1 Ookkonechchinni udumi'a Feerisitonna Muuseke seerik barachchiissalluwwi Iyyerusaaleminaa'n Yessuusibaa daggeexxi hite isoo qorettee qici, 2 «Hordofeeyye atixxi annuwwiinxa aada diiggaa'nechchi mayeete? Ittaa woddaqqaa anga anshe'na'nebaan!» hine.

3 Yessuusinna insa'ne'n hiisse haaso'ee qic, «Ha'nootta aada ha'nooxxe hitineexxi Mageniinka ajaja mayee'e diigginaa? 4 Mageni, ‹Anna atikanna ama atixxa ulfeessi! Anna ifika yookaan ama ifixxa yowwaak shiyemmowwaal› hiyyeen.✝ 5 Ha'no kinni mitti manji anna ifika yookaan ama ifixxa, ‹Ani ha'no'a assiyo hasissaaxxa Magenoke'e tolche'ene› hiyyoole, 6 ‹Iikki manji anna ifika yookaan ama ifixxa ulfeessa hasissabaan› hitinaan; tennexxe ha'nooxxe aada'a hitineexxi Mageniinka seera diigginaan* 7 Ha'no ifi uggudhdhitinaak manni, Issayaasi ha'nooxxee konnechchi butta hedgeeka raaga haaso'eexxt dhugaaten.»

8 « ‹Kunni ardi afo'ik anee'e ulfeessaan

qalbetik kinni anenaa'n bayyate'eeken.

9 Manjiinxa aada barsiisa'n

dhark ane'e magenooffanta'neen.› »

10 Higgeen Yessuusi arda ifibaa ye'eexxi hiyyee qici, «Laqqe, qalbeeffatte. 11 Manjo battoosachchi afo'o isikenaa'n fulaachcho malee'e, afo'a sa'aachchobaan.»

12 Ookkonechchi udumi'a hordofeeyye Yessuusibaa daggeexxi, «Ta'a ati haasotteettexxi yaane Feerisito riffi assiteexxa egendebexxoota?» hine.

13 Isinna kinni insa'ne'a hiyyee hiissee qici, «Iimik ank anni kaasebaak hiddichchi duuchchi goshemaan. 14 Insa'nexxa yaane waalle, insa'ne balla'uwwa akeeka'neexxe balla'a akeekisannon; balla'i balla'a akeekoole lamiing balete'ni inbaan.»✝

15 Pheexiroosinna Yessuusi'i, «Konne mammaassa no'aa tiki» hiyye.

16 Yessuusinna insa'ne hiyyee qici, «Ta'i qico'ni ha'no qalbeeffatinebaan hiyyotebaata?» hiyye. 17 «Manjiinke afo'o'ni sa'eechchi duuchchi godobi giddo mareexxi gadhi'a fulaaxxa egendineexxebaata? 18 Afo'okenaa'n fulaachchi kinni qalbetenaa'n dagaachchon; manjo battoossaachchinna isoten.✝ 19 Figgichchi hedumi, manjo shiya, yabaabula, fedhe galatixxa yabaabula, moora, dharki dhugaa kulanna, summa balleesa kunniichchi duuchchi qalbe manjiinxenaa'ni dagaan. 20 Manjo battoossaachchi konnechchuwwa malee'e anshendebaaxxe anganni ita manjo battoossitabaan» hiyye.

21 Yessuusinna ookkone boonchonaa'ni ke'eexi Xiroosikenna Sidoonake qachchuwwibaa me'e. 22 Ookkone bogii'n mitti Kenaanito manjichcho Yessuusibaa daggeexxi, «Gootta, Daawwitike Belto, anxa belto fuggichchi hafuuri abide'naa rakkatta'neen; magannete ani'a marari» hita'n raarte.

23 Isi kinni mitte hiyyichchonna ise'ni cuqqi hiyyebaan. Isixxi hordofeeyyenna isibaa daggeexxi, «Tinni manjichcho raaritta'ni no'oo udumi'n dagga'emmaxxee ise me'issi» hite iso kadhatte.

24 Yessuusi hiisseexxi, «Ani ergemmenexxi dageennechchi Isira'eelike minenaa'n gedhebiinsha ba'eeke manni'a callaten» hiyye.

25 Manjichcho kinni, «Anke Gootta Anee'e gargaar» hita'n lekka isixxe'n ibbe.

26 Yessuusinna, «Oosetixxa ita aa'neexxi worshakee darbiyyo hasisabaan» hiyye hiisse haaso'e.

27 Manjichchotinna hiissitexxi «Eeti anke Gootta worshikinnaqqa ifiki gootuwwi itaa'naa harca'emmalcho itaan» hite.

28 Eettene yanna Yessuusi ise'e, «Tee manjichcho amana atixxi lumoxxen; Tennexxe atixxe halsashsha ati'a kaddowwaal» hiyye; belto isexxinna hirba ookkone'ninni fayyite.

29 Yessuusinna ookko'n ke'e Galiilixxe abbayya bira dage; koobatanna qabate hana ofo'le. 30 Heddi manni hokkoluwwa, balla'uwwa, naafuwwa, afo'o duuduwwanna heddo wele ela gonpheeka manna aadhe Yessuusibaa iyyedageexxi lekka isixxi hunda offo'linshe; Yessuusinna insa'ne'e fayyise. 31 Ardi afo'o duudemmakiir haaso'a'na'a naafuwwi fayyee'naa hokkoluwwi eloo qico me'aa'naa balla'uwwikinna afaa'na uude wodda mambe'a hiyyat Isira'eelika Mageno galateeffate.

32 Yessuusi hordofeeyye ifixxa ye'eexxi «Kunni ardi aninni welti sase barra tureemmaxxenna itaacho afa gopheemmaxxe'e insa'ne'a mararraane; me'a wodda gaggabik orake'ni inbabaashsha agabo me'o'a waalabe'non» hiyye.

33 Hordofeeyye Yessuusixxinna «Tenne qiilla gammoojje'n konne ardi duuchchi'a geltaaxxa sagale habaa'ni anfanno?» hite hiisite haasotte.

34 Yessuusinna, «Me'e buddeena afine'e?» hiyyeexxi insa'ne'e qore.

Insa'nenna, «Torbaane buddeenanna heenoxxa shiixxaramma qulxu'me anfe'ennen» hine.

35 Yessuusinna arda ofo'lo'a ajaje. 36 Ookkonee torbaane buddeennanna eettene qulxu'me aadheexxi Mageno galateffatechchi uduma shashshateexxi hordofeeyyete'n uwwe; insa'nenna ardakee qoodde. 37 Duuchchiing ite godde. Ookkonechchi uduma hordofeeyye gatteemmaxxa hanba wo'ma torbaane qore aaxxe. 38 Iteek manninna melaalletinna oose laako'endebaang shoole kuma labballomman. 39 Yessuusi arda me'iseechchi uduma hobolote'n ofo'leexxi Megedoolike bogibaa me'e.