1 «Iimixxi mootumma ifike woyyinetike hiddichchi giddo hujaaka hiriinka hujalluwwa hasito gorsanni fuleeke fichchiinke anna labbaan. 2 Isinna mitte mitte hujalluwwi'a barratee mitte mitte diinaare'a weli aageexxi insa'nee ifike woyinetike hiddichchi giddi'a erge.*

3 «Sase saate kadamma wodda mareexxi dikko giddo huje belo uurreeka wele manna afeexxi, 4 insa'nee, ‹Ha'nonna martineexxi anke woyinetike hiddichchi fichchi giddo hujje; aninna hasisaachcho ha'no'a uwwannon› hiyye. 5 Insa'nenna ookkone woyyinetike hiddichchi fichchi giddi'a me'ine.

«Jaanenna saallane saate kadamma woddanna mareexxi higgeenna wele barratika hujalluwwa hirik hujaashsha asse. 6 Tommenna mitte saate kadamma woddanna mareexxi uurreemmaka wele manna afeexxi, ‹Ha'no barra duuchcha huje belo kaba uurritine'eechchi mayeete› hiyye insa'nee qore.

7 «Insa'nenna, ‹No'oo hirik hujlsaaka manjo gonphennexxeeten› hine hiissine haasonne.

«Isinna insa'ne'n, ‹Ha'noonna martineexxi anke woyinetike hiddichchi fichchi giddo hujje› hiyye.

8 «Bogikinna galgalo'ee wodda, eettene woyinetike hiddichchik anni ifike hujalluwwi'a umoke kadeemmake manjichcho'n ‹Udu'me dagemmakenaa'n saffeettexxi ediseexxi dagemmak qico'n hedheeka ookkone hujalluwwa yexxa'n insa'nexxe hujeka hira insa'ne'a uwwi› hiyye.✝

9 «Tommenna mitte saate woddi'a hirik hujatee e'yeemmak manninna shiqeexxi mitti mitting mitte mitte diinaare adhdhe. 10 Edise hirik hujete'n e'yeemmakiirinna shiqee wodda insa'ne ifi'a sa'eeka adhdhina'neechcho labbeemman; yaane kinni insa'ne'nna mitti mittiing mitte mitte diinaare adhdhine. 11 Insa'nenna ookkonee hira adhdhinee wodda fichchiinka anna aallanta'n, 12 ‹Kunni ta'a udu'me dageek manni mitte saate calla hujeen› yaane kinni ‹Barra duuchcha hunja'n eloona'ninna arishshote'n xoolema'n no'oo honsenekixxa qixxe insa'ne'a uutetten› hine.

13 «Fichchiink anninna insa'ne giddii'n mitteke'n hiyye hiisse haaso'ee qici, ‹Koo anke jaalo, ani atee ballessennechchi hedheba'a; weli angeennak mitte diinaare'atemmabaata? 14 Atee geyeechcho adhdhite me'i; ati'a uwwennexxe qixxe'n udu'me dageemmake manji'aanna uwwa hassaannen. 15 Anke maalaqinni eeyyennexxa assa dande'abe'noota? Yookaan ani ba'late anka maallaqa uwwennexxee diindattota?›

16 «Iittanni udu'meemmakiir edike kadaan; ediseemmakiirinna udumike kadaan.»✝

17 Yessuusi alalle Iyyerusaalemi'a me'a'n tommenna lame hordofeeyye qofinni ifibaa ye'eexxi insa'ne'n hiyyee qici 18 «Kunse no'o Iyyerusaalemi'a me'ate'n he'nennen; Manjiink Belti qeesetike sooreessuwwixxe'ninna Muuseke seerike barachchiisalluwwixxe anga'n sa'issemee uwwemaan. Insa'nenna reyotixxa murte iso'n murraan. 19 Ayihudake kadebaake mannixxe anga'ninna isoo sa'issinee unaan; insa'nenna iso'n gacifantan, isoo gannaan, fannissaan; yaane kinni sakka barranna isi reyotenaa'n ke'aan.»

20 Ookkonneechchi uduma Zebidewoosixxe oosexxi ama ifixxe oosenni Yessuusiba dage'e gulufatteexxi mitte yaane ise'a assaashsha isoo kadhatte.

21 Yessuusinna, «Maa hassette?» hiyye isee qore.

Isenna, «Tennee anxa lame labbaxxa oose atixxe mootumma'n mitte atike midda'n mittekanna atike bita'a'n ofoldaashsha assi» hite.

22 Yessuusi kinni, «Kadhatinaangechcho egendineba'a; ani ha'wannoxxe buudanaa'n* ha'wa dandeetina?» hiyye. Insa'nenna «Eeti dandeennannon» hine haasonne.

23 Yessuusinna insa'ne'n, «Dhugaaten, ani ha'wanoxxe buudanaa'n ha'witinaan; yaane kinni anke midda'ninna anke bita'a'n ofo'la ank anni qixxeesseekeeri'aate malee ani assannoxxe yaanebaan.»

24 Wele gatteemmaxxi tomme hordofeeyyenna tennee laqqeexxi ookkone lame dayyuwwa'n mufatte. 25 Yessuusi kinni duuchchiinga ifibaa ye'eexxi insa'ne'n hiyyee qici, «Ayihudake kadebaake ardik galchalluwwi ifike arda'n moyaaxxa, insa'nek ja'laabuwwinna insa'ne'n baallooma afaaxxa egendine'een. 26 Ha'noo'n iitta kada hasisaba'a; yaane kinni ha'no giddii'n akeekisanjoke kado'a hasaak ha'noke erganjo kaduun,✝ 27 Umoke kado'a hasaakinna ha'nooxxe jale kaduun, 28 Manjiink Belti isi'a ergantaashshate kaddebaak ergatemo'anna ifixxa lubbo heddi manni'a uwwo'a dage'een.»

29 Ookkonneechchi uduma Yessuusinna isixxi hordofeeyye Iyyarkonaa'n fulleexxi me'inaa'naa heddi manni Yessuusii hordofe. 30 Ookkonna lami balla'uwwi oriin qarqara ofo'leemman; insa'nenna Yessuusi ookkone'n sa'a'neexxa lanqeexxi, «Goottaa Daawwitike belto no'aa marar» hina'n raarre.

31 Ardikinna samminaashsha insa'nee xixe; insa'nek kinni, «Goottaa Daawwitike Belto, no'aa marari» hina'n hafuura gikki assine raarre.

32 Yessuusinna uure insa'nee ye'eexxi insa'nee, «Maa ha'no'a assonnaa hassina'n» hiyye qore.

33 Insa'nenna, «Goottaa ille no'oxxi baqi hito'aa hansaannen» hine.

34 Yessuusinna insa'ne'a marare ille insa'nexxa ifixxe anga qaqqabe. Hirba ookkone'n ille insa'nexxi baqqi hitenaa Yessuusii'i hordonfe.