1 Isira'eelik moyanji Iyyorbi'ami moyexxe lame tommenna torbaxxee wogga'ni Yihudaka moyanjo Ametsiyasik belti Azariyaasi moye.

2 Moye wodda wogga isixxi tommenna jaane woggammani; Iyyerusaalemii'ni ofo'leexxi onde tommenna lame wogga moye galche. Ama isixxinna Yikooliya hiyyendaaxxe Iyyerusaalemi ilendeexxe manjichchommani.

3 Isinna anni isiki Amesiyaasi assemmashsha Azariyaasinna Duuchchi Woddike Gootti edo eloxxa yaane asse.

4 Kaddo malee tullichchuwwake'ni hedhemmaka magenoonfachchotika boonchuwwa balleessebaani: ardikinna koobuwwate'ni tolcha shiqilshanna hixaana guba waaleemmabaani.

5 Duuchchi Woddik Goottinna moyanjo reyaaxxe barra qico'ni soomiinke dhukkubinni abidemaashsha asse: isinna gargaritti hedheeke mine'ni qofinni hedha'nemmani. Ettenne yanna mootummatika mine akeekisanjoke kadee akekaammakinna bogiinka arda galchammak moyanjinke belto isike Iyyo'ataamitemmani.

6 Azariyaasi moyemmake baro'ni hujendeexxi wele huje Yihudak moyanji asseexxi duuchchanna jirtetike maxaafa'ni borreessende hexxeexxebaa?

7 Azariyaasi edike annuwwishshanni reye; Daawwitike qachcha'ni ediki annuwwi moogememmake hirreessi bira moonge. Belti isiki Iyyo'ataaminna isixxe bakaa'ni moye.✝

8 Yihudak moyaji Azariyaasi moyeexxe sase tommenna saddeeta wogga'ni Iyyorbi'amik belti Zakkariyaasi Semaariyake qachcha'ni Isira'eeli'ni moye: jaane agenjo moye galche.

9 Isinna anni isiki assemmaxxa duuchcha isinna Duuchchi Woddike Gootti edo fuggoxxa yaane asse; Naabaaxik belti Iyyorbi'aami Isira'eelii'i dedhisemmaxxe cubbonaa'ni udumi'a higebaani.

10 Iyyabiisik belti Seloomi Zakkariyaasi'ni fuggoxxinni ke'eexxi; ardi edo gane shiyeexxi isixxe bakka'ninna moye.

11 Zakkariyaasi moyemmake baro'ni hujeexxi wele huje Isira'eelike moyanjuwwiinke jirtetike maxaafa'ni borreessende'eni.

12 Konne qicin Duuchchi Woddik Gootti moyanjo Iyyu'ni, «Oose atixxi shoole ila qico'n Isira'eeli'ni mootaani» hiyyeeki hiyyichchi muuxeme.✝

13 Yihudak moyanji Ooziya moyeexxe sase tommenna sallanixxe wogga'ni Iyyabiisik belti Seloomi Isira'eeli'ni moye. Semaariya ofo'leexxi mitte agenjo moye galche.

14 Gaadiki belti Minaheemi; Tirtsaa'n ke'exxi Semaariya mareexxi Iyyabiisika belto Seloomii'i shiye; ookkoneechchi uduma isixxe bakaa'ni moye.

15 Seloomi moyemmake baro'ni hujendeexxi wele hujenna fuggoxxini ke'exxi Isira'eelike moyanjuwwinke jirtetike maxaafa'ni borreessende'eni.

16 Eettenne yanaa'ni Minaheemi Tirtsaa'n fuleexxi Betifisanna qachchi giddo hedhaneeke manna duuchcha'ni qarqarake'ni hedheeka boga duuchcha lole kutti asse bire; tenneenna asseechchi qachchinxa huluwwa isi'a bana ginbeemmaxxeeteni; Tifisaani loleexxi siila'witeexxe melaalleka godoba duuchcha daddarre.

17 Yihudak moyanji Azariyaasi moyeexxe sase tommenna sallaanixxe wogga'ni Gaadiki belti Minaheemi Isira'eel'ni moye; Semaariya ofo'leexxi tomme wogga moye galche.

18 Duuchchi Woddike Gootti edo elobaaxxa yaane asse; hedhemmake baro duuchcha'ni Naabaaxik belti Iyyorbi'aami Isira'eeli'i dedhisemaxxe cubbonaa'ni udumi'a higebaani.

19 Ookkoneechchi uduma Asoorik moyanji Foha*, Isira'eelii'i lole; Minaheeminna gargaarissa isonaa'n alfo'anna mootumma isixxa jabeesso'a hiyye'e; sase tommenna shoole kuma kiilo birretika sibljo isi'a uwwe.

