1 Bogi soodee wodda duuchchiing qeesetik sooreessuwwinna ardiinxi gedhee Yessuusi hitta shiyemaaxxa mari'ante.

2 Isoonna usurre iyyemarreexxi galchallo Philaaxoosi'n sa'issine uune.

3 Yessuusii'i iikki sa'isse uwwemmak Yihuda Yessuusi'n murte uwwendeexxa afeexxi hansha hiyye; ookkonee sase tommiinga birretika sibljo iyyemareexxi qeesetike sooreessuwwa'ninna ardiinxe geedhe'n hisseexxi, 4 «Qullichcha manjo sa'ise uwwennexxee balleeseennen» hiyye. Insa'ne kinni, «No'oota maa dhibe? Iikki atike yaado» hine.

5 Tennexxee Yihuda ookkone birretika sibljo Woyyichch galmi giddi'a darbe me'eexxi suruudhdhe reye.

6 Iikki qeesetik sooreessuwwinna ookkone maallaqa aadheexxi, «Mundiinke maallaqa kadeemmaxxee Woyyichchi galmixxe uwwake maalaqa'n mankonnaa, eeti uwwendebaan» hiyye.

7 Tennexxee mari'anteexxi alagiinke mooggixxe bakka kado'a ookkonee maallaqinni ookkone waatichchika boga hirre. 8 Tennexxee iikki bogi techchi qico'n «Mundeti boga» hiyyema.✝ 9 Eettenee yanna wabeeki Ermiyaasi'n, «Isike hira kado'a Isira'eelik ardi mureeka sase tomme birretika sbiljo adhdhine; 10 Goottikinna anee ajajemmashsha waatichchiinke ookkone bogi'a ookkonee maallaqa uune» hiyyende kulendeemmaxxi yaane muuxende.✝

11 Eettenee yanna Yessuusi ookkone bogiinke galchalli edo uurre; galchallikinna isoo, «Ati Ayihudiinke moyanjo?» hiyye qore.

Yessuusinna, «Ati hiteteshshanden» hiyye.

12 Qeesetik sooreessuwwinna geedhe isoo ku'litee wodda kinni mitte hiissichchonna hiisseba'a. 13 Eettenee yanna Philaaxoos isoo, «Me'e yaanenni atee ku'lina'neexxa laqa'ebexxota?» 14 Galchallikinna mambe'a hiyyaa qico'n ku'lemeemmaxxe yaane'a Yessuusi mitte hiyyichonna midde buccuqqi hiyyeba'a.

15 Bogiink iikki galchalli ardi ayyaanake'n haseeka mitte usuremee manjo tika isi'a baratendeexxe yaanemman. 16 Eettenee yanna, xaqaro hujati ege'neme'eeke «Berbaan» hiyyemaak usureme'eemak manjichchi hedheemman. 17 Tennexxee ardi bukki hiyyee wodda Philaaxoosi insa'nee, «Ayyete ha'no'aa tikanno? Berbaanii'i yookaan? Kiristoosi hiyyemeeka Yessuusii'i?» hiyye qore. 18 Isinna tennee hiyyeechchi insa'ne Yessuusii'i hinaaffet sa'issine uuneexxa ege'neemmaxxeetemman.

19 Philaaxoosi murtetike barcuma'n ofo'le'naa, are isixxi, «Ani konnee manjichchixxee techcho oojjoti lumo qico rakkateennaxxee konnee balleessa afebaake manjo'n mittechchonna assitoxxe'e» hita'n iso'n ergite.

20 Qeesetik sooreessuwwinna ardiinxi geedhe kinni, Berbaanii'i insa'ne'a tikemaashsha Yessuusi kinni shiyemaashsha qoro'a arda malchite.

21 Galchallikinna «Konnee laminaa'n ayyee ha'no'a tikonnole eetina?» hiyyeexxi arda qore.

Ardikinna: «Berbaanii'i no'aa tiki» hiyye hiisse haaso'e.

