1 Yessuusinna hordofeeyye ifixxe'n Iyyerusaalemi'a danga'n Debire Zeyyitixxe Kooba hana hedheeke Beetefaage hiyyemaake boonchibaa genee wodda Yessuussi lame hordofeeyye 2 hiyya'ni ergee qici, «Ha'noo edi darre hedheeke olla'ibaa marre; geltineeshanni mitte usureendeexxa harrichcho isexxe beltanjonni welti affinaan; ani'anna tikkine iyyedage. 3 Ayyinna mitte yaane ha'noo'n hiyyeexxe kaddoole ‹Goottakee harre tinni hasissaan› hiyye; Isinna hirbange'n eettene harre wocci asse ergaan» hiyye. 4 Tinninna kadeechchi wabeekake'n konneechchi buttaa haaso'endeemmaxxi muuxendo'aten:

5 «Tsiiyoonnixxe belto'n

‹Kunse Moyanji atik ifi shixisheexxi

Eettene harcho'ninna

eettene harrichchoxxe beltanjo hana ofo'leexxi atibaa dagaan hitine ise'n kulle.› »

6 Tennexxee hordofeeyyetinna marteexxi Yessuusi insa'nee ajajemmashshanni assite. 7 Eettenee harrichcho isexxe beltanjoninni welti iyyedange; seemma ifixxanna tenne harre hana uggine; isinna tenne harre gulufe. 8 Lumook ardi seemma ifixxa orake'n fayya'emman; weli manni iittanni haqichchiinka shafuwwa enqa'n orake'n faya'emman. 9 Isi edi darre me'ammakinna isi udumii'n hordofa'emmak ardi

«Hoossayinna* Daawwitike belti'a!»

«Goottiinke summinni dagaak isi eebbisemeeken»

«Hoosayina ale iimate'n!»

10 Yessuussinna Iyyerusaalemi e'ye wodda iikk qachchi duuchchi «Isi kunn ayyete?» hiyya'n raanke.

11 Ardiknna «Kunniqqa Geliilake boganaa'n Naazireetii'n dageeke ookkone wabeeka Yessuusiten» hiyye.

12 Ookkoneechchi uduma Yessuusi woyyichchi Galmi giddi'a e'yeexxi ookko giddo gurgudhdhammakanna hidhdhammaka duuchcha fulche. Maallaqa jijjiidhdhammake mannika beeruwwanna guuggenjo gurgurammaake mannika beerruwwa gonbse. 13 Isinna insa'neni « ‹Mini ank soodachchotike mine hiyyemaan› hiyyendee borreessende'een. Ha'no kinni ‹bokkaametixxe wolo'o› assexxineeni» hiyye.✝ 14 Woyyichcha Galmi giddo balla'uwikinna hookoluwwi isibaa dage; isinna insa'nee fayyise. 15 Yaane kinni qeesetik sooreessuwwinna Muusseeke seerik barachchiisalluwwi, konnee Yessuusi asseeka mambe'uwwa uundemmaxxeenna «Hoosayina Daawwitike belti'a!» hita'n Galmi giddo oose raarteexxa raare lanqe wodda mufante.

16 Insa'nenna Yessuusii'i, «Tinni oose hita'neexxa laqa'inn hexxete?» hine qorre.

Isinna, «Eeti laqqeenneen; iitta hiyyendeexxa hara haasossitine egendinebaan hiyyatebaata?»

« ‹Oosetena'ninna unu'nitammaxxe

annooleke afo'inaa'n galata qixxeessitetten› » hiyyendeexxa haranga haasossitine egendinebaan hiyyatebaata?✝

17 Ookkonna insa'nee waale, qachchakenaa'n fuleexxi Biitaaniya mare gale.

18 Gorsa Yessuusi ookkone qachchibaa daga'n solo'we. 19 Or qarqara hedheeka mitte belese hiyyemaa haqichcho afeexxi isiba mare, shafe malee gumma isonaa'n gophemmaxxee, «Ta'anni edi'a ate'ni gumma haranga afendoqqe'e!» hiyye. Ookkone hirba'ninni iikki ballasetik hiqichchi bage.

20 Hordofeeyyetinna tennee kaddeexxa yaane uuddeexxi, «Kunni ballasetik haqichchi hitta iikk woddi bage?» hita'n mambe'a hite.

21 Yessuusinna hiisse haaso'a'n hiyyee qici, «Dhugaate ha'noo'n haaso'annen, amana affinoole mamanna gophphinoole konne ballasetik haqichcho'n kaddeexxa calla assitinabaan; yaane kinni tennee kooba midde ‹Kabaa'n kexxe abbaaya giddi'aa ifi daribbi› hitnoole tinni kaddaan.✝ 22 Amandineexxi sooddachchoti laqqinaaxxa duuchcha alfitinaan.»

23 Yessuusi woyyichchi Galmi giddo e'ye'e barachchiisaa'naa qeesetik sooreessuwwinna ardiinxi geedhe isibaa daggeexxi, «Maayiinke baalloominni tenne duuchcha assitaatte? Konne baalloomata ati'a uwweek ayyete?» hine isoo qorre.

