1 Yessuusi tennee yaane duuchcha haaso'e bireechchi uduma ifixxe hordofeeyye'n 2 «Lame barranni uduma sa'aatike ayyaanixxe barra kaddeexxa egendine'een; Manjiink Belti fannisemo'a sa'isseme uwwemaan» hiyye.✝

3 Ookkoneechchi uduma qeesetik sooreessuwwinna ardiinxi geedhe umo qeesichcho kadeeke Qeyyaafa hiyyemmaake manjichchixxe baxxe'n bukki hineexxi, 4 Yessuusii'i malik abindeexxi shiyatee mari'ante. 5 «Yaane kinni insa'ne, Ardi lele'mabaashsha ayyaaniinxe barra kaddoqqe'e» hine.

6 Yessuusi Biitaaniya, ookkonee soomi abideeke Simi'oonike mine'n hedhee'naa 7 mitte manjichcho hiri hara fiixxeexxa, albasixiroosixxe bilqaaxxe'n shitto aaxxe Yessuusibaa shiqqeexxi, Yessuusi itate'n hedhee'naa umo Yesuusik hana dunde.*

8 Hordofeeyyetinna tennee manjichcho assiteexxa yaane uudde mufatteexxi hittee qici, «Tinni faango'a mayeete? 9 Tinni shitto lumoke hira'n gurgurende'naa maalaqi iikki hiyyeeyyetee uwwemaa dande'amman.»

10 Yessuusinna tennee ege'neexxi insa'ne'n hiyyee qici, «Tennee manjichcho maaye rakkissina? Ise dancha yaane ani'a assite'een. 11 Hiyyeeyye duuchchii wodda ha'noonni hexxaan, ani kinni duuchchii wodda ha'noonni hedhabe'non.✝ 12 Ise tennee shitto anke biso'ni duna anee mooggokee qixxeessateeten. 13 Dhugaate ha'no'n haaso'aannen, tinni wongeele lallabendaaba, butta duuchcha'n hoone booncho'ninna tinni ise assiteexxi yaane isee qalli assatee'e kulendaan.»

14 Ookkoneechchi uduma tommenna lamekenaa'n mitti Asiqorootuke qachchik Yihuda qeesetike sooreessuwwibaa mareexxi, 15 «Yessuusii'i ha'no'aa sa'isse uwwonnole maachcho ani'a uutina?» hiyye insa'ne qore. Insa'nenna sase tomme birret sibljo* isi'a uune.✝ 16 Eettene yannanaa'n Yihuda Yessuusii'i sa'isse uwwaaxxa eloxxa yanna hase'emman.

17 Kebbotike ayyaanixxe siretixxe barra'n hordofeeyye Yessuusibaa shiqqeexxi isoo, «Ita Sa'atike ayyaanixxa ittottaa haba ati'a qixxeessinonnole eettato?» hite isoo qorte.

18 Isinna, «Qachchi giddo ebeli mine martineexxi iso'n Barachchiisalli, ‹Yanna anixxi gelte'een; hordofeeyye anxenni welti sa'atika ayyaanna atike mine'n ulfeessonaaten hiyya'neen› » hitineexxi kulle hiyye.

19 Hordofeeyyetinna Yessuusi insa'nee ajajemmashshanni assitte; Sa'atike ayyaanixxa itanna qixxeessite.

20 Bogi galgalo'ee wodda Yessuusi tommenna lame hordofeyyenni welti itatee ofo'le. 21 Itate'n he'neenge'n Yessuusi insa'ne'n, «Dhugaate ha'no'n haaso'annen, ha'no giddii'n mitti anee sa'isse uwwaan» hiyye.

22 Insa'nenna lumoo qico yaandeexxi mitti mittingi isoo, «Goottaa ante kadunnuu?» hiyyate'n ke'ne. 23 Yessuusinna insa'ne'n, «Anee sa'isseexxi uwwaak aninni welti itatee anga qore giddo ugge'eeken» hiyye hiisse haaso'e.✝ 24 Manjiink Belti isixxee borressendemmashshanni reyaan. Yaane kinni Manjiinka Belto sa'isse uwwaake ookkone manji'a isi'a aannee; iikki manji ilemaa gophe'eele silaati isi'a woyyamman.

25 Sa'isse isoo uwwa'neek Yihuda kinni isoo, «Barachchiisalloo, ante kaddunuu?» hiyye. Yessuusinna «Ati hitetteshshanden» hiyye.

26 Itande'n he'nee'naa Yessuusi buddeena aadhe galateeffate kukkuteexxi ifixxe hordofeeyye'n, «Hii'we itte; kunni maala anken» hiyye uwwe.