20 Minaheemi konne maallaqa bukki assinaashsha asseki Isira'eelinaa'nite kadda wodda, tenneenna asseechchi Asoorike moyanji'a uunaashsha mitte mitte Isira'eelixxi dureeyye onde tomme, biretika sibljo uutaashsha hunnati ajaje. Tennexxe Asooriki moyanji ookkone boga'ni turebaangi hige me'e.

21 Minaheemi moyemmake baro'ni hujendeexxi hujenna, wele huje muuxeexxi duuchchi Isira'eelike moyanjuwwinke jirtetike maxaafa'ni borreessende hexxeexxebaa?

22 Minaheeminna edike annuuwwa isikishshanni reye: belti isiki Faqisiyaasinna isixxe bakka'ni moye.

23 Yihudak moyanji Azariyaasi moyeexxe onde tomme wogga'ni Minaheemik belti Faqisiyaasi Semaariyake qachcha'ni Isira'eeli'ni moye; lame wogga moye.

24 Faqisiyaasi Duuchchi Woddike Gootti edo elobaaxxa yaane asse; Naabaaxik belti Iyyorbi'aami Isira'eelii'i dedhisemmaxxe cubbonaa'ni udumi'a higebaani.

25 Isika loliinka manna ajajammake ajajalluwwi giddii'ni Remaliyak belti Feequhe fuggoxxini iso'n ke'e; onde tomme Gele'adika manna adhdhe me'eexxi Semaariya mootummatike mine'ni hexxeexxe kollo giddo Faaqisiyaasii'i Arigoobininna Aariyanni welti shiyeexxi isixxe baka'ni moye.

26 Faqisiyaasi moyemmake baro'ni hujendeexxi, wele huje muuxeexxi duuchchi Isira'eelike moyanjuwwiinke jirtetike maxaafa'ni borreessende'eni.

27 Yihudak moyanji Azariyaasi moyeexxe onde tommenna lame wogga'ni Remaliyak belti Feequhe Semaariyake qachcha'ni; Isira'eeli'ni moye; lame tomme wogganna moye galche.

28 Isinna Duuchchi Woddike Gootti edo elobaaxxa yaane asse; Naabaaxik belti Iyyorbi'aami Isira'eelii'i dedhiseemmaxxe cubbonaa'ni udumi'a higebaani.

29 Isira'eeliki moyanji Feequhe moyemmake baro'n Asoorik moyanji Teelgelteelfeelsoori dageexxi Iyyooni, Abeeli Beeti Ma'iika, Yaanohaa, Qaadeesi'i, Hatsoorii'i, Gele'adii'i, Geliilanna, Nefitaalemike boginninni mitteba abixxe. Ardakanna booji'eexxi Asoori'a adhdhe me'e.

30 Ookkoneechchi uduma Elaki belti Hoose'i Remaliyake belto'n Feequhe'n fuggoxxinni ke'e isoo shiye; Ooziyak belti Iyyo'ataami moyeexxe lame tommenna onde wogga'ni Hoose'i Faaquhexxe baka'ni moye.

31 Feequhe moyemmake baro'ni hujeexxi, wele huje muuxeexxi duuchchinna Isira'eelike moyanjuwwiinke jirtetike maxaafa'ni borreessende hexxeexxebaa?

32 Isira'eeliki moyanji Remaliyak belti Feequhe moyeexxe langaxxe wogga'ni Yihudaka moyanjo Ooziyak belti Iyyo'ataami moye.

33 Isi moye woddanna wogga isixxi lame tommenna ondetemmani; Iyyerusaalemi ofo'leexxi tommenna jaane wogga moye galche; ama isixxinna Saadoqixxe belto kadda wodda Yeruusha hiyyende ye'endaani.

34 Isinna anni isiki Ooziya assemmaxxa duuchcha; isinna Duuchchi Woddike Gootti edo eloxxa yaane asse.

35 Kaddo malee tullichchuwwi hana hedheeka magenoonfantammaka boonchuwwa hoyyebaani; ardikinna ookko'o tolcha shiqisha'ninna hixaanna guba'ni hedhemmaani. Iyyo'ataami Duuchchi Woddike Goottika galma aldareexxa Hula langaxxa giisse.

36 Iyyo'ataami moyemmake baro'ni hujendeexxi, wele huje muuxeexxi duuchchi Yihudake moyanjuwiinke jirtetike maxaafa'ni borreessende hexxeexxebaa?

37 Eettene yanna Duuchchi Woddik Gootti Sooriyaka moyajo Retsiininna Remaliyaka belto Feequhe Yihuda lollaashsha asse.

38 Iyyo'ataaminna isike edike anuwwishsha reye; Daawwitike qachcha'ni hedheeke moyanjuwwa moongammake hirreessa'ni moogeme; bakka isixxe'ninna belti isiki Akaazi moye.