1 Ha'noo giddo hedheek bagedinna weli giba habaan'ni dageexxe? Ha'nooke bisi giddo lolenda'neexxe ha'nooxxe gaabenaa'nitebaataa? 2 Mitte yaane alfitino'a halchitinaan; yaane kinni alfitinabaan. Tennexxee manjo shiltinaan; haristinaani alfa dandetinabaan. Lolindinaani, weli aatinaani ha'noo soodachcho gophphinaammaxxe'e halsitinaaxxa yaane alfitinabaan. 3 Soodatinaa wodda soodachchotika hiissichcho alfa gophphinaachchi eettene soodatineemmaxxa yaane maaliinxe gammashsho'n hosilsate'ee fuggoke yaadinni soodatinaammaxxeten.

4 Koo ha'noo yabaabuluwwaa! Tenne butta duuchchanni jaaloma Mageniinke naaphpha kadate kaddeexxa egendinebaata? Yoona butta duuchchake jaalo kada eeyak duuchchi Magniinke naapha kade'een. 5 Iittanni Woyyichchi maxaafa, Magen no'o giddo uggeeki hafuuri isi callalinni he'nonnaa jaba qicinni hinaafaan hiyyek tolange ha'no'n labbe'ee? 6 Yaane kinni Mageni badhaadha bira sa'isse'e uwwaan woyyichchi Maxaafinna,

«Mageni ifi dukaaka manna gareeraani

shaqqake manni'a kinni badhaadha uwwaan»

Hiyyeeki tennexxeeten.

7 Yoona ifi Magenoke hirissiise! Durrissa kinni gareere; isinna ha'noona'ninna baajani. 8 Mageniinbaa shiqqe; isinna ha'noobaa shiqaani; ha'noo cubbaalleeye anga ha'nooxxa luqqi assedhe; ha'noo lame yaadinni daaqinaak qalbe ha'nooxxa ca'a assedhe. 9 Wixixxi hiyye, yaade, oodhe; osso'lichcho ha'nooka yaadotibaa, gammashsho ha'nooxxinna yaadotiba jijjiirendowwaal. 10 Gootti edo ifi heeshshi asse; isinna ha'noo iimi'a qophphi assaan.

11 Dayyuwwaa! Weli'aani weli fugoxxa haasotinoqqe; dayyoke'ni fuggoxxa haaso'aaki, yookaani dayyoke'ni muraaki seerake'ni fuggoxxa haaso'aan. Seerake'ninna muraan; ati seerake'ni murtottole ati murtaateke malee'e seerakee ajajendaattekebaan. 12 Seera uwwaakinna muraaki mitte Mageno callannni; isinna anjiranna balleesa dande'aaken. Tennexxe ati jaaloke'ni murataatek ati aayyetee?

13 Ha'noo «Telcho yookaani soodo ookkone qachchibaa mare'e mitte wogga ofo'lanon; ookko'o daddalnexxi ibilsinannon» hitina'neki laqqe. 14 Soodo kaddaaxxa midde egendinebaani; hedho ha'nooxxi isenni maachcho? Ha'noo heenooxxe yanna leelitexxi hirbange'n ba'aamake fincinke hafuurshaten. 15 Tenne erra ha'no'o hiyya hassissaaxxi «Magniinxe fedhi kaddoolenna he'naanole tenne yookaan eettene assinnannon» hiyyaa hassissaan. 16 Ta'a kinni ha'noo holla ha'nooxxenni kijibina'neen. Iittaa hexxeexxi ifi duka duuchchi fuggoxxen. 17 Yoonna eloxxe kaddeexxa yaane assa hasisaaxxa ege'na'ninni hedhee assabaak manji cubbo hujaan.