Mateus 23

Yesuusi Muuseke Seerika Barachchiisalluwwanna Feeristo Ci’meexxa

1 Okkoneechchi udima Yessuusi ardake’ninna hordofeeyye ifixe’n hiyyeexxi haaso’ee qici, 2 «Muuseke seerik barachchiisalluwwinna Feerisito barachchiisatee Muusexxe bakka’n he’neen. 3 Tennexxee insa’ne ha’noo ajanjaaxa duuchcha ajajendineexxi asse; yaane kinni haasonneexxa assa gonphaammaxxee insa’ne assinaaxxa assitinoqqe’e. 4 Ha’urtaaxxanna rakkissaaxxa ba’o usurreexxi manjiinxe dugumo’n feenaan; yaane kinni insa’ne ifi’a qubichcho ifikenn midde eettene ba’o tuqatee macci hinaba’a.

5 «Assinaaxxa duuchcha manji uudo’a assinaan; alba ifike’n uggudhinaaka ashenkitaaba hiyyemaachcho*23:5 Ashenkitaab hiyyemeechchi Ayhudootiink manni woyyichchi maxaafika hiyyichuwwa giddo uggudhdhammaxxe kolonjon ba’lisinaa’n; ifixxe qeerraxxe seemmaka handaara qeerrilsinaan.✝23:5 Mat. 6:1; Lak. 15:38; Lew. 6:8. 6 Jilati booncho ulfinniinxa bakka, Ayihudootiinke magenooffachchotike mine’ninna ulfinniinke barcuma’n offo’late eenaan. 7 Iittanni dikko giddo duuchcha’ninna manni insa’nee ‹Barachchiisallo› hiyya’n naga’a aadhaashsha eenaan.

8 «Ha’no kinni barachchiisalli ha’nook mitte calla kadeemmaxxeenna ha’no duuchchiing dayyuwwake kaddineemmaxxee ‹Barachchiisallo!› hiyyendine ye’endinoqqe’e. 9 Iittanni iimate’n hedheeka ha’noo mitte anna afineemmaxxee buttate’n ayyeenna ‹Annayyo› hitineexi yexxinoqqe’e. 10 Barachchiisalli ha’nook Kiristoosi calla kadeemmaxxee ‹Barachchiisallo› hiyyendine ye’endinoqqe’e. 11 Ha’noonaa’n sa’aak ha’noo’a erganjo kadowwaal.✝23:11 Mat. 20:26-27; Mar. 9:35; 10:43-44; Luq. 22:26. 12 Ifi lummisaak duuchchi salphata; ifi salphiisaak duuchchi kinni lumedha.✝23:12 Luq. 14:11; 18:14.

Meuuseke Seerik Barachchiisalluwwinna Feereesito Adhdhema Gophpheexxa?

13 «Manji iimixxe mootumma’n e’yabaashsha, hula cuffina’neek ha’no ifi uggudhdhalluwwi, Muuseke seerik barachchiissalluwwinna Feerisito ha’noo’a aanne’e; ha’no ifi’a e’yitinaba’a; e’yatee eeyyaakaaranna e’yabaashsha assitina. 14 Ha’no ifi uggudhdhalluwwi Muueseke seerik barachchiisalluwwinna Feeristo aro’o affebaaxxe hiyyeetteka mine mulqexxina’ninna mannakee labbaashsha qeerraxxa soodachcho assitinaammaxxee hara bira saxxeexxi murte ha’noo’n geltaan.*23:14 Mitti mitte mirqisanji maxaafixxi borruwwa laakkossa 14 lebbaan. Hiyyichchi kuninna Mar. 12:40 welti fakkaatan.

15 «Ha’no ifi uggudhdhalluwwi Muuseke seerik barachchiisalluwwinna Feerisito, manjo mitte Ayihudiinxe amana’n amanchiisatee abbaayyati hananna wodii hedhebaake boga’n dootina’n, isoo ha’nooxxe amanake hordofallo assexxinnaxxa yanna isoo ha’no caala lame anga gehaannemixxe giirake manjo assitinaammaxxee ha’no’a aanne’e.

16 «Balla’a akeekisanjuwwi’a a’noo’a aanne’e; ha’no, ‹Manji mitti Galmake’n kakatoole tinni maachchonnaba’a; Galmi giddixxe worqe’n kakatoole kinni kako iitti isoo abiddaan› hitinaan. 17 Ha’no gowwi balla’uwwi, eettenee worqenaa’ninna iitti worqe woyyittete kaddaashsha asseeke ookkone Galminaa’n hoonte sa’a? 18 Iittanni, ‹Manji tolchimalchoke’n kakatoole tinni maachchonabaan; yaane kinni ookkone tolchimalchi hana hexxeexxe uwwa’ni*23:18 UwwaManji Magenokee shiqishaaxxi ergatensha duuchcha uwwa hiyyenda. kakatoole kako iitti isoo abiddaan› hitinaan. 19 Ha’no koo balla’uwwi! Uwwatenaa’ninna uwwa iitti woyyittete kaddaashsha asseeke tolchimalchinaa’n hoonte sa’a? 20 Tennexxee ookkone tolchimalcho’n kakateek ookkone tolchimalcho’ninna isi hana tolchemeechcho duuchcha’n kakataan hiyyaten. 21 Ookkone woyyichcha Galma’n kakataa woddanna ookkonne Woyyichcha Galma’ninna ookkone isi giddo hedheechcho’n kakataan hiyyaten. 22 Iimate’n kakataak Mageniinxe moote’ninna eettene moote hana ofo’leeke’n kakataan hiyyaten.✝23:22 Isa. 66:1; Mat. 5:34.

