1 Anke dayyuwwaa! Ulfiniinke Gootta Yessuusi Kiristoosi'n amandineemmaxxee gamissinoqqe'e. 2 Worqetixxa qube uggudheekinna eloxxa seemma oddo'wek manji ha'nooxxe bukki giddi'aa dagoole, iittanni xurte seemma oddo'week hiyyeesi manji e'yoole, 3 ookkene eloxxa seemma oddo'weeke manjichchi'aa ulfinna uwwati, «Konne eloke booncho'ni ofo'li» hitnoolenna hiyyeesa manjichcho kinni, «Ati ookko uuri» yookaan «Anxe lekka unda butta ofo'li» hitinooele; 4 ha'nooxxe oddo'ni gamissiyyo assaa gophphineetaa? Iittanna fuggoke yaaddinni abidendineeki muralluwwa kadatebaataa?

5 Eeyendineeke anke dayyuwwaa! Laqqe, Mageni amanati dureeyete kandaashshanna isoo eeyyakeri'aa addatema uwweemmaxxa mootumma dhaalashsha tenne butta duuchchaxxa hiyyeeyye isi filebaan hiyyoteetaa? 6 Ha'noo kinni hiyyeeyye salphisine'een. Ha'noo wixxirri assitaaxxi dureeyyetebaataa? Murtetike minibaa ha'noo harlkisa'neek insa'netabaataa? 7 Ha'noonni ye'emma'neeka ulfichcha summa yowwina'neeki insa'netebaataa?

8 Woyyichcha maxaafa'ni, «Jaalo ifika umo ifikishsha assite'e eeyyi!» hiyyemme borreessemmeeka ulfichcha seera muuxxinoole eloxxe assate'ni hexxineen. 9 Gamisinoole kinni cubbo hujjine'een hiyyoten; seeri edonna seera qaxxaammuraakishsha uudendinaan. 10 Tinninna kaddeek seera duuchcha muuxaki yaane kinni mitteke'ni guggufataak hedhoole duuchchiinga seera qaxxaammureeshsha uudeman. 11 «Yabaabuldoxxe'e» hiyyeek iikki Gootti iittanni, «Shilittoxxee» hiyyeemmaxxeten. Tennexxee yabaabula gophphotolenna midde shilitoottole seera qaxxaammurteetten. 12 Haasotinaa woddanna kadi, hujinna wodda leexxumma uwwaake seerinni murema'neeke mannishsha kadde. 13 Tinninna kaddeechchi mararabaak duuchcha'ni mararte belo iso'ni murendaan. Mararte murte injiffataan.

14 Anke dayyuwwaa! Manji mitti «Anii amanaa afeenneni» hiyyoole huje kinni afa gopheexxe kaddoole maa la'o affe'e? Iitta hexxeexxi amanata isoo anjira dandeetaataa? 15 Mitti dayyi yookaan mitte dayyo oddo'winaaxxa seemmanna kadi indaachcho gonphee'naa, 16 ha'noo giddii'ni miitti insa'ne, «Nage'iki me'ee! Meenni boojo'we; godde» hiyyoole yaane kinni biso insa'eke hasissaachcho uwwaa gonphoole maa la'o anfe'e? 17 Iittanni huje affebaaxxi amana umo isengee rerteexxeni.

18 Yaane kinni mitti manjii, «Ati amanaa affeeteni; Ani eloxxa huje afeeneni» hiyyaan.

Amanaa atixxa hujetenaa'n gargar hiisite'e ani'aa leelshi, aninna amanaa anxaa hujenni ate'ni leelshannon hiyyannon. 19 Ati Magen mitteke kadeexxa amandatton. Tinni eloxxen! Amanatenna kaddoole fuggichchi hafuuruwwinna tenne amanaan; insa'nenna alanne culphinsaan. 20 Ati gowwi manji, eloxxe huje beloo hexxeexxi amana atixxi gumma affebaaxxe egendottaa hassaate? 21 Anni no'oki Abirihaami belto ifika Yisaaqii'i tolchimalchoke'n shiqishshee wodda, eloxxe hujenni qulloommeemmabaataa? 22 Tennenni amanaa huje isexxe welt mitteba hexxeemmaxxanna isixxi huje wo'mate kaddeexxa uudaaboxxoo. 23 «Abirihaaminna Mageno amaneen; amana isixxinna qullumate kadde isi'aa laakko'ende» hiyyaak Woyyichchi maxaafik hiyyichchi muuxeme. Konne orinni Abirhaami Mgeniinke jaalo hiyyemeen. 24 Yoonna amana callinnite kaddeebaang hujeti manji qulloommaaxxa uudaaten. 25 Iittanni Re'aabi hiyyendaammaxxi yababulto ookkone erganjuwwa adhdhiteexxi wele ora meinaashsha assitee wodda eloxxe hujenni qullitete kadebaataa? 26 Lubbotena'ni garga higeek bisi reyammashsha iittanni hujenaa'n gargar higgeexxi amana reriteexxen.