1 Daawwiti Gaatike qachchanaa'n baqatee Adulaamike qachchi bira hexxeexxe wolo'obaa'a me'e; Dayyuwwi isikinna weli mini hadi isik duuchchi tenne laqqeexxi isi hedheeba marreexxi ofolle.✝ 2 Rakkatekiir, liqa afemmakiiri, iittanni hedho qararteeki duuchchir isiba'a me'aammaxxe'e manjiink laakkossi mitteba shoole dhibba geye; Daawwitinna insa'neeke akeekisanjo kade.

3 Daawwitinna ookko'n ke'exxi Mo'aabi bogi giddo hedheeke Misiphphake qachchibaa me'e; Mo'abik moyanjinna, «Mageni ani'a assaaxxa yaane uudanno qico'n anni anikinna ama anxi atiba'a dange he'no'a eeti ani'a uwwi» hiyye. 4 Konne qicinni hado ifika Mo'aabike moyanjibaa iyyemare ugge; insa'nenna Daawwiti gongomake'ni sho'oma'n hedhemmake baro duuchcha'n moyanjik welti turre.

5 Ookkoneechchi uduma wabeek Gaadi Daawwitibaa marrexxi, «Kaba turtoxxe'e, ta'anni rakkee Yihudake bogibaa me'i» hiyye kule. Tennexxee Daawwiti ookkoo'n ke'eexxi Heereetike gongomibaa me'e.

6 Barratixxa barra Sa'ooli bagedo angate'n abixxeeshanni, Gibi'a giddo hedheeke tullichchi hana Tamarisiki hiyyemaake haqichchi hunda ofo'leemman. Ja'laabuwwi isikinna isi bira uurremmani. Eettene yanna Daawwitinna isinni welti hedhemmak manni mitte bakka'n hedheexxa Sa'ooli'n kulle. 7 Sa'oolinna ja'laabuwwa ifika hiyyee qici, «Ha'no koo Biiniyamike manna ani hiyyannexxa laqqe! Dhugaandinni Isseyik belti Daawwiti ha'no mitte mittengee hucitinaka fichchanna woyyinetike hiddichchika boga ha'no'a uwwangee? Ifike lolinke mannike kuma ajajalluwwanna dhibba ajajalluwwa assedho'a isi ha'no'o hariira'neechcho labbee'e? 8 Ane'nita qophphi hitine kexxinechchi tennexxeetee? Ank belti Isseyike beltinni welti kako aageexxa ha'no giddii'n mittikinna midde ane'n kuleek hedhebaan. Ani'a quuqemeek haranga mittikinna hedhebaan. Telchixxa telchonna assa'neshshann ank erganji anee gaado'a ank belti isoo ane'n ke'isiiseexxa ha'no giddi'n ayyinna ane'n kuleek hedhebaa.»

9 Eettene yanna Sa'oolik ja'laabuwwinni welti ookko uurre'emmak Dooyiqi Eedoomichchi hiyyee qici: «Ani Isseyik belti Noobike qachcha'ni hedheeke Abemelekii'i Ahixuubikibaa daga'naa afeennen. 10 Daawwitinna maa assaxxa Abeemeleki isixxee Duuchchi Woddika Gootta laqeen; ookkoneechchi uduma Daawwiti'a gala'atanna Goliyaadi'ii Filisixeemichchiinka wolaantichcha uwween» hiyye.✝

11 Ookkoneechchi uduma moyanji Sa'ooli qeesichcho Abemelek Ahixuubike'ninna Noobi hiyyemaake qachchiba hedheke qeesichchiinke annike mini hado duuchcha'ni erga dhaame'na insa'nenna dange. 12 Sa'oolinna Abemeleki'i, «Ahixuubike beltoo! Yoona laqi» hiyye.

Abemelekinna «Ishshi anke gootta!» Hiyye hiisse.

13 Sa'oolinna, «Atinna Isseyik belti ane'n kexxinechchi maye'ate? Ati Isi'a gala'atanna wolaantichcha uuteten; isixxee Magenokanna laqqetten; isi ta'a ane'n naapha kade ke'ee ane'e shiyo'a isi'a eldaaxxa yanna halsate'ni hedheen» hiyye.

14 Abemelekinna moyanjokee hiyyee qici, «Daawwiti atike lolike mannike addatemeeke ja'laaban; atixxa belto aadheeke atinge ballonna atee heqqaammake lolinke mannike ajajallon; atike mootumatike mini giddo isishsha ulfateeki ayyete hedhe? 15 Dhugaandinni ani Mageno isixxee laqe'ennek ani'a tinni siretixxe yannabaan! Moyanjo! Anee erganjo atika yookaan annke anika mini haddo tenne yaannexxee no'oo komatoxxee, tenne yaane ani mitteelchonna ege'nennelchchi hedhebaan.»

16 Moyanjikinna, «Koo Abemelek! Atinna atike anniki mini hadi duuchchi shiyendinaan!» Hiyye. 17 Ookkoneechchi uduma Sa'ooli isi bira uurremmake heqqanjuwwa'n; «Duuchchi Woddike Goottixxe qeesolexxi anga Daawwitinni welti hexxeemmaxxee. Ittanni yaane duuchcha ege'na'inni he'neexxi Daawwiti baqate me'eexxa midde ane'n kullebaan» hiyye. Heqqalluwwi kinni, «Mageniinxa qeese shinnabe'non» hiyye. 18 Tennexxe Sa'oli Dooyiqi'i «Atinni insa'ne shiyi!» Hiyye. Dooyiqii Eedoomichchikinna ke'eexxi duuchchinga shiyye; ettene barra'ni bireexxi efuude odo'witaammaxxe qeesoleki laakkossi saddeeta tommenna ondekemmani. 19 Ookkoneechchi uduma Sa'ooli Noobi'i qeesetike qachchi giddo hedhammaka duuchcha labballokanna melaalle, oosetanna ununixxa annuwwa, laluwwakanna harruwwa iittan gedhebuwwi duuchchi shiyemaashsha asse.

20 Yaane kinni Abemelekixxe labbaxxe oosenaa'n Abiyataar hiyyemaak mitti belti calli baaje fuleexxi Daawwitibaa me'e. 21 Isinna Sa'ooli Duuchchi Woddike Goottixxa qeese bireexxa Daawwiti'n kule. 22 Daawwitinna Abiyataarii'i hiyyee qici: «Eettene barra ani Dooyiqi'i Eedoomichchi ookko hedhee'na uudenne wodda duuchchinxa yaane Sa'ooli'n kulaan hiyyeennan. Tennexxe mudeeke atike annike mini hadi duuchchi'a buuto kadeennek anten. 23 Ati kinni aninni welti hedhi; iittanna sodaattoxxee; Sa'ooli atee shiyo'a hasa'nemmashaann aneenna shiyo'a hasa'neen. Yaane kinni aninni welti nage'ik hexxatton.»