1 Isira'eelike moyanji Elaki belti Hoose'i moyeexxe sakkaxxe wogga'n Yihudak moyanji Akaazik belti Hiziqiyaasi moye. 2 Moyee wodda wogga isixxinna lame tommenna ondetemmani: Iyyerusaalemi ofo'leexxi lame tommenna sallaane wogga moye galche. Ama isixxinna Zekkaariyaasixxe belto kadda wodda summa isekanna Abiya hiyyemmani. 3 Anni isiki moyanji Daawwiti assemmaxxa duuchcha, isinna Duuchchi Woddik Gootti edo eloxxa yaane asse. 4 Tullichchuwwake'ni hedheeka magenoonfantammaka booncho balleesse; fakkuwwatixxa sooddo butuchche bire; Ashera hiyyendaaxxe fakkexxa sooddo kukkute; Muuse giissemmaxxe sageettotike bofixxe fakke'a, Isira'eeli eettenne yanna qico'ni hixaana gunba'ni hexxemmaxxee isee butuchche; isenna Nehushittaan* hiyyendaammani.✝

5 Hiziqiyaasi Isira'eelike Duuchchi Woddike Gootta Mageno'ni addateme; isi edonna kaddo isi uduma isoo fakkaataaki weli Yihudaka moyanjuwwa duuchchanaa'ni isishsha hedheeki hedhemmabaani. 6 Isi Duuchchi Woddik Gootta'ni addatememmaxxe'e isike oranaa'ni gargaritti higebaani Duuchchi Woddiki Gootti Muuse'ni uwwemmaka ajajuwwa heqqedhdhe. 7 Tennexxe Duuchchi Woddik Gootti isin welti hedhemmaxxe assaaxxi duuchchi isi'a qajeelde. Asoorike moyanjo'ni fuggoxxini ke'e; irbo uwwammaxxanna hoyyedhe. 8 Filisixeemika manna Gaaza qico'n, ookko'ni boginxe gabala qico'ni mare geyeexxi, heqqanjuwwi ofole heqammaxxe xelephonaa'ni kinjiki ijaaremeemmake dalla'ike qachchi qico'ni lole injifate.

9 Hiziqiyaasi moyeexxe sholgaxxe wogga'ni; Isira'eelki moyanji Elaki belti Hoose'i moyeexxe torbaaxxe wogga'ni; Asoorik moyanji Selminasoori Semaariya mareexxi qachchakanna erqe kayyi'n buqe. 10 Sakkaxxe woggake muuxama'ni abixxe. Semaariya abidendeekinna Hiziqiyaasi moyeexxe jiyaxxe woga'n; Hoose'i Isira'eel'ni moyeexxe sallaanixxe wogga'nitemmani. 11 Asooriki moyanji Isira'eelika arda booji'e Asoori'a aadhe me'eexxi; Halahi, Gozaani giddo Heboorike galaani biranna Meedoonike qachchuwwa'ni ofollaashsha asse. 12 Tinninna insa'ne'n gelteechchi Duuchchi Woddike Goottik erganji Muuse ajajeeka Duuchchi Woddike Goottika insa'neeke Magenika hiyyichcho duuchcha lanqammaxxa bakka kako isini aangemmaxxa diingemmaxxeeteni. Ajajuwwa isikanna lanqebaani; higgeeni muunxebaani.

13 Hiziqiyaasi moyeexxe tommenna sholgaxxe wogga'ni Asoorik moyanji Seenaakireemi lole injifate kinjiinke dalla'ini buqemeeka Yihudaka qachchuwwa duuchcha abixxe. 14 Tennexxe Yihudak moyanji Hiziqiyaasinna «Balleessanji anendeni; waaldettexxi anenaa'ni udumi'a higi; aninna laqqatolcho duuchcha uwwannoni;» hiyya'n Lakkishii hedheemmake Asoorike moyanjibaa tenne erga erge. Asooriki moyanjinna; Yihudiinka moyanjo Hiziqiyaasi'i tomme kuma kiilo birretika sibiljo, mitte kuma kiilo worqe ani'a ergi hiyye. 15 Tennexxe Hiziqiyaasi Duuchchi Woddike Goottike galma'ninna mootummatike miya masse'nammake minuwwa'ni hedheeka birretika sibiljo isi'a uwwe.

16 Eettene yanna'ninna Yihudak moyanji Hiziqiyaasi; Duuchchi Woddike Goottike galmike cufanuwwa'ninna mikikkilanjuwwake'ni abidisemmaxxa worqe goggosheexxi Asoorike moyanji'a uwwe.

17 Asoorik moyanji Lakkishii'n loliinke mannika umo, loliinke mannika taakkaka ajajallonna, loliinke mannika akeekisanjo heddo loliinke mannini welti Yihudiinki moyanji hedheeba Iyyerusaalemi'a erge; insa'nenna Iyyerusaalemi'a duulexxi Hiziqiyaasi'ni lola geesinso'a ajaje; iikki sannachcinna jabak baaloma afeeke sase loliinkaajajuwwa akeekakemman; insa'nenna Iyyerusalmi'a genneeshanni ali darrexxe muumme darree'ni sa'aka dareeni bira seemma borcammakike fichchibaa me'inammake ora abixine. 18 Insa'nenna moyanjiinbaa erga ergine; ookkoneechchi uduma mootummatike minike ajajallo kadeeki Hiliqiyaki belti Eliyaaqeemi; borreessanji Saaminaasi iittani jirte borreessamaki Asaafiki belti Yo'ahi insa'neebaa marre.

