1 Duuchchi Woddik Gootti Eliyasi'i diidalloti iimi'a adhdhaaxxi yanna geltte wodda Eliyaasinna Elsa'i Geligeela'ni ke'ne me'ina'nemmani. 2 Eliyaasinna Elsa'i hiyyee qici, «Duuchchi Woddik Gootti anee Beeteli'a erge'eni ati kabani hedhi» hiyye.

Yaane kinni Elsa'i Elisaayi'i, «Hedhaake Duuchchi Woddike Goottike summini kakataanneni ani atenaa'ni gargari higabe'no» hiyye. Tennexxe weltinni Beeteli'a adadde me'ine.

3 Beeteli hedhemmaki wabeekotik orgi Elsa'ibaa mareexxi, «Duuchchi Woddik Gootti gootta atika Eliyaasi'i techcho atenaa'ni gargari hisseexxi adhdhe me'a'neexxa egendeeni hexxette?» hiyye. Elsa'inna «Eeti ege'nenneni; ha'noo kinni sammi hiyye» hiyye hiisse haaso'e.

4 Ookkoneechchi uduma Eliyaasi Elsa'ii, «Koo Elisayi Duuchchi Woddik Gootti anee Iyyariko ergeen ati kabaani hedhi» hiyye. Elsa'i kinni, «Ani hedhaake Duuchchi Woddike Goottike summini kakataanneni; atenaa'ni gargari higabo'non» hiyye hiisse haaso'e. Tennexxe Iyyaariko'a me'ine.

5 Iyyaariko giddo hedhemmaki wabeekotik orgi Elisaayibaa mareexxi isoo «Duuchchi Woddik Gootti techcho gootta atika atenaa'ni gargari hiisseexxi adhdha'neexxa egendeeni hexxete?» hine qorre.

Elsa'inna «Eeti ege'neenneni: ha'no kinni sammi hiyye» hiyye hiisse haaso'e.

6 Ookkoneechchi uduma Eliyaasi Elisa'i'i, «Duuchchi Woddiki Gootti anee Yordaanoosike galaanibaa erge'eni ati kabanni anee heqqi» hiyye.

Isinna, «Hedhaake Duuchchi Woddike Goottike summini kakataanneni. Aninna atenaa'ni gargari higabe'no» hiyye hiisse haaso'e. Tennexxe lamiingi mitteba me'ine.

7 Wabeekotike ya'i giddii'ni onddi tommi mareexxi Eliyaasinna Elsa'i uurrineeba Yordaanoosike galaani birii'ni bayyante uurrine.

8 Eliyaasinna kaabba fulchedheexxi wede'e gane. Wede'ikinna middi'anna bita'i'a lameba qoodeme; lamiingi bagoke buttinanaa'ni foonfe.

9 Foonfeechi uduma Eliyaasinna Elsa'ii «Atenaa'ni adhdhemebo'no edi gama ati'aa maa assonnaa hassaattexxa ane'ni kuli» hiyye.

Elsa'inna «Hafuur atik ane'ni dachcha'iki hedho'aa kadhataanneni» hiyye hiisse haaso'e.✝

10 Eliyaasinna «Jabaxxee yaane qortee'eten; kaddo malee'e ani atenaa'ni adhdhemano wodda anee uuddottole; hitetteshshanni ati'aa kaddaani; uuda gophphottole kinni alfa dandeettabexxoni» hiyye.

11 Laana haasoonna'ni me'inaa'na'a giiratixxi gaarenna giiratiki fadhadi dedhange'ni oddo insa'neexxe'ni e'yeexxi insa'ne gargari hiisse; Eliyaasinna hobonbalteti iimi'a adhdheme.

12 Elsa'inna tennee uudeexxi «Ankannaa! Ankannaa! Isira'eelixxe gaaruwwanna fadhadoo!» hiyye raare; langaxxa Eliyaasi'i uudebaani. Ookkoneechchi uduma ifixxa seemma adheexxi lameba dare.✝

13 Isinna Eliyaasinaa'ni ibeemmaka kaabba butti'ni aadhe; higgeeni Yordaanoosi galaanike kasaa'ni uurre.

14 Eliyaasinaa'ni ibemmaka kaabba aadheexxi wede'e ganeexxi, «Eliyaasiki Duuchchi Woddik Gootti Magen haba hedhe?» hiyye. Wode'ekanna ganee wodda middanna bita'a qoodemmee'naa wede'e foofe.

15 Iyyaarikoo'ni daggeexxi tenne uudemmaki wabeekotike ya'i, «Eliyaasi'ni hedhemmaki hafuuri Elsa'i'ninna ofo'le'eeni» hine. Inisa'nenna isinni afemmo'a marreexxi isi edo heeshshi hine. 16 Ookkoneechchi uduma «Kunnseteteni no'o atiki erganjuwwi jajjabba kadeeka onde tomme manna kaba anfeenneni; akimagaada Duuchchi Woddike Goottik Hafuuri gootta atika aadhe mitte kooba'ni uggeeke yookaani mitte dhooqa giddo ugge'oole marre hansowwaali.» Elisayinna «Waawwoti insa'ne erigitinoqqe.»

17 Insa'ne kinni waawwoti hiyya shookishshaa qico'ni jabeessine isoo kadhanteemmaxxee «Isinna ergitinaata» hiyye. Insa'nenna onde tomme manna ergine; mannikinna sase barra duuchcha hanseexxi anfebaangi gante.

18 Iyyaariko hedhe heqqaammake Elsa'ibaa hingee wodda: Elsa'inna «Ani edi wodda martinoqqe hiyye kuleennaba?» hiyye.

19 Qachchiinki manni Elsa'ii hiyyee qici, «Gootta no'oke ati uudateshanni kunni qachchi hedhatee elokeni kaddo malee'e wedi'i elokebaani; bogikinna midha fulchaakebaani» hine.

20 Elisayinna «Haarooxxe odolcho'ni maxine wortine anibaa iyyedagge» hiyye; hiyyemmashshaani isibaa iyyedange.

21 Ookkoneechchi uduma Elisayinna wedi'inxe muummetiba mareexxi maxine wede'i giddo woreexxi, «Duuchchi Woddik Gootti hiyya'nee qici ‹Ani konnee wede'e fayyiseenneni: konneechchinni udumi'aa langaxxa reyotenna buttini midha fulcha gophatee'e buuto kadabaani› » hiyye.

22 Eettene yannanaa'ni safeexxi Elsa'i hiyyeemmashshanni wedi'i techchi qico'ni qullichchaken.

23 Elsa'inna ookko'ni ke'eexxi Beeteli'a me'o'aa Iyyaarko'ni ke'e: isinna orake'n me'ande'ni hedhee'naa qachchi giddii'ni heddo oose fuldeexxi hafuura gikki assite'e hitee qici, «Koo molanjo kabaa'ni fuli! Koo molanjo kabaa'ni fuli!» hita'ni isoo coore.

24 Elsa'inna udumi'aa wirri hiyye uudeexxinna; Duuchchi Woddike Goottike summinni insa'ne bade. Eettene yanna'ni lami meyyaki Dibi hinaaki biniinchi badda'aa giddi'ni fuleexxi eettenee oosenaa'ni shoole tommenna lame ninnife bire. 25 Elisayinna Qermeeloosixxe koobaba'a qabate; ookko'ninna Semaariya'a hige.