1 Sa'ooli Filisixxeemika manna lolee higeechchi uduma Daawwiti Eenigaadi qiilla gammoojje'n hedheexxa laqe. 2 Tennexxe Sa'ooli Isira'eeli giddii'n sase kuma fiifina kadeeka lolinka manna adheexxi, «Qiilla gammoojjexxe gadhixxe re'exxe kino» hinaaba boroti darre'n Daawwiti'i shorre abido'a mare. 3 Orinii qarqara gedhebinke dalla'i bira hexxeexxe wolo'obaa'a foole'akee'e e'ye. Ookkonna isi ofo'lemmabaa'n giddi darre'n Daawwitinna isinni welti hedhemmaki manni sho'omme he'nemmake boonchommani.✝ 4 Mannikinna Daawwit'i «ati'a middite eldeen! Kunni Duuchchi Woddik Gootti, naapha atika anga atixxe'n sa'isse uwwannon hiyye ate'ni kulemmaxxe barran; ta'a yooni naapha atike'n hassettexxa assa dandeetatton» iso'n hine. Daawwitinna boxxa'ni isiba shiqeexxi Sa'ooli afebaangi seemmatike kasanaa'n woxee adhdhe. 5 Ookkoneechchi uduma Daawwiti Sa'oolixxe seemmaka kasa woxemmaxxee qalbe isixxi yo'oshsha yaade. 6 Isinna isixxa duuka me'ammake manni'a, «Duuchchi Woddik Gootti hariire moyanjoke asseeke anke gootta'n elobaaxxa assabe'noshsha Duuchchi Woddiki Gootti anga anxa abidoo! Isi Duuchchi Woddiki Gootti fi'leeke moyanjo kadeemmaxxee ani iso'n fuggoxxa assa ani'a hasissabaan!» Insa'nee hiyye.✝ 7 Tennexxe Daawwiti konne hiyyichchinni Sa'ooli'n fuggoxxa assinabaasha isixxa duuka me'ammaka manna hoyye. Sa'oolinna wolo'o giddii'n ke'e fule me'e.

8 Ookkoneechchi uduma Daawwitinna gongomi giddi'n fuleexxi Sa'ooli hordofe ye'eexxi «Anke gootta moyanjo!» Hiyye. Sa'oolinna udumi'a wirri hiyye eriqe kayya uudee wodda Daawwiti albi buttina tuqaa qico'n heeshshi hiyyeexxi anga iimi'a ke'isse; 9 Daawwitinna Sa'oolii'i hiyyee qici, «Ani ate'n fuggoxxa assona'a hasaanneesha asse manni ate'n haaso'a'neeka haaso'a mayee laqqaate? 10 Techcho wolo'oti giddo hexxeenaa Duuchchi Woddik Gootti atee anga anxe'n sa'isse uwwemmaxxa uushsho dandeetatton. Mitti mitti aninni hedhemmaki manninna ani atee shiyonnaa anee tiritirseemman. Yaane kinni ati Duuchchi Woddiki Gootti hariireke moyanjo kaddeettaxxee ani anke gootta'ni anga anxa ke'issabe'non hiyyee ati'a marareenneni. 11 Anke anna! Seemma atixxenaa'n woxee aadhennexxa uudi! Atee shiya dande'annan; yaane kinni atee shiyannaxxa bakka seemma atixxike kassanaa'n woxedhe aadhennen. Ani ate'n jallate yookaan ate'n elobaaxxa assa hasebe'noxxa tennenninni ege'na dandeetatton; ati kinni telchonna atee balleessebe'nongi anee shiltotta'a shorritaaten. 12 Yooni Duuchchi Woddik Gootti atixxenna anixe oddo'n balleessanji ayyete kadeexxa foye murowwaali! Ani ate'n elobaaxxa assatee hasebe'nongi ane'n assitaattexxe elobaaxxe yaane duuchchi'a Duuchchi Woddiki Gootti halo fulowwaal. 13 Fuggoxxa yaane hujjaaxxi fuggaaleyye callan, hiyyaaka edike manna no'okika hiyyichcho atinni egendeeten; tennexxee ani ate'n anga anxa ke'issabe'non.

14 «Isira'eeliki moyanji ayyee shilltotaa wo'landaatexxa uudi! Ayyee shorritatexxa kassi hiyyi! Anee reyeke wolchishsha yookaan taffetishsha hedhenenge shorritato?✝ 15 Duuchchi Woddik Gootti no'o lamenaa'ni balleessanji ayyete kadeexxa murowwaal. Isi tenne yaane uude ani'a baasee anga atixxenaa'n anee anjirowwaal.»

16 Daawwitinna haaso'a bireechchinni uduma Sa'oolinna, «Anke belto Daawwiti! Dhugaanda kunni hafuuri atinge?» Hiyye oodhe. 17 Ookkoneechchi uduma Daawwiti'i hiyyee qici, «Ati Daawwiiti dhugaatike manjoni! Ani kinni ballesanjoken; ani ati'a elobaaxxa assenne wodda ati ani'a eloxxa assitetten! 18 Duuchchi Woddik Gootti anga atixxe'n anee sa'isse uwweemman; ati kinni anee shiltebexxon; ani'a eloxxa assitaateke kaddetexxa telcho ege'nishsheeten. 19 Naapha ifika anga ibirse fuggoxxa assebaaki walaaki manji haba afema? Telcho ani'a assitettexxe eloxxe yaane'a Duuchchi Woddik Gootti ati'a elo! 20 Ati Isira'eelike moyanjo kaddattoxxanna Isira'eelixxi moottumma atixxe galcha'n jabaate hexxaaxxa telcho kokeennen. 21 Yoona anki summinna anke mini hadike summixxi booso baxxe dedhedaabaashsha assite sanne anxanna anke annika mini hado yo'oxxenaa'n gatisattoshsha Duuchchi Woddike Goottike summinni ani'a kakatimee.» 22 Daawwitinna Sa'ooli'a fuggoxxa assabe'noni hiyye kakate.

Ookkoneechchi uduma Sa'ooli mini ifikiba'a me'e; Daawwitinna isixxa duuka me'ammaki mann wolo'otiba'a hinge me'ine.