1 Eettene yanna'ni Elsa'i belto iseka reyotenaa'ni ise'a ke'isseexxi manjichcho, «Duuchchi Woddik Gootti torbaane wogga qico'ni turaaka solo'o konne boga'ni ibise'en: kexxettexxi yannate tura dandeettattoke boonchiba'a atike mini hadinni welti me'i» hiyye.✝ 2 Manjichotinna kexxeexxi Mageniinki manji ise'a kulemmashani assite; mini hadi isekini me'iteexxi; Filisixeemike boga'ni torbaane woga ofolde.

3 Torbaane wogga muuxendeechchi uduma Filisixeemike bogibaa'ni higge dagge: ijaadhiteemmake minixxeenna bogi ifikixxe'e ku'lito'a moyanjiinbaa me'ite.

4 Eettenne yanna moyanji, Mageniinke manjika erganjo Giyaazinni welti, «Elisa'i hujeexxa lumollamma yaanuwwa duuchcha ane'ni kuli» hiyya'nemmaani.

5 Elisa'i belto iseka reyotenaa'ni ke'issemmaxxi manjichcho mine ifikixxenna bogi ifikixxe ku'lito'a moyanjiinba'a shiqqeemmaxxa yanna Elisa'i reyeemmaka iseka belto hitta asse reyotenaa'ni ke'iseexxa Giyaazi moyanjoke'ni kulaammaxxe yanna'nitemmaani. Giyaazinna «Gootta anke moyanjo; iitti manjichonna tenneteni; Elisa'i reyotenaa'ni ke'issemmaki isek beltinna konneteni» hiyye.

6 Moyanjikinna tenneenni yaane qoree'na isenna hiissite kuldee. Ookkoneechchi uduma moyanji, «Afeechcho duuchcha itani waalde me'itettexxe yanna'ni ta'i qico'ni hedhdheeka fichchi isekixxa karra duuchcha ise'a hiissitattoshsha» hiyye jalqaba ajaje.

7 Elisa'i Demasiqo'a me'e; ettenne yanaa'ni Sooriyaki moyanji Beenihadaadi ela gopheemmaani; moyanjokeenna, «Mageniinki manji kabaa'a dage'eni hine kulle» 8 Isinna Azaheeli'i, «Uwwa angate'ni abixxite maritetexxi Magenke manjinni welti afemi. Isi darree'ni ‹Konne dhukkubanaa'ni fayyani fayyanno?› hitetexxi Duuchchi Woddika Gootta qodhdhi» hiyye.

9 Ookko'ni Azaheeli Demasiqo bogi giddo huccemalchonaa'ni elolla yaane duuchcha shoole tomme gaaluwwa'ni fe'eexxi Elisa'yiba'a mare; Azaheelina Elisayi edo uurreexxi, «Sooriyaki moyanji atiki belti Beenihadaadi; ‹Dhibo tennenaa'ni fayyani fayaanno?› hiyye atibaa anee erge'eni» hiyye.

10 Elisa'inna, «Marittettexxi, ‹Fayya dhugaaten fayyitattoni› hiyyi. Yaane kinni reyaaxxa Duuchchi Woddik Gootti ane'ni leeliishe'eni; ‹Martettexxi, Dhugaaten fayyitabxxon› hiyyi reyaaxxa Duuchchi Woddik Gootti ane'ni ifise'een» hiyye hiisse.

11 Shooka qico'ni, Elsayinna Azaheeli'i dhaphphi hiyye uude; ookkoneechchi uduma Mageniinki manji Elisayi oodhee indiddo dune.

12 Azaheelinna «Anke gootta mayee ooxxaatte?» hiyye qore.

Elisa'yinna hiisseexxi, «Isira'eelike arda'ni assittaattoxxa fuggoxxa yaane ege'nennaxxeeten: kolluwwa insa'nexxa giirati gubbatton: dargageeyye insa'neexxa wolantichchik shiltattoni; oose insa'neexxanna buttinake'ni cancaqqattoni, siila'witeexxa melaalle insa'neexxika godobanna daritattoni» hiyye.

