1 Moyanji Hiziqiyaasi tennee laqeexxe yanna'ni ifixxa yaaddoti seemma haaqi asse dare; doniyya oddo'weexxi Duuchchi Woddike Goottike galmiba me'e.

2 Ookkoneechchi uduma mootummatike minika ajajallo Eliyaqemini'i, borreessanjo Saaminaasinna qeesetiki akekisanjuwwi dooniyya odo'wineexxi Amootsike beltibaa wabeeka Issayaasibaa duuchchiinga erge.

3 Insa'nenna hinee qici, «Hiziqiyaasinna yooni tinni barra rakkotixxe, xixematixenna salphinniinxe barrani; tinni barranna oose ilendaaxxi yanna geltoole ciniinto bira saxxammashsha; yaane kinni ciniinffatate'e ilate hunna gopheexxe manjichchoshsha kandeenneni. 4 Hedhaaka Duuchchi Woddika Gootta yowwaashsha gootti isik Asoorik moyanji ergemmaki umike loliinke manni ajajallika hiyyichcho duuchcha Duuchchi Woddiki Gootti atiki Mageni taki laqe'en, laqemmake hiyyichchixxeenna Duuchchi Woddiki Gootti iso'o xixaashsha lubboti gatemmake no'oke manni'a soodati» hine.

5 Moyanjo Hiziqiyaasik Ja'laabuwwi Issayaasibaa dagee wodda, 6 Issayaasi hiyyee qici, «Gootta ha'nooke hitine kuldinaa qici, ‹Yooni Duuchchi Woddik Gootti Asoorike moyanjiki erganjuwwi anee yowwa'na'a laqqetteke yowwichchi'a sodaattoxxe. 7 Kunna ani mitte bifaka hafuura iso'ni uggannoni; kaddeexxa odo laqoole ifike bogibaa higaani; ookkonna wolaantichchake'ni shiyemmasha asannoni.› »

8 Loliinke manniki ajajalli Asoorik moyanji Lakkishii'n ke'e me'exxa laqeexxi hige; moyanjo Libinaa'n lolake'ni hedhe'na mare.

9 Eettene yanna Gibtseki moyanji Tophiyiinka moyanjo'ni Tirhaaqa lolo'a me'ate'ni hedheexxa Senakireemi laqe; tennexxee Hiziqiyaasiba'a higeeni hiyye erga ergee qici, 10 «Martineexxi Yihudaka moyanjo Hiziqiyaasi, addattaatteki atiki Mageni ‹Iyyerusaalemi Asoorike moyanjixxe anga'ni ibbabaani› hiyye atee soboqqe. 11 Yooni Asoorik moyanjuwwi boga atike duuchcha'ni maa asseexxa laqqeetteni; hara balleesine birre'eni; ati gattattota? 12 Ediki annuwwi anki biremmaka arda kunninna, Gozaanika, Kaaranikanna Retsefika iittani Telasaari hedhemmaka Edenike mannik magenuwwi insa'neeki anjire'eta? 13 Isinni Hamaatiki, Arifaadiki, moyanjuwwi haba he'ne? Sefariwayimike qachchiki moyanji haba hedhe? Higgeeni Heenaaki yookaani Iwwak moyanjuwwi haba he'ne?»

14 Hiziqiyaasi borro erganjokena'ni aadheexxi haaseesse; ookkoneechchi uduma Duuchchi Woddike Goottike galmi giddo mareexxi borrotanna Duuchchi Woddike Gootti edo farri asse.

15 Ookkoneechchi uduma Hiziqiyaasi hiyya'ni Duuchchi Woddike Goottibaa soodatee qici; «Kurubeeluwwiinxe oddo'n moote atixxe'ni ofoldeetteke koo, Isira'eelike Duuchchi Woddike Gootta Mageno; buttatixxe mootumma duuchchiki Mageni ateni callani; iimanna butta dadeettekinna ateteni.✝ 16 Duuchchi Woddike Goottaa ta'anna mansha atixxa wirrassite laqi, Duuchchi Woddike Gootta; ille atixxini uudi; Seenaakireemi Duuchchi Woddika Gootta yowwo'a ergeeka hiyyichcho laqi.

17 «Duuchchi Woddike Gootta Asoorik moyanjuwwi konne gosa gosaka ardanna boga insa'neeka balleessineexxi dhugaaten. 18 Magenuwwa insa'neeka giirati giddo hunne gunbe'eni; kunni manjiinxe anga'ni hunjeeka haqichchonna kinjo calla malee'e magenuwwakemmabaani. 19 Duuchchi Woddike Gootta no'oke Mageno, buttatiki mootummuwwa duuchchi atini calli Duuchchi Woddike Gootta Mageno kaddeettexxa ege'naashsha ta'a Asoorike moyanjixxe anganaa'ni no'o wodi.»