22 Philaaxoosinna insa'nee, «Kiristoosi hiyyemeeka Yessuusita maa assanno?» hiyye qore.

Duuchchiing, «Isi fannisemowwaal» hiyye hiisse haaso'e.

23 Philaaxoosinna, «Mayee? Isixxi balleessa maachcho?» hiyye insa'nee qore.

Insa'ne duuchchiing, «Isi fannisemowwaal» hina'n adda cancine.

24 Tennexxee Philaaxoos tinni yaane canca ke'issita'nee malee'e la'o affa'nebaaxxa afeexxi, «Konne manjichchxxe mundenaa'n ani qullote; yoona tinni ha'note uudda» hiyya'n ardi edo wode'ik anga anshedhe.✝

25 Iikki duuchchiing ardi, «Isixxi munde no'o'ninna no'oxxe oosse'n geltowwaal» hiyye.

26 Eettene yanna Philaaxoos Berbaanii'i insa'ne'a tike. Yessuusii kinni jadhafiseechchi uduma fannisemo'a sa'isse uwwe.

27 Ookoneechchi uduma ookkone galchallik loliink manni Yessusii'i ookkone galchaallixxe baxxe giddo iyyemare; ookkonee sannachcha duuchchanna Yessuusibaa bukki assine. 28 Seemmatanna isinaa'n fulchineexxi diimmoxxa seemma iso'n oddeessine. 29 Ute sagarree kallachchanna giissineexxi Yessuusike umo'n uggine; Middixxe isexxe anga'ninna siqqichcho abidisat, isi edo gulufanteexxi, «Ayihudiinke moyanjoo, nage'i ati'a kadowwaal» hina'n iso'n gacifante. 30 Hancufakanna iso'n tunfe; siqqichchotanna isinaa'n aa'neexxi isoo umo gannaamman. 31 Iso'n gacifanteechchi udumanna diimmoxxa seemma isinaa'n fulchineexxi seemma isinxa iso'n oddeesati fanninso'a adhdhine me'ine.

32 Isoo aa'ne fulle me'ina'naa Simi'ooni hiyyemeeka Qereena bogi manjo anfeexxi eettene Yesuusixxa fanno dukaashsha isoo'n hunnante.

33 Ookkoneechchi uduma, tika isixxi, «Umii qoonjo» hiyyemeeba, Golgoota dange. 34 Ookkonna ha'loottoti makendeexxa woyinetixxa bookka ha'wo'a Yessuusi'n uune; isi kinni isee maqeechchi uduma ha'wa gibe.✝ 35 Insa'nenna Yessuusii'i fannisseechchi uduma hixa ibinseexxi seemma isixxa qoodemme.✝ 36 Ookkonna offolleexxi insa'ne isoo heqqinaamman. 37 «Kunni Ayihudiinke moyanjo Yessuusiten» hiyyaaka isoo ku'latika borreessa isike umi iimi darre uggurre. 38 Eettenee yanna Yessuusinni welt lame bokkaame mitti isike midda'n mittikinna isike bita'a'n fanninsende'eemman. 39 Ora sa'ammakiirinna isoo yowa'ninna umo ifika lele'misa'n✝ 40 «Woyyichcha galma diiggettexxi sase barra giddo isoo ijaartattok ati amo mee, ifi anjir! Mageniinke Belto kaddo'oottole amo fannotenaa'n dirritataa!» isoo hinaamman.✝

41 Iittanna iikki qeesetik sooreessuwwi, Muuseke seerike barachchiisalluwwinninna geedheti welti, iso'n gacifanta'n hinee qic, 42 «Wele anjireedheen; ifi kinni anjira dande'abaan! Isira'eelike moyanjo kado'oole ta'a fannotenaa'n dirraqqata! No'onna iso'n amannannon. 43 Magenoke'n addateexxi, ‹Ani Mageniinke Belton hiyyeemmaxxe isoo eeya'noole mee Mageni isoo anjiruun!› »✝ 44 Iittanni isinni welti fannisendeemmaxxi bokkaamenna isoo yowwita'nemman.