24 Yessuusinna hiyyeexxi insa'ne'n hiisse haaso'ee qici, «Aninna mitte qortuma ha'noo qoraanen. Qortumma konne ani'a hiisitinoole, aninna maayiinke baalloominni tennee yaanuwwa assa'ennexxa ha'no'n kulannon. 25 Yohaannisixxi xammaqaa? Hoone darree'nitemma? Mageni darree'nite yookaan manjii darreenite?» hine.

Insa'nenna weli'aa weli haasoonna'n hinee qici, ‹Magenii darree'nite› hinnonoole, ‹isinna hiisseexxi no'oo maayeeta iso'ni amana gophphineema?› hiyyaan; 26 ‹Manjii darree'nite› hinonnoole iittan duuchching Yohaannisii'i wabeekiinsha uudaammaxxee arda sodantaannen.»

27 Tennexxee, «Egennebe'no» hineexxi Yessuusi'n hiissine haasonne.

Isinna insa'nen, «Aninna tennee yaanuwwa maayiinke baalloominni assa'ennexxa ha'no'ni kulabe'no» hiyye.

28 Yessuusinna insa'nee, «Amme kulle, ha'no'ni maa labba? Mitti manjichchi lame oose afe'eemman. Taakkaka ifika belto ye'eexxi isoo, ‹Anke belto techcho martettexxi anka woyinetika fichcha huji!› hiyye.

29 « ‹Iikk Beltichchinna waalenne, marabe'no› hiyye; yaane kinni uduma gibemang yaade mare.

30 «Annikinna langake ifike beltiba mareexxi isoona iittanni hujaashsha ajaje. Beltichchikinna, ‹Ishshi annayyo, marannon› hiyye. Yaane kinni marebaang gate.

31 «Tennee lame oosenaa'n ifike annixxa fedhii wonsheek?» hoonete?

Insa'nenna «Takake belton» hineexi hiissine haasonne.

Yessuusinna insa'ne'n hiyyee qici, «Dhugaate ha'no'n haasoa'ennen, cubbaaleeyyetinna yabaabuluwwi mootumma Mageniinxa e'yati hanoo edisaan. 32 Xammaqalli Yohaannisi qullummatika ora ha'no'n leellisho'a dagaa wodda isoo amandinebaan; cubbaaleeyyetinna yabaabuluwwi kinni isoo amane. Tennee kaddeexxa uuddinne udumanna midde aadde aaggineexxi isoo amandinebaan.» ✝

33 «Wele mammaassanna laqe: woyinetika hiddichcho kaalseemmak mitti manjichchi hedhemman; isinna konnee woyinetike hiddichcha'n dalla'a ijaare, woyine miicendaaxxa balenna u'meexxi heqateenna xeleepho ijaare. Ookkoneechchi uduma ookkone woyinetika hiddichcho hujalluwwakee kira uwweexxi wele bogibaa me'e.✝ 34 Gumma qocendaaxxi yannanna geltaa wodda ifika qoobbo adhdho'a erganjuwwa ifika ookkone hujalluwwiba erge.

35 «Iikk hujalluwwinna ookkonee isika erganjuwwa abideexxi mitte ganne; mitti shinne; wele mitte kinjik cancanqe. 36 Isinna edike erganjuwanaa'n laakkossik sa'aaka wele ifika erganjuwwa insa'nebaa erge; hujaluwwi iikkinna ediseeke erganjuwwa'n assemanxa insa'neninna asse. 37 Udumii'n kinni ‹Belto anka ulfeesinaan› hiyyati belto ifika konnee hujallubaa erge.

38 «Yaane kinni hujalluwwi iikki belto isika afee wodda weli'aan weli ‹Kunnifa'i isoo dhaala'neeken, amme isoo shinnennexxi karra isixxa dhaallo› hine. 39 Tennexxee belto isika aa'ne woyinetike hiddichchi giddii'n fulchineexxi shinne.

40 «Woyine eettene hiddichchiink annita dagaa wodda konne hujalluwwa'n maachcho assa ha'no'n labba?» hiyye.

41 Insa'nenna «Ookkone fuggichcha manna fuggo shiyyeexxi ookkonee woyinet hiddichchonna isi'a gumma yannate'n uwwaake wele hujalluwwi'a kira uwwaan» hine.

42 Yessuusinna insa'ne'ni, «Woyyichcha maxaafa'n,

« ‹Iikki ijaaralluwwi gibemmak kinji

isi dhaadotike kinjo kade.

Mageni tennee asse'een;

isenna ille no'oxxe'n masoten hiyyendeexxi borreesendeexxa haasositinebaataa?›✝

43 «Tennexxee ha'no'n kulo, mootumma Mageniixxi ha'nonaa'n adhdhendeexxi isexxa gumma gummisaake wele manni'a uwwendaan. 44 Konne kinji hana ibaak bututaan; kunni kijinna itti hana ibaak manji isi bullo'aan.»*

45 Qeesetik sooreessuwwinna Feerisito konnee mammaassuwwa laqqee wodda Yessuusi haaso'a'neek insa'nexxeete kaddeexxa egenne. 46 Isoo abinde usurro'a yorre; kaddo malee'e ardi wabeekiinsha isoo uundemmaxxee sodaante.