1 Qiisi hiyyemaak mitti gurra fuleek Biiniyaamitotik manji hedhemman; anni isik Abi'eel, Tseroorike, Tseroori Bikooratike Bikoorati Afeeqii'i Biiniyaamixxe gosatike minike minjichchike beltomman. 2 Qiisinna Isira'eelixxe oose giddi'n danchummati ayyinna isoo lekka uggaak hedhebaake Sa'ooli hinake belto afe'emman; Sa'ooli wele manni duuchchinaa'n agoodik alalle taggagichcha hojja qeerrakemman.

3 Barratixxa barra Sa'oolike annixxi Qiisixxi harruwa baxxemmaxxxee Qiisi belto ifika Sa'ooli'i, «Eriganjuwwakenaa'n mitte adhdhite me'ite baxxeexxa harruwwa hasi» hiyye. 4 Tennexxe Kooba callike Efireemike boga'ninna Shaaliisha qarqara hedheeke boncho duuchcha'ni mammareemme. Yaane kinni insa'ne harruwwa anfebaan, Shaalshake bogi giddi'a e'yi'ne harruwwa kinni ookkonna hexxemmabaan. Ookkoneechchi uduma Biiniyaamike gosati minike bogiba'a hinige me'ine; ookkonna anfebaan. 5 Tsufike bogiba gennee wodda Sa'ooli isinni welti hedhemmaka erganjo «Ta'a anni ank harruwwatee yaada waaleexi no'oxxee yaadammaxxee ta'a hadi'a hingo» hiyye.

6 Erganjikinna, «Egedhdhi mee! Konne qachchi giddo mitti Mageniink manji hedheen; isinna yo'oshsha ulfeessemeeken; isi hiyyaaxxi duuchchi butta ibbabaan. Hoone ora me'inannoxxa no'o'n kula dande'ammaxxee ookko'a me'ino» hiyye hiisse haaso'e.

7 Sa'oolinna, eriganjo ifike, «Marronnoole manjichchokee maachcho uunanno? Indannoxxi gala'anna no'oxxe qaliqallo giddi'n mude'een. Mageniike manji'a uunannoxxi uwwa hexxebaan; maachchonna anfennechchi hedhebaan» hiyye.

8 Erganjikinna langaxxanna, «Kunse, ani sase giraama birretika sibiljo afe'ennen; hoone ora me'inannoxxa no'o'a kulo'a mitte shiixxoka birretika sibiljonna Mageniinke manji'a uwwannon» hiyye hiisse.

9 (Bireke baro'n Isira'eelike boga'n mitti manji Mageno qodhdhatee haseexxe kaddoole, «Magenokenaa'n waleella uudammake manjiba'a me'ino» hiyya'nemman; techcho wabeekake hiyyema'neeki edi wodda Magenokenaa'n leella uudake hiyyemammani.)

10 Sa'oolinna eriganjo isika «Eloxxe ke'i me'ino!» hiyye. Tennexxe Mageniiki manji hedheeke qachchiba'a me'ine.

11 Insa'nenna qachchiiba'a me'iyyotee tullicha qabanta'neegge'n wodde'e ikki'lo'a me'aammaka dubarra anfeexxi «Mageniixxa waleella uudammaki manjichchi kaba hedhe?» Hineexxi qorre.

12 Dubaarrikinna, «Eeti ha'no edo hedheen, ardi telcho tullichchake'n tolcha tolchinammaxxe bakka'n tolcha tolchammaxxee Mageniinxa leella uudammakinna telcho qachchi no'okiba'a dage'eeni rakine marre. 13 Qachchi giddi'a e'yitineeshshanni, tullichchi hana magenoonfatammaxxe bakka ita ito'a qabateba edi darre isoo affinaan. Isi Magenii tolcha eebbisaashsha soodatebaak ardi tolcha ita gophammaxxee isi dagaa qico'n ardi ita safabaan; ookkoneechchi uduma ye'emeeki ardi itaan; rakkine ta'anni alalle marre; iikki woddi isoo affinaani» hine. 14 Tennexxe insa'ne qachchiba'a alalle marreexxi, qachchi giddi'a e'yande'n he'nenaa'n Saamu'eeli tullichchi hana tolchinamaxxe bakkaba'a qabato'a insa'ne he'needarre'n dagaa'na'a anfe.