20 Ookkoneechchi uduma Amootsiki belti Issayaasi moyanjo Hiziqiyaasibaa hiyye erga ergee qici: «Isira'eeliki Duuchchi Woddik Gootti Mageni Asoorike moyanjo Seenaakireemixxee anibaa soodattettexxa soodachcho laqeenneni. 21 Yooni isixxee Duuchchi Woddik Gootti hiyyeeki hiyyichchi;

« ‹Tsiyoonixxi belto duuddo dubarrichcho tuffattaan;

ise ate'ni qi'missan, ate'e tuffattaan;

Iyyerusaalemixxi dubarrichcho,

atee ise'ni hana me'itatto wodda umo le'missaan.

22 Yowwitettekinna ille fulchitettek ayye'nite?

Lallabba'etek aye'nitesi?

Hollati ifi dukaatek aye'nite?

Woyyichcha Isira'eelike Mageno'ninde?

23 Erganjuwwi atiki gamii'ni,

Mageno atika yowwite maala muluqo fulchitettexxi;

Atinna hitette qici,

«Heddo anxe gaaruwwani,

Koobuwwatika qeerrinne:

Libaanoosixxe xungo'ni iima fuleenneni:

Qeerraramma biribiirsuwwa;

elolla hi'neessuwwa woxedheenneni;

Bayyike bogixxa gabala

eloke gongomiba geyeenneni» hiteetteni.

24 «Keessummumma ofo'leenne boga'ni wedi'inxa bale qoltenneni

ookkonna wode'e ha'wenneni.

Lekka anxixxe kophenni,

Gibtseke wodi'ixxa muummuwwa hirbeesse basseenneni» hite gacifattetten.

25 « ‹Heddo yanna ediga'ma,

tennee ani assennexxa laqqebexxongi hexxeetta?

Edinge baro'n hedennexxinna,

ta'a kinni muuxxendaashsha assenneni.

Konne kinjinke dalla'ini buqemeeka qachchuwwa,

ati kinotixxe ole assitota'ateni.

26 Ookko hedha'neeke manni hunna gophphe'eeni,

alayyexxinna shookiinxa dooniyya odo'wine'eni.

Diidake'ni lateeke hiddichchishsha;

reefike mudhishsha mininxe guuto'ni latteexxi,

Nophphitebaangi baggammaxxe badda'ashsha kande'eni.

27 « ‹Haba ofoldattoxxa

haa'no dage'e haa'no me'itattoxxa

ane'n mufattettexxa mufe ege'nenneni.

28 Ane'ni mufattettaxxe, tuffe atixxanna mansha anxinni laqeennaxxe

malxaqqo anxinni sano atixxa urannoni,

Lugaama ankanna afo'o atike'ni uggannoni

daggettanga ora hige me'itattoshsha assannoni.›

29 «Koo Hiziqiyaasi'i beessisikinna konneechchini butti'a hedheenii:

«Tenne wogga'ni ifittini latteexxa,

daggaxxe wogga'ni kinni ookken ifitti lateekenaa'n lataaka itinaani.

Yaane kinni Sakkaxxe wogga'ni midha facaalsitine ha'mitinaani,

woyinetanna kalsitinaani; gummatanna ittinaani.

30 Ta'anna Yihudake ardanaa'n hafe ganteeki hidda oltaan

gummatanna gumminsaani.

31 Iyyerusaaleminaa'ni lubboti gateeki; Tsiyoonixxe koobaba'ni renne baaki ganteeki fulaani.

Dada Duuchcha Ajajake Duuchchi Woddik Gootti Magenixxi hinaaffe tennee assitaani.

32 «Tennexxe'e Duuchchi Woddik Gootti Asoorike moyanjixxe hiyya'nee qici,

«Konne qachcha'ni hara e'yabaani:

mitte gabenna iso'ni darbatabaani:

Wonte abixxe iseba'a shiqabaani;

buttinakanna iso'n iimi'a tullubabaani.

33 Dagemmange oriba'a hige me'ani: hige me'aani male'e konne qachcha'n hara e'yabaani; hiya'neni Duuchchi Woddik Gootti.

34 Anxeenna anke erganjo Daawwitixxee hiyye;

konnee qachcha anjironna'a gollannoni.»

35 Eettennee hashsha Duuchchi Woddike Goottixxi erganna fuldeexxi Asooritotixxe kaamibe'n mitte dhibbanna saddeeta tommenna onde kuma manna shilte; gorsa manni diiphii'ni ke'a wodda bonchi duuchchi rensha calla kade. 36 Asoorik moyanji Seenaakireeminna ookko'n ke'exxi me'e;

Nenewe'a higeexxi ookkoni ofo'le.

37 Mitte barra Nisirok hiyyemaak insa'neke magenuwwixxa fakkeke mini giddo kumbu hiyyate'n hedhee'na'a; Adiraameelekinna Saaretseeri hiyyendaaxxi oose isixxi wolaantichchiki iso shilte; ookko'ni fuldeexxi Araarati'a baqaatte. Belti isiki Asirado isixxe bakkaa'ni mowe.