1 Ookkoneechchi uduma Na'oomi Ruutii, «Bulte eloxxe'n fuldota'a eloka heerundatoka manjo hasennele woyyan. 2 Egendetteshshanni deegge qocca'n welti hossattaxxi melaalluwwa ergatenda'neek Bo'eezi fira no'okeeten; isinna dokko galgala so'a uxxa'neen, 3 Tennexxe biso anshexxe, qayyexxe ifi seefati. Ookkoneechchi uduma isi so'aa uxxaammaxxee aldu'mebaa me'i; yaane kinni hirbaata ite ha'waa qico'n ille isixxe'ni leellitoxxe'e. 4 Isi haba diiphaaxxa hubatte uuddetechchi uduma isi diiphe cokokki hiyyamma wodda isi biri'a shikki hite seemma faashshetexxi lekkatibaa'ni dhiiphi; isinna maa assitattoxxa ate'ni kulaan» hite.

5 Ruutinna «Hitetexxa duuchcha muuxxannon» hite.

6 Tennexxe Ruuti aldu'metibaa marte ballo isexxi hitemmashshanni assiteen. 7 Bo'eezi ite ha'weechchi uduma ifi eeyye gophe so'iinxe tuulobaa me'eexxi irkatemmaba diiphe; Ruutinna laana isi biri'a shikki hiteexxi seemma isixxa faashshe lekkatibaa'n diiphe. 8 Bo'eezi hashsha wodhakka kadamaa wodda dammaqeexxi cinaachcha wirri hiyyaa wodda mitte manjichcho isixxe lekkaba diiphphee'naa afe mambe'a hiyye; 9 «Ati ayyete?» Hiyye qore.

Isenna «Anke gootta ante Ruutiten; ati shiqixxe aante kaddettaxxee duuchchiinxi uuddaak ateten; ane'ni seemma buyyisi» hite.

10 Bo'eezinna «Duuchchi Woddik Gootti atee eebbiso anxe belto; ta'a assitaatexxe yaane iimi gama konnechchi edi gama ballo atixxee assitetexxi eloxxi yaane addatensha atixxa leellishaaxxen; Ati hasseetele duureessa yookaan hiyyeessa mitte ka'untichcho'n heerundattan; yaane kinni iitta assatee hasseboxxon; 11 Yoona anxe belto mee yaadi! Ati hassetexxa duuchcha ani ati'a wonshannon; atinna eloxxe manjo kaddetexxa qachchi duuchchik manni ege'neen. 12 Ani shiqixxe aante atixxe kada dhugaaten; atixxi yaane duuchchanna uuddaak anten; yaane kinni ani iimi ga'ma aanteti shiqaak manji hedheen.✝ 13 Soodaa qico'ni kabanni diiphi; bogi soodee'naa ikki manjichchi ati'a hasissaaxxa wonshaakenna wonshabaake kadeexxa isoo qorrannon; isi isexxi yaane anee uuddaan hiyyoole eloxxen; isexxi yaane anee uuddabaan hiyyoole kinni ani ati'a hasissaaxxa wonshannoxxa hedhaake Duuchchi Woddike Goottike summinni kakataannen; soodaa qico'ni kabanni diiphi» hiyye.

14 Tennexxe Ruuti Bo'eezixxe lekkamba diiphphe. Yaane kinni Bo'eezi Ruuti isinni welti hexxemmaxxa ayyinna ege'no'a hansa gopheemmaxxee, Ruuti ayyinna afebaang bariisa diiphii'n kexxe. 15 Bo'eezinna Ruutii'i «Fugatteettexxa bayyanni farri assedhi» hiyye. Isenna farri assexxe; Bo'eezinna jaane ginbe geyaaka so'a qulxube usure dudduroke'n ba'isse. Isenna qachchi giddi'a higge. 16 Ruutinna mini'a e'yitee wodda ballo isexxi Na'oomi «Anxe belto ikki haaso'i maa kade?» Hite. Ruutinna Bo'eezi ise'a asseexxa duuchcha haasotte. 17 Higgeen «Ballo atixxe'n anga duwwixxin martoxxen hiyyeexxi konne so'a duuchcha ani'a uwween» hite.

18 Na'oominna «Yooni anxe belto! Tinni duuchcha muuxendaaxxee ossunteti heqqedhi; Bo'eezi tenne yaane telchonni bire baak haranga diiphabaan» hite.