1 Remaliyak belti Feequhe moyeexxe tommenna torbaane wogga'ni; Yihudake moyanjik Iyyo'ataamik belti Akaazi moye.

2 Akaazi Moye wodda wogga isixxi lame tommemmani; Iyyerusaalemi ofo'leexxi tommenna jaane wogga moye galche. Anni isiki Daawwiti assemmaxxa eloxxa yaane Duuchchi Woddike Gotta ifike Mageni edo assebaani.

3 Isinna Isira'eelike moyanjuwwika elobaaka adaba hordofe; ittanni Duuchchi Woddik Gootti Isira'eelike ardi edi'ni shorreemmake gosa gosake ardixxa batte yaane hordofeexxi; belto ifinga fakkuwwate'e ciincatike tolcha asse shiqishe.✝ 4 Iittanni tullichchuwwake'ni magenoonfatammake boonchuwwa'ni; tullichchuwwiinxe xungo'ninna shafi callike haqichchuwwi hunda duuchcha tolcha tolche hixxaanakanna gube.

5 Sooriyaki moyanji, Retsiininna Isira'eelika moyanjo Remaliyaka belto Feequhe lollo'anna Akazi'i bunqo'a Iyyerusaalemi'a dange; kaddo male'e Akaazi'i injifata dandeenebaani.✝ 6 Eettenne yanna'ni Sooryaki moyanji Retsiini Yihudaka manna shoreexxi; Eelaatika qachcha sooriyake assee ifiba'a hiissedhe; ookkoneechchi uduma Eedoomito Elaati'a dageexxi techchi qico'ni ookko hexxa'neeni.

7 Tennenaa'ni kexxeexxa Akaazi Asoorike moyanjiba'a Teelgelteelfeelsoori, «Ani atiki erganji, atinge beltoni; daggettexxi anee lola'neeke Sooriyake moyanjona'ninna Isira'eelike moyanjixxe anganaa'ni ane'e anjiiri» hiyya'ni erga isiba'a ergedhe.

8 Akaazinna Duuchchi Woddike Goottike galma'ninna mootummatika miyya masse'nammake minuwi giddo afemaaka birretika sibljonna worrqe aadheexxi Asoorike moyanji'a uuno'a erge.

9 Asoorik moyanjinna, Akaazika qortuma Demasiqo loleexxi ifitti hiissedhe; arda isikanna booji'exxi Qiiri'a adhdhe me'exxi; Retsiinii'i shiye.

10 Ookkoneechchi uduma Moyanji Akaazi Asoorika moyanjo Teelgelteelfeelsoorinni afemo'a Demasiqo'a me'e. Demasiqo hedheeka tolchimalcho uudeexxi; eettene fakke'ni tolchimalcho giissate'e fakkeesse borreessexxi qeesichcho Uuriya'a erge.

11 Qeesichchi Uuriyanna moyanji Akaazi Demasiqoo'ni ergemmaxxe fakkeshshanni tolchi malcho giisse; moyanji Akaazi hige dagebaangi edise giisse bire.

12 Moyanji Demasiqo'ni hige dagee wodda; tolchi malcho uude; biri'a shiqeexxi tolcha shiqisho'a tolchi malchiinbaa alale mare.

13 Isinna cincatika tolchanna midhatika tolcha tolchi malchoke'ni hana shiqishe; ha'watika tolchanna dune; mittummatike tolchixxa mundenna tolchi malchoke'ni fifixe.

14 Haarooke tolchi malchixxenna Duuchchi Woddike Goottike galmixxe oddo'ni Duuchchi Woddike Gootti edo uurrinsemmaka sageettotika tolchi malcho bakkatenaa'ni hoyyeexxi haarooke tolchi malchibaa'ni middi darre'ni ugge.✝

15 Ookkoneechchi uduma moyanji Akaazi Qeesichcho Uuriya'a hiyye ajajee qici, «Konne lumoke haarooke tolchi malcho'ni; gorsika ciincatika tolchanna galigalka midhatika tolcha; moyanjinxe shiqaka ciincatika tolchanna midhatika ha'watika tolcha ittaani ardi duuchchixxe shiqaka ciincatika tolcha, midhatikanna ha'watika tolcha shiqishi; ciincatike tolchi'a shiqaake horixxa munde duuchcha tolchi malchoke'ni fifixxi; sageetottiki tolchi malchi kinni ani hasannoxxa yaane qodhdhate la'oonfatannoke kadaani» hiyye.

16 Qeesichchi Uuriyanna moyanji Akaazi ajajemmaxxa duuchcha asse.

17 Moyanji Akaazinna gami gaminka saanquwa goggosheexxi aadhe; moluwwati hana hexxeexxa itti anshe'nammaxxa qoruwwa hoyye. Wodee'e cammammaka gonga ba'edhe abidemmaka tommenna lame kormooletixxa fakke sageettoti giissineexxi hana dirrise ba'lake kinjo'ni hana ofo'lishe.✝

18 Asoorika moyanjo gammachchiisate'e hiyye sanbatiinxa barra moyanjiinxa moote ugginaaba gargari hedhee booncho balleesse: konneechchi edo hedhemmaki hooni moyanjinna Duuchchi Woddike Goottike galmi giddi'a e'yammaxxa gatexxa hula cufe.

19 Moyanji Akaazi asseexi wele yaane duuchcha Yihudake moyajuwwike jirtetike maxaafa'ni borreessende hexxeeni: 20 Akaazi edike isike annuwwishsha reye Daawwitike qachchi giddo hedheeke moyanjuwwiinke hirreessa'ni moogeme: isixxe bakka'ni belti isiki Hiziqiyaasi moye.✝