27 Ookkoneechchi udma buudattanna aadheexxi galateeffateechchi uduma insa'nen hiyyee qici, «Ha'no duuchchiing tenne buudanna'ni ha'we. 28 Tinni heddi mannixxe cubboxxee gattowwaali'a dundaaxxe haaroxxe kakoxxe anxe munden.✝ 29 Ha'no'n kulo, anke annixxe moote'n haaroxxa woyinexxe gummaxxa ha'wa ha'nonni welti ha'wannoxxe eettene barra qico'n ta'inaa'n safennexxi tenne woyinexxe gummaxxa ha'wa ha'wabe'no» 30 Faarotanna faarsineechchi uduma Debrezayitixxa koobaba'a qabante.

31 Ookkoneechchi uduma Yessuusi hordofeeyyete'n hiyyee qici, «Maxaafake'n ‹Allalisanjo ganannon, gedhebikinna xeeremaan› hiyyendee borreessendemaxxee ha'no duuchching tennee hashsha anee waakkattinaan.✝ 32 Yaane kinni reyotenaa'n ke'ennechchi uduma ha'no'a edise Geliila'a me'annon» hiyye.

33 Pheexiroosinna, «Weli duuchchiing midde atee waakkatoole ani atee haranga waakkatabe'no» hiyye.

34 Yessuusinna «Dhugaate ate'ni haaso'annen, tenne hashsha lukichchi baroodebaa edi darre ‹Isoo ege'nebe'no› hita'ni sasele anee waakkattatton» hiyye. 35 Pheexiroosi kinni, «Reyatenna kaddoole midde atinninni welti reyanno malee'e haranga atee waakkatabe'no» hiyye. Hordofeeyye duuchchiinxinna tenneenni hite.

36 Ookkoneechchi uduma Yessuusi ifixxe hordofeeyyenni welti Geetesemaani hiyyendaaxxe bakkabaa me'eexxi insa'nee, «Ookkoo marennexxi soodatanno wodda ha'no kabanni ofo'le» hiyye. 37 Pheexiroosinna, lame Zebidewoosixxa oose adhdhe me'eexxi yaadate'ninna wixixxi hiyyate'ni ke'e. 38 «Lubbo anxi yaaddoti reyo shiqqe; aninni welti ossitineexxi kabanni turre» hiyye. 39 Insa'nenaa'n shiixxoo qico bayyate me'e albik gonbisemeexxi, «Anke anna dandeessissaaxxe kaddoole tinni buuda anenaa'n saxxowwaal; yaane kinni fedhii atixxishshate kaddo malee fedhii anixxishsha kaddoqqe'e» 40 Ookkoneechchi uduma hordofeeyyetibaa ille iima higgeexxi daggaa wodda diinphee'naa afe; Isinna Pheexiroosii'i hiyyee qici; «Aninni welti mitte saate midde dammaqine tura dande'a gophphineeshshatebaata?»

41 «Hega uudendinabaashsha jabaattineexxi Mageno soodatte; hafuuri qixxeeffateen; maali kinni gophaalessaken.»

42 Higgeen langaxxa me'eexxi, «Anke Annaa, tinni ani ha'webe'nok saxxa'nebaaxxe buuda kaddoole fedhii atixxe kaddowwaal» hiyye soodate.

43 Ille iima hige dagaa wodda ille insa'nexxe'n mugi ha'ureemmaxxee dhiinphee'naa afe. 44 Insa'nenna ookkonni waale'e woldinbaa me'eexxi woldo Mageno soodatammashshanni sakkaxxanna soodate. 45 Ookkoneechchi uduma hordofeeyyetiba'a dageexxi insa'ne'n hiyyee qici, «Ta'anna diiphphine hafuura adhdhande'n hexxinee? Kunse yanna gelte'een; Manjiink Belti cubbaaleyyetixxe anga'n sa'isseme uwwemaan; 46 ke'we me'ino; anee sa'isse uwwaak dagate'n hedheen.»

47 Yessuusi haaso'ande'n hedhee'naa tommenna lame hordofeyyenaa'n mmitti Yihuda dage. Isinni welti qeesetik sooreessuwwinaa'ninna ardiinxe gedhenaa'n ergemeek heddi manni wolaantichchuwwakanna dulluwwa abixxeek isinni welt hedhemman. 48 Yihudanna, «Ani sunqannok isoten, isoo abidde» hiyyeexxi beessisa insa'ne'n uwweemman.

49 Iikki woddi Yessuusibaa mareexxi, «Barachchiisalloo nage'i ati'a kadowwaal!» hiyya'n isoo sunqedhe.

50 Yessuusinna isoo «Koo anke jaaloo daggeettechcho muuxi!» hiyye.

Eettenee yanna iikki manni dage'e Yessuusii'i abideexxi usure. 51 Eettene yanna'n Yessuusinni welti hedhdhemmake manninaa'n mitti ifika wolaantichcha xuqqi asse aadhati qeesetike sooreessike erganjixxa mansha kute.

52 Yessuusinna isoo hiyyee qici, «Wolaantichchik ke'aak duuchchi wolaantichchik ba'aani; wolaanticha atika gonofi giddi'a hissi. 53 Anna anka ye'edhennele iikki woddi heddo kumi caala laakko'emaaka erganatika sannachcha ani'a erga dande'abaachcho ate'n labbe? 54 Yaane kinni iitta assaannole woyyichchi maxaafi kaddaan hiyyemmaxxi yaanuwwa hitta muuxendata?»