45 Barrixxe jaane saatenaa'ni sallane saate qico'n bogi duuchchi dukkane. 46 Sallane saate kadaa wodda Yessuusi hafuura gikki asseexxi, «Elohee! Elohee! Laama sebeqitaanee?» hiyya'n raare. Tennexxi tikanna «Anke Magenoo anke Magenoo anee mayee waaldete?» hiyyaten.✝ 47 Ookko uurreemmake mannanaa'ni mitti mitti tennee laqeexxi, «Eelyaasii'i ye'a'neen» hiyye. 48 Iikki woddi insa'nenaa'n mitti spoonje adheexxi majjajjeexxe woyinexxe booka giddo cuuphe'e, spoonje etteneenna siqqichchotixxe qacce'n uggeexxi ha'wo'a Yessuusi'n uwwe.✝ 49 Weli gatemmaki manni kinni, «Waalle, Eelyaasi dageexxi isoo anjiraaxxa uundannon» hiyye. 50 Yessuusi hafura gikki asse'e langaxxa raareexxi lubbo ifixxa sa'isse uwwe. 51 Eettenee yanna galmi giddik seemmatik goli iimi'n butti qico'n lameba haaqqi hiyye; buttatinna lele'mite; rassuwwatinna dhodhoote.✝ 52 Moogguwwi banemee'naa rerteemmaxxe qulliyyenaa'n heddi manni ke'e. 53 Moogguwwi giddii'n fulatinna Yessuusi reyotenaa'n ke'eechchi uduma ookkone woyyichcha qachcha'n e'yineexxi heddo manna'n leelline.

54 Iikki dhibbiink ajajallinna isin welti Yessuusi heqqaammakiir buttatixxa lele'manna wele kaddeexxa yaanuwwa uudendee wodda lumo qico sodaanteexxi «Dhugaaten isi Mageniinke Beltomman» hine. 55 Yessuusii'i Geliila ergatenda'n isoo hordoffeemmaxxi heddo melaalle tennee yaane uuda'n ookko hexxemman. 56 Insa'ne giddii'n Megidelixxi Maarami, Maaramii'i Ya'iqoobixxinna Yooseefixxi ama, iittanni Zebidewoosixxe oosexxi ama hexxemman.✝

57 Bogi galgalo'ee wodda Yooseefi hiyyemaak dureessi manjichchi Armatiyaasike qachchinaa'n dage; isi ifinge uminninni Yessuusike hordofallomman. 58 Isinna Philaaxoosibaa shiqeexxi Yessuusika rensha isoo kadhate; Philaaxoosinna iikki renshi isi'a uwwemaashsha ajaje. 59 Yooseefi rensha konne aadheexxi eloxxe layinotixxe seemmanni isoo mirqe. 60 Yooseefi rassa giddi'a boceexxi ifi'a giissedheemmake haaroke moogo'n isoo masse; ookkoneechchi uduma lumoka kinjo gogo'misheexxi ookkone mooggixxa hula cufe me'e.

61 Megidelixxi Maaraminna wele Maarami ookko Yessuusike mooggike kallachcha'n ofolle'eemman.

62 Langa baro Edi Sanbatixxa gorsa umi qeesetik sooreessuwwanna Feerisito mitteba Philaaxoosibaa marreexxi 63 isoo hinee qic, «Goottaa! Iikki dedhisalli hedho hedhemma wodda ‹Sase barra uduma ani ke'annon› hiyyeemmaxxa qalli hinneennen.✝ 64 Tennexxee isixxi hordofeeyye rensha isika moorteexxi ardake'n reyotenaa'n ke'edheen hita'n oddessitabaashsha kunni mooggi sase barra qico'n heqqemaashsha ajaja sa'issi; ittate kada gophphoole udumik dedhi edikenaa'n caalaake kadaan.»

65 Philaaxoosinna insa'nee, «Ha'no heqqaaka manna affine'een; martineexxi egendinee qicinni heqqisse» hiyye. 66 Insa'enna marreexxi ookkone mooggo'n maxxansa maxxansineexxi heqqanjo heqqinse.