1 Edi Sanbat sa'eechchi uduma torbatixxe taakkaxxe barra'n boro haachchabbaa wodda Megidelixxi Maaraminna wele Maarami Yessuusika mooggo uundo'a me'ine.* 2 Dedhange'n lumoxxi buttiniinxi lele'ma kadde. Goottiink iimik erganji iimatenaa'n dirreexxi ookkone mooggiba mare kinjo gogo'misheexxi itti hana ofo'le. 3 Isixxi dhagganna banqotishsha xassitaammaxxe; isixxi seemmanna kaadetishsha golalooxxeemman. 4 Iikki heqqanjuwwinna ookkonee iimika erganjo soda'atenaa'n kexxeexxa culphinseexxi reyeeke manjishsha kande. 5 Iikki iimik erganjinna eettene melaalle hiyyee qici, «Ha'no mee sodaatte! Ookkonee fannisemeemmaka Yessuusii halsitina'neexxa ege'neennen. 6 Isi kaba hedhebaan; haaso'eemmashshanni ke'edheen; amme renshi isik massemeexxi hedhemmaxxa bakka uudde. 7 Ta'a rakkine martineexxi isixxe hordofeeyye'n ‹Reyotenaa'n ke'edheen; ha'no'a ediseexxi Geliila'a sa'e me'aan; ookkonna isoo affinaan› hitine kulle. Kunse ani ha'no'n kuleennen.»

8 Melaalle iittinna soda'anna gammashsho insa'ne'n wo'mite'naa rakkeexxi gongita'n eettenee mooggiinxe bakkabaa'n me'ite. Isixxe hordofeeyye'ninna kuldo'a gongite.

9 Hirbange'n Yessuusi insa'nee afeexxi, «Nage'i ha'no'a kadowwaal» hiyye; insa'nenna Yessuusiba'a shikki hine'e lekka isixxa abixxineexxi isi'a sagande. 10 Eettenee yanna Yessuusinna insa'ne'n, «Mee sodaattee! Martineexxi Geliila'a me'inaashsha dayyuwwa anke'n kulle; ookkonna anee anfaan» hiyye.

11 Melaalle iittinna orange'n hexxe'naa ookkone heqanjuwwinaa'n heenok manni qachchinbaa mareexxi kaddeexxa yaane duuchcha qeesetike sooreessuwwa'n kule. 12 Iikki qeesetik sooreessuwwinna geedheti welti bukki hiyyeexxi mari'ateechchi uduma loliinke manni'a geyaaka maallaqa uneexxi insa'ne'n hinee qici, 13 « ‹No'o diipho he'nee'naa hordofeeyye isixxi hashsha daggeexxi rensha isika moodhdhiteen› hitineexxi ardake'n kulle. 14 Tinni odo ookkone bogiinke galchallo'n laqendeexxe kaddoole no'o iso'n yaane barrinsannon; ha'no'ni mitte rakkonna geltabaashsha assinnannon.»

15 Iikki loliink manninna maallaqa adhdheexxi hiyyemmeemmashshanni asse. Tinni yaane Ayihudi giddo techchi qico'n ba'la qicinni haaso'endaan.

16 Ookkoneechchi uduma iitti tommenna mitte hordofeeyye Yessuusi insa'ne kulemmaxxe Geliila hexxeexxe eettene koobaba'a me'ite. 17 Insa'nenna isoo anfeexxi isi'a sagande; mitti mmitti kinni mame. 18 Yessuusinna iitti hordofeeyye hexxeemmabaa shiqeexxi insa'ne'n hiyyee qici, «Baalloomi iimate'ninna buttate'n ani'a uwwemeedheen. 19 Tennexxee martineexxi gosa gosaka arduwwa duuchcha Aabikkenni, woldikenninna Woyyichchi Hafuuriike summinni insa'ne xammaqqina'n anxe hordofeeyye asse.✝ 20 Ha'noo ajajeennaxxa duuchchanna assinaashsha insa'nee barachchiisse; aninna buttatike muuxami qico'n, duuchchii wodda ha'nonni welti hedhennen.»