23 «Ha’no ifi uggudhalluwwi Muuseke seerik barachchiisalluwwinna Feerisito bassibelotenaa’n, sugettetenaa’ninna hixichchokeninaa’n tommimitte utinaan; yaane kinn seera Mageniinke’ni umoke kaddeexxa yaanuwwa, tinniirinna dhugaa assaa, gattowaali hiyyanna xuurameessumma waldinaan; eetteneera waldinebaangi tenneeranna assa ha’noo hassissamman.✝23:23 Lew. 27:30. 24 Ha’no Balla’uwwi akeekisanjuwwi! Bookee melmelchitinee fulchitina’n gaala kinni liqinsitinaan.

25 «Ha’no ifi uggudhdhalli Muuseke seerik barachchiisalluwanna Feerisito, ha’noo giddo ifi calli’a hiyyanna mulqedha wo’mitee’naa gadhi darre buudatanna qore ca’a assitnaan. 26 Koo ati balla’i Feerisichchi gadhi darri ca’a hiyyo’a edisettexxi buudatanna qore giddi darre ca’a assi.

27 «Ifi’uggudhdhalli Muuseke seerik barachchiisalluwwinna Feerisito, gadhi darre’n noori itti issemee’naa eleekara, giddi darri kinni reyeeke mannixxi miqe wo’mite’naa batto’eemake hirreessuwwa labbinaammaxxee ha’no’a aanne’e.✝23:27 Erga. Huj. 23:3. 28 Iittanni, ha’no gadho uudaake’n qulliyye fakkaattinaan; yaane kinni giddo ha’no’n ifi’uggudhdhatinna fuggoxxi wo’mite’en.

29 «Ha’no ifi’uggudhdhalli Muuseke seerik barachchiisalluwwinna Feerisito ha’no’a aanne’e; ha’no wabeekotika hirreessuwwa ijaartina’n qulliyyetixxa hawultuwwanna danchoossitina’n, 30 ‹Edike no’oke annuwwike baro’n silaan he’neennele wabeekoletixxa munde dunati insa’nenni welti mittoommannabaan› hitinaan. 31 Tennexxee wabeeko shiyemmake mannixxe oose kadda ha’nooxxa, ha’no umo ifi’nge’n dhugaa kuldina’neen. 32 Tennexxe annuwi ha’nook safeemmaxxa yaane ha’no baada geessisse.

33 «Ha’no bofuwwi buutetixxi oose, gehaannemixxe murtenaa’n hitta fula dandeettina?✝23:33 Mat. 3:7; 12:34; Luq. 3:7. 34 Tennexxe ani wabeeko, beekoletanna barachchiisalluwwa ha’noobaa ergaannen: ha’noonna konneeri giddii’n wele shiltina, wele fannisina, wele kinni ha’nooke magenooffatixxe bakka’n jadhaffina’nee mitte qachchanaa’ni mittinbaa insa’nee shorritina. 35 Tennexxe ookkone qullichcha Aabeelixxe mundenaa’n ookkone woyyichcha Galmixxenna ookkone tolchimalchixxe oddo’n shiltineemmake Beraakiyuka belto Zakkaariyaasixxe mundee qico’n buttate’n dundineemmaxxe qullitte munde duuchchixxi mura woxxa ha’no’n geltaan.✝23:35 Dada. 4:8; 2 Odo. 24:20-21. 36 Dhugaate ha’no’n haaso’annen, tinni mura woxxa duuchchi tennee ilake manna’n geltaan.

Yessuusi Iyyerusaalemi’a Oodheexxa

37 «Ati wabeeko shilta’ettexxi, atiba ergati dgeekaaranna kinjik cancaqqattoxxe, tee Iyyerusaalemi lukkichcho beltanna ifixxa keela ifike hunda bukki assexxammashsha, me’ele oose atixxa bukki assedha yorenne; ha’no kinni eetinebaan. 38 Kunse mini ha’nok oonee gataan.✝23:38 Erm. 22:5. 39 Tennexxee, ‹Goottiinke summinni dagaak eebbisemeeken!› hitinaa qico’n langaxxa anee affinabaa.» ✝23:39 Far. 118:26.