55 Eettene yanna'n Yessuusi arda, «Bokkaame abidina'neeshsha wolaantichchakanna dulla abixxitineexxi anee abidino'aa daggineebaata? Barra barra'n woyyichchi galmi giddo offo'le barachchiisaanna wodda anee abidineemmabaan.✝ 56 Yaane kinni tinni duuchchi kaddeechchi wabeeko woyyichcha maxaafa'n haassottemmaxxi muuxendo'aaten,» Eettenee yanna hordofeeyye duuchiinxi isoo waalde baajje.

57 Yessuusii'i abideemmak manni Muuseke seerik barachchiisalluwwinna ardiinxi geedhe bukki hiteemmaba'a, ookkonee umo qeesichcho Qeyyaafaba'a isoo iyyemarre. 58 Yaane kinni Pheexiroosi bayyateexxi ookkone umo qeesichchixxe baxxe qico'n isoo hordofaamman; giddi'aanna e'yeexxi eettene yaaneka muuxama uudo'a baxxetike ookkone heqqanjuwwinni welti ofo'le.

59 Eettene yanna Qeesetik sooreessuwwinna Ayihudiinxe Songoxxi duuchcha Yessuusii shilshiisatee'e dhariinxa dhugaa kula hanseemman. 60 Yaane kinni heddo dhariinxi dhugaa kula shiqqoolenna isoo reyotee geessissaaxxa yaane kuldaaxxi dhuga kula afendeba'a.

Udumii giddii'n lami manni ke'eexxi, 61 «Kunni manji, ‹Ani Mageniinka woyyichcha galma diigennexxi sase barra giddo isoo hiisse ijaara dande'annon› hiyye haaso'edheen» hine.✝

62 Eettene yanna iikki umi qeesichchi ke'e uurreexxi Yessuusii'i, «Kunni manni ate'n dhugaa kula'neexxee mitte hissichchonna uuta'ebexxoo?» hiyye. 63 Yessuusi kinni sammiyye.

Iikk umi qeesichchinna Yessuusii'i, «Hedhaake Magenike summinni atee laqa'ennen! Ati Mageniinke Belto Kiristoosite kaddo'oottole no'o'n kuli» hiyye.

64 Yessuusinna, «Tinni ati hitetteshshanden; yaane kinni hegeri Manjiink Belti ookkone Hunnaammessa Mageninke midda'n ofo'leexxi iimatike duumanchinni dagaa wodda uuddinaan» hiyye hiisse haaso'e.✝

65 Eettene yanna iikki umi qeesichchi mufeti seemma ifixxa dareexxi hiyyee qici, «Magenoke'n yowwichchiinka haaso'a haaso'edheen; no'o maa wele dhugaa kula hansanno? Isi Magenoke'n yowwichchiinka haaso'a haaso'eexxa ha'no umo ha'nongenninni laqqine'een; 66 Maa ha'no'n labba?» hiyye.

Insa'nenna, «Isi'a reya hassissaan» hine hiissine haasonne.✝

67 Eettenee yanna Yessuusike alba'n tunfa'n tuntummotinna isoo ganne; weli manninna isoo dhabanaansa'n 68 «Kiristoosii, atee dhabanaaseek ayyete? Amo mee no'aa raaga haaso'i» hina'nemman.

69 Pheexiroosi gadho umi qeesichchixxe baxxe giddo ofo'lee'naa mitte erganjo belto isibaa shiqqeexxi, «Atinna Geliilake Yessuusinni welti hexxettan» hite.

70 Isi kinn «Ati maa haasottaattenxa ani ege'nebe'non» hiyyeexxi duuchchiing edo waakkate.

71 Baxxe giddii'n fulo'a hulatibaa me'a'neenge'n higgeenna welenxi mitte erganjo belto isoo affeexxi ookko hedhemmake manni duuchchi edo, «Kunni manji Naazireetike Yessuusinni welti hedhemman» hite.

72 Pheexiroosinna, «Konnee hita'etteka manjo ege'nebe'non» hiyya'n kakot higgeenn waakkate.

73 Shiixxoxxe yanna uduma ookko uurreemmak manni Pheexiroosibaa shikki hiyyeexxi, «Haaso'i ating ege'nishaammaxxee dhugaaten, ati isa'neeke manninaa'n mitteken» hiyye.

74 Eettene yanna Pheexiroosi, «Konnee hitina'neeka manjo ege'nebe'non» hiyya'n ifi badinati kakote'n ke'e. Ookkone hirba'ninni lukkichchi baroode.

75 Eettenee yanna Pheexiroosi, «Lukkichchi barodebaang sasele anee waakkattatton» hiyyemmaka Yessuusika haaso'a qalli hiyye. Gadhi'aanna fuleexxi qaraartaaxxa oodhishsha oodhe.