1 Iyyosiyaasi moyee galchema sane wogga isixxi saddeetateman; iisnna galduma ifika assedheexxi Iyyeerusaalemi'i sase tommenna mitte wogga moye galche. Ama isixxinna Yidiida hiyyemaake Bootseqaatike qachcha'ni ilendeexxe Adaayaxxe beltoman.✝

2 Iyyosyaasinna Duuchchi Woddike Gootti edo eloxxa yaane asse; middi'anna bita'i'a higebaani; anni isiki Daawwiti assemmaxxa duuchcha asse.

3 Iyyosiyaasi moyemmake baro'ni tommenna saddeeta wogga'ni Meshulaamike beltik belti Atsaaliyake belto kadeeke mootumatike minike borreesanji Saafaani konneechchi butta hexxeexxa erga Duuchchi Woddike Goottike Galmibaa hiyya'ne ergee qici: 4 «Galimiinxa hula heqqammakiiri ardakenaa'ni bukki assinemmaki maallaqi Duuchchi Woddike Goottike galma'ni aageeka maallaqa laakko'o'a qeesetike akeekisanjo Hilqiyaasibaa mari. 5 Konne Galmiixxa huje towataashsha filemake manna'ni uunowwaali; insa'nenna Duuchchi Woddike Goottika galma qammachammake manni'a uunowwaali. 6 Insa'nenna uunaaki mine ijaarammake kinjiinka mine ijaarammake kino qunqume giissammake manni'ateni. Ittani galminxe qammachchatixxa huje hujaakeeri'a kadaaka saanquwwanna bonce giissineexxa kino hirrowwaali. 7 Hujisa'neeki manni addatemeeke manna kadeemmaxxe'e hitteeki maallaqi fuleexxa insa'ne'e qo'nisiyyo hasissabaani.»✝

8 Ookkoneechchi uduma borresanji Saafaani moyanjokenaa'ni borreesemeka ajaja Hiliqiya'niuwwe; Hiliqiyanna, «Seeriinka maxaafaqqa Duuchchi Woddike Gootike galmi giddo afenneni» hiyye uwwe; isinna aadhe haaseesse.

9 Ookkoneechchi uduma borreessanji Saafaani moyanjoke, «Ja'labuwwi atiki Duuchchi Woddike Goottike galmi giddo hedhemmaka maallaqa fulchiteeni; galmakanna towanta'ni hujisammake manni'a uune'eni» isoo hiyye.

10 Ookkoneechchi uduma, borreessanji Saafaani moyanjoke, «Umi qeeschchi Hilqiyaasi maxaafa ane'n uwwe'eni» hiyye kule. Saafaaninna moyanjoke maxaafa haaseesse.

11 Moyanjikinna seeriinke maxaafika hiyyichcho laqeexxi yaaddoti seemma ifixxa dare.

12 Ookkoneechchi uduma qeesichcho Hilqiyaasi'i, Saafaanika belto Ahiqaamii'i, Miikaka belto Akiboori'n, borreessanjo Safaaninna moyanji bira hedhe ergatemaammaka erganjo Assayaa'a hiyye ajajee qici, 13 «Martineexxi anxe ardixxeenna Yihudake ardi duuchchixxee konne afemeeke maxaafi giddo mayi boreessemeexxa Duuchchi Woddika Gootta laqqe. Ediki annuwwi no'oki konne maxaafa'ni borreessemeeka seera heqqedhanna muuxa gonpheemmaxxe'e Duuchchi Woddiki Gootti insa'ne'ni mufate.»

14 Qeesichchi Hilqiyaasi, Ahiqaami, Akiboorinna, Saafaani, Assayanna, ookkone seemma heqamake Harihaasike beltika belto, Tiquwwaka belto, Seleemixxa are wabeetto Hildaana qodhdhino'a me'ine. Iseenna hexxammabi Iyyerusaalemi giddo langake ola'a'nitemmani.

15 Wabeekotinna hitee qici: «Isira'eelki Duuchchi Woddik Gootti Mageni Aniba'a ergitineeke manjichchi'a hitinaaqici, 16 ‹Duuchchi Woddik Goottinna Yihudaki moyanji haaseesseeke maxaafi giddo borreessendeexxa duuchcha konne booncho'ninna arda iseke'ni fuggoxxa yaane iyyedagannoni. 17 Insa'ne ane'e waalleexxi wele magenuwwi'a hixaana gunbeemmaxxe: anga ifixxini hunjeexxi fakkuwwa duuchchi ane'e mufachchinseemmaxxe: mufe anxinna bira saxxaani malee'e qiiddabaani.› 18 Duuchchi Woddika Gootta qodhatee ha'no ergeeke Yihudake moyanji'a hitinaa qici: ‹Duuchchi Woddiki Gootti Isira'eeliki Mageni laqqettexxe yaane'a hiyya'neexxi tenneten. 19 Ha'no badinoteenna ba'netee geltineeke manna kandemmaxxe'e konne booncho'ni ifi salphisatanna ardake'ni haaso'ennexxa laqqete wodda godobi atee yo'emmaxxe, Duuchchi Woddike Gootti edo ifi salphissettaxxe, yaaddoti seemma atixxa darte ani edo ooxxettaxxe Duuchchi Woddiki Gootti laqeenneni hiyya'neeni. 20 Tennexxe Iyyerussaalemi'i xixaanneka xixichcho illeti uuddebexxongi rertattoni; rertattoxxe'e xixabo'noni.› »

Tennexxe ardikinna wabeekitte haasottemmaka hiissichcho moyanjoke'e marre kulle.