15 Sa'ooli dago'a mitte barra edi darre Duuchchi Woddik Gootti Saamu'eeli'n hiyye leelishe'emma qici, 16 «Soodo tenne yanna'n Biniyaamixxe gosaka mitte manjo atiba'a ergannon; anke arda Isira'eel'ni akeekaashsha isoo hariir; isinna anka arda Filsixeemitotixxe anganaa'ni anjiraan. Anke ardixxa rakko uudeennen, kunnisse arda anka gargarona'a anyee ye'edheexxa ye'a.»

17 Saamu'eelinna Sa'oolii'i uudee wodda, Duuchchi Woddik Gootti Saamu'eeli'i, «Ikki atte'n kule'ennak manjichchi kunnisse isoten; isi anka arda galchaan» hiyye. 18 Sa'ooli dala'iinxe hula biri'a Saamu'eelibaa shiqeexxi, «Magenokenaa'n leella uudaake majichchiki mini haba'ate kadeexxa maganneten ani'n kuli» hiyye.

19 Saamu'eelinna Sa'ooli'n hiyye hiisse haaso'e, «Magenokenaa'n leella uudannek anten; telcho aninni welti ita itinammaxxee ani'a edissine hana magenoonfantaak tullichchiba'a alalle me'e; godobika atika yaada duuchcha soodo gorsa ate'n kulee atee me'isannon. 20 Sase barra edo baxxemmaaxxi atixxi harruwwa afende'een isexxee yaaddoxxee; yaane kinni Isira'eelike ardixxi halcha atenna atike annike mini hadon» isoo hiyye.

21 Sa'oolinna hiisse haaso'ee qici, «Ani Isira'eelixxe gosake minuwwinaa'n lumoshsha shiixxooke Biiniyaamike gosatike minike manjjon; gosa anxinna Biiniyaamixxe gosanaa'n yo'oshsha shiixxoxxen Mayeeta iitta hexxeexxa yaane ane'ni kuldaate?» hiyye. 22 Ookkoneechchi uduma Saamu'eeli Sa'oolinna isika erganjo itatike mini giddi'a iidage; ye'eemeeke sase tomme kadaak manni offoleexxe itatixxe bakka duuchchinaa'n ulfaateexxe bakka'n insa'nee ofo'lishe. 23 Saamu'eelinna ookkone ita ra'isammaka, «Qoffinni uggi hiyya'n ate'n woxxe uwwennaka maala hinni» hiyye. 24 Tennexxee iikki ita ra'isammak lukatika maala* hedheeshshanni iyyedageexxi Sa'ooli edo ugge; Saamu'eelinna Sa'ooli'i, «Kunni ati'a qofinni uggemeeke maalan; ‹Ani keesuma ye'ennen› hiyyennexxe yaannanaa'n tenne yanna qico'n ati'a uggemeeke kademmaxxee it» hiyye. Sa'oolinna eettene barra Saamu'eelinni welti ite ha'we. 25 Sa'oolinna Saamu'eeli goorotenaa'n adadde qachchibaa dangeechchi uduma Saamu'eeli ifike minixxe heelichcho* hana Sa'oolinni welti haaso'e.

26 Soodimaro ke'ne; Saamu'eeli Sa'ooli'i mini giddixxe heelichchotenaa'n ye'eexxi, «Ke'we geegesee'na'a me'itota'a» hiyye; Sa'oolinna ke'ee wodda Samu'eelinni welti gadhi'a fulle. 27 Qachchinke kasiba'a adadde me'ate'n he'neenge'ni Saamu'eeli Sa'ooli'i, «Erganji atik no'o edi'a sa'e me'aashsha iti kuli» hiyye. Erganjikinna edi'a sa'eexxi me'e; ookkoneechchi uduma Saamu'eeli Sa'ooli'i, «Mageni ane'n kuleexxa erga ate'n kulonna'a hee'nooxxe yanna'a kabanni hekki hiyyi» hiyye.