19 Asoorik loliinki ajajallinna insa'ne'a hiyyee qici: «Hiziqiyaasi'a hitinaa qici:

« ‹Lumoki Asooriki moyanji hiyya'nee qici: Atinni iitta addattettexxi yaane maachcho? 20 Loliinxa barannonna hunna afeenneni hitaatteni; yaane kinni odoni callani. Ane'ni iitta fuggoxxini kexxeetteki ayye'n addatteete? 21 Uudi iitta addattaattexxe Gibtse'ni irkataaki manji, anga isixxa ote'e madeessammake cancaaqemeeke shonbooqishshateni. Gibtsek moyanji Feri'ooninna iso'ni addataake duuchchi'a iittandeni. 22 Iittanni ati ane'n, «No'o addantaanneki Duuchchi Woddike Gootta'n Mageno no'oke'niteni» hita'eettexxe kaddoolenna, Hiziqiyaasi Yihudakanna Iyyerusaalemika arda «Ha'no magenoonfata hasisaaki Iyyerussaalemi hedheeke konne tolchimalchi edoni» hiyyeexxi eettenee koobati hanixxa magenoofachchotixxa bakkaaranna tolchimalchuwa diigiseeki isotebaa»?

23 « ‹Ta'a daggettexxi gootta ankinni Asoorike moyanjinni welti weli aagge'e; fadhado gulufaaka manna afa dandeettaattexxe kaddoole; lame kuma fadhado ati'a uwwannoni. 24 Addattaattek Gibtsexxe gaaruwa'ninna fadhaduwwake'nite kaddoole anke gootti hunda hedheeki loliinke mannki jalqaba midde mitte hitta hiissa dandeettatto? 25 Isee waalini ani lole konnee boncho balleessona'a dageenneki Duuchchi Woddike Goottike ajaji belo ati'a fakkaata'ne? Konne boga'ni duule lole balleessonna'a ane'ni kuleeki umi isingennini Duuchchi Woddike Goottani.› »

26 Ookkoneechchi uduma Hilqiyaasiki belti Elyaqeemi, Saaminaasinna Yo'asi loliinke mannika akeekisanjo, «No'o atik erganjuwwi lanqannaxxe; maganneteni Soorike afo'ini haaso'i; dalla'ake'ni hedheek manni laqaake Ibirayisixike afo'in no'o'ni haasoottoxxeni» hine.

27 Loliinka manna ajajammakinna, «Yoona gootti anki iitta haaso'onna'a ane ergeeki; gootta ha'nookenna ha'no'a calla? Insa'nenna ha'noshsha ifinga foole'a indaashsha, shi'na ifinxanna ha'winaashsha dala'ake'ni ofolleekiirinna miteba lanqashatebaa?»

28 Ookkoneechchi uduma loliinka manna ajajammaki uurreexxi hafuura gikki asseexxi Ibirayisixike afo'in hiyya'ni haaso'ee qici: «Yoona lumoke Asoorike moyanjiinka hiyyichcho laqqe! 29 Moyanjikinna anxe anganaa'ni ha'no'o anjira dande'a gophammaxxee Hiziqiyaasi'i ha'no soboqqe'e! 30 Higgeenna Hiziqiyaas, ‹Duuchchi Woddik Gootti mitte mami belo no'o anjiraani; konnee qachchanna Asoorike moyanji'a sa'isse uwwabaani› hiyya'ni Duuchchi Woddike Gootta'ni addattinaashsha ha'no'aa kula'neexxa laqqinoqqe'e.

31 «Hiziqiyaasi hiyya'neexxa laqqinoqqe'e. Asoorik moyanjinna hiyya'nee qici: aninni welti araaremme, anganna uwwe: ookkoneechchi uduma ha'nonaa'ni mitti mittingi ifixxe woyinenaa'ninna balase ifixxenaa'ni ittani, ifinxe balenaa'ni wode'e ha'waani. 32 Tinninna kaddaachchii ha'noonga fakkataaka boga midhatanna woyinetixxa booka; waasanna woyinetika hiddichcho; ejersiinxa haqqenna; malebi hedheebaa e'yishanno qico'niteni; ha'nonna rertinabaashsha hedho fi'le.

«Hiziqiyaasinna, ‹Duuchchi Woddik Gootti no'o anjiraani hiyya'ni ha'no dedhisammaxxe isixxa laqqinoqqe'e,› 33 Isi'ni gosa gosake ardike magenuwwanaa'ni boga Asoorike moyanjixxe anganaa'ni anjireeki haba hedhe? 34 Hamaatikanna Arifaadik magenuwwi isi haba hedhe? Sefariwayimik, Yenaa'ikanna Iwwak magenuwwi yoona haba genne? Semaariya'a anxe anganaa'ni anjireeta? 35 Konne boguwwiki magen duuchchi boga ifika anxe anganaa'ni gatiso'a dande'eeki ayyete hedhe? Yoona Duuchchi Woddik Gootti Iyyerusaalemi'i anxe anganaa'ni hitta woda dande'a?»

36 Moyanjikinna, «Hiissa hiissitinoqqe» hiyye ajajemmaxxee, ardi sammi hiyye mitte hiissanna hiissebaani.

37 Ookkoneechchi uduma mootummatike miniki ajajalli Kelqiyaasiki belti Elyaaqeemi, borreessanji Saaminaasi iittanni Asaafiki belti Yo'ahi seemma ifi ifixxa yaaddoti daddarre; Hiziqiyaasiba'a dangeexxi loliinke manniki ajajalli insa'ne'n hiyyeexxa kulle.