi Isira'eelike moyanjuwwiinke jiritetike Maxaafa'ni borreessende hexxeexxebaa?

9 Iyyo'akaazinna edike ifike annuwwihshani reye: Semaariya moogeme; belti isiki Yo'aasinna bakka isixxe'n moye.

10 Yihudake moyanjike Iyyo'aasike baro'ni; sase tommenna torbaane wogga'ni; Iyyo'akaazi belti Yo'aasi Semaariyake qachcha'ni Isira'eeli'ni moye; tommenna jaane wogga moye galche.

11 Isinna Duuchchi Woddike Gootti edo elobaaxxa huje: Naabaaxik belti Iyyorbi'aami Isira'eelika arda dedhiseemmaxxe cubbo duuchchanaa'ni bayyatebaani; ittini jabaate.

12 Yo'aasi moyemmake baro'ni asseexxi wele yaane duuchcha iittani Yihudaka moyanjo Ameetsiyasi'i loleeke loliini welti Isira'eelike moyanjuwwinke jirtetike Maxaafa'ni borreessendeexxeba?.

13 Yo'aasinna edike ifike annuwwiinshanni reye; Iyyorbi'aminna isixxe bakka'ni moote isixxe'ni ofo'le. Yo'asinna Semaariya Isira'eelike moyanjuwwinke hirreessa'ni moogeme.

14 Ettenne yanaa'ni Elisa'inna jaba qicin ela gophe lubbote ga'na'nemmani. Isira'eeliki moyanji Yo'aasi isoo laqo'a adaadde mareexxi isi'a oodhe; «Anke annayyo! Anke annayyo! Isira'eliixxe sarageeluwwa gulufaammake manni'a!» hiyya'ni oodhe.✝

15 Elisa'inna moyanjo, «Mitte gabenna mogiduwwa iyyedagi» hiyye isinna iyyedage.

16 Isira'eelika moyanjo, «Gabe angate'ni abixxi» hiyye. Gabetanna abixxe wodda Elisa'inna anga ifixxa moyanjiinxe anga'ni hana ugge.

17 Higgeeni, «Boroti darrexxa maskoote bani» hiyye: moyanjikinna bane; Elisa'inna «Gabe fixi!» hiyye; isinna fixe; ookkoo'ni, «Duuchchi Woddike Goottixxa injifachchotixxa gabe! Sooriya injifatendaaxxe gabe!» hiyye. Elsa'inna higgeeni «Sooriyitotanna Afeeqike booncho'n hara kutti assite insa'ne biritattoni» hiyye.

18 Higgeeni, «Gabuwwa aadhi» hiyye; moyanjikinna aadhe; Elisaiinna sase yanna buttna ganeexxi uurrise.

19 Duuchchi Woddike Goottiki manji iso'n aareexxinna «Buttinna onde yookaani jaane yanna gana hassisammani; iitta assitettelcho kadeele Sooriyito injifate hara kutti assite insa'ne birtatani; ta'a kinni injifattattoki sase yanna callani» hiyye.

20 Elisa'inna reye'na: moongeni. Eettene yanna Mo'aabinaa'n daga'n lole miidhaaki manni wogga woga'nini Isira'eelike boga'ni e'yina'nemmani.

21 Mitte yanna Isira'eeliki manni mitti manji reye'naa mooggoke'ni he'ne'naa'a mitti lole miidhammake mannixxa gamo dedhange'ni anfe; tennexxe reyemmake manjika rensha Elsa'ike mooggi giddo hunne; renshikinna Elsay'ixxa miqe tuqeeshshani iikki woddi manjichchi fayyeexxi lekkati uurre.

22 Iyyo'akaazi moyemmake baro duuchcha'ni Sooriyaki moyanji Azaheeli Isira'eelika arda rakkisa'neemmani.

23 Duuchchi Woddik Gootti kinni insa'ne'a marare yaadexxi insa'neba'anna hige; tinninna Abirihaami'a, Yissihaaqi'anna Ya'iqoobi'a aagettaxxe kakko'a hiyyeeteni; techchi qico'ni insa'ne biro'a hasebaani; albi ifiki edi'ninna insa'ne fugussebaani.

24 Sooriyaki moyanji Azaheeli reye; belti isiki Beenihadaadinna bakka isixxe'ni moye.

25 Ookkoneechchi uduma Iyyo'akaazik belti Yo'aasi; Azaheelik belt Beenihadaadi anna iske Iyyo'akazinaa'n lole adhdhemmaka qachchuwwa hiisse abixxe; Yo'aasi sase yanna lole'e injifate; Isira'eelika qachchuwwa konne qicinni ifitti hiissedhe abixxe.