13 Azaheelinna «Yoona woriishinnsha uudemannok atiki eriganji ani tenne heene hunnaanni assa dande'anno?» hiyye.

Elisa'ina hiisseexxi, «Ati Sooriyake moyanjo kadde mootattoxxa Duuchchi Woddik Gootti ane'ni leellishe'eni» hiyye.✝

14 Ookkoneechchi uduma Azaheel Elisa'i biri'nii fuleexxi gootti ifikiba'a hige; Benhadaadinna «Abbo Elisayi maa hiyye?» hiyye qore.

Azaheelinna «Dhugaandinni dhibo tennenaa'ni fayyitattoxxa ane'ni kule'eni» hiyye.

15 Yaane kinni gorsa bariisa Azaheeli ejja aadheexxi wodi'i giddo cuuphe: ookkooni moyanjo Banihadadi'i buqeexxi shiye.

Azahelina Benihadadike booncho'ni Sooryike moyanjo kade.

16 Isira'eeliki moyanjiki Aki'aabik belti Iyyoraami moyemmaxxe ondixxe wogga'ni Iyyosafixxiki belti Iyyoraami Yihudaka boga moye. 17 Isinna moyee wodda, wogga isixxi sase tommenna lame woggammani; Iyyerusaalemi ofo'leexxi saddeeta wogga galche.

18 Are isixxinna Aki'aabixxe belto kaddeemmaxee Aki'abike mini hadi assammashsha isinna Isira'eelike moyanjuwwika ora hordofe; Duuchchi Woddike Gootti edo elobaaxxa huje huje.

19 Kado malee'e eriganjo ifike Daawwitixxee hiyyeexxi Duuchchi Woddik Gootti kinni Yihudaa balleesso'a hasebaani; tininna Daawwiti'i horte ifixxenaa'n moyanjo gophabaaxxa addachchise'emmaxxeeten.✝

20 Iyyoraami moye galchammake baro'ni Eedoomi Yihudake'ni elobaaxxinni ke'eexxi; ifika moyanjo moyaashsha asse.✝

21 Tennexxee Iyyoraami ookkone sarageela duuchcha bukki asseexxi Tsa'iiri'a duule. Eedoomika loliinka sannachchanna buqe; hashshunte isinna ookkone sarageeluwwik ajajaluwwi ooko'ni baqante fulla'neege'ni, loliink manni ifi ifike minibaa baanje.

22 Eedoominna techchi qico'ni Yihudake'n fuggoxxinni ke'eeshshanni hedheen; Libinak qachchinna ookkone wodda fuggoxxinni ke'emmani.

23 Iyyoraami moyemmake baro'ni hujendeexxi wele yaane duuchchi Yihudake jiritetike moyanjuwwiinke maxaafa'ni borreessende hexxexxeebaata?

24 Iyyoraami edike ifike annuwwishanni reye: Daawwitike qachchi giddo hedheeke moyanjuwiinke hirreessa'ni moonge: isixxe bakka'ni isingi belti Akaaziyaasi moye.

25 Isira'eeliki moyanji Aki'aabik belti Iyyoraami moyexxe tommenna lame wogga'ni, Iyyoraamiki belti Akaaziyaasi Yihudake'ni moye.

26 Akaaziyaasi moyee wodda lame tommena lame woggammani: Iyyerusaalemi ofo'leexxi mitte wogga galche: ama isixxanna Ataaliyate hinaani; isenna Omiirii'i Isira'eelike moyanjike beltixxe beltomman.

27 Akaaziyaasi Aki'aabike mini hadinni balloke kadeemmaxxe'e Aki'abike mini hadishshanni cubbo hujeexxi Duuchchi Woddika Gootta yaadise.

28 Aki'abike belto Iyyuraminni welti Sooriyaka moyanja Azaheeli'i Raamoti Gele'adi lolo'a mare; Sooriyitonna Iyyoraami'i madeesite.

29 Tennexxe moyanji Iyyoraami Remaatike booncho'ni Azahelinni welti lolememmake lola'ni Sooriyaki manni isoo madeessemmaxxe madanaa'n fayyo'a Iyyizirali'a hige.

Aki'aabik belti Iyyoraami mado'eemmaxxe Yihudaka moyanjo Iyyoraamiki belti Akaaziyaasi isi fooreexxa laqo'a Iyyizira'eeli'a me'e.